Asʋ̃ Olympics Ɛɣɛlɛlilɛ Yɩ Kɔhʋla Kɛhã Mmenii Kɔwɔ Nu Amba a?—Mɩnla Yɛ Bayɩbʋlʋ Yɩ Kã a?

Mmenii kɛyɛ abʋmɩ abʋmɩ anlu yɛ bekehila 2024 Olympics ɛɣɛlɛlilɛ yɩ a. Na bɛzabɛ mɔɔ bokodu ɔzɔ tɔlɔnwa yɩ nɩ, bɔzʋ̃ amanlɩ 206 zʋ. Thomas Bach mɔɔ ɩdɩ ebani mɔɔ ɩla International Olympic Committee yi munwa nɩ hã kɛɛ: “Egyimalilɛ eyi kɛma ɔkʋ̃yɛlɛ nɩɩ azʋ̃nudwolɩyɛ kɛɣa amanlɩ amanlɩ avinli.” Izia ɩhanlɩ kɛɛ, “Bɛmá ye munwala yɛva yɛ nwʋ yewula Olympics eyi nu, iluwakɛɛ yɩ bʋtayɩ yɛ lɛ kɛɛ ɩkɛma ɔkʋ̃yɛlɛ nɩɩ azʋ̃nudwolɩyɛ kɛɣa mmenii avinli ɩávalɩ nwʋ kɛɛ ɩsʋnɩ dɩka mɔɔ abiyela zʋ̃ nɩ.”

Asʋ̃ Olympics ɛɣɛlɛlilɛ yɩ kɔhʋla kodwu bʋtayɩ kezile eyi nwʋ a? Asʋ̃ mmɩlɩ be kɛɣa mɔɔ azʋ̃nudwolɩyɛ nɩɩ ɔkʋ̃yɛlɛ ankasa kɛɣa mmenii avinli a?

Asʋ̃ ɩkɛma azʋ̃nudwolɩyɛ nɩɩ ɔkʋ̃yɛlɛ kɛɣa a?

Ɔlʋbɔ eyi Olympics ɛɣɛlɛlilɛ yɩ ma mmenii bɛ adwɩnɩ hɔ nninyeni sʋ̃maa zʋ. Ɩva nkyɩkyɛmi ɩɣa mmenii nɩɩ manlɩyɛlɛ okuwu azʋlɔtʋ bɛ avinli. Ndwokɔ mɔɔ ɩva nkyɩkyɛnu ɩɣa yɩ be yɛ lɛ enii yɩ fanwʋdi, mmenii nu nyiyimi, ɔzʋ̃mɩnlɛ nu nkyɩkyɛmi, yɛɛ mmenii mɔɔ bobu bɛ animitiyia.

Ɛɣɛlɛ azʋlɔtʋ mɔɔ amanlɩ amanlɩ bɔ numɔ di dɩkɛɛ Olympics nɩ ma mmenii anyɩ de. Naasʋ̃ ɩáva azʋ̃nudwolɩyɛ nɩɩ ɔkʋ̃yɛlɛ ɩba, mfomi ɩhyɛ subanɩ azʋlɔtʋ mɔɔ ɩfa nkyɩkyɛmi ɩba nwʋ ɛzɩzɩbɛ.

Bayɩbʋlʋ yɩ hanlɩ subanɩ mɔɔ ɩkɛma ɩkɛyɛ sɩ kɛɛ ɔkʋ̃yɛlɛ kɛɣa mmenii avinli wɔ nnɛ nwʋ odwokɔ. (2 Timoti 3:1-5) Sɛ ɛpɛ kɛɛ ɔnwʋ ɔzɔ nkɔmɩhyɛ yɩ nwʋ ndwokɔ sʋ̃maa a, kɩnga odwokɔ mɔɔ ise “Did the Bible Predict the Way People Think and Act Today?”

Mɔɔ ɩkɛma ɔkʋ̃yɛlɛ nɩɩ azʋ̃nudwolɩyɛ ankasa kɛɣa

Bayɩbʋlʋ yɩ ma yenyia anyɩnlɩlazʋ kɛɛ azʋ̃nudwolɩyɛ nɩɩ ɔkʋ̃yɛlɛ ankasa bɛaɣa oyuwadɩ munwala. Ɩbɔ anʋhʋba kɛɛ, mmenii munwala kɛyɛ ɔkʋ̃ wɔ sʋlɔ aɣanɩ be mɔɔ bɔfʋlɔ yɩ “Nyamɩnlɩ yɩ Bulombunlililɛ” nɩ yɩ tumililɛ tʋ.—Luuku 4:43; Matiyu 6:10.

Ɔzɔ Bulombunlililɛ yɩ zʋ Bulombunli yɛ lɛ Gyisɛsɩ Kɩlayɩsɩ na ikehila ma azʋ̃nudwolɩyɛ kɛɣa oyuwadɩ munwala. Bayɩbʋlʋ yɩ kã kɛɛ:

• “Ɛdɩnɣɛlɛmaa kebazi, na azʋ̃nudwolɩyɛ sʋ̃maa kɛɣa.”—Ndwomi 72:7.

• ‘Ikele ehyinyianii mɔɔ isũ ɩpɩbɛ mmʋwalɩyɛ nɩ, ikele bɛ wɔ nsisi nɩɩ basabasayɛlɛ nwʋ.’—Ndwomi 72:12, 14.

Nnɛ po, Gyisɛsɩ yɩ ehilehilelɛ hã mmenii abʋmɩ abʋmɩ mɔɔ bɔwɔ amanlɩ 239 zʋ wɔ nu. Gyehova Dasɩvʋlɔmaa mɔɔ yɛwɔ oyuwadɩ dɩka bela bɔ mmɔdɩnɩ kɛɛ yɛ nɩɩ mmenii kɔwʋwa azʋ̃nudwolɩyɛ nu. Sɛ ɛpɛ kɛɛ ɔnwʋ mɔɔ ɩbʋwa yɛ a, kɩnga Ɔwɩɛnɩlɛ Aɣanɩ mɔɔ yɩ odwokɔtile se “Yebetumi Adi Ɔtan So Nkonim.”