Ɛbɩlawɔlɛ Nɩɩ Dasɩlɛlilɛ Dɩyɛzumanlɛ Kɛlɛta Nwʋ Awuuku Nu Ɛbɩbɛlɛ
OCTOBER 7-13
BAYƖBƲLƲ NU ANWƲNYIA | GYEMISI 3-5
“Dá Nyamɩnlɩ Yɩ Nɣɛlɛbɛ Ali”
cl-E 221-222 ¶9-10
Asʋ̃ “Nɣɛlɛbɛ Nɩ Mɔɔ Ɩzʋ̃ Sʋlɔ Nɩ,” Ɩyɛɛ Egyima Wɔ Wʋ Ɛbɩlawɔlɛ Nu a?
“Mɔɔ idi bɔmʋnlɩ; yɩ nwʋ ɩtɩ.” Kɛ abiye yɩ nwʋ ɩkɛdɩ nɩ ikile kɛɛ ɩkɛyɛ sanwuu mɔɔ evinli bela íni yɩ nwʋ, kɛ nnwʋnlamɩ anyɩ zʋ nkʋ̃ a, mfomi wɔ yi nu sʋ̃. Bayɩbʋlʋ ɩfa nɣɛlɛbɛ itindiã ahʋnlɩnɩ nɩ nwʋ, naasʋ̃ sʋlɔ nɣɛlɛbɛ ɩlɔ́kʋla ɩkɔwɔlɔ ahʋnlɩnɩ mɔɔ nzunzunlɩyɛ tanɩ, akɔnɔ tanɩ, nɩɩ adwɩnɩ tanɩ ɩyɛ numɔ manlɩ nɩ nu. (Ɛɣɛlɛwulɛ 2:10; Matiyu 15:19, 20) Naasʋ̃, sɛ yɛ ahʋnlɩnɩ nu ɩtɩ a—kile kɛɛ, kɛmɔ enii mɔɔ iáli munli nɩ ɩkɔhʋla ɩkɛyɛ nɩ a—‘yɛkɔhwɩ̃ yɛ nwʋ wɔ tanɩ nwʋ na yɛayɛ baaba.’ (Ndwomi 37:27; Ɛɣɛlɛwulɛ 3:7) Asʋ̃ ɩ́dɩ yɩ ɔhʋanɩ zʋ kɛɛ anwʋdɩlɛ ɩdɩ nɣɛlɛbɛ yɩ subanɩ mɔɔ ili bɔmʋnlɩ a? Meti, sɛ yɛ nwʋ ɩádɩ wɔ ɛbɩlawɔlɛ nɩɩ sunzuma ɔfʋã nu a, kɛ ɩkɛyɛ na yɛahʋla yɛala nɣɛlɛbɛ mɔɔ ɩzʋ̃ sʋlɔ nɩ yi subanɩ mvʋlɔ nɩ sʋ̃ ali a?
“Akʋ̃ sʋ̃ ɩma azʋ̃nudwolɩyɛ.” Sʋlɔ nɣɛlɛbɛ ɩkã yɛ ma yedi azʋ̃nudwolɩyɛ mɔɔ ɩdɩ Nyamɩnlɩ yɩ sunzuma mma nɩ yɩ mɛda. (Galatiyiamaa 5:22) Yɛbɔ mmɔdɩnɩ kɛɛ ‘yɛkɔwʋwa azʋ̃nudwolɩyɛ nu’ mɔɔ yɛlɛ́sɩkɛ ɔkʋ̃yɛlɛ mɔɔ ɩkã Gyehova yi mmenii ɩbɔ numɔ nɩ. (Ɛfɩsɛsɩmaa 4:3) Akʋ̃ sʋ̃, sɛ odwokɔ be ɩba yɛ azʋ̃nudwolɩyɛ nwʋ a, yɛbɔ mmɔdɩnɩ yesiyeziye. Mɩnla ti mɔɔ eyi nwʋ ihyinyia a, Bayɩbʋlʋ ɩkã kɛɛ: ‘Mʋnlʋmmɔ bɔwʋwa azʋ̃nudwolɩyɛ nu. Na ɔlɔlɛ nɩɩ azʋ̃nudwolɩyɛ Nyamɩnlɩ nɩ, ɩ nɩɩ mʋnlʋmmɔ bɔkɔwʋwa.’ (2 Kɔlɛntɩmaa 13:11) Meti, mmɩlɩ tɩndɩnlɩ mɔɔ yɛkɔlɩ ɔzʋlɔ yɛbʋwa azʋ̃nudwolɩyɛ nu nɩ, azʋ̃nudwolɩyɛ Nyamɩnlɩ nɩ ikeli yɛ mɛda. Kezimɔ yɛ nɩɩ yɛ ɔhɔnwʋmmɔ dedimaa di ndwokɔ nɩ ɩkã yɛ nɩɩ Gyehova avinli abusunwawɔlɛ nɩ senyii.
cl-E 223-224 ¶12
Asʋ̃ “Nɣɛlɛbɛ Nɩ Mɔɔ Ɩzʋ̃ Sʋlɔ Nɩ,” Ɩyɛɛ Egyima Wɔ Wʋ Ɛbɩlawɔlɛ Nu a?
“Ɩtɩ odwokɔ tʋ.” Sɛ bɛkã kɛɛ abiye ɩtɩ odwokɔ tʋ a, kɛ ikile a? Kɛmɔ nnimidimaa bekile nɩ, Giliki odwokɔ pɔkɔ yɩzayɩ mɔɔ bekile yɩ tʋ kɛɛ “ɩtɩ odwokɔ tʋ” wɔ Gyemisi 3:17 nɩ, yɩ tʋhilelɛ ɩyɛ ɛzɩzɩbɛ. Odwokɔtʋhilelɛmaa bɛfa odwokɔ pɔkɔ dɩkɛɛ “odwolɛ,” “abʋtalɩ,” nɩɩ “ntɩyasɩ” yɛ bɛfa bedi egyima a. New World Translation Bayɩbʋlʋ yɩ azɩ ɛkɛnɩ odwokɔ be ikile kɛɛ, yɩ tʋhilelɛ yɩzayɩ yɛ lɛ “abiye mɔɔ iyiaki odwokɔ nu ma ɩka.” Mɩnla ɔhʋanɩ zʋ yɛ yekehile kɛɛ yɛlɛ nɣɛlɛbɛ mɔɔ ɩzʋ̃ sʋlɔ yɩ ɔfʋã eyi yedi egyima a?
cl-E 224-225 ¶14-15
Asʋ̃ “Nɣɛlɛbɛ Nɩ Mɔɔ Ɩzʋ̃ Sʋlɔ Nɩ,” Ɩyɛɛ Egyima Wɔ Wʋ Ɛbɩlawɔlɛ Nu a?
