Yan Zabolotnyi/stock.adobe.com
BƆHƆ́ ƆZƲLƆ BƆWƖƐNƖ!
Amumuyɛ Hyɛ Oyuwadɩ Yi Nu Manlɩ—Mɩnla Yɛ Bayɩbʋlʋ Yɩ Kã Wɔ Nwʋ a?
Basabasayɛlɛ okuwu be mɔɔ bɔwɔ Haiti nɩ, nninyeni la yɛ bɛsɩkɛɛ a. Akʋ̃ sʋ̃, South Africa, Mexico, nɩɩ amanlɩ azʋlɔtʋ mɔɔ ɩwɔ Latin America nɩ bɔnwʋʋ amanɩyɛ iluwa basabasayɛlɛ mɔɔ ɩkɔlɩɩ zʋlɔ wɔ kɛnɩ nɩ ti. Nnɩka azʋlɔtʋ po mɔɔ basabasayɛlɛ ɩáhyɛda kɔlɩ zʋlɔ wɔ kɛnɩ, iluwa nwʋmɔ amanɩyɛwɔlɛ mɔɔ bɛtɩ nɩ ti, ɩma adwɩnɩndwɩnɩ hyɛ bɔ zʋ na bɛtɩ nɣanlɩ kɛɛ béni banɩwɔlɛ.
Mɩnla yɛ Bayɩbʋlʋ kã wɔ amumuyɛ mɔɔ ɩkɔlɩɩ zʋlɔ wɔ oyuwadɩ yi nu nɩ nwʋ a?
Bayɩbʋlʋ yɩ hyɛlɩ amumuyɛ nwʋ nkɔmɩ
Bayɩbʋlʋ yɩ hyɛlɩ nkɔmɩ kɛɛ amumuyɛ kɩnla “oyuwadɩ yɩ awielɩyɛ nwʋ sɛnkyɩlɛdɩ” nɩ nwʋ. (Matiyu 24:3) Mmɩlɩ mɔ Gyisɛsɩ Kɩlayɩsɩ ɩkãã nninyeni mɔɔ ikezizi wɔ awielɩyɛ mmɩlɩ yi nu nwʋ odwokɔ nɩ, ɩhanlɩ kɛɛ:
“Sianti yɛ lɛ kɛɛ, amumuyɛ ɩkɔzʋnɩ nɩ ti bo nu sʋ̃maa bɔ ɔlɔlɛ nu ikogo.”—Matiyu 24:12.
Bayɩbʋlʋ yɩ zia hyɛlɩ nkɔmɩ kɛɛ wɔ “awielɩyɛ mmɩlɩ yi nu nɩ,” yɛkɔnwʋ ‘mmenii mɔɔ bɛáhʋla bɛhyɛ bɔ nwʋ zʋ, bɔ nwʋ yɛ ɛyɛlɛ, bɛ anyɩ iáleli baabayɛlɛ nwʋ.’ (2 Timoti 3:1-5) Ɔzɔ angʋmidi subanɩ nɩ ti yɛ amumuyɛ wuli zʋlɔ zɛ yɩ a.
Naasʋ̃ anyɩnlɩlazʋ lɛ́sanlɩ kʋlaa. Bayɩbʋlʋ yɩ bɔ anʋhʋba kɛɛ ɩlɛ́kyɛ bela bɛkɛyɩ amumuyɛmaa wɔ kɛnɩ.
“Ɩha ɛgyɩkɩ̃ɩ̃ be nɩ tanɩyɛlɛmaa béni ɛkɛnɩ biyekʋ̃; Ɛkɛbɩbɛ dɩka mɔɔ nɩ bɔwɔ nɩ, Naasʋ̃ ɔlɔ́nwʋ bɛ. Naasʋ̃ kãnwʋazɩmaa kɔwʋwa azɩlɛ yɩ zʋ, Na bɛ anyɩ kele baaba wɔ azʋ̃nudwolɩyɛ sʋ̃maa nu.”—Ndwomi 37:10, 11.
Suma anyɩnlɩlazʋ mɔɔ ɩwɔ Bayɩbʋlʋ yi nu nwʋ ndwokɔ sʋ̃maa nɩɩ sianti mɔɔ ɔkɔhʋla kele keli kɛɛ nninyeni mɔɔ isizii wɔ nnɛ nɩ kile kɛɛ, Bayɩbʋlʋ nkɔmɩhyɛ inyiaa numɔɣalɛ. Kɩnga ndwokɔ eyimmɔ.
“A Real Hope for a Better Tomorrow”
“Nneɛma Bɛn Na Esisi a Ɛbɛkyerɛ Sɛ Yɛwɔ “Awiei Mmere” Anaa “Nna a Edi Akyiri” No Mu?”