Kezimɔ Gyehova Pɛ Kɛɛ Asafʋ Yɩ Nɩɩ Bɛzabɛ Mɔɔ Bɛyɛ Tanɩ Mɔɔ Numɔ Yɛ Ɔnlʋmɔ Di

1. Mɩnla yɛ Gyehova pɛ kɛɛ mmenii munwatĩĩ nyia a?

GYEHOVA wɔlɩ adasamaa nɩ, ɩvalɩ abiyela yɩ pɛ ɩmanlɩ yɩ. Yɛfa akyɛdɩ eyi yedi egyima eɣile bela yesizi abɔkɔ. Pɔkɔ mɔɔ nwʋmɔ hyinyia tɛla ebiyela yɛ lɛ kɛɛ, abiye kezi pɔkɔ kɛɛ ikeyila yɩ nwʋ zʋ kɛma Gyehova na ɩaɣa ɩahɩnla yɩ azʋ̃mɩvʋlɔ nwʋ. Gyehova pɛ kɛɛ abiyela yɛ zɔ. Mɩnla ti a? Iluwakɛɛ ɩdɔ mmenii na ɩpɛ kɛɛ isi bɛ bʋwɔ. Ɩpɛ kɛɛ ɩ nɩɩ bɛ nyia ɔhɔnwʋvalɛ na bɔbʋwa azɩ daabaa.—Dit. 30:​19, 20; Gal. 6:​7, 8.

2. Mɩnla yɛ Gyehova pɛ kɛɛ tanɩyɛlɛmaa yɛ a? (1 Dwɔɔnʋ 2:1)

² Naasʋ̃ Gyehova ɩáhyɛ abiye kɛɛ ɩzʋ̃mɩ́ yɩ. Ɩma ɔhʋanɩ ma abiyela si mɔɔ ɩpɛ kɛɛ ɩyɛ nɩ nwʋ pɔkɔ. Na sɛ Kilisinyianii mɔɔ inluma bu Nyamɩnlɩ yɩ mmɛla zʋ na ɩyɛ tanɩ mɔɔ numɔ yɛ ɔnlʋmɔ sʋ̃ ɛ? Sɛ iánu yɩ nwʋ a, ɩsɛ kɛɛ bɛyɩ yɩ wɔ asafʋ yɩ nu. (1 Kɔl. 5:13) Naasʋ̃ mɛyɩ po nɩ, Gyehova kila ɔhʋanɩ paa kɛɛ, tanɩyɛlɛnii nɩ konlu yɩ nwʋ na iazia ɩaɣa yɩ pɛ. Nɔhʋanlɛ nu nɩ, eyi yɛ lɛ sianti titili paa ti mɔɔ Gyehova valɩ elelɛdɩyɛ nɩ manlɩ a, na ama iluwa zʋ ɩava mmenii mɔɔ bonlu bɔ nwʋ nɩ bɛ tanɩ ɩahyɛ bɛ. (Kɩnga 1 Dwɔɔnʋ 2:1.) Yɛ Nyamɩnlɩ mɔɔ ɩwɔ ɔlɔlɛ nɩ kɔ zʋlɔ hyɛ tanɩyɛlɛmaa ɛzɩzɩbɛ kɛɛ, bonlú bɔ nwʋ.—Zak. 1:3; Wul. 2:4; Gye. 4:8.