“Ɩkã yɩ nwʋ azɩ.” Giliki odwokɔ pɔkɔ mɔɔ bekile yɩ tʋ “ɩkã yɩ nwʋ azɩ” nɩ, íni dɩka fʋlɔ bela wɔ Kilisinyianɩ Giliki Ɛhɛlɛlɛ Odwokɔ yi nu. Kɛmɔ nnimidimaa bekile nɩ, ɔzɔ odwokɔ pɔkɔ eyi, “bɛta bɛfa bedi egyima wɔ azogyiamaa bo nu.” Mɔɔ ikile yɛ lɛ kɛɛ “abiye yɩ odwokɔ ɩáyɛ sɩ” yɛɛ “ɩkã yɩ nwʋ azɩ ɩma mmenii mvʋlɔ.” Ɩáyɛ sɩ kɛɛ abiye mɔɔ nɣɛlɛbɛ mɔɔ ɩzʋ̃ sʋlɔ ikile yɩ ɔhʋanɩ nɩ ɩkɛhã yɩ nwʋ azɩ ɩkɛma ɔhʋanɩhilelɛ mɔɔ ɩwɔ Bayɩbʋlʋ yi nu nɩ. Bézi yɩ kɛɛ enii mɔɔ ɩdɩ kyɩngyɩ̃ɩ̃ mɔɔ isi pɔkɔ a, abiyela ɩáhʋla ɩsɩnza yɩ adwɩnɩ. Mfomi, sɛ idi mfʋmɩ be wɔ yɩ pɔkɔzilɛ, yɩ odwokɔhanlɛ, anzɛnyɩɩ yɩ nyɛlɩyɛ be nu, na bekyina Ɛhɛlɛlɛ Odwokɔ nɩ zʋ bɛtɩnɣɛ yɩ adwɩnɩ a, ide itiã numɔ ndɛndɛ, na ɩyɛ nzɩnzanlɩyɛ. Asʋ̃ ɔzɔ yɛ mmenii mvʋlɔ bezi wʋ kɛɛ ɛdɩ a?
“Alɔbɔnwʋnlɛ Ɩyɛ Yɩ Manlɩ Yɛɛ Ɩbɔ Ɛbɩla Baaba”
“Alɔbɔnwʋnlɛ ɩyɛ yɩ manlɩ yɛɛ ɩbɔ ɛbɩla baaba.” Alɔbɔnwʋnlɛ ɩdɩ nɣɛlɛbɛ mɔɔ ɩzʋ̃ sʋlɔ yɩ ɔfʋã mɔɔ nwʋmɔ ihyinyia iluwakɛɛ bekile kɛɛ, “alɔbɔnwʋnlɛ ɩyɛ” nɣɛlɛbɛ mɔɔ ɩzʋ̃ sʋlɔ nɩ “manlɩ.” Yɛ́ yɩ ndwɩ kɛɛ, bɛkã “alɔbɔnwʋnlɛ” yɛɛ “ɛbɩla baaba” nwʋ odwokɔ bɔbɔ numɔ. Eyi ɩfata iluwakɛɛ wɔ Bayɩbʋlʋ yi nu nɩ, bɛta bekile alɔbɔnwʋnlɛ yɩ tʋ kɛɛ abiye mɔɔ ɩdwɩnɩ mmenii mvʋlɔ bɔ nwʋ, kunlumiyɩbalɛ mɔɔ ɩma abiye ɩda kunlumiba ali. Buuku be ikile alɔbɔnwʋnlɛ yɩ tʋ kɛɛ “alɔbɔ mɔɔ abiye idi wɔ abiye yɩ bʋwabɩlɛ mɔɔ ɩ́dɩbɛ nwʋ na ɩbɔ mmɔdɩnɩ kɛɛ ɩkɛyɛ nwʋmɔ dɩyɛ be.” Meti, Nyamɩnlɩ yɩ nɣɛlɛbɛ ɩ́dɩ dɩyɛ mɔɔ íni ntɩyasɩ, yi ti nu ɩáyɛ ɛzɩzɩbɛ, anzɛnyɩɩ ɩ́dɩ buuku nu odwokɔ be ɔzʋzɔ la. Mfomi, ɩwɔ ɔlɔlɛ, ahʋnlɩnɩba, nɩɩ ntɩyasɩ. Ɔhʋanɩ ɛhɩnla dɩyɛ zʋ yɛ yɛkɔhʋla yɛkɛla yɩ ali kɛɛ alɔbɔnwʋnlɛ ɩyɛ yɛ manlɩ a?
cl-E 226-227 ¶18-19
Asʋ̃ “Nɣɛlɛbɛ Nɩ Mɔɔ Ɩzʋ̃ Sʋlɔ Nɩ,” Ɩyɛɛ Egyima Wɔ Wʋ Ɛbɩlawɔlɛ Nu a?
“Ɩádwɩnɩ adwɩnɩ tanɩ anzɛnyɩɩ ɩáyɛ nyiyimi.” Nɣɛlɛbɛ mɔɔ ɩzʋ̃ sʋlɔ nɩ ɩkʋla idi enii nu nyiyimi nɩɩ manlɩ mɔɔ abiye ɩzʋ̃ numɔ mɔɔ bɛfa bepigyia bigyia bɔ nwʋ sʋlɔ nɩ zʋ. Sɛ nɣɛlɛbɛ mɔɔ ɩdɩ ɔzɔ nɩ yɛ ikile ɔhʋanɩ yɛ a, yɛbɔ mmɔdɩnɩ yɛyɩ adwɩnɩ tanɩ bela mɔɔ ɩkɛma yɛkɛyɛ nyiyimi wɔ yɛ ahʋnlɩnɩ nu. (Gyemisi 2:9) Yɛágyina mmenii mvʋlɔ bɛ ɔnwʋmazilɛ, bo ozukua, anzɛnyɩɩ ɔnwʋmɔ ɔhʋanɩ mɔɔ bɔwɔ wɔ asafʋ yi nu nɩ zʋ na yɛ nɩɩ bɛ ali; ɔzɔ sʋ̃ la yɛ yɛáwu yɛ ɔhɔnwʋmmɔ azʋ̃mɩvʋlɔ mɔɔ bɛdɩ ahyinyiamaa nɩ sʋ̃ animitiyia a. Sɛ Gyehova ɩyɩ yɩ ɔlɔlɛ ali ihile ɔzɔ mmenii nɩ a, mɛyɩ nɩ ɩsɛ kɛɛ yebu bɛ kɛɛ bɛfata kɛɛ yɛda yɛ ɔlɔlɛ ali yekile bɛ.
