Aninyia Yɛ Ɔkɔhʋla Ɛkɛva Wʋ Nwʋ Ekediã Yɩ Zʋ a?—Mɩnla Yɛ Bayɩbʋlʋ Yɩ Kã a?

Sɛ ede ebiye edi paa na sɛ ɩma wʋ sa sɩ azɩ a, ɩkʋla ɩma wu padi kolɔ. Ɔzɔ ti, mmenii sʋ̃maa minli anwʋlazʋ mɔɔ bɛlɛ yɩ wɔ  . . .

• manlɩwulɛmaa mɔɔ bɛáma mmenii nwʋ hyinyia bɛ nɩ.

• amanɩyɛwɔlɛmaa mɔɔ bɛpɩndɩ awohwi ndwokɔ nɩ.

• sayɩnsɩmaa mɔɔ bɛáma mmenii nwʋ hyinyia bɛ nɩ.

• nyamɩnlɩzʋ̃mɩnlɛ mbanimbani mɔɔ bɛfa bɔ nwʋ bowula manlɩwulɛndwokɔ nu tɛla kɛɛ bekegyina Nyamɩnlɩ yi agyia nu nɩ.

Mfʋmɩ bela íni nu kɛɛ abiye kehila yɩ nwʋ bʋwɔ wɔ mmenii mɔɔ ɩkɛva yɩ nwʋ ikediã bɔ zʋ nɩ nwʋ. Bayɩbʋlʋ yɩ bɔ yɛ kɔkɔ kɛɛ:

• “Áma ɛfa wʋ nwʋ tiã adumivʋlɔ zʋ, desanii bela lɔ́kʋla kele wʋ nnwʋanlɩ.”—Ndwomi 146:3.

Ebiye mɔɔ ɔkɔhʋla kɛva wʋ nwʋ kediã yɩ zʋ

 Bayɩbʋlʋ yɩ kã Gyisɛsɩ nwʋ odwokɔ kɛɛ sa ɔkʋla fa wʋ nwʋ tiã yi zʋ. Nɩ ɩ́dɩ enii baaba be kɛkɛ mɔɔ ɩwʋwalɩ azɩ alʋbɔ sʋ̃maa mɔ idua numɔ nɩ. Mfomi nɩ Nyamɩnlɩ yɩ́ Gyisɛsɩ kɛɛ “ikeli Bulombunli . . . , na yi Bulombunlililɛ ɩlɛ́ba awielɩyɛ kyɩ̃!” (Luuku 1:32, 33) Gyisɛsɩ yɛ ɩdɩ Nyamɩnlɩ yi Bulombunlililɛ yɩ zʋ Bulombunli a, na kakɩ yɩ po yɩ aɣanɩ yɩ zʋ̃ sʋlɔ idii dɩyɛ.—Matiyu 6:10.

• Sɛ ɛpɛ kɛɛ ɔnwʋ sianti mɔɔ ɔkɔhʋla ɛkɛva wʋ nwʋ kediã Gyisɛsɩ zʋ a, kɩnga ndwokɔ eyimmɔ “Hena Ne Onyankopɔn Ahenni No So Hene?” nɩɩ “Dɛn Na Onyankopɔn Ahenni Bɛyɛ?”