3. Mɩnla yɛ yekozunzu nwʋmɔ wɔ dɩyɛzumanlɛ eyi nu a?

³ Gyehova pɛ kɛɛ yenyia adwɩnɩ mɔɔ ɩlɛ yɩ wɔ tanɩ nɩɩ tanɩyɛlɛmaa nwʋ nɩ be. Dɩyɛzumanlɛ eyi kehile kezimɔ yɛkɔhʋla kɛyɛ zɔ. Mmɩlɩ mɔ ɛkɩngaa dɩyɛzumanlɛ odwokɔ eyi nɩ, kila kɛɛ ɔkɔnwʋ (1) kezimɔ bɛ nɩɩ abiye mɔɔ ɩyɛlɩ tanɩ be mɔɔ numɔ yɛ ɔnlʋmɔ wɔ tɩɩtɩɩ Kɔlɛntɩ asafʋ yɩ nu lili, (2) ɔhʋanɩhilelɛ mɔɔ sʋ̃mavʋlɔ Pɔɔlʋ va manlɩ mmɩlɩ mɔ tanɩyɛlɛnii be nlunli yɩ nwʋ nɩ, nɩɩ (3) mɔɔ Bayɩbʋlʋ nu odwokɔ eyi ma yɛnwʋ yɛfalɩ kezimɔ Gyehova tɩ nɣanlɩ wɔ Kilisinyiamaa mɔɔ bɛyɛ tanɩ mɔɔ numɔ yɛ ɔnlʋmɔ nwʋ nɩ.

MƆƆ KƆLƐNTƖ ASAFƲ YƖ YƐLƖ MMƖLƖ MƆ ABIYE YƐLƖ TANƖ MƆƆ NUMƆ YƐ ƆNLƲMƆ NƖ

4. Mɩnla yɛ izili wɔ tɩɩtɩɩ Kɔlɛntɩ asafʋ yɩ nu a? (1 Kɔlɛntɩmaa 5:​1, 2)

⁴ Kɩnga 1 Kɔlɛntɩmaa 5:​1, 2. Wɔ sʋ̃mavʋlɔ Pɔɔlʋ yi odwokɔbadɛlɛlɛ ɔhʋanɩdulɛ mɔɔ ɩtɔ zʋlɔ asã yɩ nu nɩ, ɩdɩlɩ amanɩyɛwɔlɛ be mɔɔ nɩ ɩyɛ atɩɩtɩɩ mɔɔ ɩzʋ̃ Kɔlɛntɩ asafʋ fʋlɔ yɩ nu. Nɩ eliyema be wɔ ɔzɔ asafʋ yɩ nu mɔɔ ɩ nɩɩ yɩ papa yɩ yɩ da. Nɩ nyɛlɩyɛ eyi yɛ asibɔnwʋ paa na “bɛzabɛ mɔɔ bézi Nyamɩnlɩ nɩ po bɔlɔ́bɔ ɔzɔ ɛbɩla nɩ”! Naasʋ̃ nɩ asafʋ yɩ sunzu kɛɛ mfʋmɩ bela íni nwʋmɔ kɛɛ ɔzɔ eliyema nɩ kɔhɔ zʋlɔ kɔwʋwa bo nu. Ɩkɛyɛ kɛɛ bo nu be po nyianlɩ adwɩnɩ kɛɛ bɛyɛɛ zɔ kɛva kozumazuma kezimɔ Gyehova da nwɔkɛnwʋnlɛ ali na ɩtɩ adasamaa mɔɔ bɛáli munli tʋ nɩ. Naasʋ̃ Gyehova ɩázʋzɔ tanɩ zʋ wɔ yi mmenii nu. Iluwa ɔzɔ ɛbɩlazɩkɛlɛ mɔɔ nɩ ɩkɔlɩɩ zʋlɔ nɩ ti, nɩ ɩsɩkɛɛ dimaba mɔɔ asafʋ yɩ wɔ nɩ. Nɩ sɛ ɩkɔ zʋlɔ ɩbʋwa asafʋ yɩ nu a, abiyemmɔ kɔhʋla kozumazuma yi subanɩ tanɩ yɩ. Meti mɩnla ɔhʋanɩhilelɛ yɛ Pɔɔlʋ va manlɩ asafʋ yɩ a?

5. Mɩnla yɛ Pɔɔlʋ hanlɩ hileli asafʋ yɩ kɛɛ bɛyɛ́ a, na mɩnla yɛ nɩ ɩpɛɛ kehile a? (1 Kɔlɛntɩmaa 5:13) (Kila mfonyini yi sʋ̃.)