“Iáli awohwi.” Giliki odwokɔ pɔkɔ mɔɔ igyĩ ɛkɛnɩ ɩma “awohwi” nɩ, yɛkɔhʋla yɛkɛva yekedindiã “enii mɔɔ ɩyɩ fɩlɩmɩ” nwʋ. Wɔ tɩɩtɩɩ nɩ, na nɩ Giliki nɩɩ Wulomimaa mɔɔ bɛyɛ fɩlɩmɩ nɩ, bɛfa dɩyɛ be bɛkɩda bɛ anyunu wɔ mmɩlɩ mɔ bɛyɛɛ fɩlɩmɩ nɩ na ama bɛánwʋ enii ɔkʋ̃ mɔɔ bɛdɩ. Meti, bɛvalɩ Giliki odwokɔ pɔkɔ mɔɔ igyĩ ɛkɛnɩ ɩma “awohwi” nɩ belili egyima wɔ abiyela mɔɔ ɩfa kezimɔ ɩdɩ nɩ yɩzayɩ isiye, anzɛnyɩɩ abiye mɔɔ ɩáhã nɔhʋanlɛ nɩ nwʋ. Kɛ kezimɔ yɛ nɩɩ yɛ ɔhɔnwʋmmɔ dedimaa di nkʋ̃ la yɛ ɩsɛ kɛɛ Nyamɩnlɩ yɩ nɣɛlɛbɛ yɩ ɔfʋã eyi ɩkã yɛ ma yɛfa yedi egyima a, mfomi ɩsɛ kɛɛ ɩda ali wɔ kezimɔ yɛtɩ nɣanlɩ wɔ bɔ nwʋ nɩ sʋ̃ nu.
Pɩbɛlɩ Bayɩbʋlʋ Yi Nu
w08-E 11/15 20 ¶6
Ahɛlɛta Mɔɔ Gyemisi Nɩɩ Pita Bɛhɛlɛlɩ Yi Nu Ndwokɔ Aditili
4:5, NWT—Mɩnla ɛhɛlɛlɛ odwokɔ yɛ nɩ Gyemisi ɩtwɩ̃ɩ̃ adwɩnɩ ikeziye ɔzʋlɔ a? Kɛ ɛhɛlɛlɛ odwokɔ pɔkyɩɩ be yɛ nɩ Gyemisi ɩtwɩ̃ɩ̃ adwɩnɩ ikeziye zʋ a. Naasʋ̃, ɩkɔhʋla ɩkɛɣa kɛɛ, igyinanlɩ ndwokɔ mɔɔ ɩwɔ Gyɛnɛsɩsɩ 6:5; 8:21; Ɛɣɛlɛwulɛ 21:10; nɩɩ Galatiyiamaa 5:17 nɩ zʋ yɛ ɩhanlɩ ndwokɔ eyi mɔɔ Nyamɩnlɩ yɩ sunzuma nɩ ɩhanlɩ yɩ ma ɩhɛlɛlɩ nɩ a.
w97-E 11/15 20-21 ¶8
Dedi Ɩma Yɛfa Abʋtalɩ Yɛbɔ Mpayɩ
Ɩdɩ tanɩ kɛɛ yɛkɛdɩndɛ yekediyia yɛ ɔhɔnwʋ dedinii be. (Gyemisi 4:11, 12) Naasʋ̃ abiyemmɔ bɛkɩnhã bɔ ɔhɔnwʋmmɔ Kilisiyiamaa bɔ nwʋ ndwokɔ tanɩ, ebiye a iluwakɛɛ bobu bɔ nwʋ kɛɛ bɛdɩ ɛdɩnɣɛlɛmaa anzɛnyɩɩ iluwakɛɛ bɛpɛ kɛɛ bobu mmenii mvʋlɔ animitiyia na bɛava bɛabigyia bigyia bɔ nwʋ sʋlɔ nɩ ti a. (Ndwomi 50:20; Ɛɣɛlɛwulɛ 3:29) Giliki odwokɔ pɔkɔ mɔɔ bekile yɩ tʋ kɛɛ ‘bɛkɩnhã bɔ nwʋ ndwokɔ tanɩ’ nɩ ɩlɛ adwɩnɩ be mɔɔ mɛyɩ yɛ lɛ ɛdanɩlɛ, na ikile sʋ̃ kɛɛ yekogugua ndwokɔ nu anzɛnyɩɩ yɛkɛhã odwokɔ be mɔɔ ɩáyɛ nɔhʋanlɛ yekediã abiye zʋ. Eyi ikehile kɛɛ yebuwaa yɛ anlima be ɔfɔ. Mɩnla ɔhʋanɩ zʋ yɛ eyi ikile kɛɛ ‘yɛkãã Nyamɩnlɩ yɩ mmɛla nɩ nwʋ odwokɔ tanɩ na yebuwaa mmɛla nɩ ndɛnɩ’ a? Na nɩ mmɛla ahilehilevʋlɔ nɩɩ Falasiimaa nɩ bɛfa bɛ tɩɩtɩɩ ndwokɔ nwʋ ehilehilelɛ nɩ “betiã Nyamɩnlɩ odwokɔ nɩ ahanlɩ.” (Maakɩ 7:1-13) Ɔzɔ sʋ̃ la yɛ sɛ yebuwa yɛ anlima be ɔfɔ wɔ mmɩlɩ mɔ Gyehova ilóbuli yɩ ɔfɔ a, asʋ̃ nɩ kɛ ‘Nyamɩnlɩ yɩ mmɛla nɩ yɛ yɛkãã nwʋmɔ odwokɔ tanɩ na yebuwaa mmɛla nɩ ndɛnɩ’ a, na nɩ yelékile kɛɛ yɩ mmɛla nɩ ɩávata a? Na sɛ yɛtɩndɛ yetiyia yɛ anlima wɔ ɔhʋanɩ mɔɔ ɩávata zʋ a, yɛlɔ́kʋla yekeli mmɛla mɔɔ mɛyɩ yɛ lɛ ɔlɔlɛ nɩ zʋ.—Wulomimaa 13:8-10.
