Suma Kɛɛ Ekenyia Gyehova Nɩɩ Gyisɛsɩ Bɛ Adwɩnɩ Yɩ Be

1-2. Mɩnla yɛ Gyehova mɔɔ yɛkɔlɔ yɩ nɩ pɩbɛ kɛɛ yɛkɛyɛ a, na mɩnla ɔhʋanɩ zʋ yɛ Gyisɛsɩ lalɩ yɩ ali kɛɛ ɩvalɩ yɩ adwɩnɩ munwatĩĩ ɩlɔlɩ Gyehova a?

“FA WƲ ahʋnlɩnɩ munwatĩĩ ɩ nɩɩ wʋ ɛkɛla munwatĩĩ ɩ nɩɩ wʋ adwɩnɩ munwatĩĩ ɩ nɩɩ wʋ anwʋzɩzɩbɛ munwatĩĩ dɔ Niibenyia wʋ Nyamɩnlɩ nɩ.” (Mk. 12:30) Gyisɛsɩ manlɩ ɩlalɩ ali petee kɛɛ eyi yɛ lɛ mmɛla mɔɔ nwʋmɔ hyinyia paa wɔ Mosisi Mmɛla yɩ nu a. Yɛ́ yɩ ndwɩ kɛɛ, ɔlɔlɛ mɔɔ yɛkɔlɔ Gyehova nɩ pɩbɛ kɛɛ yɛkɛva yɛ ahʋnlɩnɩ yɛkɔlɔ yɩ, mɔɔ nninyeni mɔɔ yɛ anyɩ deli nwʋ nɩɩ yɛ nɣanlɩdɩlɛ sʋ̃ kɩnla nwʋ. Akʋ̃ sʋ̃, ɩsɛ kɛɛ yɛzʋ̃ yɛ ɛkɛla munwatĩĩ nɩɩ yɛ anwʋzɩzɩbɛ munwatĩĩ nu yɛdɔ yɩ. Naasʋ̃, ɩsɛ kɛɛ yɛfa yɛ adwɩnɩ sʋ̃ yɛdɔ Gyehova, mɔɔ kezimɔ yesunzu nninyeni nwʋ kɩnla nwʋmɔ. Nɔhʋanlɛ, yɛlɔ́kʋla kɛdɩ kezimɔ Gyehova sunzu nninyeni nwʋ nɩ munwatĩĩ tʋ kʋlakʋla. Naasʋ̃ sɛ yɛkʋla yɛnwʋ “Kɩlayɩsɩ yɩ adwɩnɩ” a, ɩkɛma yɛkɔnwʋ kezimɔ Nyamɩnlɩ sunzu nninyeni nwʋ bʋwɔ, iluwakɛɛ Gyisɛsɩ da yɩ Zɩ yɩ adwɩnɩ ali pɛpɛɛpɛ.—1 Kɔl. 2:16.

² Gyisɛsɩ valɩ yɩ adwɩnɩ munwatĩĩ lɔlɩ Gyehova. Nɩ izi mɔɔ Nyamɩnlɩ pɛ kɛɛ ɩyɛ na izili yɩ kɛnɣa kɛɛ ɩkɔwɔ yɩ ɛbɩla ma ɩ nɩɩ yɩ keyiyia, ɩávalɩ nwʋmɔ kɛɛ nɩ ɔzɔ mɔɔ ɩkɛyɛ nɩ kɛma ɩkɔnwʋ amanɩyɛ sʋ̃maa nɩ. Gyisɛsɩ va ziyeli yɩ anyɩ zʋ kɛɛ ɩkɛyɛ mɔɔ yɩ Zɩ pɛ yɩ, na ɩáma dɩyɛ bela twɩnhwɩ̃ yɩ adwɩnɩ wɔ ɔzɔ bʋtayɩ yɩ nwʋ.

