Mɩnla Mmɩlɩ Yɛ Kʋnɛ Tʋ Kodua a?—Mɩnla Yɛ Bayɩbʋlʋ Yɩ Kã a?

Wɔ Fʋlɔ, April 13, 2024 nɩ, Iran maa dʋlɩ hyɛlɩ Israel maa bɔ zʋ. Na eyi manlɩ Amanlɩ Amanlɩ Nkabomi bɛ ɛhɛlɛlɛvʋlɔ ebani be mɔɔ bɔfʋlɔ yɩ António Guterres hanlɩ kɛɛ, “Nnɛ yɛ ɩdɩ mmɩlɩ mɔ ɩsɛ kɛɛ yɛkã nsisi nɩɩ kʋnɛ azɩ a. Na ɩsɛ kɛɛ yɛbɔ mmɔdɩnɩ kɛɛ yɛkɛhyɛ yɛ nwʋ zʋ wɔ dɩyɛ bela nu.”

Kʋnɛ mɔɔ ɩkɔlɩɩ zʋ wɔ Middle East nɩ, ɩdɩ ndianwʋ ɔkʋ̃ mɔɔ ikile kɛɛ sikalɛ yɩ, kʋnɛ wuli zʋlɔ wɔ oyuwadɩ munwala.

“Nnɛ, basabasayɛlɛ mɔɔ ɩkɔlɩ zʋlɔ wɔ oyuwadɩ nɩ, ɩdɛla Oyuwadɩ Kʋnɛ Mɔɔ Ɩtɔ Zʋlɔ Anwɩ̃ yɩ po. Na ɛzɩkɛlɛ la yɛ ɩsɩkɛɛ nninyeni a. Mɔɔ isizii nɩ va mmenii kɛyɛ billion anwɩ̃ bɔ nnwʋanlɩ idiã asianɩ nu. Na sɛ ɛkyɛ bo nu anla a, eɣile bela bo nu ɔkʋ̃ wu iluwa kʋnɛ azʋlɔtʋ nɩ ti.”—United Nations Security Council, January 26, 2023.

Nnɩka azʋlɔtʋ mɔɔ kʋnɛ nɩɩ basabasayɛlɛ kɔlɩ zʋlɔ wɔ kɛnɩ yɩ be yɛ lɛ Israel, Gaza, Syria, Azerbaijan, Ukraine, Sudan, Ethiopia, Niger, Myanmar, nɩɩ Haiti.a

Mɩnla mmɩlɩ yɛ kʋnɛ tʋ kodua a? Asʋ̃ oyuwadɩ adumivʋlɔ kɔhʋla kɛma azʋ̃nudwolɩyɛ kɛɣa a? Mɩnla yɛ Bayɩbʋlʋ yɩ kã a?

Oyuwadɩ mɔɔ kʋnɛ hyɛ numɔ manlɩ

Basabasayɛlɛ mɔɔ isizii wɔ nnɩka nnɩka nɩ dɩ sɛnkyɩlɛdɩ mɔɔ ikile kɛɛ ɩlɛ́kyɛ kʋnɛ tʋ kodua kʋlaa kʋlaa. Kʋnɛ azʋlɔtʋ mɔɔ isizii nɩ ma Bayɩbʋlʋ nkɔmɩhyɛ mɔɔ ɩfalɩ yɛ mmɩlɩ eyi nwʋ nɩ ba numɔ. Bayɩbʋlʋ yɩ fʋlɔ yɛ mmɩlɩ eyi kɛɛ “oyuwadɩ yɩ awielɩyɛ.”—Matiyu 24:3.

• Bayɩbʋlʋ yɩ kã kɛɛ yɛ mmɩlɩ eyi nwʋ odwokɔ kɛɛ: ‘Bɛkɛdɩ kʋnɛ mɔɔ ibike bɛ. Manlɩ kodwodwu kediyia manlɩ yɛɛ bulombunlililɛ kodwodwu kediyia bulombunlililɛ.’—Matiyu 24:6, 7.

Kɩnga odwokɔ mɔɔ ise “Nneɛma Bɛn Na Esisi a Ɛbɛkyerɛ Sɛ Yɛwɔ “Awiei Mmere” Anaa “Nna a Edi Akyiri” No Mu?” na ɔkɔnwʋ kezimɔ kʋnɛ mɔɔ isizii nɩ ma Bayɩbʋlʋ nkɔmɩhyɛ ba numɔ.

Kʋnɛ be mɔɔ ɩkɛva kʋnɛ munwala ɩkɛɣa awielɩyɛ

Bayɩbʋlʋ yɩ hyɛ nkɔmɩ kɛɛ mmɩlɩ be kɛɣa mɔɔ basabasayɛlɛ tʋ kodua. Kɛ ɩkɛyɛ na eyi ɩayɛ bʋwɔ a? Mɔɔ ɩdɩ yɛ lɛ kɛɛ enii desanii bela íni kɛnɩ mɔɔ ɩkɔhʋla ɩkɛyɛ eyi, mfomi Amagadɔnʋ mɔɔ ɩdɩ “Nyamɩnlɩ Tumivʋlɔ yɩ yi eɣile kezile yi nu kʋnɛ” yɩ nɩ, yɛ Nyamɩnlɩ koluwa zʋlɔ kodu basabasayɛlɛ munwala tʋ a. (Yikile 16:14, 16) Kʋnɛ eyi kɛma Nyamɩnlɩ yi tile nu pɔkɔ mɔɔ mɛyɩ yɛ lɛ kɛɛ adasamaa kenyia azʋ̃nudwolɩyɛ daabaa nɩ kɛɣa nu.—Ndwomi 37:10, 11, 29.

Sɛ ɛpɛ kɛɛ ɔnwʋ sʋ̃maa falɩ Nyamɩnlɩ yɩ kʋnɛ mɔɔ ɩkɛva kʋnɛ munwala ɩkɛɣa awielɩyɛ yɩ nwʋ a, kɩnga odwokɔ mɔɔ ise “Mɩnla Yɛ Lɛ Amagadɔnʋ Kʋnɛ Yɩ a?”