Ukraine Kʋnɛ Yɩ Inyia Ɔlʋbɔ Ɔkʋ̃—Mɩnla Anyɩnlɩlazʋ Yɛ Bayɩbʋlʋ Yɩ Ɩfa Ɩma a?

Wɔ Yalɛ, February 24, 2023 nɩ, nɩ kʋnɛ mɔɔ ɩkɔlɩɩ zʋlɔ wɔ Ukraine nɩ inyia ɔlʋbɔ ɔkʋ̃. Amanɩyɛwɔlɛ azʋlɔtʋ be kile kɛɛ, Ukraine nɩɩ Russia azogyiamaa kɛyɛ 300,000 yɛ bohũhũ bɛ anzɛnyɩɩ bebilabila a, na manlɩmaa kɛyɛ 30,000 yɛ bosunzu kɛɛ bowu wɔ kʋnɛ yɩ nu a. Naasʋ̃ sa ɩkʋla ɩba yɩ kɛɛ bɔbʋ zɔ po.

Alɔbɔ odwokɔ yɛ lɛ kɛɛ, dɩyɛ bela iáhile kɛɛ kʋnɛ yɩ kɛɣa awielɩyɛ kakɩ yɩ.

• “Kɛyɛ ɔlʋbɔ ɔkʋ̃ yɛ dɩ yɛ Russia azogyiamaa hɔlɩ Ukraine bɔ zʋ a, na dɩyɛ bela iáhile kɛɛ kʋnɛ yɩ kɛɣa awielɩyɛ kakɩ yɩ. Dɩyɛ bela iáhile kɛɛ bo nu ɔkʋ̃ keli nkunimi wɔ kʋnɛ yɩ nu, na nhyɩhyɛlɩyɛ mɔɔ ɩkɛma azʋ̃nudwolɩyɛ kɛɣa bɛ avinli nɩ, bo nu bela ɩlɛ́yɛlɩ yɩ adwɩnɩ kɛɛ ikele ikediã nu.”—NPR (National Public Radio), February 19, 2023.

Iluwa ɛyɛkɛ nɩɩ amanɩyɛ mɔɔ kʋnɛ eyi nɩɩ kʋnɛ mvʋlɔ ɩva ɩɣa mmenii mɔɔ bɔ nwʋ íni odwokɔ zʋ nɩ ti, ɩma bɛ ɛɣɛɛlɛ ɩwɔ. Mɩnla anyɩnlɩlazʋ yɛ Bayɩbʋlʋ yɩ ɩfa ɩma a? Asʋ̃ kʋnɛ munwala yɩ tʋ kodua eɣile be a?

Kʋnɛ be mɔɔ ɩkɛva kʋnɛ munwala ɩkɛɣa awielɩyɛ

Bayɩbʋlʋ yɩ kã kʋnɛ be mɔɔ ɩlɛ́sɩkɛ adasamaa, mfomi ikele bɛ nɩ nwʋ odwokɔ. Bɔfʋlɔ ɔzɔ kʋnɛ yɩ Amagadɔnʋ, na bɛkã nwʋmɔ odwokɔ kɛɛ ɩdɩ “Eɣile nɩ mɔɔ Nyamɩnlɩ ikowuwa mmenii ndɛnɩ nɩ.” (Yikile 16:14, 16) Nyamɩnlɩ luwa ɔzɔ kʋnɛ yɩ zʋ ɩkɛyɩ enii yi aɣanɩ mɔɔ ɩva kʋnɛ sʋ̃maa ɩɣa wɔ nnɛ nɩ munwala wɔ kɛ. Sɛ ɛpɛ kɛɛ ɔnwʋ kezimɔ Amagadɔnʋ kɛva azʋ̃nudwolɩyɛ mɔɔ íni awielɩyɛ kɛɣa a, kɩnga ndwokɔ eyimmɔ:

• “Mɩnla Yɛ Lɛ Amagadɔnʋ Kʋnɛ Yɩ a?”

• “Amagadɔnʋ Dɩ Odwokɔba!”