Manlɩwulɛ Nu Basabasayɛlɛ—Mɩnla Yɛ Bayɩbʋlʋ Yɩ Kã Wɔ Nwʋ a?

Manlɩwulɛ nu basabasayɛlɛ wuli zʋlɔ na ɩva ɔhawʋ sʋ̃maa ɩɣa oyuwadɩ yɩ ɔfʋã dɩka bela.

• Ɔzʋ̃mɩ 2023 kɔbʋmɩ 2024 nɩ, manlɩwulɛmaa mɔɔ bɔwɔ Mexico mɔɔ begyinanlɩ kɛɛ bɔdʋ́ mma bɛma nɩ, bo nu 39 yɛ bohunhunli bɛ a. Odwokɔ eyi be lésili kyɩ̃. Sɛ yɛfa mɛyɩ yetiã ahanlɩ a, basabasayɛlɛ mvʋlɔ sʋ̃ hɔlɩ zʋlɔ mɔɔ ɩ́dɩ odwokɔ ɣalɛ kʋlaa.

• Europe sʋ̃ iluwaa manlɩwulɛndwokɔ ti, aɣile asã yɩ basabasayɛlɛ kɔlɩ zʋlɔ wɔ kɛnɩ paa. Na wɔ May 15, 2024 nɩ, ɩka ɛgyɩkɩ̃ɩ̃ be ankɩ bokũ manlɩ ebani mɔɔ ɩwɔ Slovakia nɩ.

• Wɔ September 15, 2024 sʋ̃ nɩ, ɩha ɛgyɩkɩ̃ɩ̃ be la ankɩ bokũũ Donald Trump mɔɔ nɩ ɩdɩ United States maa bɛ manlɩ ebani nɩ. Eyi dɩ yɩ mbɔmɩ anwɩ̃ zʋ mɔɔ ankɩ bɛpɛ kɛɛ bokũ. Na odwokɔ eyi yɛ mmenii sʋ̃maa asibɔnwʋ.

Mɩnla ti mɔɔ manlɩwulɛ nu basabasayɛlɛ wuli zʋlɔ zɛ yɩ a? Asʋ̃ yɩ tʋ kodua a? Mɩnla yɛ Bayɩbʋlʋ yɩ kã wɔ nwʋ a?

Bayɩbʋlʋ yɩ hyɛlɩ nkɔmɩ kɛɛ, manlɩwulɛndwokɔ ti mmenii nu kɛhyɩhyɛ

Bayɩbʋlʋ yɩ fʋlɔ mmɩlɩ mɔ yɛwɔ numɔ yɩ kɛɛ “awielɩyɛ mmɩlɩ.” Na ɩkã kɛɛ, ɔzɔ mmɩlɩ yɩ nu nɩ, mmenii kenyia subanɩ azʋlɔtʋ be mɔɔ ɩlɛ́ma bɛ nɩɩ mmenii mvʋlɔ kɛyɛ adwɩnɩ wɔ nninyeni nwʋ na ɩkɔhɔ ɩkɛva basabasayɛlɛ sʋ̃ ɩkɛɣa.

• ‘Awielɩyɛ mmɩlɩ yi nu nɩ, mmɩlɩ mɔ numɔ yɛ sɩ kɛɣa. Iluwakɛɛ mmenii kɛyɛ boniayɛmaa, belédi nɔhʋanlɛ, mmenii mɔɔ bɛáhʋla bɛ nɩɩ bɛ yɛ nhyɩhyɛlɩyɛ, bɔ nwʋ kɛyɛ ɛyɛlɛ, bɛbayɩ mmenii mvʋlɔ bɛkɛma, bɛ azʋ̃ kɛyɛ sɩ, mmenii mɔɔ botu bɔ nwʋ.’—2 Timoti 3:1-4.

Bayɩbʋlʋ yɩ zia hanlɩ kɛɛ yɛ mmɩlɩ zʋ nɩ, manlɩwulɛ nu basabasayɛlɛ kowuli zʋlɔ na mmenii kodwodwu kediyia aɣanɩ yɩ. (Luuku 21:9) Naasʋ̃ anyɩnlɩlelɛ odwokɔ yɛ lɛ kɛɛ, mmenii nu nkyɩkyɛmi mɔɔ manlɩwulɛndwokɔ va ɣa nɩ lɔ́kɔlɩ zʋlɔ daabaa.

Manlɩwulɛ nu basabasayɛlɛ tʋ kodua

Bayɩbʋlʋ yɩ ma yɛnwʋ kɛɛ, Nyamɩnlɩ kɛva yɩ aɣanɩ mɔɔ ɩwɔ sʋlɔ nɩ kɛɣa keziye enii aɣanɩ yɩ agyia nu.

• ‘Sʋlɔ Nyamɩnlɩ nɩ kebigyia bulombunlililɛ be sʋlɔ, na ikowuwu bulombunlililɛ azʋlɔtʋ yɩ [mɔɔ ɩha yɩ] munwala ma ɩkɛzã, na mɛyɩ dɩyɛ ikegyina daabaa.’—Danɩyɛlɩ 2:44.

Nyamɩnlɩ yɩ Bulombunlililɛ kɛma ɔkʋ̃yɛlɛ kɛɣa mmenii munwala bɛ avinli na ɩkɛma azʋ̃nudwolɩyɛ kowuli zʋlɔ wɔ azɩlɛ yɩ zʋ dɩka bela.

• Gyisɛsɩ Kɩlayɩsɩ yɛ ɩdɩ Nyamɩnlɩ yɩ Bulombunlililɛ yɩ zʋ bulombunli a, na bɔfʋlɔ yɩ kɛɛ “Azʋ̃nudwolɩyɛ Bulombunli.” Ikehila kɛɛ ‘azʋ̃nudwolɩyɛ tʋ lótua kyɩ̃.’—Ayɩzaya 9:6, 7.

• Nnɛ po nɩ, Nyamɩnlɩ ikilehilee bɛzabɛ mɔɔ yɩ Bulombunlililɛ yɩ di bɔ zʋ nɩ ma bɔkɔnwʋ kezimɔ bɛ nɩɩ mmenii kɔwʋwa azʋ̃nudwolɩyɛ nu. Meti Bayɩbʋlʋ yɩ kã kɛɛ: “Bɛkɛva bɛ apʋka bɛkɛyɛ ahwamɛ na bɛava bɛ kaama bɛayɛ koone. Manlɩ be lɔ́twɩ̃ apʋka wɔ manlɩ fʋlɔ zʋ na bolósuma kʋnɛ dɔkʋ̃.”—Ayɩzaya 2:3, 4.

Sɛ ɛpɛ kɛɛ ɔnwʋ eyi nwʋ ndwokɔ sʋ̃maa a, kɩnga odwokɔ mɔɔ ise “What Will God’s Kingdom Accomplish?” Na kila vidiyo mɔɔ ise Mɩnla Yɛ Lɛ Nyamɩnlɩ Bulombunlililɛ Nɩ a?