3. Mɩnla yɛ sʋ̃mavʋlɔ Pita zumanlɩ wɔ Gyisɛsɩ kɛnɩ a, na mɩnla yɛ Pita hyɛlɩ yɩ ɔhɔnwʋmmɔ Kilisinyiamaa ɛzɩzɩbɛ kɛɛ bɛyɛ́ a? (1 Pita 4:1)

³ Pita nɩɩ asʋ̃mavʋlɔ nɣalɩyɛ yɩ nyianlɩ ɔnwʋmɔ ɔhʋanɩ bɛ nɩɩ Gyisɛsɩ wɔlɩ na bɔnwʋnlɩ kezimɔ nɩ Gyisɛsɩ yɛ yɩ dɩyɛ, meti bozumazumanlɩ kezimɔ ɩdwɩ̃ nɩ. Mmɩlɩ mɔ Pita hɛlɛlɩ yɩ kɛlɛta mɔɔ ili bɔmʋnlɩ nɩ, ɩhyɛlɩ Kilisinyiamaa ɛzɩzɩbɛ kɛɛ beziyeziyé bɔ nwʋ kɛɛ bɔkɔdwɩ̃ kɛmɔ nɩ Kɩlayɩsɩ ɩdwɩ̃ nɩ. (Kɩnga 1 Pita 4:1.) Odwokɔ “besiyeziye bɔ nwʋ” mɔɔ Pita va lili egyima nɩ dɩ odwokɔ mɔɔ nɩ azogyiamaa fa di egyima. Meti sɛ Kilisinyiamaa sumazuma kezimɔ Gyisɛsɩ sunzu nninyeni nwʋ anzɛnyɩɩ benyia yɩ adwɩnɩ yɩ be a, sa ɩbʋwa bɛ ma benyia akʋndɩ mɔɔ tumi wɔ nu mɔɔ bɛkɛva kɔhʋ̃ kediyia tanɩyɛlɛ nwʋ akɔnɔ nɩɩ oyuwadɩ mɔɔ Setanɩ di zʋlɔ tumi nɩ.—2 Kɔl. 10:​3-5; Ɛfɩ. 6:12.

4. Mɩnla yɛ yekozunzu nwʋmɔ wɔ dɩyɛzumanlɛ eyi nu a?

⁴ Yekozunzu kezimɔ Gyisɛsɩ dwɩ̃ nɩ nwʋ na yɛahila kezimɔ yekozumazuma yɩ. Yɛkɔnwʋ (1) kezimɔ yɛkɔhʋla yekozumazuma kezimɔ Gyehova dwɩ̃, (2) kezimɔ yɛkɛhã yɛ nwʋ azɩ, nɩɩ (3) kezimɔ yɛkɛma yɛ adwɩnɩ nu kɛla kɛnɩ.

SUMAZUMA KEZIMƆ GYEHOVA DWƖ̃ NƖ

5. Mmɩlɩ be, mɩnla yɛ Pita yɛlɩ mɔɔ ikile kɛɛ iányia Gyehova yɩ adwɩnɩ a?

⁵ Bɛmá yehila mmɩlɩ be mɔ Pita iányia Gyehova yɩ adwɩnɩ wɔ nninyeni nwʋ nɩ. Gyisɛsɩ hã hileli yɩ adʋwavʋlɔ yɩ kɛɛ ɩsɛ kɛɛ ɩkɔ Gyelusalamɩ na nyamɩnlɩzʋ̃mɩnlɛ nu mbanimbani yi bɛahyɩ yɩ, bɛayɛ yɩ ayɛkwa na bɛahũ yi. (Mt. 16:21) Nɩ ɩyɛ sɩ ɩma Pita kɛɛ ikele kediã numɔ kɛɛ Gyehova kɛma ɔhʋanɩ ma bokohũ Gyisɛsɩ mɔɔ ɩdɩ Mɛzaya mɔɔ nɩ bɔwɔ yɩ nwʋ anʋhʋba mɔɔ nɩ ɩdɩ Yizilayamaa bɛ anyɩnlɩlazʋ nɩ. (Mt. 16:16) Meti Pita hwɩnlɩ Gyisɛsɩ hɔlɩ ahanlɩ na ɩhã ihileli yi kɛɛ: “Niibenyia, Nyamɩnlɩ ɩbá igua, eyi ilésili wʋ zʋ kyɩ̃!” (Mt. 16:22) Iluwakɛɛ nɩ Pita íni Gyehova yɩ adwɩnɩ wɔ nninyeni nwʋ nɩ ti, ɩ nɩɩ Gyisɛsɩ ɩáyɛ adwɩnɩ.