OCTOBER 14-20
BAYƖBƲLƲ NU ANWƲNYIA | 1 PITA 1-2
“Bɛyɛ́ Nwanzanwanza”
w17.02-E 9 ¶5
Elelɛdɩyɛ Nɩ—“Ɛhyɛlɛdɩyɛ Baaba Mɔɔ Idi Munli” Mɔɔ Ɩzʋ̃ Ɛzɩlɛ Nɩ Yɩ Ɛkɛnɩ
Kɛ ɩkɛyɛ na yɛahile kɛɛ Gyehova yi dima nɩ ɩla yɛ ahʋnlɩnɩ zʋ a? Yɛ ɛbɩlawɔlɛ yɛ yɛkɛva yekehile a. Gyehova ikilaa ɔhʋanɩ kɛɛ yɛkɛyɛ nwanzanwanza. (Kɩnga 1 Pita 1:15, 16.) Eyi ikile kɛɛ, ɩsɛ kɛɛ yesʋ̃mɩ Gyehova nkʋ̃tɩnyɩɩ na yɛzʋ̃ yɛ ahʋnlɩnɩ munwala nu yetiye yɩ. Sɛ yeyiyia ɛdanɩlɛ po a, yɛyɛ mɔɔ yɛkɔhʋla bela kɛɛ yɛkɛva yɩ egyinalɛzʋ-ndwokɔ nɩɩ yɩ mmɛla mɔɔ ɩtɩnɣɛ nɩ yɛkɔwɔ yɛ ɛbɩla. Sɛ yɛyɛ dɩyɛ mɔɔ ɩtɩnɣɛ a, ɩma yɛ kɩnlanɩyɛ nɩ itwe, na ɩhyɛ Gyehova yi dima animinyiamɩ. (Mt. 5:14-16) Kɛ mmenii mɔɔ yɛdɩ nwanzanwanza nɩ, yɛfa yɛ ɛbɩlawɔlɛ yekile kɛɛ Gyehova yɩ mmɛla ɩdɩ baaba na Setanɩ yɩ ɔzʋnɩ mɔɔ ɩva idiã yɛ zʋ nɩ ɩdɩ awohwi. Iluwakɛɛ yɛtɔ sini nɩ ti, ye munwala yedi mfʋmɩ. Sɛ ɩba yɩ kɛɛ yedi mfʋmɩ a, yɛzʋ̃ yɛ ahʋnlɩnɩ munwala nu yenu yɛ nwʋ, na yɛtwɩ̃ yɛ nwʋ wɔ dɩyɛ bela mɔɔ ikua Gyehova yi dima nwʋ evinli nɩ nwʋ.—Ndw. 79:9.
lvs-E 77 ¶6
Kezimɔ Yekezi Anyɩnlɩlelɛdɩyɛ Nwʋ Pɔkɔ
Gyehova ɩkã ikile yɛ kɛɛ: “Bɛyɛ́ nwanzanwanza iluwakɛɛ mɩdɩ nwanzanwanza.” (1 Pita 1:14-16; 2 Pita 3:11) Sɛ yɛ ɔzʋ̃mɩnlɛ ɩdɩ nwanzanwanza anzɛnyɩɩ ɔnwʋmɔ ɩtɩ a, yɛ Gyehova ikele ikediã nu a. (Ditilonɔmi 15:21) Sɛ yɛyɛ mɔɔ Gyehova ikyi dɩkɛɛ ɛbɩlazɩkɛlɛ, basabasayɛlɛ, anzɛnyɩɩ nninyeni mɔɔ ɩfalɩ azunzuma ndwokɔ nwʋ a, mɛyɩ nɩ ikile kɛɛ yɛ ɔzʋ̃mɩnlɛ nwʋ ɩádɩ. (Wulomimaa 6:12-14; 8:13) Yɛɛ sɛ yɛfa ɔzɔ nninyeni nɩ sʋ̃ yedide yɛ anyɩ a, ɩlɛ́ma yɛkɔzɔ Gyehova yɩ anyɩ. Eyi ɩkɛma yɛ ɔzʋ̃mɩnlɛ nwʋ ɩkɛɣa odwokɔ, Gyehova iléde yɛ ikediã nu, na ɩfa yɛ nɩɩ yɩ avinli abusunwawɔlɛ itiã asianɩ nu.
Pɩbɛlɩ Bayɩbʋlʋ Yi Nu
w08-E 11/15 21 ¶10
Ahɛlɛta Mɔɔ Gyemisi Nɩɩ Pita Bɛhɛlɛlɩ Yi Nu Ndwokɔ Aditili
1:10-12. Nɩ awɔvʋlɔ bɛpɛ kɛɛ bɔnwʋ nɔhʋanlɛ mɔɔ numɔ ɩdɔ mɔɔ Nyamɩnlɩ yɩ nkɔmɩhyɛmaa mɔɔ bɔwʋwalɩ azɩ wɔ ɔwɔkɩ nɩ bɛhɛlɛlɩ bɛvalɩ Kilisinyiamaa mɔɔ nɩ bɔvɔ ngɔlɔ bɛ wɔ asafʋ yi nu nɩ nwʋ na bɛadɩ yɩ tʋ. Naasʋ̃, nninyeni nu ɩlalɩ ɛkɛnɩ bʋwɔ wɔ mmɩlɩ mɔ Gyehova ɩwɔlɩ yɩ tʋ kɛɛ ɩlɛ asafʋ nɩ idi egyima nɩ. (Ɛfɩ. 3:10) Asʋ̃ íni kɛɛ yesumazuma mɔɔ awɔvʋlɔ nɩ bɛyɛlɩ nɩ na yɛbɔ mmɔdɩnɩ yɛpɩbɛ “Nyamɩnlɩ nhyɩhyɛlɩyɛ bela mɔɔ ɩwɔ kuma kulonwuu po nu nɩ” a?—1 Kɔl. 2:10.
