Mɩnla Ti Mɔɔ Manlɩwulɛndwokɔ Kyɩkyɛ Mmenii Nu Zɛ Yɩ a?—Mɩnla Yɛ Bayɩbʋlʋ Yɩ Kã a?

Wɔ oyuwadɩ munwala nɩ, manlɩwulɛndwokɔ kyɩkyɛ mmenii nu. Okuwu be mɔɔ bɔfʋlɔ yɩ Pew Research Center yɛlɩ ɛbɩbɛlɛnu be wɔ ɔlʋbɔ 2022 nu na ɩhanlɩ kɛɛ, “mmenii mɔɔ bɛ anyɩ dɩ mɔɔ bɔwɔ amanlɩ 19 mɔɔ bɛyɛlɩ ɛbɩbɛlɛnu wɔ numɔ nɩ, bo nu 65% hanlɩ kɛɛ, mɩádɩ-mʋ-nwʋ-tʋ kezile be la bɛzabɛ mɔɔ bɔwɔ paati azʋlɔtʋ mɔɔ ɩwɔ bɛ manlɩ yi nu nɩ bɛ avinli paa.”

Asʋ̃ ɔnwʋ yɩ wɔ dɩka mɔɔ ɛda nɩ kɛɛ, manlɩwulɛndwokɔ mɔɔ ɩtɩdɩ mmenii nu nɩ ɩtɛlɛɛ a? Mɩnla ti a? Mɩnla kɔhʋla kezi yi munwa a? Sunzu mɔɔ Bayɩbʋlʋ yɩ kã nɩ nwʋ kila.

Subanɩ mɔɔ ɩkyɩkyɛ mmenii nu

Bayɩbʋlʋ yɩ hanlɩ yɛ mmɩlɩ yɩ nwʋ odwokɔ kɛɛ ɩdɩ “awielɩyɛ mmɩlɩ.” Ɔzɔ ti, mmenii sʋ̃maa kenyia subanɩ mɔɔ ɩkɛma ɩkɛyɛ sɩ kɛɛ bɛkɛyɛ ɔkʋ̃.

• “Awielɩyɛ mmɩlɩ yi nu nɩ, mmɩlɩ mɔ numɔ yɛ sɩ kɛɣa. Iluwakɛɛ mmenii bɛbayɛ angʋmidi, . . . mmenii mɔɔ bɛáhʋla bɛ nɩɩ bɛ yɛ nhyɩhyɛlɩyɛ.”—2 Timoti 3:1-3.

Ɩávalɩ nwʋmɔ mmɔdɩnɩ mɔɔ mmenii bɔ kɛɛ bɛkɛma enii aɣanɩ kɛyɛ bʋwɔ nɩ, bɛlanwʋ la bɛánwʋ zʋ. Ɩyɛ sɩ ɩma mmenii mɔɔ bɛ adwɩnɩ iáyiyia nɩ kɛɛ bɔkɔwɔ nu bɛkɛyɛ egyima na akʋ̃ bɛaziyeziye bɛ avinli ndwokɔ po. Mɔɔ ɩzʋ̃ numa ɩɣa nɩ si odwokɔ eyi mɔɔ Bayɩbʋlʋ hanlɩ dianlɩ kɛnɩ dadaada nɩ zʋ owudo.

• “Enii di enii zʋ ma iwieli yi tanɩ.”—Odwokɔhanlɛvʋlɔ 8:9.

Naasʋ̃ Bayɩbʋlʋ yɩ fa yi munwa awudo ma, ɩkã aɣanɩ be mɔɔ enii mɔɔ idi zʋ nɩ, ɩlɛ tumi mɔɔ ɩkɔhʋla ɩkɛyɩ mmenii nu nkyɩkyɛmi mɔɔ yeyiyia wɔ oyuwadɩ nnɛ nɩ wɔ kɛnɩ nwʋ odwokɔ.

Anyunumililɛvʋlɔ mɔɔ ɩfata mɔɔ ɩdwɩnɩ enii nwʋ

Bayɩbʋlʋ yɩ da anyunumililɛvʋlɔ mɔɔ ɩfata paa ali ikile yɛ: mɛyɩ yɛ lɛ Gyisɛsɩ Kɩlayɩsɩ. Gyisɛsɩ lɛ tumi, ɔnwʋmɔ ɔhʋanɩ, nɩɩ ɛpɛ mɔɔ ɩkɛma adasamaa kenyia azʋ̃nudwolɩyɛ na bɛayɛ ɔkʋ̃.

• “Ɩ mmɩlɩ zʋ nɩ ɛdɩnɣɛlɛmaa kebazi, na azʋ̃nudwolɩyɛ sʋ̃maa kɛɣa.”—Ndwomi 72:7.

• “Amanlɩ amanlɩ yɩ munwala kɔzʋ̃mɩ yɩ.”—Ndwomi 72:11.

Gyisɛsɩ dɩ anyunumililɛvʋlɔ mɔɔ ɩfata paa iluwakɛɛ ɩdwɩnɩ mmenii nwʋ na ɩpɛ kɛɛ ɩbʋwa bɛ, yi titili nɩ bɛzabɛ mɔɔ bezizi bɛ nɩ.

• “Ikele ehyinyianii mɔɔ isũ ɩfʋlɛ yɩ nɩ, nɩɩ kwahwɩhwɩnii nɩɩ mɔɔ íni bʋwavʋlɔ nɩ. Ɩkɔnwʋ kwahwɩhwɩnii nɩɩ ehyinyianii nwɔkɛ, na ikele ehyinyiamaa nnwʋanlɩ. Ikele bɛ wɔ nsisi nɩɩ atinuzɩzɩbɛ ndwokɔ nu.”—Ndwomi 72:12-14.

Suma Nyamɩnlɩ yɩ Bulombunlililɛ, sʋlɔ aɣanɩ mɔɔ Gyisɛsɩ dɩ yɩ anyunumililɛvʋlɔ nɩ nwʋ dɩyɛ sʋ̃maa. Pɩbɛlɩ kezimɔ ekegyina yi tumililɛ yɩ mɛda nɩɩ mfasʋ mɔɔ ekenyia wɔ zʋ.

• Kila vidiyo mɔɔ ise Mɩnla Yɛ Lɛ Nyamɩnlɩ Bulombunlililɛ Nɩ a?

• Kɩnga odwokɔ mɔɔ ise “Nyamɩnlɩ Yɩ Bulombunlililɛ—Aɣanɩ Mɔɔ Nsisi Bela Íni Numɔ.”