6. Mɩnla ɔhʋanɩ zʋ yɛ Gyisɛsɩ lalɩ yɩ ali kɛɛ ɩwɔ Gyehova yɩ adwɩnɩ wɔ nninyeni nwʋ a?

⁶ Nɩ Gyisɛsɩ wɔ yɩ sʋlɔ Ɛzɩlɛ yɩ adwɩnɩ wɔ nninyeni nwʋ. Gyisɛsɩ hã hileli Pita kɛɛ: “Ɔzʋ̃ mʋ nwʋ ɛkɩhyɩ twɩ̃ wʋ nwʋ, Abɔnsamɩ. Ɔtʋndʋ̃ʋ̃ mɩ agyia nu, iluwakɛɛ mɔɔ ɔdwɩ̃ɩ̃ nɩ ɩ́zʋ̃ Nyamɩnlɩ na ɩzʋ̃ enii.” (Mt. 16:23) Nɩ Gyisɛsɩ zi kɛɛ, mɔɔ ɩkɛyɛ na Gyehova yɩ ɛpɛ ɩayɛlɩ kɛ nɩ, nɩ ɩsɛ kɛɛ ɩnwʋ amanɩyɛ na iwu. Ebiye a, nɩ adwɩnɩba yɛ Pita ɩlɛ ɩkãã zɔ a, naasʋ̃ Gyisɛsɩ bʋlɩ Pita yɩ fʋlɔdulɛ yɩ. Pita ɣa nwʋnlɩ kɛɛ, ɩsɛ kɛɛ inyia Nyamɩnlɩ yɩ adwɩnɩ wɔ nninyeni nwʋ. Na eyi dɩ ozumalɛdɩyɛ mɔɔ nwʋmɔ hyinyia ma amɩyɛ sʋ̃.

7. Aɣinzi yi, mɩnla yɛ Pita yɛlɩ mɔɔ ikile kɛɛ nɩ ɩpɛ kɛɛ ɩsɩnza yɩ adwɩnɩ ma ɩ nɩɩ Gyehova yɩ dɩyɛ yiyia a? (Kila mfonyini yi.)

⁷ Aɣinzi yi, Pita lalɩ yɩ ali kɛɛ ɩpɛ kɛɛ ɩsɩnza yɩ adwɩnɩ ma ɩ nɩɩ Gyehova yɩ dɩyɛ yiyia. Nɩ mmɩlɩ dwu kɛɛ amanlɩ amanlɩ nu maa kɛɣa kɛhɩnla Nyamɩnlɩ yi mmenii nwʋ. Bɔzʋ̃manlɩ Pita kɛɛ ɩhɔ́ ɩhã odwokɔba yɩ ihile Kɔnɛlɩyɔsɩ mɔɔ nɩ ɩkɩnla amanlɩ amanlɩ nu maa mɔɔ belili bɔmʋnlɩ bɛɣa bɛyɛlɩ Kilisinyiamaa nwʋ nɩ. Nɩ Dwuumaa bɛ nɩɩ amanlɩ amanlɩ nu maa bɛáwɔ numɔ bɛyɛ dɩyɛ, meti nɩ ikehyinyia kɛɛ Pita sɩnza yɩ adwɩnɩ na ama ɩahʋla ɩahã odwokɔba nɩ iahile amanlɩ amanlɩ nu maa yɩ. Mmɩlɩ mɔ Pita nwʋnlɩ Nyamɩnlɩ yɩ adwɩnɩ wɔ odwokɔ eyi nwʋ nɩ, ɩzɩnzanlɩ yɩ adwɩnɩ. Meti, mmɩlɩ mɔ Kɔnɛlɩyɔsɩ zʋ̃manlɩ kɛɛ bɔhɔ́ bɔvʋlɔ yɩ nɩ, ‘ɩátwɩnhwɩ̃ yɩ nwʋ.’ (Egy. 10:​28, 29) Ɩhanlɩ odwokɔba yɩ ihileli Kɔnɛlɩyɔsɩ nɩɩ yɩ awudomaa, na bonlumanlɩ bɛ.—Egy. 10:​21-23, 34, 35, 44-48.

