Onlumanlɛ Ɩfa Nyilalɛ Sʋ̃maa Ɩba!

Gyisɛsɩ ihileli kɛɛ ɩsɛ kɛɛ Kilisinyiamaa bonuma. (Kɩnga Matiyu 28:19, 20.) Mɩnla ɔhʋanɩ zʋ yɛ ɩsɛ kɛɛ bonuma abiye a? Na mɩnla yɛ ɩsɛ kɛɛ abiye yɛ na iadwu ɔzɔ bʋtayɩ yɩ nwʋ a?

1. Mɩnla ɔhʋanɩ zʋ yɛ ɩsɛ kɛɛ bonuma abiye a?

“Numa” ɩzʋ̃ Giliki odwokɔpɔkɔ mɔɔ yɩ tʋ ikile “fa wula” nzulo tʋ nu. Bonumaa Gyisɛsɩ nɩ bɛvalɩ yɩ bowulalɩ Baka Dwɔdanɩ nu, na mɛyɩ mɛda nɩ “Gyisɛsɩ ɩzʋ̃ nzulo nɩ nu ivindenli.” (Maakɩ 1:9, 10) Ɔzɔ la sʋ̃ yɛ sɛ nɔhʋanlɛ Kilisinyiamaa bonumaa a bɛfa bɛ bowula nzulo nu a.

2. Sɛ abiye numa a ikile mɩnla?

Sɛ abiye numa a, ikile kɛɛ iyila yɩ nwʋ zʋ ɩma Gyehova Nyamɩnlɩ. Sɛ abiye iyilaa yɩ nwʋ zʋ a, kɛ ɩyɛ yɩ ise a? Ansaana ikonluma nɩ ɩbɔ mpayɩ wɔ ɛɣɩntanlɛ nu, na ɩkã ikile Gyehova kɛɛ ɩkɔzʋ̃mɩ yɩ yɩ nnwʋanlɩ eɣile munwatĩĩ. Ɩbɔ anʋhʋba kɛɛ ɩkɔzʋ̃mɩ Gyehova nkʋ̃ la na ɩkɛma Nyamɩnlɩ yɩ apɛdɩ mɔɔ ɩkɛyɛ nɩ nwʋ ikehyinyia yɩ ɩkɛdɛla dɩyɛ bela wɔ yɩ ɛbɩlawɔlɛ nu. Isi pɔkɔ kɛɛ “ɩkɔhwɩ̃ yɩ nwʋ wɔ oyuwadɩ akɔnɔ nwʋ na ɩadʋwa Gyisɛsɩ” na iali yɩ ehilehilelɛ nɩ yɩ ndianwʋ mɛda. (Matiyu 16:24) Yɩ nwʋ zʋ yilalɛ nɩɩ onlumanlɛ yɩ ɩma ɩtwɩ̃ ibike Gyehova nɩɩ yɩ ɔhɔnwʋmmɔ dedimaa.

3. Mɩnla yɛ ɩsɛ kɛɛ abiye ɩyɛ ansaana ɩahʋla ianluma a?

Ansaana ɔkɔhʋla okonluma nɩ ɩsɛ kɛɛ osuma Gyehova nwʋ dɩyɛ na enyia yi nu dedi kezile. (Kɩnga Hibulumaa 11:6.) Mmɩlɩ mɔ wʋ nnimidi nɩɩ wʋ dedi ɩyɛɛ kezile nɩ ɩkɛma ɔlɔlɛ mɔɔ ɔwɔ ma Gyehova nɩ sʋ̃ ɩkɛyɛ kezi. Na ekenyia ɛpɛ kɛɛ ekeli yɩ nwʋ dasɩlɛ na wʋava yɩ mmɛla wʋawɔ wʋ ɛbɩla. (2 Timoti 4:2; 1 Dwɔɔnʋ 5:3) Mmɩlɩ mɔ abiye ɩbɔɔ “ɛbɩla mɔɔ ye Niibenyia ɩpɛ yɩ” na ɩyɛɛ “dɩyɛ mɔɔ ɩsɔ yɩ anyɩ nɩ” ɩkɔhʋla ikezi pɔkɔ kɛɛ ikeyila yɩ nnwʋanlɩ zʋ ɩkɛma Gyehova na ianluma.—Kolosiyiamaa 1:9, 10.a

SUMÁ SƲ̃MAA

4. Sa yɛkʋla yesuma dɩyɛ be wɔ Gyisɛsɩ yɩ onlumanlɛ yi nu

Kɩnga Matiyu 3:13-17 na sumá sʋ̃maa falɩ Gyisɛsɩ yɩ onlumanlɛ nwʋ. Akʋ̃ bozunzú ndwokɔɣizialɛ eyimmɔ nwʋ:

• Asʋ̃ bonlumanlɩ Gyisɛsɩ nɩ, nɩ ɩdɩ abɔdɔma a?

• Kɛ bonlumanlɩ yɩ bezeli a? Asʋ̃ bɛbɩndɩnlɩ nzulo wɔ yi ti zʋ a?

Gyisɛsɩ ɩwɔlɩ yɩ tʋ kɛɛ ɩyɛɛ egyima titili mɔɔ Nyamɩnlɩ ɩvalɩ ɩmanlɩ yɩ wɔ azɩlɛ yɩ zʋ nɩ wɔ yi onlumanlɛ mɛda. Kɩnga Luuku 3:21-23 nɩɩ Dwɔɔnʋ 6:38, na akʋ̃ bozunzú odwokɔɣizialɛ eyi nwʋ:

• Mɩnla egyima yɛ Gyisɛsɩ ɩvalɩ ilili bɔmʋnlɩ wɔ yɩ ɛbɩlawɔlɛ nu wɔ yi onlumanlɛ mɛda a?