⁵ Kɩnga 1 Kɔlɛntɩmaa 5:13. Gyehova yi sunzuma yɩ hanlɩ Pɔɔlʋ ma ɩhɛlɛlɩ kɛɛ, bɛyɩ́ tanɩyɛlɛnii mɔɔ ilónunli yɩ nwʋ yɩ wɔ asafʋ yɩ nu. Nɩ kɛ ɩsɛ kɛɛ asafʋ yɩ nu maa mɔɔ bedi nɔhʋanlɛ nɩ bɛ nɩɩ yɩ di se a? Pɔɔlʋ hanlɩ hileli bɛ kɛɛ “áma mʋnlʋmmɔ bɛ nɩɩ yɩ tu.” Mɩnla yɛ nɩ ɩpɛɛ kehile a? Pɔɔlʋ hilehileli numɔ kɛɛ, íni kɛɛ bɛ nɩɩ “enii mɔɔ ɩdɩ ɔzɔ nɩ bɔbʋwa ɔbʋnlɩ ɔkʋ̃ nwʋ bɔtʋ salɛ bedi alɩyɛ po.” (1 Kɔl. 5:11) Sɛ ɛ nɩɩ abiye bʋwa azɩ di alɩyɛ a, ɩáyɛ sɩ kɛɛ bɔkɔwɔ nkɔmmɔ bɔkɔhɔ aɣinzi. Ɩda ali petee kɛɛ, nɩ Pɔɔlʋ ɩpɛɛ kehile kɛɛ íni kɛɛ asafʋ yɩ nu maa bɛ nɩɩ ɔzɔ benyia nɩ bɔ. Nɩ eyi kɔwɔ asafʋ yɩ nwʋ banɩ na bɛányianlɩ yi subanɩ tanɩ yɩ be. (1 Kɔl. 5:​5-7) Akʋ̃ sʋ̃, sɛ bɛ nɩɩ yɩ ɩábɔ a, ɩkɛma yɩ adwɩnɩ kɛɣa yɩ nwʋ zʋ kɛɛ ɩyɛ tanɩ kezile idiyia Gyehova, na ebiye a ikeli ɛyɛkɛ na ɩahã yɩ ma ianlu yɩ nwʋ.

6. Mɩnla yɛ asafʋ yɩ yɛlɩ wɔ Pɔɔlʋ yɩ kɛlɛta yɩ nwʋ a, na mɩnla yɛ tanɩyɛlɛnii yɩ sʋ̃ yɛlɩ a?

⁶ Pɔɔlʋ valɩ yɩ kɛlɛta yɩ hɔ manlɩ Kilisinyiamaa mɔɔ bɔwɔ Kɔlɛntɩ mɛda nɩ, nɩ ɩdwɩnɩ kezimɔ asafʋ yɩ kɛyɛ bɛ dɩyɛ wɔ nwʋmɔ nɩ nwʋ. Aɣinzi yi, Tayɩtɔsɩ valɩ amanɩyɛwɔlɛ fɛlɛkʋ̃ be ɣɩlɛlɩ Pɔɔlʋ. Nɩ asafʋ yɩ va anyɩnlɩlelɛ zɔ Pɔɔlʋ yɩ kɛlɛta yɩ nu. (2 Kɔl. 7:​6, 7) Bɛvalɩ ɔhʋanɩhilelɛ mɔɔ ɩwɔ kɛlɛta yɩ nu bɛyɛlɩ egyima. Akʋ̃ sʋ̃, mmɩlɩ mɔ Pɔɔlʋ valɩ kɛlɛta yɩ hɔ manlɩ asafʋ yɩ nɩ, aziyianɩ ɛgyɩkɩ̃ɩ̃ be mɛda yɛ tanɩyɛlɛnii nɩ nlunli yɩ nwʋ a! Nɩ iyiaki yɩ nyɛlɩyɛ nɩɩ yi subanɩ tanɩ yɩ, na ɩwɔ yɩ tʋ ɩlɛ Gyehova yɩ mmɛla ɩbɔɔ yɩ ɛbɩla. (2 Kɔl. 7:​8-11) Mɩnla yɛ akʋ̃ Pɔɔlʋ hanlɩ hileli asafʋ yɩ kɛɛ bɛyɛ́ a?