it-2-E 565 ¶3
Kilavʋlɔ
Kilavʋlɔ Kezile Baaba Nɩ. Wɔ 1 Pita 2:25 nɩ, Pita ɩvalɩ odwokɔ mɔɔ ɩwɔ Ayɩzayɩ 53:6 nɩ ɩhanlɩ mmenii mɔɔ “bɛdɩ kɛɛ mmuwuanɩ mɔɔ beminli nɩ” bɔ nwʋ odwokɔ. Akʋ̃ ɩdʋwalɩ ɔzʋlɔ kɛɛ: “Naasʋ̃ sikalɛpɛyɩ mɛyɩ, bɛva mʋnlʋmmɔ bezia bɛɣa kɛɛ bɛɣɩla beli mmuwuanɩzʋhilalɛvʋlɔ nɩ nɩɩ mʋnlʋmmɔ bɛ ɛkɛla zʋ Kilavʋlɔ nɩ yɩ mɛda.” Ɩkɛyɛ kɛɛ nɩ Gyehova Nyamɩnlɩ nwʋ odwokɔ yɛ nɩ ɩkã a, iluwakɛɛ mmenii mɔɔ Pita ɩhɛlɛlɩ odwokɔ eyi ɩhɔ ɩmanlɩ bɛ nɩ, nɩ bɔzʋ̃ Kɩlayɩsɩ Gyisɛsɩ yɩ pɛ bɔlɔ́twɩnlɩ bɔ nwʋ. Mfomi iluwa Gyisɛsɩ yɩ zʋ yɛ mmenii nɩ bezialɩ bɛɣalɩ Gyehova Nyamɩnlɩ mɔɔ ɩdɩ Kilavʋlɔ Kezile Baaba nɩ yɩ pɛ a. (Ndw 23:1; 80:1; Gyɛ 23:3; Izi 34:12) Gyehova sʋ̃ ɩdɩ Kilavʋlɔ, mɛyɩ yɛ ikilahila ye nu a. (Ndw 17:3) Kɛ ikehilahila ye nu nɩ, ɩkɔhʋla ikehile nninyeni anwɩ̃. Giliki odwokɔ pɔkɔ e·pi·sko·peʹ mɔɔ yɩ tʋ ikile kɛɛ ikilahila ye nu nɩ, ɩkɔhʋla ikehile ndɛnɩwuwalɛ mɔɔ Nyamɩnlɩ ɩfa ɩba kɛmɔ izili wɔ adʋwavʋlɔ bɛ mmɩlɩ zʋ wɔ Gyelusalamɩ mɔɔ bɛánwʋ mmɩlɩ mɔ ‘ɩɣa ihilahilalɩ bo nu nɩ [Giliki nu e·pi·sko·pesʹ].’ (Lk 19:44, NWT) Anzɛnyɩɩ sʋ̃ ɩkʋla ikile mfasʋ baaba mɔɔ yekenyia dɩkɛɛ mmenii mɔɔ bɛkɛhyɛ Nyamɩnlɩ animinyiamɩ wɔ eɣile mɔɔ ɩkɛɣa “ikehila kezimɔ nninyeni nu ɩdɩ” nɩ [Giliki nu e·pi·sko·pesʹ].”—1Pit 2:12, NWT.
OCTOBER 21-27
BAYƖBƲLƲ NU ANWƲNYIA | 1 PITA 3-5
“Nninyeni Munwala Yɩ Awielɩyɛ Iɣike”
w13-E 11/15 3 ¶1
“Bɔwɩɛnɩ́ Na Bɔwɔ́ Mpayɩ”
BENYIA be mɔɔ bɔmʋnlɩ nɩ, nɩ ɩyɛ egyima ohunluma nɩ ɩhanlɩ kɛɛ: “Sɛ ɛyɛ egyima ohunluma nɩ munwala na ɩha ɛgyɩkɩ̃ɩ̃ ma oyumi ɩtɩdɩ a, ɔzɔ mmɩlɩ nu nɩ, sɛ wʋáminyia wʋ anyɩ a, sa ɛda.” Sɛ abiye ɩyɛ egyima ohunluma kyɩ̃ a, ebiye a ikele benyia eyi yɩ odwokɔ nɩ ekediã numɔ. Nnɛ sʋ̃, Setanɩ oyuwadɩ ɩhɔ yɩ anyunu, ɩha ɛgyɩkɩ̃ɩ̃ be nɩ awielɩyɛ nɩ ɩɣa. Ɔzɔ mmɩlɩ eyi nu paa yɛ sɛ Kilisinyianii be ɩáma yɩ anyɩ ɩda ɛkɛnɩ a, ɩkɛla a. (Wul. 13:12) Naasʋ̃ kɛ mmɩlɩ mɔ ɩsɛ kɛɛ yɛda yɛ dɩ. Nɔhʋanlɛ odwokɔ yɛ lɛ kɛɛ, sɛ abiye ɩda wɔ ɔzɔ mmɩlɩ eyi nu a, ɩkɛyɛ ɛyɛlɛ baaba! Eyi ti mɔɔ ɩsɛ kɛɛ ‘yɛmá yɛ adwɩnɩ nu ɩda ɛkɛnɩ’ na ‘yɛwɩɛnɩ́ na yɛbɔ́ mpayɩ’ yɩ a.—1 Pit. 4:7, NWT.
w99-E 4/15 22 ¶3
Kezimɔ Ɔkɔnwʋ Sunzuma Ɔfʋã Nu Mɛlɛkɛyɛlɛ Be Na Wʋali Ɔzʋlɔ
Mɔɔ itualɩ yɩ tʋ nɩ, má sʋ̃mavʋlɔ Pita yɩ fʋlɔdulɛ mɔɔ ɩzʋ̃ ɔlɔlɛ nu ɩva ɩmanlɩ nɩ ɩwʋwa wʋ adwɩnɩ nu: “Nninyeni munwala yɩ awielɩyɛ iɣike. Eyi ti, mʋnlʋmmɔ bɔzɔ́ bɔ nwʋ bʋwɔ baaba, behilá bɔ nwʋ bʋwɔ na bɛma bɛ anyɩ ɩla ɛkɛnɩ na mʋnlʋmmɔ bɛahʋla bɛawɔ mpayɩ. Na mɔɔ ihyinyia baaba nɩ yɛ lɛ kɛɛ, bɛkɛva bɛ ahʋnlɩnɩ munwala bɔkɔlʋlɔ bɔ nwʋ nkʋ̃kʋ̃ nkʋ̃kʋ̃. Sianti yɛ lɛ kɛɛ, ɔlɔlɛ ɩkɩda tanɩ sʋ̃maa zʋ.” (1 Pita 4:7, 8) Ɩáyɛ sɩ kʋlaa kɛɛ yɛkɛma enii yɩ sinidɔlɛ—kɛɛ ɩdɩ mmenii mvʋlɔ anzɛnyɩɩ amɩyɛzayɛ yɛ dɩyɛ nɩ—ɩkɔwɔlɔ yɛ ahʋnlɩnɩ nɩɩ yɛ adwɩnɩ nu, ma ɩkɔdʋndʋnlɩ yɛ agyia nu. Setanɩ izi enii yɩ mɛlɛkɛyɛlɛ eyi bʋwɔ baaba. Anyɩnlɩdɩlɛ ɔhʋanɩ ɔkʋ̃ mɔɔ iduwa ɔzʋlɔ ɩyɛ eyi yɛ lɛ kɛɛ ikobuko buko mmenii nu na iali bɔ zʋ. Meti ɩsɛ kɛɛ yɛyɛ ndɛndɛ yɛfa ɔlɔlɛ mɔɔ numɔ ɩyɛ sɩ yɛkɩda tanɩ mɔɔ ɩba yɛ avinli nɩ zʋ, na ama ‘Abɔnsamɩ iányianlɩ yɛ nwʋ ɔhʋanɩ.’—Ɛfɩsɛsɩmaa 4:25-27.
w18.03-E 14-15 ¶2-3
Ngyɛvʋlɔyɛlɛ Ɩdɩ Subanɩ Mɔɔ Ɩyɛ Pɩkɛ Na Ɔnwʋmɔ Ihyinyia Baaba!
