Fa Ndwokɔ Mɔɔ Ɩba JW.ORG Ahyɛasɩ Kɛnɩ Nɩ Di Egyima Wɔ Wʋ Dasɩlɛlilɛ Egyima Yɩ Nu

Bɛfa ndwokɔ nɩɩ vidiyo azʋlɔtʋ be bokua ahyɛasɩ ɔfʋã kɛnɩ wɔ yɛ wɛbsayɩtɩ yɩ zʋ, na bɛyɛ yɩ wɔ ɔhʋanɩ be zʋ mɔɔ ɩkɛma bɛzabɛ mɔɔ bɛ́dɩ Gyehova Dasɩvʋlɔmaa nɩ bɛ anyɩ keleli nwʋmɔ. (Egy 13:48) Ɩta ɩkã ndwokɔ be mɔɔ bɛkã nwʋmɔ odwokɔ wɔ amanɩyɛwɔlɛ nu anzɛnyɩɩ mɔɔ mmenii bɛta bɔdwɩnɩndwɩnɩ nwʋ na bɛkã nwʋmɔ odwokɔ.

Kɛ ɩkɛyɛ na wʋava ahyɛasɩ ɔfʋã mɔɔ ɩwɔ jw.org zʋ nɩ wʋali egyima wɔ dasɩlɛlilɛ nu a?

• Tá kila wɛbsayɩtɩ yɩ zʋ. Yɛ́ ndwokɔ mɔɔ bɛfa betiã nninyeni mvʋlɔ ɔfʋã ɛkɛnɩ mɔɔ ɩwɔ yɛ wɛbsayɩtɩ yɩ ahyɛasɩ ɛkɛnɩ nɩ ndwɩ̃, na dwɩnɩ kezimɔ ɛkɛva ɔkɔwʋwa anyɩnlɩlelɛnii be nɩ nwʋ. (Sɛ ɛpɛ kɛɛ ɔnwʋ nninyeni mvʋlɔ mɔɔ ɩlɛ́kyɛlɩ bela bɛva bogualɩ ahyɛasɩ ɔfʋã ɛkɛnɩ a, minyia ɔfʋã mɔɔ ise “Kila Ndwokɔ Mvʋlɔ” yɩ zʋ.) Sɛ ɛta kɔ wɛbsayɩtɩ yɩ zʋ a, ɩkɔwʋwa wʋ ma ekenyia ndwokɔ mvʋlɔ mɔɔ ɛkɛva ekeli egyima wɔ dasɩlɛlilɛ nu.

• Fá ndwokɔ nɩɩ vidiyo azʋlɔtʋ mɔɔ ɩwɔ ahyɛasɩ kɛnɩ nɩ bɔ nkɔmmɔwɔlɛ tʋ. Ndwokɔ eyimmɔ ma yɛnwʋ nninyeni mɔɔ ebiye a, bɛzabɛ mɔɔ bɔwɔ azɩlɛ-sini yi nu nɩ bɔdwɩnɩndwɩnɩɩ nwʋ.

• Fá ahyɛasɩ kɛnɩ ɔfʋã nɩ kile mmenii. Twɩ̃ adwɩnɩ siye odwokɔ tile be mɔɔ ɩwɔ ɛkɛnɩ nɩ zʋ na kile yi kezimɔ ikenyia nwʋmɔ ndwokɔ sʋ̃maa wɔ wɛbsayɩtɩ yɩ zʋ.

• Fá lɩnkɩ nwʋa. Mmenii sʋ̃maa yɛ bɛábɛ kɛɛ bɛ nɩɩ yɛ tɩndɛ a, naasʋ̃ bɛ anyɩ deli nwʋmɔ kɛɛ bɔkɔhɔ yɛ wɛbsayɩtɩ yɩ zʋ. Meti áma ɔtwɩnhwɩ̃ wʋ agyia azɩ kɛɛ ɛkɛva ahyɛasɩ ɛkɛnɩ ɔfʋã nɩ yɩ lɩnkɩ, odwokɔ tile anzɛnyɩɩ vidiyo pɔkyɩɩ be mɔɔ ɩwɔ ɛkɛnɩ nɩ ɔkɔnwʋa bɛzabɛ mɔɔ bɛ anyɩ deli nwʋmɔ nɩ.