DƖYƐZUMANLƐ 6

Kilé Sianti Mɔɔ Ɛlɛ Ɛhɛlɛlɛ Odwokɔ Be Edii Egyima

Ɛhɛlɛlɛ odwokɔ mɔɔ bɔhwɩ̃ adwɩnɩ beziye zʋ

Dwɔɔnʋ 10:33-36

MƆ ƖSƐ KƐƐ ƐYƐ: Áma ɛkɩnga ɛhɛlɛlɛ odwokɔ be na wʋadiã yɩ ɛkɛnɩ wʋahɔ wʋahã odwokɔ fʋlɔ. Bɔ́ mmɔdɩnɩ bʋwa wʋ ediyelɛmaa nɩ ma bɔnwʋ kezimɔ ɛhɛlɛlɛ odwokɔ mɔɔ ɛɣɩnga nɩ ɩfalɩ odwokɔ mɔɔ ɛkãã nɩ nwʋ bʋwɔ.

KEZIMƆ ƐKƐYƐ YƖ:

Má ndwokɔ abɔkɔ nɩ ɩla ali. Sɛ ɛkɩnga ɛhɛlɛlɛ odwokɔ be owie a, twɩ̃ adwɩnɩ siye odwokɔ titili mɔɔ ɩfalɩ odwokɔtile yɩ nwʋ nɩ zʋ. Ɔkɔhʋla ɛkɛyɛ eyi iluwa ɔzɔ ndwokɔ abɔkɔ mɔɔ ekedĩ numɔ anzɛnyɩɩ odwokɔ mɔ ekeɣizia mɔɔ ɩkɛma wʋ ediyelɛmaa nɩ bɛkɛbɩbɛ ndwokɔ abɔkɔ yɩ nɩ zʋ.

Sɛ ɛfa ndwokɔ abɔkɔ mvʋlɔ ekilehile ɛhɛlɛlɛ odwokɔ mɔɔ ɛɣɩnga nɩ nu a, bɔ́ mmɔdɩnɩ kɛɛ ɛkɛma wʋ ediyelɛmaa nɩ bɔkɔnwʋ kezimɔ ndwokɔ abɔkɔ mɔɔ ɩwɔ Bayɩbʋlʋ yɩzayɩ yi nu nɩ ɩ nɩɩ wʋ odwokɔtile nɩ iyiyia.
Twɩ̃ adwɩnɩ siye odwokɔ mɔɔ ɛpɛ kɛɛ bɛkakɛ nɩ zʋ. Sɛ sianti be ti yɛ ɛɣɩnganlɩ ɛhɛlɛlɛ odwokɔ be a, mɛyɩ nɩ kilehile kezimɔ ndwokɔ aditili mɔɔ ɩwɔ ɛhɛlɛlɛ odwokɔ nɩ nu nɩ ɩfʋwalɩ ɔzɔ sianti nɩ zʋ.

Bukó wʋ Bayɩbʋlʋ yi nu wɔ mmɩlɩ mɔ ekilehilee ɛhɛlɛlɛ odwokɔ be nu nɩ. Eyi ɩkɔwʋwa wʋ ediyelɛmaa nɩ ma bɔkɔnwʋ kezimɔ wʋ odwokɔ yɩ nɩ ɩfalɩ mɔɔ ɛɣɩnga nɩ nwʋ.
Kilehilé nu ma numɔ ɩla ɛkɛnɩ. Áma ɛfa ndwokɔ mɔɔ ɩávalɩ wʋ odwokɔtile nwʋ nɩ ekilehile nu. Kyiná mɔɔ wʋ ediyelɛmaa nɩ bezi yi daada nɩ zʋ sí pɔkɔ wɔ ndwokɔ mɔɔ ɛkɛhã mɔɔ ɩkɛma wʋ ehilehilelɛ nu ɩkɛla ɛkɛnɩ na bɛadɩ yɩ tʋ sʋ̃ nɩ nwʋ.