KEZIMƆ NƖ ƖSƐ KƐƐ ASAFƲ YƖ NƖƖ TANƖYƐLƐNII NƖ DI

7. Mmɩlɩ mɔ bɛyɩlɩ benyia nɩ wɔ asafʋ yɩ nu nɩ, mɩnla yɛ ɩyɛlɩ a? (2 Kɔlɛntɩmaa 2:​5-8)

⁷ Kɩnga 2 Kɔlɛntɩmaa 2:​5-8. Pɔɔlʋ hanlɩ kɛɛ “ɛdɩnyɩanlɛ mɔɔ bo nu sʋ̃maa bɛva bɛdɩnyɩa yɩ nɩ, ɩdɩ baaba ɩma yɩ.” Meti yɛkɛhã a, nɩ ɛdɩnyɩanlɛ yɩ wʋwa benyia yɩ ma inlu yɩ nwʋ. Meti nɩ iáhyinyia kɛɛ asafʋ nɩ kɔhɔ zʋ kɛdɩnyɩa yɩ.—Hib. 12:11.

8. Mɩnla dɔkʋ̃ yɛ Pɔɔlʋ hanlɩ hileli asafʋ yɩ kɛɛ bɛyɛ́ a?

⁸ Meti Pɔɔlʋ valɩ ɔhʋanɩhilelɛ manlɩ asafʋ yɩ falɩ eliyema mɔɔ ɩyɛlɩ tanɩ nɩ nwʋ kɛɛ: “Bɛvá yɩ nwʋ bɛhyɛ yɩ, na bɛyɩkyɩ́ yɩ ɛɣɛɛlɛ,” na “bɛmá ɔzɔ enii nɩ ɩnwʋ yɩ kɛɛ mʋnlʋmmɔ bɔdɔ yɩ baaba amba.” Yɛ yɩ ndwɩ kɛɛ, kɛ elelɛ kɛkɛ yɛ nɩ Pɔɔlʋ pɛ kɛɛ bede benyia yɩ bɛkɩnla Gyehova yi mmenii nwʋ dɔkʋ̃ a, mfomi nɩ ɩpɛ kɛɛ boduwa bo munwa ndwokɔ nɩɩ bɛ nyɛlɩyɛ zʋ bɛma benyia mɔɔ inlu yɩ nwʋ nɩ nwʋ yɩ kɛɛ, bɛva yɩ tanɩ bɛhyɛ yɩ na bɔdɔ yɩ amba. Sɛ bɛyɛ zɔ a, nɩ ɩkɛma eliyema nɩ kɛdɩ nɣanlɩ kɛɛ asafʋ yɩ bɛ anyɩ ile kɛɛ izia ɩɣa.

9. Mɩnla ti mɔɔ ebiye a nɩ ɩyɛ sɩ ɩma abiyemmɔ kɛɛ bɛkɛva benyia mɔɔ nɩ inlu yɩ nwʋ nɩ yɩ tanɩ bɛkɛhyɛ yɩ a?

⁹ Asʋ̃ nɩ abiyemmɔ bɔtwɩnhwɩ̃ɩ̃ bɛ agyia azɩ kɛɛ bekezia bekele benyia mɔɔ inlu yɩ nwʋ nɩ bekediã nu dɔkʋ̃ a? Bayɩbʋlʋ yɩ ɩáhã, naasʋ̃ sa ɩkʋla ɩba yɩ zɔ. Iluwakɛɛ yɩ nyɛlɩyɛ nɩ valɩ ɔhawʋ sʋ̃maa ɣɩlɛlɩ asafʋ yɩ munwatĩĩ na ebiye a ɩmanlɩ mmenii be sʋ̃ bɛ anyunu gualɩ azɩ. Nɩ asafʋ yɩ nu maa bɔwɔ mmɔdɩnɩ beli Gyehova yɩ mmɛla zʋ. Meti ɩkɛyɛ kɛɛ bo nu be dɩlɩ nɣanlɩ kɛɛ ntɩyasɩ íni numɔ kɛɛ bekezia bekele abiye mɔɔ ɩwɔ ɛbɩla mɔɔ ɩdɩ zɛ kɛɣa asafʋ yɩ nu dɔkʋ̃. (Fa tindiã Luuku 15:​28-30 nwʋ.) Mɛyɩ, nɩ mɩnla ti mɔɔ nɩ nwʋmɔ hyinyia kɛɛ asafʋ yɩ kɛla ɔlɔlɛ kanyɩɩ ali kehile eliyema yɩ mɔɔ nɩ izia ɩɣa Gyehova pɛ nɩ a?