8. Kɛ ɩkɛyɛ na yɛala yɩ ali kɛɛ yɛ adwɩnɩ nɩɩ Gyehova yɩ adwɩnɩ yiyia a? (1 Pita 3:8)

⁸ Alʋbɔ be mɛda nɩ, Pita hyɛlɩ yɩ ɔhɔnwʋmmɔ Kilisinyiamaa ɛzɩzɩbɛ kɛɛ “bo munwala bɛ adwɩnɩ ɩyɛ ɔkʋ̃.” (Kɩnga 1 Pita 3:8.) Kezimɔ Gyehova dwɩ̃ nɩ bɛla yɩ ali wɔ yi Odwokɔ yɩ nu, meti sɛ yesuma a, sa ɩkʋla ɩma yɛ nɩɩ ye mmeliyema nyia adwɩnɩ ɔkʋ̃. Kɛ ndianwʋ nɩ, Gyisɛsɩ hyɛlɩ yɩ mɛdalilɛmaa ɛzɩzɩbɛ kɛɛ bɛvá Bulombunlililɛ yɩ beli bɔmʋnlɩ wɔ bɛ ɛbɩlawɔlɛ nu. (Mt. 6:33) Eyi ti, ebiye a ɛlawulowɔlɛvʋlɔ be mɔɔ ɩwɔ wʋ asafʋ nu kezi pɔkɔ kɛɛ ɩkɛyɛ mmɩlɩ munwala ɔzʋ̃mɩnlɛ egyima yɩ be. Kɛ ankɩ yɛkɛhã ndwokɔ be mɔɔ ɩkɛma yi padi kogolɔ nɩ, ɩsɛ kɛɛ yɛkã mɔɔ ɩva iziye yɩ anyɩ zʋ nɩ nwʋ odwokɔ baaba na yɛbʋwa yɩ.

KÃ WƲ NWƲ AZƖ

9-10. Mɩnla ɔhʋanɩ zʋ yɛ Gyisɛsɩ lalɩ kãnwʋazɩ kezile ali a?

⁹ Nunuma mɔɔ awulo kyɩ̃ a bokohũ Gyisɛsɩ nɩ, ihileli Pita nɩɩ asʋ̃mavʋlɔ nɣalɩyɛ nɩ kãnwʋazɩ nwʋ ozumalɛdɩyɛ be mɔɔ nwʋmɔ hyinyia paa. Gyisɛsɩ zʋ̃manlɩ Pita nɩɩ Dwɔɔnʋ kɛɛ bɔhɔ́ bedindiã nninyeni bɛma alɩyɛ mɔɔ itualɩ yɩ tʋ mɔɔ nɩ ɩ nɩɩ bɛ kɔwɔ numɔ keli wɔ azɩlɛ yɩ zʋ nɩ. Ɩkɛyɛ kɛɛ bɛvalɩ nduhũ nɩɩ kyɩansɩ mɔɔ bɛfa bɔwʋwʋ ngyɛvʋlɔ bɛ agyia nwʋ ansaana bɛali alɩyɛ sʋ̃ bɔhɔlɩ kɛ. Naasʋ̃ aninyia yɛ nɩ ɩkɛyɛ egyima eyi mɔɔ ɩba azɩ nɩ a?

