Asʋ̃ Aɣanɩ Be Wɔ Kɛnɩ Mɔɔ Ɩkɔhʋla Ikeli Azɩlɛ Yɩ Zʋ Tumi Daabaa a?—Mɩnla Yɛ Bayɩbʋlʋ Yɩ Kã a?

Aɣanɩ azʋlɔtʋ mɔɔ bɔwɔ oyuwadɩ yɩ nu nɩ, ɛzɩnzanlɩ la yɛ bɛsɩnzaa bɛ a, meti ɩáma nninyeni kɔ bʋwɔ ma bɛ kʋlaa. Aɣanɩ azʋlɔtʋ mɔɔ ɩdɩ kɛɛ mɔɔ beli tumi bɛhyɛ wɔ amanlɩ be zʋ po nɩ, ɩyɛ na sɛ bɛbadʋ mma a, nɩ bo kunlu du kɛɛ ebiye a bokodu bɛ wɔ dɩyɛ zʋ. Akʋ̃ sʋ̃, bɛtɩndɛ betiyia bɛ, bɔwʋdʋwʋdʋ bɛ, bɛtɩ bɔ zʋ atunwa, na manlɩwulɛ okuwu mvʋlɔ sʋ̃ bɛ nɩɩ bɛ sũ pɩla.

Bayɩbʋlʋ yɩ ma yɛnwʋ kɛɛ, aɣanɩ ɔkʋ̃ be wɔ kɛnɩ mɔɔ idi tumi daabaa. Na ɩkɛyɛ kɛɛ ɛdɩ ɔzɔ aɣanɩ yɩ nwʋ odwokɔ po kyɩ̃. Mɛyɩ yɛ lɛ aɣanɩ mɔɔ Gyisɛsɩ hanlɩ nwʋmɔ odwokɔ wɔ mpayɩ mɔɔ ihileli yɩ adʋwavʋlɔ yɩ nu nɩ.

• “Ɔzɔ ti sɛ mʋnlʋmmɔ bɔbɔɔ mpayɩ a, bɔwɔ́ yɩ zɛ: ‘Yɛ Zɩ mɔɔ ɔwɔ sʋlɔ, ma yɛva annidi yɛwɔ́ wu dima. Wu Bulombunlililɛ ɩɣɩla, bɛyɛ́ wʋ apɛdɩ wɔ azɩlɛ yɩ zʋ, kɛmɔ bɛyɛ yɩ wɔ sʋlɔ nɩ.’”—Matiyu 6:9, 10.

Mɩnla yɛ Bayɩbʋlʋ kã falɩ ɔzɔ Bulombunlililɛ yɩ nwʋ a?

Ɔzɔ Bulombunlililɛ yɩ dɩ aɣanɩ mɔɔ idi tumi daabaa

Ɔzɔ Bulombunlililɛ yɩ wɔ sʋlɔ.

• Gyisɛsɩ vʋlɔlɩ ɔzɔ aɣanɩ yɩ kɛɛ “sʋlɔ Bulombunlililɛ.” (Matiyu 4:17; 5:3, 10, 19, 20, New World Translation) Meti ntɩyasɩ wɔ numɔ kɛɛ ɩhanlɩ kɛɛ: “Mu Bulombunlililɛ nɩ íni oyuwadɩ eyi nu.”—Dwɔɔnʋ 18:36.

Bulombunlililɛ nɩ kɛɣa keziye enii aɣanɩ yɩ agyia nu.

• Bayɩbʋlʋ yɩ kã kɛɛ: ‘Bulombunlililɛ eyi kowuwu [enii] yi bulombunlililɛ azʋlɔtʋ yɩ munwala ma ɩkɛzã, na mɛyɩ dɩyɛ ikegyina daabaa.’—Danɩyɛlɩ 2:44.

Bulombunlililɛ eyi mɔɔ Gyisɛsɩ Kɩlayɩsɩ di zʋlɔ bulombunli nɩ, bɛlɛ́sɩkɛ yɩ kyɩ̃.

• Bayɩbʋlʋ yɩ kã kɛɛ: “Yi tumililɛ dɩ tumililɛ mɔɔ ɩwɔ kɛnɩ daabaa mɔɔ ilótua numɔ kyɩ̃, na bɛlɛ́sɩkɛ yi bulombunlililɛ kyɩ̃.”—Danɩyɛlɩ 7:13, 14.

Bulombunlililɛ yɩ kɛma azʋ̃nudwolɩyɛ kɛɣa azɩlɛ yɩ zʋ, na yekenyia banɩwɔlɛ.

• Bayɩbʋlʋ yɩ kã kɛɛ: “Abiyela kɛva azʋ̃nudwolɩyɛ kɔwʋwa yɩzayɩ yɩ nwanyɩ egyini nu nɩɩ yɩ fɩgɩ nnuno tʋ, na abiyela lówunlawunla bɛ.”—Mika 4:4, Good News Translation.

Suma sʋ̃maa falɩ Bulombunlililɛ yɩ nwʋ

Mmɩlɩ mɔ nɩ Gyisɛsɩ wɔ azɩlɛ yɩ zʋ nɩ, ɩvalɩ yɩ mmɩlɩ sʋ̃maa nɩ la “ɩhanlɩ Odwokɔba nɩ mɔɔ ɩfalɩ Nyamɩnlɩ yi Bulombunlililɛ nɩ nwʋ.” (Matiyu 9:35) Izia ɩhyɛlɩ nkɔmɩ kɛɛ:

• “Bɔkɔwɔ Odwokɔba eyi mɔɔ ɩfalɩ Nyamɩnlɩ Bulombunlililɛ nɩ nwʋ ɛlawulo wɔ oyuwadɩ yɩ dɩka bela, ama abiyela ɩadɩ Odwokɔba nɩ na akʋ̃ awielɩyɛ nɩ ɩaɣa.”—Matiyu 24:14.

Nnɛ, bɛkãã Bulombunlililɛ yɩ nwʋ odwokɔba yɩ wɔ amanlɩ mɔɔ ɩbʋ 240 zʋ. Yɛhyɛɛ wʋ ɛzɩzɩbɛ kɛɛ, suma aɣanɩ eyi nwʋ ndwokɔ sʋ̃maa nɩɩ kezimɔ ekenyia yi tumililɛ yɩ zʋ mfasʋ.

Yesiãã wʋ, kila vidiyo mɔɔ ise Mɩnla Yɛ Lɛ Nyamɩnlɩ Bulombunlililɛ Nɩ a?