Kezimɔ Yɛkɛva Mɔɔ Yɛkɔhʋla Yɛkɛhã Wɔ Dasɩlɛlilɛ Nu Nɩ Yekeli Egyima

Ɔzʋmɩ January 2018 nɩ, yɛnwʋ mɔɔ yɛkɔhʋla yɛkɛhã wɔ dasɩlɛlilɛ nu wɔ Yɛ Kilisinyianɩ Ɛbɩlawɔlɛ Nɩɩ Dasɩlɛlilɛ—Dɩyɛzumanlɛ Kɛlɛta yɩ anyunu. Kɛ yɛkɛva yekeli egyima yekeze a?

Mmɩlɩ Mɔ Ɛyɛɛ Egyimalilɛ Wɔ Dɩyɛzumanlɛ Tʋ: Ɩsɛ kɛɛ ɛfa odwokɔɣizialɛ, ɛhɛlɛlɛ odwokɔ, nɩɩ mɔɔ ɛkɛhã eɣile fʋlɔ nɩ mɔɔ ɩwɔ mɔɔ yɛkɔhʋla yɛkɛhã wɔ dasɩlɛlilɛ nu ɔfʋã ɛkɛnɩ nɩ edi egyima. Naasʋ̃ eyi iáhile kɛɛ ekehila mɔɔ bɛhã wɔ vidiyo yi nu nɩ ɛkɛhã yɩ pɛpɛɛpɛ. Sa ɔkʋla ɛfa bʋwabɩlɛ fʋlɔ, anyunumiyɩlɛ fʋlɔ, kezimɔ bosunzu ndwokɔ nwʋ nɩɩ mɔɔ ɩkɩnla nwʋ nɩ edi egyima. Sɛ bɛáma ɔhʋanɩhilelɛ kɛɛ ɛva awuuku nɩɩ nninyeni mvʋlɔ mɔɔ ɩwɔ ye Nninyeni Mɔɔ Yɛfa Yekilehile nɩ be nu ɛma po a, sa ɔkʋla ɛyɛ ɔzɔ.

Mmɩlɩ Mɔ Oluwaa Dasɩlɛlilɛ Nu: Bɛyɛ mɔɔ yɛkɔhʋla yɛkɛhã wɔ dasɩlɛlilɛ nu nɩ kɛɛ ɩwʋwa yɛ. Sɛ abiye ikile odwokɔ yɩ nwʋ anyɩnlɩlelɛ na ɩpɛ kɛɛ isuma sʋ̃maa a, sa ɔkʋla oduwa siakehila ɔfʋã ɛkɛnɩ yɩ zʋ ɔtʋwa nkɔmmɔ nɩ zʋ. Sa ɔkʋla ɛsɩnza mɔɔ yɛkɔhʋla yɛkɛhã wɔ dasɩlɛlilɛ nu nɩ anzɛnyɩɩ ɛkã odwokɔ fʋlɔ kʋlaa. Odwokɔtile anzɛnyɩɩ ɛhɛlɛlɛ odwokɔ mɔɔ yɛva yeli egyima kyɩ̃ nɩ, asʋ̃ mmenii mɔɔ bɔwɔ wʋ azɩlɛ-sini yi nu nɩ bɛ anyɩ ilelili nwʋmɔ a? Asʋ̃ dɩka mɔɔ ɛda nɩ, bɛ anyɩ ikeleli nninyeni mɔɔ izizi aɣile asã yɩ nu la anzɛnyɩɩ amanɩyɛwɔlɛ pɔkyɩɩ be nwʋ a? Ɩávalɩ nwʋmɔ kezimɔ ɛpɛ kɛɛ ɛfa mɔɔ yɛkɔhʋla yɛkɛhã wɔ dasɩlɛlilɛ nu edi egyima nɩ, ɩsɛ kɛɛ ɛfa eyi ɛyɛ wʋ bʋtayɩ, kɛɛ ‘ɛkɛyɛ eyimmɔ muwantĩĩ, ama Odwokɔba nɩ ɩabɩndɩnlɩ nnɩka munwatĩĩ, na wʋanyia nwʋmɔ nyilalɛ nɩ be.’—1Kɔl 9:22, 23.