Sɛ Yewu a, Mɩnla Yɛ Isi a?

Mɔɔ Bayɩbʋlʋ yɩ kã

Bayɩbʋlʋ yɩ ka kɛɛ: “Bɛzabɛ mɔɔ bɛda azɩ nɩ bezi kɛɛ bokowu, naasʋ̃ awuvʋlɔ dɩyɛ, bézi dɩyɛ bela.” (Odwokɔhanlɛvʋlɔ 9:5; Ndwomi 146:4) Ɔzɔ ti sɛ yewu a, yéni nnwʋanlɩ nu dɔkʋ̃. Awuvʋlɔ bɛáhʋla bɔdwɩnɩ dɩyɛ nwʋ, bɛáhɩnhã bɔ nwʋ, na bɛádɩ nɣanlɩ bela sʋ̃.

“Ndɛdɛlɛ nu yɛ ekezia ɔkɔhɔ a”

Nyamɩnlɩ hanlɩ mɔɔ isi mmɩlɩ mɔ yewu nɩ nwʋ odwokɔ hileli Adamɩ. Iluwakɛɛ Adamɩ yɛlɩ Nyamɩnlɩ zʋ azʋ̃nzɩzɩbɛ nɩ ti, ɩhanlɩ ihileli yi kɛɛ: “Ɛdɩ ndɛdɛlɛ na ndɛdɛlɛ nu yɛ ekezia kɔhɔ a.” (Gyɛnɛsɩsɩ 3:19) Ansaana Nyamɩnlɩ ɩlɛ ndɛdɛlɛ ɩbawɔ Adamɩ nɩ, nɩ Adamɩ íni nnwʋanlɩ nu. (Gyɛnɛsɩsɩ 2:7) Na mmɩlɩ mɔ Adamɩ wuli nɩ, izia ɩhɔlɩ ndɛdɛlɛ nu mɔɔ nɩ íni nnwʋanlɩ nu dɔkʋ̃.

Ɔzɔ la yɛ ɩtʋ abiyela mɔɔ iwu wɔ nnɛ nɩ a. Mmɩlɩ mɔ Bayɩbʋlʋ yɩ ɩkãã enii nɩɩ nnamɩ nwʋ odwokɔ nɩ, ɩhanlɩ kɛɛ: “Bo munwala bɔzʋ̃ ndɛdɛlɛ nu, na bo munwala bekezia bɔkɔhɔ ndɛdɛlɛ nu.”​—Odwokɔhanlɛvʋlɔ 3:19, 20.

Anyɩnlɩlazʋ wɔ kɛnɩ ma awuvʋlɔ

Bayɩbʋlʋ yɩ ta fa owulo tindiã nna nwʋ. (Ndwomi 13:3; Dwɔɔnʋ 11:11-14; Egyima 7:60) Abiye mɔɔ ɩla hatɩɩ nɩ, ízi dɩyɛ bela mɔɔ ɩkɔlɩɩ zʋlɔ wɔ yɩ nwʋ. Ɔzɔ la sʋ̃ yɛ abiye mɔɔ iwu nɩ ɩánwʋ dɩyɛ bela mɔɔ ɩkɔlɩɩ zʋlɔ a. Naasʋ̃ Bayɩbʋlʋ yɩ ma yɛnwʋ kɛɛ Nyamɩnlɩ kɔhʋla kodunwo awuvʋlɔ dɩkɛɛ mɔɔ bodunwo abiye wɔ nna nu nɩ la, na ɩama bɛanyia nnwʋanlɩ dɔkʋ̃. (Dwoobu 14:13-15) Eyi kile kɛɛ anyɩnlɩlazʋ wɔ kɛnɩ ma bɛzabɛ mɔɔ Nyamɩnlɩ kodunwo bɛ wɔ owulo nu nɩ.