DƖYƐZUMANLƐ 4

Ɛhɛlɛlɛ Ndwokɔ Mɔɔ Bɛda Yɩ Ali Bʋwɔ

Matiyu 22:41-45

MƆ ƖSƐ KƐƐ ƐYƐ: Siyeziyé wʋ ediyelɛmaa nɩ bɛ adwɩnɩ ansaana wʋaɣɩnga ɛhɛlɛlɛ odwokɔ be.

Nwʋ́ sianti mɔɔ ɛkɩngaa ɛhɛlɛlɛ odwokɔ yɩ nɩ. Dá ɛhɛlɛlɛ odwokɔ bela ali wɔ ɔhʋanɩ be zʋ mɔɔ ɩkɔwʋwa wʋ ediyelɛmaa nɩ ma bɔkɔnwʋ odwokɔ pɔkɔ mɔɔ ɛpɛ kɛɛ ɩda ali wɔ nkyɩkyɛmi yi nu nɩ.

Nwʋ́ mɔɔ ɛkãã nwʋmɔ odwokɔ nɩ bʋwɔ. Sɛ ɛdaa ɛhɛlɛlɛ odwokɔ be ali na ɔkɔwɔ enii mɔɔ ɩdɩndɛnlɩ wɔ nkyɩkyɛmi nɩ nu anzɛnyɩɩ enii mɔɔ ɩhɛlɛlɩ ɔzɔ Bayɩbʋlʋ buuku nɩ a, kilá kɛɛ mɔɔ ɛkãã nɩ ɩdɩ nɔhʋanlɛ.
Má wʋ ehilehilelɛ nɩ igyina Bayɩbʋlʋ nɩ zʋ. Sɛ ɛ nɩɩ mmenii mɔɔ bede Nyamɩnlɩ bedi nɩ bɛtɩndɛɛ a, twɩ̃ adwɩnɩ siye Bayɩbʋlʋ yɩ zʋ kɛɛ ɩdɩ Nyamɩnlɩ yɩ Odwokɔ wɔ ɔhʋanɩ be zʋ mɔɔ ɩkɛla ali kɛɛ Bayɩbʋlʋ yɩ nu la yɛ yekenyia nɣɛlɛbɛ a.
Má wʋ ediyelɛmaa nɩ bɛ anyɩ ileli ɛhɛlɛlɛ odwokɔ yɩ nwʋ. Biziá odwokɔ be mɔɔ ɛhɛlɛlɛ odwokɔ yɩ yɩzayɩ ɩkɛyɩ yi munwa, kã odwokɔ ɛzɩzɩbɛ be mɔɔ ɛhɛlɛlɛ odwokɔ nɩ ɩfa nwʋmɔ munwalɩyɛ ɩma, anzɛnyɩɩ kã egyinalɛzʋ-odwokɔ mɔɔ ɛhɛlɛlɛ odwokɔ yɩ nɩ ɩkɔwʋwa bɛ ma bɛkɛdɩ yɩ tʋ.

Sunzú mɔɔ wʋ ediyelɛmaa nɩ bezi daada bɛfalɩ wʋ odwokɔtile nɩ nɩɩ ɛhɛlɛlɛ odwokɔ mɔɔ ɛkɛva ekeli egyima nɩ nwʋ. Dá ɛhɛlɛlɛ odwokɔ mɔɔ bezi yi daada nɩ ali wɔ anyɩnlɩlelɛ zʋ, na bʋwá wʋ ediyelɛmaa nɩ ma bɛdɩ yɩ tʋ wɔ ɔhʋanɩ fʋlɔ zʋ.