¹⁰ Gyisɛsɩ ɩátwɩnhwɩ̃ yɩ agyia azɩ kɛɛ ɩkɛyɛ egyima eyi. Ɩlalɩ yɩ ali kɛɛ ɩwɔ kãnwʋazɩ kezile paa. Ɩyɛlɩ yɩ asʋ̃mavʋlɔ yɩ nnwʋánlɩ kɛɛ bɔnwʋnlɩ kɛɛ ɩyɛɛ nkɛlɛ egyima eyi. Gyisɛsɩ yɩlɩ yɩ sʋlɔ atalɩ mɔɔ igua yɩ zʋ nɩ, ɩvalɩ nduhũ ɩhyɩlɩ yɩ azɩ̃, idwonwɔnlɩ nzulo igualɩ kyɩansɩ yɩ nu, na ɩwɔlɩ yɩ tʋ kɛɛ ɩwʋwʋʋ bɛ agyia nwʋ. (Dwɔ. 13:​4, 5) Nɩ ikele mmɩlɩ na Gyisɛsɩ ɩahʋla ɩawʋwʋ asʋ̃mavʋlɔ 12 yɩ munwala bɛ agyia nwʋ, na ɩwʋwʋlɩ Dwudasɩ po mɔɔ nɩ ɩbayɩ yɩ kɛma nɩ yɩ agyia nwʋ. Naasʋ̃, Gyisɛsɩ zʋ̃ kãnwʋazɩ nu yɛlɩ egyima eyi iwieli. Akʋ̃ Gyisɛsɩ zʋ̃ abʋtalɩ nu hilehileli numɔ kɛɛ: “Asʋ̃ mʋnlʋmmɔ bɛtɩ mɔɔ mɩyɛ nɩ yɩ tʋ a? Mʋnlʋmmɔ bɔfʋlɛ mɩ Kilehilevʋlɔ nɩɩ Niibenyia, na ɩdɩ baaba sʋ̃ kɛɛ bɔkɔvʋlɛ mɩ ɔzɔ, iluwakɛɛ mɩdɩ ɔzɔ amba. Mɩdɩ mʋnlʋmmɔ be Niibenyia nɩɩ mʋnlʋmmɔ be Kilehilevʋlɔ, naasʋ̃ mʋwʋwʋ mʋnlʋmmɔ bɛ agyia nwʋ nkʋ̃kʋ̃. Ɩsɛ kɛɛ mʋnlʋmmɔzabɛ sʋ̃ bɔwʋwʋ bo nu ɔkʋ̃ bela yɩ agyia nwʋ nkʋ̃kʋ̃.”—Dwɔ. 13:​12-14.

