Gyisɛsɩ Kodu Awukasɛmɩ Tʋ

Mmɩlɩ mɔ Gyisɛsɩ wɔ azɩlɛ yɩ zʋ nɩ, belili awohwi bedianlɩ yɩ zʋ, behyinli yi, bɛyɩlɩ yɩ bɛmanlɩ na bohunli yi ɛyɛkɛ ɛyɛkɛ. Eyi ti sɛ awukasɛmɩ nɩɩ ndɛnɩhyɩalɛ ti, yɛnwʋʋ amanɩyɛ a, ɩtɩ yɛtʋ paa. Nɩ odwokɔ bela íni yɩ nwʋ, naasʋ̃ ɩzʋ̃ yɩ ahʋnlɩnɩ nu ɩvalɩ yɩ nnwʋanlɩ ‘idianlɩ ɛkɛnɩ ɩva ileli mmenii sʋ̃maa.’ (Matiyu 20:28; Dwɔɔnʋ 15:13) Nyamɩnlɩ ɩyɩ Gyisɛsɩ kɛɛ yi Bulombunlililɛ yɩ zʋ Bulombunli, na ɩlɛ́kyɛ bela, Gyisɛsɩ kɛva ɔzɔ tumi mɔɔ ɩwɔ nɩ ɩkɛma awukasɛmɩ tʋ kodua wɔ azɩlɛ yɩ munwala zʋ.—Ayɩzaya 42:3.

Bayɩbʋlʋ yɩ kã kezimɔ azɩlɛ yɩ kɛyɛ mmɩlɩ mɔ Gyisɛsɩ idii tumi nɩ nwʋ odwokɔ kɛɛ:

• “Ɩha mmɩlɩ ɛgyɩkɩ̃ɩ̃ bela, nɩ tanɩyɛlɛmaa béni ɛkɛnɩ ebiyekʋ̃, ɛkɛbɩbɛ dɩka mɔɔ nɩ bɔwɔ, naasʋ̃ nɩ béni ɛkɛnɩ. Naasʋ̃ kãnwʋazɩmaa kɔwʋwa azɩlɛ yɩ zʋ, na bɛ anyɩ kele baaba wɔ azʋ̃nudwolɩyɛ sʋ̃maa nu.”—Ndwomi 37:10, 11.

Yɛkɛhã a, Gyisɛsɩ yɛ nninyeni sʋ̃maa ma yɛ, na ɩlɛ́kyɛ bela sʋ̃ ɩbayɛ sʋ̃maa ɩkɛhɩnla nwʋ. Kɛ yɛkɛyɛ na yɛahile nwʋmɔ anyɩnlɩzɔlɛ a? Ɔhʋanɩ ɔkʋ̃ yɛ lɛ kɛɛ, yekozuma “Nyamɩnlɩ yi Bulombunlililɛ nɩ nwʋ odwokɔba” yɩ nwʋ dɩyɛ sʋ̃maa. Ɔzɔ odwokɔ yɩ yɛ Gyisɛsɩ ɣa wɔlɩ nwʋmɔ ɛlawulo a. (Luuku 4:43) Kɩnga odwokɔ mɔɔ ise “Nyamɩnlɩ Yɩ Bulombunlililɛ Yɩ, Mɛyɩ Yɛ Lɛ Mɩnla a?”