5. Onlumanlɛ ɩdɩ bʋtayɩ mɔɔ sa ɔkʋla otwu nwʋmɔ

Ebiye a wu kunlu itu kɛɛ ekeyila wʋ nwʋ zʋ na wʋanluma. Naasʋ̃ sɛ ɔkɔ ɔzʋlɔ osuma Gyehova nwʋ dɩyɛ na ɛba ɔnwʋ yɩ bʋwɔ a, ɩlɛ́yɛ sɩ ɩkɛma wʋ kɛɛ ekezi pɔkɔ mɔɔ nwʋmɔ ihyinyia eyi. Kilá mmenii be mɔɔ bɔhʋla bɛyɛ ɔzɔ, yɩ́ VIDIYO nɩ.

VIDIYO: Kezimɔ Ɔkɔhʋla Ɛkɛyɛ Gyehova Yɩ Ɔhɔnwʋ (1:11)

Kɩnga Dwɔɔnʋ 17:3 nɩɩ Gyemisi 1:5, na akʋ̃ bozunzú odwokɔɣizialɛ eyi nwʋ:

• Mɩnla yɛ ɩsɛ kɛɛ abiye yɛ na ama ɩahʋla ianluma a?

1. Yeyila yɛ nwʋ zʋ yɛma Gyehova mmɩlɩ mɔ yɛhã yehile yɩ kɛɛ yɛpɛ kɛɛ yɛsʋ̃mɩ yɩ daabaa nɩ

2. Sɛ yenumaa a, yɛma mmenii nwʋ kɛɛ yeyila yɛ nwʋ zʋ yɛma Nyamɩnlɩ

6. Sɛ yenuma a, ɩma yɛba yɛkɩnla Gyehova yɩ abusunwa yɩ nwʋ

Sɛ yenuma a, yɛba yɛkɩnla oyuwadɩ munwala abusunwa mɔɔ ɔkʋ̃yɛlɛ wɔ numɔ yɩ nwʋ. Ɩávalɩ nwʋmɔ dɩka mɔɔ yɛzʋ̃ nɩɩ kezimɔ bɛdɩdɩlɩ yɛ nɩ, ye munwala yɛlɛ dedi ɔkʋ̃ na mmɛla ɔkʋ̃ la yɛ yɛfa yɛbɔ yɛ ɛbɩla. Kɩnga Ndwomi 25:14 nɩɩ 1 Pita 2:17, na akʋ̃ bozunzú odwokɔɣizialɛ eyi nwʋ:

• Sɛ abiye numa a, kɛ ɩkã ɩ nɩɩ Gyehova nɩɩ yɩ ɔhɔnwʋmmɔ dedimaa bɔ ɔhɔnwʋvalɛ ise a?

YƖ DƆKƆWƆLƐ

Gyisɛsɩ ihileli kɛɛ ɩsɛ kɛɛ Kilisinyiamaa bonuma. Ansaana abiye ɩkɔhʋla ikonluma nɩ ɩsɛ kɛɛ inyia Gyehova nu dedi kezile, ɩfa yɩ mmɛla ɩbɔ yɩ ɛbɩla, na iyila yɩ nwʋ zʋ ɩma yɩ.

Kɛ Okowuwa Ekeze a?

• Mɩnla ɔhʋanɩ zʋ yɛ ɩsɛ kɛɛ bonuma abiye a, na mɩnla ti mɔɔ nwʋmɔ ihyinyia a?

• Sɛ abiye inuma a, ikile mɩnla?

• Mɩnla yɛ ɩsɛ kɛɛ abiye ɩyɛ ansaana ianluma a?

PƖBƐ́ SƲ̃MAA

Sumá mɔɔ onlumanlɛ ikile nɩɩ mɔɔ iáhile.

“Mɩnla Yɛ Lɛ Onlumanlɛ a?” (Ndwokɔ mɔɔ ɩwɔ jw.org zʋ)

Kilá ɔhʋanɩ mɔɔ abiye ikoluwa ɔzʋlɔ na ɩahʋla ianluma.

“Gyehova Nwʋ Ɔlɔlɛ Nɩɩ Anyɩnlɩzɔlɛ Yɛ Ɩkã Abiye Ma Inuma a” (Ɔwɩɛnɩlɛ Aɣanɩ, March 2020)

Kɩnga mɔɔ ɩhanlɩ benyia be ma inlumanlɩ.

“Nɩ Bɛpɛ Kɛɛ Mɩzamɩ Mɩpɩbɛlɩ Nɔhʋanlɛ Yi Nu” (Ɔwɩɛnɩlɛ Aɣanɩ, February 1, 2013)

Kilá sianti mɔɔ onlumanlɛ ɩfa nyilalɛ ɩba nɩɩ kezimɔ ekeziyeziye wʋ nwʋ ɛkɛma onlumanlɛ.

“Asʋ̃ Ɩsɛ Kɛɛ Munuma a?” (Ndwokɔ Mɔɔ Mmɩlantɩyɛ Nɩɩ Nɣɛdɛkɛ Bebizia—Munwalɩyɛ Mɔɔ Ɩkɔwʋwa Bɛ, Ɔfʋã 2, yi ti 37)