10-11. Sɛ asafʋ nu mbanimbani yi bɛáfa tanɩyɛlɛnii mɔɔ inlu yɩ nwʋ nɩ yɩ tanɩ bɛkyɛ yɩ a, ankɩ mɩnla yɛ ɩkɔhʋla kezi a?

¹⁰ Mɔwʋ fa yɩ kɛɛ asafʋ nu mbanimbani yi bɛáma ɔhʋanɩ ma benyia mɔɔ inlu yɩ nwʋ nɩ isia ɩba asafʋ yɩ nu, anzɛnyɩɩ beleli yi nɩ, asafʋ yɩ nu maa bɛáda ɔlɔlɛ ali bekile yi a, ankɩ mɩnla yɛ ɩkɔhʋla kezi a? Ankɩ sa ɩkʋla ɩma ‘idi ɛyɛkɛ sʋ̃maa na iayiaki yi dedi nɩ nu.’ Ankɩ ɩkɔhʋla kɛdɩ nɣanlɩ kɛɛ ɩlɔ́kʋla kɔzʋ̃mɩ Gyehova dɔkʋ̃. Ankɩ ebiye a ikeyiaki mmɔdɩnɩ mɔɔ ɩbɔɔ kɛɛ ikeziyeziye ɩ nɩɩ Gyehova avinli abusunwawɔlɛ yɩ.

¹¹ Na mɔɔ ɩdɩbɛ kʋlaa po nɩ, sɛ mmeliyema mɔɔ bɔwɔ asafʋ yɩ nu nɩ bɛáfa bɛkyɛ tanɩyɛlɛnii mɔɔ inlu yɩ nwʋ nɩ a, nɩ ɩkɛma bɛ nɩɩ Gyehova avinli abusunwawɔlɛ kɛzɩkɛ. Mɩnla ti a? Iluwakɛɛ ɩba yɩ zɔ a, nɩ bolósumazuma kezimɔ Gyehova fa tanɩ kyɛ nɩ, mfomi nɩ bosumazumaa Setanɩ mɔɔ yi ti nu yɛ sɩ na ɩánwʋ nwɔkɛ nɩ yi subanɩ yɩ. Ɩba yɩ zɔ a, nɩ bɛmaa ɔhʋanɩ ma Abɔnsamɩ koluwa bɔ zʋ kogolɔ benyia nɩ yi padi wɔ Gyehova ɔzʋ̃mɩnlɛ nwʋ.—2 Kɔl. 2:​10, 11; Ɛfɩ. 4:27.

12. Nɩ kɛ ɩkɛyɛ na Kɔlɛntɩ asafʋ yɩ bɛazumazuma Gyehova a?

¹² Meti, nɩ kɛ ɩkɛyɛ na Kɔlɛntɩ asafʋ yɩ bɛazumazuma Gyehova, na kɛ Setanɩ a? Mɛyɩ yɛ lɛ kɛɛ bokozumazuma kezimɔ Gyehova ɩ nɩɩ tanɩyɛlɛmaa mɔɔ bonlu bɔ nwʋ di nɩ. Kila mɔɔ Bayɩbʋlʋ ɛhɛlɛlɛmaa be hɛlɛlɩ valɩlɩ Gyehova nwʋ. Devidi hanlɩ kɛɛ, “ɛdɩyɛnɛ na ɔwɔ ɛpɛ kɛɛ ɛkɛva tanɩ kɛhyɛ.” (Ndw. 86:5) Mika hɛlɛlɩ kɛɛ: “Aninyia yɛ lɛ Nyamɩnlɩ dɩkɛɛ mɔwʋ, mɔɔ ɩfa tanɩ ɩkyɛ a?” (Mik. 7:18) Na Ayɩzaya sʋ̃ hanlɩ kɛɛ: “Má tanɩyɛlɛnii iyiakí yɩ ɔhʋanɩ na enii tanɩ ɩzɩnza yɩ adwɩnɩ; ma izia ɩɣɩla Gyehova pɛ, na ɩkɔnwʋ yɩ nwɔkɛ, ɩɣɩlá yɛ Nyamɩnlɩ yɩ pɛ, na ɩkɛva ɩkɛhyɛ yɩ ma ikowulu zʋlɔ.”—Ayɩ. 55:7.