Ndwokɔ mɔɔ Pita ɩhanlɩ ihileli mmeliyema nɩ, numɔ ɔkʋ̃ yɛ dɩ: ‘Belé abiyela kɩnlɩma.’ (1 Pit. 4:9) Giliki nu nɩ, odwokɔ pɔkɔ “ngyɛvʋlɔyɛlɛ” ikile “ɔlɔlɛ anzɛnyɩɩ kunlumiba mɔɔ bɛda yɩ ali bekile mmenii mvʋlɔ mɔɔ yézi bɛ nɩ.” Naasʋ̃, yɛ́ yɩ ndwɩ kɛɛ, Pita iduli yɩ mmeliyema Kilisinyiamaa mmenyia nɩɩ mmaalɛ fʋlɔ kɛɛ ‘belé abiyela’ kɛɛ ɛyɛvʋlɔ, kile kɛɛ, belé mmenii mɔɔ bezi bɛ daada na bɛ nɩɩ bɛ bɔ daada nɩ kɛɛ ngyɛvʋlɔ. Sɛ bede bɛ kɛɛ ngyɛvʋlɔ a, nɩ kɛ ɩkɔwʋwa bɛ ikeze a?
Nɩ ɩkɛma bɛkɛyɛ ɔkʋ̃. Mɔwʋ dɩyɛ, fá wʋ nwʋ kɛɛ ndianwʋ. Abiye ɩdʋ salɛ ɩvʋlɔ wʋ ma ɔhɔ yɩ awudo ma wʋ anyɩ ile kyɩ̃ a? Ɔzɔ egyelalɛ yɩ nɩ, ɩáma enyia dɩyɛ be mɔɔ ɛkɛhakɛ yɩ eɣile bela a? Mmɩlɩ mɔ wʋzawʋ sʋ̃ ɔdʋlɩ salɛ ɔvʋlɔlɩ wʋ asafʋ nu maa be nɩ, bɔ ɔhɔnwʋvalɛ nɩ numɔ ɩáyɛ ɛzɩzɩbɛ anzɛnyɩɩ? Sɛ yɛtʋ salɛ yɛfʋlɔ ye mmeliyema mmenyia nɩɩ mmaalɛ na yɛ nɩɩ bɛ bɔ numɔ de yɛ anyɩ a, ɩma yɛnwʋ bɛ bʋwɔ baaba. Mmɩlɩ mɔ nɩ nninyeni nu ɩyɛ ɛzɩzɩbɛ paa wɔ Pita yɩ mmɩlɩ zʋ nɩ, nɩ ihyinyia kɛɛ Kilisinyiamaa bebike bike bɔ nwʋ bɔ nwʋ mmɩlɩ munwala. Ɔzɔ sʋ̃ la yɛ ɩsɛ kɛɛ Kilisinyiamaa mɔɔ bɛda “mmɩlɩ mɔ ili awielɩyɛ” eyi nu nɩ bɛyɛ a.—2 Tim. 3:1.
Pɩbɛlɩ Bayɩbʋlʋ Yi Nu
w13-E 6/15 23
Ndwokɔɣizialɛ Mɔɔ Ɩzʋ̃ Ɛɣɩngalɛmaa Bɛ Ɛkɛnɩ
Bayɩbʋlʋ nɩ ɩkã kɛɛ, Gyisɛsɩ ‘ɩhɔlɩ ɩhanlɩ odwokɔ ihileli azunzuma mɔɔ bɔwɔ fiyiadɩ’ nɩ. (1 Pit. 3:19, NWT) Kɛ eyi tʋ ikile a?
▪ Sʋ̃mavʋlɔ Pita ɩhanlɩ kɛɛ ɔzɔ azunzuma eyi yɛ “bɛyɛlɩ azʋ̃nzɩzɩbɛ wɔ mmɩlɩ mɔ Nyamɩnlɩ ɩlɛ abʋtalɩ ɩdɩkɛɛ wɔ Nowa mmɩlɩ nu nɩ.” (1 Pit. 3:20, NWT) Yɛkɔhʋla yɛkɛhã kɛɛ, awɔvʋlɔ mɔɔ bɔhɔ bɛhɩnlanlɩ Setanɩ yɩ nwʋ ma bɛdɩlɩ atunwa nɩ yɛ na nɩ Pita ɩkã bɔ nwʋ odwokɔ a. Dwuudu ɩhanlɩ kɛɛ ɔzɔ awɔvʋlɔ nɩ “bo kunlu iátwoli be gyinabʋ baaba nɩ mɔɔ Nyamɩnlɩ ɩvalɩ ɩmanlɩ bɛ nɩ na bɔbʋlɩ be gyinabʋ baaba nɩ nɩ,” ɩdʋwalɩ ɔzʋlɔ kɛɛ Nyamɩnlɩ “igua bɛ nwɔnzɔnwɔnzɔ mɔɔ bɛázalʋ yɩ kyɩ̃ wɔ anwunzumi kabii nɩ nu dɛba kɛɛ bɛlɩkɛ́ Ndɛnɩwuwalɛ Eɣile kezile nɩ mɔɔ bokowuwa bɔ ɔfɔ nɩ.”—Dwu. 6.
Mɩnla azʋ̃nzɩzɩbɛ yɛ awɔvʋlɔ nɩ bɛyɛlɩ wɔ Nowa yɩ mmɩlɩ zʋ a? Ansaana Nzuloyilɛ nɩ ɩbaɣa nɩ, ɔzɔ awɔvʋlɔ tanɩ nɩ bɛlanɩnlɩ bɔ nwʋ mmenii. Naasʋ̃ ɔzɔ mmɩlɩ nɩ, nɩ Nyamɩnlɩ ɩlɛ́manlɩ ɔhʋanɩ bɛ kɛɛ bɛyɛ ɔzɔ. (Gyn. 6:2, 4) Akʋ̃ sʋ̃, nɩ ɩ́dɩ yɩ ɔhʋanɩ zʋ kɛɛ awɔvʋlɔ bɛ nɩɩ mmaalɛ bekenyia nna nu nkitanwʋlilɛ. Nyamɩnlɩ ɩábɔ awɔvʋlɔ kɛɛ bɛ nɩɩ mmaalɛ benyia nna nu nkitanwʋlilɛ. (Gyn. 5:2) Sɛ Nyamɩnlɩ yɩ mmɩlɩ mɔ ɩhyɛ nɩ itwu a, ɩkɛzɩkɛ ɔzɔ awɔvʋlɔ tanɩ mɔɔ bɛyɛlɩ azʋ̃nzɩzɩbɛ nɩ. Dwuudu ɩhanlɩ kɛɛ, sikalɛyɩ bɔwɔ “anwunzumi kabii” nu. Sɛ yɛkɛhã a, bɔwɔ sunzuma ɔfʋã nu fiyiadɩ.