11. Mɩnla ɔhʋanɩ zʋ yɛ Pita lalɩ yɩ ali kɛɛ izuma kɛɛ ɩkɛhã yɩ nwʋ azɩ a? (1 Pita 5:5) (Kila mfonyini yi sʋ̃.)

¹¹ Pita zumanlɩ kezimɔ Gyisɛsɩ kã yɩ nwʋ azɩ nɩ. Gyisɛsɩ hɔlɩ sʋlɔ mɛda nɩ, Pita yɛlɩ nnwʋánlɩdɩyɛ be, ɩzalɩ benyia be mɔɔ bɔwʋlɩ yɩ kɛɛ abubuwa nɩ adimakɛlɛ. (Egy. 1:​8, 9; 3:​2, 6-8) Ɔzɔ nnwʋánlɩdɩyɛ mɔɔ Pita yɛlɩ nɩ manlɩ mmenii sʋ̃maa ɣa dualɩ yɩ nwʋ yiyialɩ. (Egy. 3:11) Naasʋ̃ nɩ Pita ɩábɛ kɛɛ ide animinyiamɩ ɩma yɩ nwʋ ɩávalɩ nwʋmɔ kɛɛ dɩka mɔɔ bɛdɩdɩlɩ yɩ nɩ, nɩ dimalelɛ nɩɩ dibilɛ nwʋ hyinyia mmenii baaba paa nɩ. Meti Pita zʋ̃ kãnwʋazɩ nu valɩ animinyiamɩ munwatĩĩ manlɩ Gyehova nɩɩ Gyisɛsɩ, mmɩlɩ mɔ ɩhanlɩ kɛɛ: “Tumi nɩ mɔɔ ɩwɔ Gyisɛsɩ yi dima nɩ nu, ɩ nɩɩ dedi mɔɔ yɛlɛ yɩ wɔ ɔzɔ dima nɩ nu nɩ, mɛyɩ yɛ ɩma enii mɔɔ igyĩĩ mʋnlʋmmɔ bɛ anyunu ɛkɩhyɩ mɔɔ bɛzabɛ sʋ̃ bezi yɩ nɩ, yɩ nwʋ ɩza a.” (Egy. 3:​12-16) Pita hɛlɛlɩ kɛlɛta be manlɩ Kilisinyiamaa mɔɔ nɩ ɩfalɩ kezimɔ nwʋmɔ hyinyia kɛɛ yɛkɛla kãnwʋazɩ ali nwʋ. Ndwokɔ ankasa mɔɔ Pita va lili egyima wɔ yi odwokɔ yɩ nu nɩ, nɩ ɩdɩkɛɛ mɔɔ ɩkãã kɛɛ bowulá kãnwʋazɩ dɩkɛɛ atalɩ. Na eyi ma yɛkakɛ kezimɔ Gyisɛsɩ valɩ nduhũ hyɩlɩ yɩ azɩ̃ na ɩwʋwʋlɩ yɩ asʋ̃mavʋlɔ yɩ bɛ agyia nwʋ nɩ.—Kɩnga 1 Pita 5:5.

12. Kɛ ɩkɛyɛ na yɛahɔ zʋ yɛala kãnwʋazɩ ali kɛmɔ Pita yɛlɩ nɩ a?

¹² Sa yɛkʋla yesumazuma kezimɔ Pita hɔlɩ zʋlɔ lalɩ kãnwʋazɩ ali nɩ. Kakɛ kɛɛ, kɛ ndwokɔ mɔɔ abiye fa di egyima mmɩlɩ mɔ ɩtɩndɛɛ nkʋ̃ la yɛ ikile kɛɛ ɩkã yɩ nwʋ azɩ a. Odwokɔpɔkɔ mɔɔ Pita va gyinanlɩ kɛnɩ manlɩ “kãnwʋazɩ” nɩ ma yɛnwʋ kɛɛ, kãnwʋazɩ sʋ̃ kile kezimɔ yebu yɛ nwʋ nɩɩ mmenii mvʋlɔ. Yɛbʋwa mmenii mvʋlɔ iluwakɛɛ yɛdɔ Gyehova nɩɩ mmenii, na kɛ ɛhamvʋlɛ mɔɔ yɛpɛ kɛɛ bɛkamvʋ yɛ ti a. Sɛ yɛfa anyɩnlɩlelɛ yɛsʋ̃mɩ Gyehova na yɛbʋwa ye mmeliyema kɛmɔ yɛkɔhʋla na mmenii bɛánwʋ yɩ po a, nɩ yɛdaa yɩ ali kɛɛ yɛkã yɛ nwʋ azɩ.—Mt. 6:​1-4.

MA WƲ “ADWƖNƖ NU ƖLA KƐNƖ”

13. Sɛ bɛkã kɛɛ abiye yɩ “adwɩnɩ nu ɩla kɛnɩ” a, kɛ yɩ tʋ kile a?

¹³ Bɛkã kɛɛ abiye yɩ “adwɩnɩ nu ɩla kɛnɩ” a, kɛ yɩ tʋ kile a? (1 Pit. 4:​7, NWT) Kilisinyianii mɔɔ yɩ adwɩnɩ nu la kɛnɩ nɩ bɔ mmɔdɩnɩ kɛɛ ikezizi abɔkɔ mɔɔ ɩ nɩɩ Gyehova yɩ adwɩnɩ yiyia. Kilisinyianii mɔɔ ɩdɩ zɔ nɩ, izi kɛɛ dɩyɛ bela íni kɛnɩ mɔɔ nwʋmɔ hyinyia tɛla ɩ nɩɩ Gyehova avinli abusunwawɔlɛ. Iáwu yɩ nwʋ tɛla zʋlɔ, na ide itiã numɔ kɛɛ kɛ dɩyɛ bela yɛ izi a. Akʋ̃ sʋ̃, ɩzʋ̃ kãnwʋazɩ nu ɩta ɩbɔ Gyehova mpayɩ ɩfa ɩda yɩ ali kɛɛ ɩfa yɩ nwʋ itiã yɩ zʋ.a

