Duwá Vidiyo Zʋ Kilehile Wʋ Bayɩbʋlʋ Dɩyɛzumanlɛmaa

Sɛ yɛfa mfonyini yedi egyima a, ɩma enii mɔɔ ikilaa nɩ ɩfa yɩ adwɩnɩ isiye ɔzʋlɔ na ɩbʋwa yɩ ma ɩtɩ yɩ tʋ, yɛɛ ɩma ɩkakɛ mɔɔ izumanlɩ nɩ sʋ̃. Gyehova, yɛ Kilehilevʋlɔ Kezile Baaba nɩ, ɩvalɩ mfonyini ihilehileli ozumalɛdɩyɛ azʋlɔtʋ mɔɔ ihyinyia nu. (Gyn 15:5; Gyɛ 18:1-6) Ɔzɔ la sʋ̃ yɛ Gyisɛsɩ, Kilehilevʋlɔ Kezile nɩ ɩyɛlɩ a. (Mt 18:2-6; 22:19-21) Aɣile asã yɩ, vidiyo ɩɣa ɩyɛ mfonyini nwʋ dɩyɛ ɔkʋ̃ mɔɔ mfasʋ kezile wɔ ɔzʋlɔ. Sɛ ekilehilee wʋ Bayɩbʋlʋ dɩyɛzumanlɛmaa a, asʋ̃ ɛfa vidiyo edi egyima bʋwɔ a?

Beziyeziye vidiyo 10 kɛɛ ɩwʋwa yɛ ma yehilehile ozumalɛdɩyɛ mɔɔ ɩwɔ Odwokɔba Mɔɔ Ɩzʋ̃ Nyamɩnlɩ Yɩ Ɛkɛnɩ! blohyʋɔ yi nu nɩ. Mbɔmɩ sʋ̃maa nɩ, vidiyo ɔkʋ̃ bela yi odwokɔtile nɩ, ɩ nɩɩ odwokɔɣizialɛ ɔkʋ̃ mɔɔ bɛva tundunli baaba bɛhɛlɛ wɔ blohyʋɔ yi nu nɩ iyiyia. Mɔɔ ɔkɔhwɩ̃ wɔ jw.org/aha zʋ nɩ, lɩnkɩ ɩkɩnla nwʋmɔ mɔɔ ɩkɛma ɔkɔnwʋ mmɩlɩ mɔ ɩsɛ kɛɛ ɛyɩ vidiyo bela nɩ. Mɔɔ ɩkɩnla eyi nwʋ nɩ, vidiyo mvʋlɔ sʋ̃ wɔ ɛkɛnɩ mɔɔ ɩbʋwa wɔ mmɩlɩ mɔ yɛlɛ yɛ ɔnwʋma azʋlɔtʋ mɔɔ ɩwɔ ye Nninyeni Mɔɔ Yɛfa Yekilehile nɩ nu yedii egyima nɩ.

Asʋ̃ ɛ nɩɩ wʋ Bayɩbʋlʋ dɩyɛzumanlɛvʋlɔ bosunzuu Bayɩbʋlʋ nu odwokɔ be nwʋ mɔɔ ɩyɛ sɩ ɩma yɩ kɛɛ ɩkɛdɩ yɩ tʋ a? Anzɛnyɩɩ wʋ Bayɩbʋlʋ dɩyɛzumanlɛvʋlɔ nɩ iyiyiaa ndwokɔ ɛzɩzɩbɛ pɔkyɩɩ be a? Pɩbɛ́ vidiyo azʋlɔtʋ mɔɔ ɩwɔ jw.org® nɩɩ JW Broadcasting® zʋ nɩ nu na nwʋ́ mɔɔ ɩkɔwʋwa yɩ. Ebiye a sa ɔkʋla ɛ nɩɩ wʋ Bayɩbʋlʋ dɩyɛzumanlɛvʋlɔ nɩ bɔbɔ nu bekila ɔkʋ̃ na bɛazunzu nwʋmɔ.

Eziyianɩ bela nɩ, bɛda vidiyo mvʋlɔ ali. Mmɩlɩ mɔ ekilaa nɩ, dwɩnɩndwɩnɩ́ kezimɔ ɛkɛva ekehilehile mmenii mvʋlɔ nɩ nwʋ.