Asʋ̃ Amagadɔnʋ Kɔwɔ Yɩ Tʋ Wɔ Yizilaya a?—Mɩnla Yɛ Bayɩbʋlʋ Yɩ Kã a?

Bayɩbʋlʋ yɩ kilehile amagadɔnʋ nu kɛɛ, kʋnɛ mɔɔ ɩkɔhɔlɩ zʋlɔ wɔ enii aɣanɩ nɩɩ Nyamɩnlɩ avinli wɔ oyuwadɩ dɩka bela. Eyi kile kɛɛ kʋnɛ eyi lɔ́kɔlɩ zʋlɔ wɔ dɩka pɔkyɩɩ be.

• ‘Ɩdɩ ndwokɔ mɔɔ ɩzʋ̃ azunzuma tanɩ nɩ mmɔ bɛ kɛ na bɔkɔ awulombunli mɔɔ bɔwɔ azɩlɛ yɩ zʋ munwala bɛ kɛ, kɛɛ bokohunwaa bo munwa bɛkɛma Nyamɩnlɩ Tumivʋlɔ yɩ yi eɣile kezile nɩ. Na bohunwanlɩ hunwanlɩ bo munwa bɔhɔlɩ dɩka mɔɔ bɔfʋlɔ yɩ wɔ Hibulu nu kɛɛ Amagadɔnʋ nɩ.’—Yikile 16:14,16 NWT.

“Amagadɔnʋ” zʋ̃ Hibulu odwokɔ pɔkɔ be mɔɔ bɔfʋlɔ yɩ Har Meghid·dohnʹ, mɔɔ ikile “File Mɛgido.” Nɩ ɩdɩ twonwa be mɔɔ ibike ɔwɔkɩ Yizilaya. Eyi ti mbiyemmɔ dedi kɛɛ Amagadɔnʋ kʋnɛ yɩ kɔhɔlɩ zʋlɔ wɔ Yizilaya. Naasʋ̃ Mɛgido anzɛnyɩɩ yɩ apaa yɩ nu dɩka bela íni kɛnɩ mɔɔ “awulombunli mɔɔ bɔwɔ azɩlɛ yɩ zʋ munwala” nɩɩ bɛ azogyiamaa kɔhʋla kohunwa hunwa bo munwa wɔ kɛ.

Ndwokɔ mɔɔ ɩwɔ Yikile buuku yi nu dɩ ndwokɔ mɔɔ ikezi wɔ sɛnkyɩlɛdɩ ɔhʋanɩ zʋ. (Yikile 1:1) Amagadɔnʋ ɩ́dɩ dɩka pɔkyɩɩ be mfomi ɩdɩ mmɩlɩ mɔ oyuwadɩ aɣanɩ munwala kohunwa hunwa bo munwa kɛɛ botwodwuu bekediyia Nyamɩnlɩ yi tumililɛ.—Yikile 19:11-16, 19-21.