14. Mɩnla yɛ Pita yɛlɩ mmɩlɩ be mɔɔ nɩ ikile kɛɛ ɩáfa yɩ nwʋ itiã Gyehova zʋ a?

¹⁴ Nunuma mɔɔ awulo kyɩ̃ a Gyisɛsɩ kowu nɩ, ɩwɔlɩ yɩ adʋwavʋlɔ yɩ kɔkɔ kɛɛ: “Nnɛ ohunluma yɩ bo munwatĩĩ bekeɣiandi bekediã mɩ ɛkɛnɩ.” Pita mɔɔ nɩ ide yɩ nwʋ idi nɩ wuwalɩ yɩ kɛɛ: “Sɛ mmenii bo munwatĩĩ bekediã wʋ ɛkɛnɩ po a, mamɩ mɛyɩ milétiã wʋ ɛkɛnɩ kyɩ̃!” Ɔzɔ nunuma nɩ, Gyisɛsɩ duli yɩ adʋwavʋlɔ nɩ be fʋlɔ kɛɛ: “Bɔwɩɛnɩ́, bɔwɔ́ mpayɩ.” (Mt. 26:​31, 33, 41) Sɛ Pita valɩ fʋlɔdulɛ eyi yɛlɩ egyima a, ankɩ aɣinzi yi ikenyia akɛnɣazɩzɩbɛ kɛhã kɛɛ ɩkɩnla Gyisɛsɩ yɩ adʋwavʋlɔ yɩ nwʋ. Naasʋ̃ Pita yɩlɩ Gyisɛsɩ manlɩ, na ɩyɛlɩ ɛyɛkɛ yɩ baaba.—Mt. 26:​69-75.

15. Nunuma mɔɔ awulo kyɩ̃ a Gyisɛsɩ kowu nɩ, mɩnla ɔhʋanɩ zʋ yɛ ɩlalɩ yɩ ali kɛɛ yɩ adwɩnɩ nu la kɛnɩ a?

¹⁵ Gyisɛsɩ valɩ yɩ nwʋ munwala dianlɩ Gyehova zʋ. Ɩávalɩ nwʋmɔ kɛɛ nɩ Gyisɛsɩ di munli nɩ, ɩwɔlɩ mpayɩ mbɔmɩ sʋ̃maa ansaana ibawu. Eyi manlɩ inyianlɩ akɛnɣazɩzɩbɛ ɩyɛlɩ mɔɔ Gyehova pɛ kɛɛ ɩyɛ nɩ. (Mt. 26:​39, 42, 44; Dwɔ. 18:​4, 5) Pɩlazunɛ bela íni nwʋmɔ kɛɛ, Pita yɩ ɛɣɛɛlɛ iáfi kezimɔ Gyisɛsɩ wɔlɩ mpayɩ mbɔmɩ sʋ̃maa wɔ ɔzɔ ohunluma yɩ kyɩ̃.

