Mɩnla Ti Mɔɔ Gyehova Dasɩvʋlɔmaa Zɩnza Nninyeni Mɔɔ Bede Bedi Nɩ Be Nu a?

Ɔzʋmɩ ɔwɔkɩ munwala nɩ, dɩyɛ titili mɔɔ ye dedi gyina zʋlɔ yɛ lɛ Bayɩbʋlʋ yɩ. Meti mmɩlɩ bela mɔɔ yɛkɛdɩ Bayɩbʋlʋ nu odwokɔ be tʋ bʋwɔ nɩ, yɛsɩnza ye dedi nu ma ɩ nɩɩ ntɩyasɩ fʋlɔ nɩ yiyia.a

Ɔzɔ nzɩnzanlɩyɛ azʋlɔtʋ nɩ, ɩ nɩɩ egyinalɛzʋ-odwokɔ mɔɔ ɩwɔ Ɛɣɛlɛwulɛ 4:18 nɩ yiyia. Ɩkã kɛɛ: “Ɛdɩnɣɛlɛmaa bɔ ɔhʋanɩ dɩkɛ nwɔnɩ hanyɩɩ mɔɔ itwe ngyɩkɩ̃ɩ̃ ngyɩkɩ̃ɩ̃ ɩkɔ ɩpʋmɩ oyuwa ketee.” Kɛmɔ oyuwa finde na itwe ngyɩkɩ̃ɩ̃ ngyɩkɩ̃ɩ̃ nɩ, ɔzɔ la sʋ̃ yɛ Nyamɩnlɩ ma yɛtɩ nɔhʋanlɛ odwokɔ mɔɔ ɩwɔ Bayɩbʋlʋ yɩ nu nɩ yɩ tʋ ngyɩkɩ̃ɩ̃ ngyɩkɩ̃ɩ̃ wɔ yɩ mmɩlɩba nu a. (1 Pita 1:10-12) Kɛmɔ Bayɩbʋlʋ hyɛlɩ nwʋmɔ nkɔmɩ nɩ, “awielɩyɛ mmɩlɩ” eyi nu yɛ yenyiaa Bayɩbʋlʋ nu ntɩyasɩ mɔɔ numɔ dɔ paa.​—Danɩyɛlɩ 12:4.

Íni kɛɛ yɛma ɔzɔ nzɩnzanlɩyɛ mɔɔ yenyia wɔ Bayɩbʋlʋ nu ntɩyasɩ nu nɩ dide yɛ anzɛnyɩɩ ɩyɛ yɛ asibɔnwʋ. Nɩ ɩsɛ kɛɛ Nyamɩnlɩ yɩ azʋ̃mɩvʋlɔ mɔɔ bɔwʋwalɩ azɩ wɔ ɔwɔkɩ mmɩlɩ nu nɩ sʋ̃, bɛyɛ nzɩnzanlɩyɛ azʋlɔtʋ be wɔ ntɩyasɩ be mɔɔ nɩ bɔwɔ, nɩɩ nninyeni be mɔɔ nɩ bekilaa yɩ ɔhʋanɩ nɩ nu.

• Mosisi lili mfʋmɩ zunzunli kɛɛ mmɩlɩ idwu kɛɛ ide Yizilayamaa nɩ, naasʋ̃ wɔ Nyamɩnlɩ anyɩ zʋ nɩ, nɩ ɩha kɛyɛ alʋbɔ 40.​—Egyima 7:23-25, 30, 35.

• Asʋ̃mavʋlɔ nɩ bɛátɩ nkɔmɩhyɛlɛ mɔɔ ɩfalɩ Mɛzaya yi wulo nɩɩ yɩ awudunwolɩyɛ nɩ nwʋ.​—Ayɩzaya 53:8-12; Matiyu 16:21-23.

• Nɩ ɔwɔkɩ Kilisinyiamaa bɔwɔ ntɩyasɩ mɔɔ ɩávata wɔ “Niibenyia eɣile” nɩ nwʋ.​—2 Tɛsalonikamaa 2:1, 2.

Aɣinzi yi, Nyamɩnlɩ dɩnɣɛnlɩ bɛ adwɩnɩ wɔ bɛ ntɩyasɩ mɔɔ nɩ ɩávata nɩ nwʋ, na yɛbɔɔ mpayɩ kɛɛ ɩkɔhɔ zʋlɔ ɩkɛyɛ ɔzɔ la ɩkɛma yɛ wɔ nnɛ sʋ̃.​—Gyemisi 1:5.