Kezimɔ Yɛkɛva Mɔɔ Yɛkɔhʋla Yɛkɛhã Wɔ Dasɩlɛlilɛ Nu Nɩ Yekeli Egyima

Mmeliyema yɛ egyima ɛzɩzɩbɛ ansaana bɛaziyeziye mɔɔ yɛkɔhʋla yɛkɛhã wɔ dasɩlɛlilɛ nu nɩ, na ɛlawulowɔlɛmaa sʋ̃maa nwʋ kɛɛ, sɛ bɛfa bedi egyima a ɩbʋwa paa. Naasʋ̃ kɛmɔ ɩsʋnɩ dɩka bela nɩ yɩ bʋwabɩlɛ nɩ ti, sa ɛlawulowɔlɛmaa kʋla duwa ɔhʋanɩ fʋlɔ zʋ anzɛnyɩɩ bɛfa odwokɔtile fʋlɔ mɔɔ bɛzabɛ mɔɔ bɔwɔ bɛ azɩlɛ-sini nu bɛ anyɩ ikeleli nwʋ nɩ bedi egyima wɔ dasɩlɛlilɛ nu. Naasʋ̃ sɛ yɛyɛɛ ɛlawulowɔlɛ titili a, ɩsɛ kɛɛ yɛfa nwʋmɔ ɔhʋanɩhilelɛ yɛyɛ egyima. Yɛ bʋtayɩ yɛ lɛ kɛɛ yekeli Gyisɛsɩ yɩ ahyɛdɩ mɔɔ ise yɛwɔ́ Bulombunlililɛ nwʋ odwokɔba nɩ nwʋ ɛlawulo nɩ zʋ.—Mt 24:14.

Sɛ ɛlawulowɔlɛmaa besiyeziyee be egyimalilɛ a, ɩsɛ kɛɛ bɛfá mɔɔ yɛkɔhʋla yɛkɛhã wɔ dasɩlɛlilɛ nu yɩ odwokɔtile mɔɔ ɩwɔ Ɛbɩlawɔlɛ Nɩɩ Dasɩlɛlilɛ Dɩyɛzumanlɛ Kɛlɛta yi nu bedi egyima. Sɛ bɛlɛ́falɩ egyimalilɛ yɩ nwʋ ɔhʋanɩhilelɛ pɔkyɩɩ be bɛlɛ́manlɩ a, sa ɔkʋla ɛfa odwokɔɣizialɛ fʋlɔ, ɛhɛlɛlɛ odwokɔ, nɩɩ mɔɔ ɛkɛhã eɣile fʋlɔ mɔɔ ɩkɔhʋla ɩkɔwʋwa wɔ wʋ azɩlɛ-sini nu di egyima. Na sa ɔkʋla oduwa ɔhʋanɩ fʋlɔ sʋ̃ zʋ ɛyɛ. Naasʋ̃ ɩsɛ kɛɛ ɛfa ekyina mɔɔ yɛkɔhʋla yɛkɛhã wɔ dasɩlɛlilɛ nu yɩ odwokɔtile nɩ zʋ. Yɛlɛ ɔhʋanɩhilelɛ eyi yesiyee mɔɔ ɩɣalɩ June 2020 dɩyɛzumanlɛ kɛlɛta yɩ nu mɔɔ ɩwɔ owukolɛ 8 yɩ agyia nu.