16. Mɩnla ɔhʋanɩ zʋ yɛ Pita lalɩ yɩ ali kɛɛ izuma kɛɛ ɩkɛma yɩ adwɩnɩ nu kɛla kɛnɩ a? (1 Pita 4:7)

¹⁶ Aɣinzi yi, Pita zumanlɩ kɛɛ ɩkɔhɔ zʋ kɛva yɩ nwʋ kediã Gyehova zʋ iluwa mpayɩwɔlɛ zʋ. Wɔ Gyisɛsɩ yɩ awudunwolɩyɛ mɛda nɩ, ɩhyɛlɩ Pita nɩɩ asʋ̃mavʋlɔ mɔɔ bɛha nɩ ɛzɩzɩbɛ kɛɛ bɛ sa kɛhã sunzuma nwanzanwanza yɩ na ɩawʋwa bɛ ma bɛayɛ bo odwokɔbahanlɛ egyima yɩ. Naasʋ̃ Gyisɛsɩ hanlɩ hileli bɛ kɛɛ ɩsɛ kɛɛ bɛdɩkɛ wɔ Gyelusalamɩ kɔbʋmɩ kɛɛ eyi kɛɣa numɔ. (Lk. 24:49; Egy. 1:​4, 5) Mɩnla yɛ Pita yɛlɩ mmɩlɩ mɔ ɩdɩkɛɛ nɩ a? Pita nɩɩ yɩ ɔhɔnwʋmmɔ Kilisinyiamaa yɩ hɔlɩ zʋlɔ “wɔlɩ mpayɩ.” (Egy. 1:​13, 14) Aɣinzi yi mɔɔ Pita hɛlɛlɩ yɩ kɛlɛta mɔɔ ili bɔmʋnlɩ nɩ, ɩhyɛlɩ yi mmeliyema Kilisinyiamaa ɛzɩzɩbɛ kɛɛ bɛmá bɛ adwɩnɩ nu la kɛnɩ na bɛva bɔ nwʋ bediã Gyehova zʋ wɔ mpayɩwɔlɛ nu. (Kɩnga 1 Pita 4:7.) Pita zumanlɩ kɛɛ ɩkɛva yɩ nwʋ kediã Gyehova zʋ na ɩɣa ɩyɛlɩ enii titili wɔ asafʋ yɩ nu.—Gal. 2:9.

17. Ɩávalɩ nwʋmɔ adʋmɩ akyɛdɩ bela mɔɔ yɛwɔ nɩ, mɩnla yɛ ihyinyia kɛɛ yɛkɔ zʋ yɛyɛ a? (Kila mfonyini yi sʋ̃.)

¹⁷ Sɛ yɛ adwɩnɩ nu kɔhʋla kɛla kɛnɩ a, ɩsɛ kɛɛ yɛta yɛbɔ Gyehova mpayɩ. Yezi kɛɛ ihyinyia kɛɛ yɛkɔ zʋ yɛbɔ Gyehova mpayɩ ɩávalɩ nwʋmɔ adʋmɩ akyɛdɩ bela mɔɔ yɛwɔ nɩ. Eyi ti, sɛ ɩsɛ kɛɛ yesizi abɔkɔ be mɔɔ nwʋmɔ hyinyia a, yɛbɔ Gyehova mpayɩ yɛpɩbɛ yɩ kɛnɩ ɔhʋanɩhilelɛ, iluwakɛɛ yede yedi kɛɛ izi mɔɔ ɩdɩ baaba ɩma yɛ.

18. Mɩnla yɛ ezi wʋ kɛnɣa kɛɛ ɛkɛyɛ a?

¹⁸ Ɩyɛ yɛ fɛ paa kɛɛ Gyehova ɩwɔ yɛ wɔ ɔhʋanɩ be zʋ mɔɔ ɩma yɛkʋla yɛda yi subanɩ azʋlɔtʋ yɩ be ali. (Gyn. 1:26) Ɩwɔ numɔ, yɛlɔ́kʋla kozumazuma Gyehova pɛpɛɛpɛ. (Ayɩ. 55:9) Naasʋ̃ dɩkɛɛ Pita nɩ, sa yɛkʋla yɛsɩnza kezimɔ yɛdwɩ̃ nɩ ma ɩ nɩɩ Gyehova yɩ adwɩnɩ yiyia. Bɛmá yɛhɔ zʋlɔ yezumazuma kezimɔ Nyamɩnlɩ dwɩ̃, yɛhã yɛ nwʋ azɩ, na yɛ adwɩnɩ nu ɩla kɛnɩ.