Mmenii Bɛále Manlɩwulɛmaa Bedi Dɔkʋ̃—Mɩnla Yɛ Bayɩbʋlʋ Yɩ Kã a?

Mmadʋlɛ mɔɔ ɩkɔhɔlɩ zʋlɔ wɔ 2024 ɔlʋbɔ yi nu wɔ oyuwadɩ munwala nɩ, ebiye lésili kyɩ̃. Naasʋ̃, anwʋlazʋ mɔɔ mmenii sʋ̃maa lɛ wɔ manlɩwulɛmaa bo nu nɩ hɔ azɩ kʋlaa.

• Beɣiziaɣizialɩ mmenii be ndwokɔ wɔ America, na bo nu sʋ̃maa hanlɩ kɛɛ, “manlɩwulɛmaa sʋ̃maa dɩ angʋmidi,” bɛ manlɩmaa nwʋ iáhyinyia bɛ.a—Pew Research Center, September 19, 2023.

Mmɩlantɩyɛ nɩɩ nɣɛdɛkɛ sʋ̃maa sʋ̃ bɛále manlɩwulɛmaa bedi.

• “Mɔɔ ihyinyia mmɩlantɩyɛ nɩɩ nɣɛdɛkɛ mɔɔ bɔwɔ kɛnɩ nnɛ nɩ yɛ lɛ kɛɛ bekenyia abiye mɔɔ ikeli bɛ ɔhawʋ nwʋ egyima. Naasʋ̃ mmɩlɩ mɔ beɣiziaɣizialɩ bo nu be ndwokɔ nɩ, bɛhanlɩ kɛɛ, bo odwokɔ ɩávalɩ manlɩwulɛmaa bɔ nwʋ.”—The New York Times, January 29, 2024.

• “Amanɩyɛwɔlɛmaa kile kɛɛ, mmɩlantɩyɛ nɩɩ nɣɛdɛkɛ lɛ dedi wɔ bɛzabɛ mɔɔ bɛfa vidiyo azʋlɔtʋ bokua sohyia midiya zʋ nɩ tɛla manlɩwulɛmaa.”—The Korea Times, January 22, 2024.

Asʋ̃ yɛkɔhʋla yekenyia manlɩwulɛmaa bo nu dedi kɛɛ bɔkɔhʋla bɛkɛma nninyeni kɛyɛ bʋwɔ a? Aninyia yɛ yɛkɔhʋla yekele yi yekeli a?

Kila bʋwɔ wɔ enii mɔɔ ekele yi keli nɩ nwʋ

Sɛ abiye si pɔkɔ kɛɛ, kɛ abiyela kɛkɛ yɛ ikele yi ikeli a, ɩ́dɩ tanɩ kʋlaa a. Bayɩbʋlʋ yɩ kã kɛɛ “enii mɔɔ ízi nɣɛlɛbɛ nɩ ide odwokɔ bela idi, naasʋ̃ nɣɛlɛbɛvʋlɔ mɛyɩ ɩdwɩnɩ agyiakɛ bela mɔɔ ikodu nɩ nwʋ.”—Ɛɣɛlɛwulɛ 14:15.

• Sɛ ɛpɛ kɛɛ ɔnwʋ kezimɔ ɛkɛbɩbɛlɩ odwokɔ be nu kɔnwʋ yɩ kɛɛ ɩdɩ nɔhʋanlɛ anzɛnyɩɩ awohwi a, kɩnga odwokɔ mɔɔ ise “Hwɛ Yiye Na Woannye Nsɛm Nyinaa Anni.”

Akʋ̃ sʋ̃, manlɩwulɛmaa po mɔɔ bedi nɔhʋanlɛ na bɛlɛ adwɩnɩba nɩ, kɛ debela yɛ bɔkɔhʋla bɛkɛyɛ a. Meti mɔɔ Bayɩbʋlʋ yɩ bɔ yɛ kɔkɔ kɛɛ:

• “Áma ɛfa wʋ ɛɣɛɛlɛ wula enii aɣanɩ nu; enii bela lɔ́kʋla kele wʋ nnwʋanlɩ.”—Ndwomi 146:3, Good News Translation.

Enii mɔɔ ɔkɔhʋla kele yi keli

Bayɩbʋlʋ ma yɛnwʋ kɛɛ, Nyamɩnlɩ ɩyɩ abiye mɔɔ ɩfata kɛɛ ili yɛ zʋ tumi, na yɛkɔhʋla yekenyia yi nu dedi paa. Mɛyɩ yɛ lɛ Gyisɛsɩ Kɩlayɩsɩ. (Luuku 1:32, 33) Gyisɛsɩ dɩ Nyamɩnlɩ yɩ Bulombunlililɛ yɩ zʋ Bulombunli. Ɔzɔ Bulombunlililɛ yɩ dɩ aɣanɩ be mɔɔ ɩwɔ sʋlɔ, na ikeli adasamaa zʋ tumi.—Matiyu 6:10.

• Sɛ ɛpɛ kɛɛ ɔnwʋ kezimɔ ekenyia Gyisɛsɩ nu anwʋlazʋ nɩɩ mɔɔ ɩkɛyɛ ɩkɛva ikeli yɛ ɔhawʋ azʋlɔtʋ nwʋ egyima a, kɩnga ndwokɔ eyimmɔ “Hena Ne Onyankopɔn Ahenni No So Hene?” nɩɩ “Dɛn na Onyankopɔn Ahenni Bɛyɛ?”