Mɛyɩ dɩyɛ, mɩnla mmɩlɩ yɛ Gyisɛsɩ ɩhɔlɩ ɩhanlɩ odwokɔ ihileli “azunzuma mɔɔ bɔwɔ fiyiadɩ” nɩ a? Pita ɩhɛlɛlɩ kɛɛ bɛmanlɩ Gyisɛsɩ “inyianlɩ nnwʋanlɩ wɔ sunzuma nu” ansaana eyi isi. (1 Pit. 3:18, 19, NWT) Yɛ́ yɩ ndwɩ kɛɛ, Pita ɩhanlɩ kɛɛ Gyisɛsɩ ‘ɩhɔlɩ ɩhanlɩ odwokɔ.’ Eyi ikile kɛɛ ansaana Pita ɩkɛlɛ yɩ kɛlɛta mɔɔ ili bɔmʋnlɩ nɩ, na nɩ Gyisɛsɩ ɩhã odwokɔ yɩ nɩ iwie daada. Meti mɔɔ eyi ikile yɛ lɛ kɛɛ, ebiye a Gyisɛsɩ idunwonli yɩ mɛda nɩ, ɩmanlɩ azunzuma tanɩ nɩ mmɔ bɔnwʋnlɩ azʋ̃nlɩhwɩnlɛ mɔɔ ɩla ɛkɛnɩ ɩdɩkɛɛ bɛ. Mɔɔ Gyisɛsɩ ɩhanlɩ nɩ, nɩ ɩ́dɩ Odwokɔba mɔɔ ɩkɛma bekenyia anyɩnlɩlazʋ be. Mfomi na nɩ ɩdɩ ndɛnɩwuwalɛ odwokɔ. (Dwn. 1:1, 2) Mmɩlɩ mɔ Gyisɛsɩ ilili nɔhʋanlɛ ɩhɔ ɩbʋmʋnlɩ owulo nu na bodunwonli yɩ nɩ, ɩlalɩ yɩ ali kɛɛ Abɔnsamɩ íni tumi bela wɔ yɩ zʋ. Akʋ̃ na nɩ Gyisɛsɩ ɩkɔhʋla ɩkɛhã ndɛnɩwuwalɛ mɔɔ ɩla ɛkɛnɩ ɩdɩkɛɛ azunzuma evinli nɩ mmɔ nɩ.—Dwɔ. 14:30; 16:8-11.
Eɣile be ɩba mɔɔ Gyisɛsɩ ɩkɛyɩkyɩ Setanɩ nɩɩ yɩ awɔvʋlɔ tanɩ nɩ ikogua kuma kulonwuu kulonwuu nɩ nu. (Lk. 8:30, 31; Yik. 20:1-3) Sikalɛpɛyɩ mɛyɩ, ɔzɔ azunzuma tanɩ nɩ bɔwɔ sunzuma ɔfʋã nu anwunzumi kabii nu. Bɛ ɛzɩkɛlɛ ɩla ɛkɛnɩ ɩdɩkɛɛ bɛ.—Yik. 20:7-10.
w08-E 11/15 21 ¶8
Ahɛlɛta Mɔɔ Gyemisi Nɩɩ Pita Bɛhɛlɛlɩ Yi Nu Ndwokɔ Aditili
4:6—Aninyiammɔ yɛ lɛ mmenii “mɔɔ bowu” mɔɔ “bɔwɔlɩ Odwokɔba nɩ ɛlawulo behileli” bɛ nɩ a? Nɩ ɔzɔ awuvʋlɔ nɩ yɛ lɛ mmenii mɔɔ nɩ ‘bowu wɔ bɔ mfʋmɩ nɩɩ bɛ tanɩ nu’ anzɛnyɩɩ bɛzabɛ mɔɔ nɩ bowu wɔ sunzuma ɔfʋã nu ansaana bɛbɛadɩ odwokɔba nɩ. (Ɛfɩ. 2:1, NWT) Naasʋ̃, mmɩlɩ mɔ benyianlɩ odwokɔba nɩ nu dedi yɩ mɛda nɩ, bɔwɔlɩ yɩ tʋ ‘bɔwʋwalɩ azɩ wɔ sunzuma nu’ mɔɔ ikile kɛɛ, akʋ̃ bɛ nɩɩ Gyehova nyianlɩ abusunwawɔlɛ.
OCTOBER 28–NOVEMBER 3
BAYƖBƲLƲ NU ANWƲNYIA | 2 PITA 1-3
‘Mmɩlɩ Mɔ Bɛdɩkɛɛ Na Bɛ Anyɩ Ɩla Kɛɛ Gyehova Yɩ Eɣile Nɩ Ɩkɛɣa Ndɛndɛ Nɩ’
w06-E 12/15 27 ¶11
Gyehova ‘Ikeli Ɩkɛma Yi Mmenii’
Anwʋlazʋ mɔɔ Gyisɛsɩ ɩva ɩmanlɩ kɛɛ Gyehova ikeli ɩkɛma yi mmenii “ndɛndɛ zʋ” nɩ, kɛ ɩsɛ kɛɛ yɛtɩ yɩ tʋ yese a? Nyamɩnlɩ yɩ Odwokɔ ikile kɛɛ ‘ɩwɔ numɔ kɛɛ Gyehova ɩlɛ abʋtalɩ’ dɩyɛ, naasʋ̃ sɛ mmɩlɩ nɩ itwu a, ikeli yi mmenii bo ndwokɔ ɩkɛma bɛ ndɛndɛ zʋ. (Luuku 18:7, 8, NWT; 2 Pita 3:9, 10, NWT) Mmɩlɩ mɔ Nzuloyilɛ nɩ ɩɣalɩ wɔ Nowa yɩ mmɩlɩ zʋ nɩ, bɛzɩkɛlɩ tanɩyɛlɛmaa nɩ ndɛndɛ zʋ la. Ɔzɔ sʋ̃ la yɛ ɩzɩkɛlɩ tanɩyɛlɛmaa mɔɔ nɩ bɔwɔ Lɔɔtʋ yɩ mmɩlɩ zʋ iluwa sɩnɩ mɔɔ ɩzʋ̃ sʋlɔ ɩɣalɩ ɩzɩkɛlɩ bɛ nɩ zʋ a. Gyisɛsɩ ɩhanlɩ kɛɛ: “Ɔzɔ sʋ̃ la yɛ Mɩzamɩ Enii Ɣalɛ nɩ mɩ ɛɣalɩyɛ nɩ ɩkɛyɛ a.” (Luuku 17:27-30) Ɔzɔ sʋ̃ la yɛ “mmuzulo ɩkɛɣa” tanɩyɛlɛmaa “bɔ zʋ aɣilevile nu” dɔkʋ̃ a. (1 Tɛsalonikamaa 5:2, 3) Nɔhʋanlɛ nu nɩ, yɛkɔhʋla yekenyia anwʋlazʋ kɛɛ, Gyehova ɩlɛ́ma ndɛnɩ mɔɔ ikowu ikediyia Setanɩ oyuwadɩ nɩ ɩkɛba nwʋmɔ eɣile ɔkʋ̃ po.