13. Mɩnla ti mɔɔ nɩ ɩsɛ kɛɛ besia bede benyia yɩ mɔɔ nɩ inlu yɩ nwʋ nɩ wɔ asafʋ yi nu a? (Kila alɩka mɔɔ ise “Mɩnla Mmɩlɩ Yɛ Bezia Beleli Benyia Yɩ Mɔɔ Bɛyɩlɩ Yɩ Wɔ Kɔlɛntɩ Asafʋ Yɩ Nu Nɩ a?”)

¹³ Mɔɔ ɩkɛyɛ na Kɔlɛntɩ asafʋ yɩ bɛazumazuma Gyehova nɩ, nɩ ɩsɛ kɛɛ bɛfa anyɩnlɩlelɛ bede benyia mɔɔ bɛyɩlɩ yɩ wɔ asafʋ yi nu nɩ na bɛma ɩnwʋ kɛɛ bɔdɔ yɩ na bɛ anyɩ le kɛɛ izia ɩɣa. Pɔɔlʋ hanlɩ kɛɛ sɛ bɛfa benyia yɩ mɔɔ inlu yɩ nwʋ nɩ yɩ tanɩ bɛkyɛ yɩ a, nɩ ikile kɛɛ ‘bedidi ehilehilelɛ nɩ zʋ.’ (2 Kɔl. 2:9) Ɩwɔ numɔ, bɛyɩlɩ benyia yɩ wɔ asafʋ yi nu nɩ, nɩ aziyanɩ ɛgyɩkɩ̃ɩ̃ be yɛ idua numɔ dɩyɛ, naasʋ̃ nɩ ɛdɩnyɩanlɛ yɩ ma inlu yɩ nwʋ. Meti nɩ ntɩyasɩ bela íni numɔ kɛɛ bɔkɔhwɩnhwɩ̃ bɛ agyia azɩ kɛɛ bekezia bekele yi wɔ asafʋ yi nu.

KƐ ƖKƐYƐ NA YƐAZUMAZUMA GYEHOVA YƖ PƐLƖPƐLƖLILƐ NƖƖ YƖ NWƆKƐNWƲNLƐ A?

14-15. Mɩnla yɛ yezuma wɔ odwokɔ mɔɔ izili wɔ Kɔlɛntɩ asafʋ yi nu nɩ nu a? (2 Pita 3:9) (Kila mfonyini yi sʋ̃.)

¹⁴ Kezimɔ tɩɩtɩɩ Kɔlɛntɩ asafʋ yɩ yɛlɩ bɛ dɩyɛ wɔ odwokɔ mɔɔ izili yi nwʋ nɩ, bɛhɛlɛ yɩ wɔ Bayɩbʋlʋ yɩ nu na ‘iahilehile yɛ.’ (Wul. 15:4) Ɔzɔ odwokɔ yɩ ma yɛnwʋ kɛɛ, Gyehova ɩázʋzɔ tanɩ mɔɔ numɔ yɛ ɔnlʋmɔ zʋ wɔ yi mmenii nu. Ebiye a abiye kenyia adwɩnɩ kɛɛ iluwakɛɛ Gyehova dɩ nwɔkɛnwʋnlɛvʋlɔ ti, sɛ abiye yɛ tanɩ na iánlu yɩ nwʋ po a, ɩkɛma ɩkɔhɔ zʋlɔ kɔwʋwa asafʋ yi nu. Naasʋ̃ kɛ ɔzɔ yɛ Gyehova da nwɔkɛnwʋnlɛ ali a. Gyehova dɩ nwɔkɛnwʋnlɛvʋlɔ naasʋ̃ ɩázʋzɔ tanɩ zʋ. (Dwu. 4) Ntɩyasɩ wɔ numɔ kɛɛ Gyehova ɩáyɛ zɔ, iluwakɛɛ sɛ ɩma ɔhʋanɩ ma abiye mɔɔ ɩyɛ tanɩ na iánlu yɩ nwʋ kɔ zʋlɔ bʋwa asafʋ yɩ nu a, sa ɩkʋla ɩfa mmenii mɔɔ bɔwɔ asafʋ yɩ nu bɔ nnwʋanlɩ itiã asianɩ nu.—Ɛɣɛ. 13:20; 1 Kɔl. 15:33.

