Gyisɛsɩ Kodu Ehyinyia Tʋ

Mmɩlɩ mɔ Gyisɛsɩ wɔ azɩlɛ yɩ zʋ nɩ ɩlalɩ ɔlɔlɛ kezile ali ihileli mmenii, titili ehyinyiamaa nɩɩ bɛzabɛ mɔɔ nɩ bɔ nwʋ hyɩlɩ bɛ nɩ. (Matiyu 9:36) Ɩvalɩ yɩ nnwʋanlɩ po ɩwɔlɩ afɔlɩ ɩmanlɩ adasamaa. (Matiyu 20:28; Dwɔɔnʋ 15:13) Nyamɩnlɩ ɩyɩ Gyisɛsɩ kɛɛ yi Bulombunlililɛ yɩ zʋ Bulombunli, na ɩlɛ́kyɛ bela, Gyisɛsɩ kɛva ɔzɔ tumi mɔɔ ɩwɔ nɩ ɩkɛma ehyinyia tʋ kodua wɔ azɩlɛ yɩ munwala zʋ.

Bayɩbʋlʋ yɩ kã mɔɔ Gyisɛsɩ kɛyɛ yɩ nwʋ odwokɔ wɔ ɔhʋanɩ kɩnlɩma zʋ kɛɛ:

• “Ma ilí kɔhyʋwabanɩmaa mɔɔ bɔwɔ mmenii nu nɩ bo odwokɔ ɩma bɛ, ma ilé ehyinyianii yɩ nnwuakula.”—Ndwomi 72:4.

Yɛkɛhã a, Gyisɛsɩ ɩyɛ nninyeni sʋ̃maa ma yɛ, na ɩlɛ́kyɛ bela sʋ̃ ɩbayɛ sʋ̃maa ɩkɛhɩnla nwʋ. Kɛ yɛkɛyɛ na yɛahile nwʋmɔ anyɩnlɩzɔlɛ a? Ɔhʋanɩ ɔkʋ̃ yɛ lɛ kɛɛ, yekozuma “Nyamɩnlɩ yi Bulombunlililɛ nɩ nwʋ odwokɔba” yɩ nwʋ dɩyɛ sʋ̃maa. Ɔzɔ odwokɔ yɩ yɛ Gyisɛsɩ ɣa wɔlɩ nwʋmɔ ɛlawulo a. (Luuku 4:43) Kɩnga odwokɔ mɔɔ ise “Nyamɩnlɩ Yɩ Bulombunlililɛ Yɩ, Mɛyɩ Yɛ Lɛ Mɩnla a?”