Aninyia Yɛ Ikele Manlɩmaa Yɩ a?—Mɩnla Yɛ Bayɩbʋlʋ Yɩ Kã a?

Kɛmɔ Amanlɩ Amanlɩ Nkabomi wɔlɩ amanɩyɛ nɩ:

• Ɔzʋmɩ October 7 kɔbʋmɩ October 23, 2023 nɩ, mmenii mɔɔ bɔbʋ 6,400 yɛ bohunhunli bɛ wɔ Gaza-Israel kʋnɛ yɩ nu a, na mmenii 15,200 sʋ̃ bilabilalɩ, na bo nu sʋ̃maa dɩ mmenii mɔɔ bɛ́dɩ azogyiamaa. Akʋ̃ sʋ̃, bodu mmenii yaalɛ abʋmɩ abʋmɩ sʋ̃maa sʋ̃ wɔ bɛ abika nu.

• Babʋmɩ September 24, 2023 nɩ, bohũhũ mmenii 9,701 wɔ Russia nɩɩ Ukraine kʋnɛ yɩ nu na mmenii 17,748 sʋ̃ yɛ bebilabila wɔ Ukraine a.

Mɩnla anyɩnlɩlazʋ yɛ Bayɩbʋlʋ yɩ fa ma bɛzabɛ mɔɔ bɔnwʋʋ amanɩyɛ iluwa kʋnɛ ti nɩ a?

Sianti mɔɔ yɛwɔ anyɩnlɩlazʋ

Bayɩbʋlʋ yɩ hyɛ nkɔmɩ kɛɛ Nyamɩnlɩ kɛma “kʋnɛ keyiaki wɔ azɩlɛ yɩ munwala zʋ.” (Ndwomi 46:9) Ɩkɛva sʋlɔ aɣanɩ anzɛnyɩɩ bulombunlililɛ ɩkɛɣa ikeziye enii aɣanɩ iagyia nu. (Danɩyɛlɩ 2:44) Nyamɩnlɩ yi Bulombunlililɛ kɛma adasamaa nwʋ kɔdɔ bɛ.

Kila mɔɔ Gyisɛsɩ Kɩlayɩsɩ, mɔɔ ɩdɩ Nyamɩnlɩ yi Bulombunlililɛ zʋ Bulombunlililɛ nɩ kɛyɛ:

• “Ikele ehyinyianii mɔɔ isũ ɩpɩbɛ mmʋwalɩyɛ, kɔhyʋwabanɩ nɩɩ mɔɔ íni bʋwavʋlɔ nɩ. Ɩkɔnwʋ kɔhyʋwabanɩ nɩɩ ehyinyianii nwɔkɛ, na ikele ehyinyiamaa nnwʋanlɩ. Ikele bɛ wɔ nsisi nɩɩ basabasayɛlɛ nwʋ.”—Ndwomi 72:12-14.

Nyamɩnlɩ koluwa yi Bulombunlililɛ yɩ zʋ kɛyɩ ɛyɛkɛ nɩɩ amanɩyɛnwʋnlɛ mɔɔ kʋnɛ nɩɩ basabasayɛlɛ fa ba nɩ wɔ kɛ.

• “Ɩkɛbɩba bɛ anyɩ tʋ mmʋnlɩ munwala, na owulo íni kɛnɩ biyekʋ̃, na aɣɛlɛbɔ nɩɩ ozunɛ nɩɩ ɛyɛkɛ íni ɛkɛnɩ ebiyekʋ̃. Nninyeni dadampɔ nɩ bodua numɔ.”—Yikile 21:4.

Ɩlɛ́kyɛ Nyamɩnlɩ yi Bulombunlililɛ kɛva nzɩnzanlɩyɛ kezile kɛɣa azɩlɛ yɩ zʋ. Bayɩbʋlʋ yɩ hyɛlɩ ‘kʋnɛ nɩɩ kʋnɛ nwʋ amanɩyɛwɔlɛ’ mɔɔ yɛtɩ nwʋmɔ odwokɔ wɔ nnɛ nɩ nwʋ nkɔmɩ. (Matiyu 24:6) Mɔɔ ɩkɔlɩɩ zʋ nɩɩ ndwokɔ mvʋlɔ mɔɔ isizii nɩ da yɩ ali kɛɛ yɛda “awielɩyɛ mmɩlɩ yi nu” wɔ enii yɩ tumililɛ tʋ.—2 Timoti 3:1.