w06-E 12/15 19 ¶18
“Gyehova Yɩ Eɣile Kezile Nɩ Iɣike”
Ɩáyɛ yɛ nnwʋánlɩ kɛɛ sʋ̃mavʋlɔ Pita iduli yɛ fʋlɔ kɛɛ yɛmá “Nyamɩnlɩ Eɣile” nɩ ɩyɛ ndɛndɛ wɔ yɛ adwɩnɩ nu! Kɛ yɛkɛyɛ eyi yekeze a? Ɔhʋanɩ ɔkʋ̃ yɛ lɛ kɛɛ yɛkɛva yɛ nwʋ yekowula ‘ɛbɩla mɔɔ nwʋmɔ ɩtɩ sanwuu nu na yeadu yɛ nwʋ yɛama Nyamɩnlɩ’ ɛzɩzɩbɛ ɛzɩzɩbɛ. (2 Pita 3:11, 12) Yɛ nwʋ mɔɔ yɛkɛva yekowula egyima mɔɔ ɩdɩ ɔzɔ nu nɩ, ɩkɔwʋwa yɛ ma yekehila “Nyamɩnlɩ Eɣile” nɩ ɔhʋanɩ ɛzɩzɩbɛ. Mɔɔ Giliki odwokɔ pɔkɔ mɔɔ bekile yɩ tʋ kɛɛ “ɩyɛ ndɛndɛ wɔ yɛ adwɩnɩ nu” nɩ ikile yɛ lɛ kɛɛ “yɛkɛyɛ dɩyɛ be wɔ ndɛndɛ” zʋ. Yɛlɔ́kʋla yɛkɛma Gyehova yɩ mmɩlɩ mɔ ɩha nɩ ɩkɔhɔ ndɛndɛ dɩyɛ, naasʋ̃ mmɩlɩ mɔ yɛdɩkɛɛ ɔzɔ eɣile nɩ, sɛ yɛyɛ Nyamɩnlɩ yɩ ɔzʋ̃mɩnlɛ egyima nɩ ɛzɩzɩbɛ ɛzɩzɩbɛ a, mmɩlɩ nɩ ɩkɔhɔ ndɛndɛ ɩkɛdɛla kezimɔ yekila yɩ ɔhʋanɩ nɩ po.—1 Kɔlɛntɩmaa 15:58.
Pɩbɛlɩ Bayɩbʋlʋ Yi Nu
w08-E 11/15 22 ¶2
Ahɛlɛta Mɔɔ Gyemisi Nɩɩ Pita Bɛhɛlɛlɩ Yi Nu Ndwokɔ Aditili
1:19—Aninyia yɛ lɛ “awulobahyɩ̃ ɔhɔnlɔnwa” nɩ a, mɩnla mmɩlɩ yɛ ivindenli a, na kɛ ɩyɛ mɔɔ yɛnwʋ yɩ kɛɛ ivinde a? “Awulobahyɩ̃ ɔhɔnlɔnwa” nɩ yɛ lɛ Gyisɛsɩ Kɩlayɩsɩ mɔɔ ɩwɔ yɩ Bulombunlililɛ tumi nu nɩ. (Yik. 22:16) Wɔ 1914 nɩ, Gyisɛsɩ ivindenli wɔ abɔdɩ munwatĩĩ bɛ anyunu kɛɛ Bulombunli Mɛzaya ɩva ɩwɔlɩ eɣile fʋlɔ be nwʋ ɛlawulo. Kɩlayɩsɩ yɩ nwʋ ɛzɩnzanlɛ nwʋ anyɩnlɩzʋdɩyɛnwʋnlɛ nɩ ɩmanlɩ belili bɔmʋnlɩ bɔnwʋnlɩ Gyisɛsɩ yɩ animinyiamɩ nɩɩ yɩ Bulombunlililɛ tumi nɩ, na eyi ɩma yɛnwʋ yɩ kɛɛ Nyamɩnlɩ yɩ nkɔmɩhyɛlɛ ndwokɔ nɩ, ɩdɩ nɔhʋanlɛ petee. Ɔzɔ odwokɔ nɩ mɔɔ yekediye nɩ, ikodwe wɔ yɛ ahʋnlɩnɩ nu na ama yɛanwʋ yɩ kɛɛ Awulobahyɩ̃ Ɔhɔnlɔnwa nɩ ivinde.
w08-E 11/15 22 ¶3
Ahɛlɛta Mɔɔ Gyemisi Nɩɩ Pita Bɛhɛlɛlɩ Yi Nu Ndwokɔ Aditili
2:4, NWT—Mɩnla yɛ lɛ “Tartarus” a, na mɩnla mmɩlɩ yɛ bɔdʋlɩ awɔvʋlɔ atunwadɩlɛmaa nɩ bogualɩ numɔ a? Tartarus ɩdɩ kɛɛ fiyiadɩ mɔɔ azunzuma abɔdɩ nkʋ̃ la yɛ bɛ nɩɩ bɛ kɔ ɛkɛnɩ a, enii ɩáhɔ ɛkɛnɩ. Ɩdɩ bʋwabɩlɛ be mɔɔ sɛ abiye ɩkɔ nu a, yɩ adwɩnɩ inu mɔɔ ɩáma ɩnwʋ Nyamɩnlɩ yi tile nu pɔkɔ azʋlɔtʋ. Mmenii mɔɔ bɔwɔ Tartarus nɩ, béni eɣile be nwʋ anyɩnlɩlazʋ bela. Nyamɩnlɩ ɩdʋlɩ awɔvʋlɔ atunwadɩlɛmaa igualɩ Tartarus nu wɔ Nowa yɩ mmɩlɩ zʋ, na sa bɔkɔ ɔzʋlɔ bɔbʋwa ɔzɔ bʋwabɩlɛ tanɩ nɩ nu nkʋ̃ʋ̃ kɔbʋmɩ kɛɛ bɛkɛzɩkɛ bɛ.