¹⁵ Naasʋ̃ yezi kɛɛ Gyehova ɩábɛ kɛɛ ɩsɩkɛ abiyela. Ɩpɛ kɛɛ ide mmenii nnwʋanlɩ. Bɛzabɛ mɔɔ bonlu bɔ nwʋ na bɛpɛ kɛɛ besiyeziye bɛ nɩɩ yɩ avinli abusunwawɔlɛ yɩ nɩ, ɩda nwɔkɛnwʋnlɛ ali ikile bɛ. (Izi. 33:11; kɩnga 2 Pita 3:9.) Meti, mmɩlɩ mɔ benyia yɩ mɔɔ nɩ ɩwɔ Kɔlɛntɩ nɩ nlunli yɩ nwʋ na iyiakili yɩ ɛbɩla tanɩ nɩ, Gyehova luwalɩ Pɔɔlʋ zʋ manlɩ asafʋ yɩ nwʋnlɩ kɛɛ ɩsɛ kɛɛ bɛfa benyia yɩ tanɩ bɛkyɛ yɩ na besia bede yi.

16. Kezimɔ Kɔlɛntɩ asafʋ yɩ yɛlɩ bɛ dɩyɛ wɔ odwokɔ mɔɔ izili yi nwʋ nɩ, kɛ ɛtɩ nɣanlɩ wɔ nwʋmɔ ese a?

¹⁶ Mɔɔ izili wɔ Kɔlɛntɩ asafʋ yi nu mɔɔ yezunzu nwʋmɔ nɩ ma yɛnwʋ kɛɛ Gyehova dɩ ɔlɔlɛ, ɩtɩnɣɛ na ɩdɩ pɛlɩpɛlɩ. (Ndw. 33:5) Asʋ̃ eyi ɩáhã wʋ kɛɛ ɛyɩ Gyehova ayɛlɛ a? Debe yi yɩzayɩ, ye munwala tanɩ wɔ yɛ nwʋ meti yehyinyia yɩ kɛnɩ tanɩfakyɛ. Akʋ̃ sʋ̃, yɛ anyɩ sɔ yɩ paa kɛɛ Gyehova ɩma yɛ sa hã elelɛdɩyɛ yɩ, iluwakɛɛ iluwa mɛyɩ zʋ yɛ yenyia tanɩfakyɛ a. Ɩyɛ yɛ fɛ paa kɛɛ yezi kɛɛ Gyehova dɔ yi mmenii paa na ɩpɛ kɛɛ isi bɔ bʋwɔ!

17. Mɩnla yɛ yekozunzu nwʋmɔ wɔ dɩyɛzumanlɛ ndwokɔ mɔɔ ili kɛnɩ nɩ nu a?

¹⁷ Sɛ nnɛ abiye yɛ tanɩ mɔɔ numɔ yɛ ɔnlʋmɔ a, kɛ ɩkɛyɛ na asafʋ nu mbanimbani bɛazumazuma Gyehova yɩ ɔlɔlɛ na bɛawʋwa enii kʋ̃ nɩ yɩ ma ianlu yɩ nwʋ a? Sɛ asafʋ nu mbanimbani si pɔkɔ kɛɛ bɛyɩɩ abiye wɔ asafʋ yi nu anzɛnyɩɩ bedee yɩ a, kɛ ɩsɛ kɛɛ asafʋ yi nu maa bɛyɛ bɛ dɩyɛ bese a? Yekozunzu ndwokɔɣizialɛ eyimmɔ nwʋ wɔ dɩyɛzumanlɛ ndwokɔ mɔɔ ili kɛnɩ nɩ nu.