OZUMALƐDƖYƐ 37
Mɔɔ Bayɩbʋlʋ Ɩkã Ɩfalɩ Egyima Nɩɩ Ozukua Nwʋ
Asʋ̃ egyima anzɛnyɩɩ ozukua nwʋ adwɩnɩndwɩnɩ ɩhyɛ wʋ zʋ kyɩ̃ a? Sa ɩkʋla ɩyɛ sɩ kɛɛ yekeli ye ahyinyiadɩ nwʋ egyima na mmɩlɩ ɔkʋ̃ yɩ la sʋ̃ yɛava ɔzʋ̃mɩnlɛ mɔɔ ɩfata yɛama Gyehova. Bayɩbʋlʋ yɩ ɩfa fʋlɔdulɛba mɔɔ ɩkɔhʋla ɩkɔwʋwa yɛ nɩ ɩma.
1. Mɩnla yɛ Bayɩbʋlʋ ɩkã ɩfalɩ egyima nwʋ a?
Nyamɩnlɩ ɩpɛ kɛɛ yɛ anyɩ ideli ye egyima nwʋ. Bayɩbʋlʋ yɩ ɩkã kɛɛ ‘dɩyɛ baaba bela íni ɛkɛnɩ ɩma enii kɛɛ ikenyia anyɩnlɩlelɛ wɔ yi egyima ɛzɩzɩbɛ nu.’ (Odwokɔhanlɛvʋlɔ 2:24) Gyehova ɩyɛ egyima ɛzɩzɩbɛ. Sɛ yesumazuma yɩ na yɛzʋ̃ yɛ ahʋnlɩnɩ munwala nu yɛyɛ egyima ɛzɩzɩbɛ a, ɩma yɛsɔ yɩ anyɩ na yɛzayɛ sʋ̃ yɛ anyɩ ide.
Egyima nwʋ ihyinyia. Naasʋ̃ íni kɛɛ yɛma nwʋmɔ ba hyinyia yɛ tɛla ɔzʋ̃mɩnlɛ mɔɔ yɛfa yɛma Gyehova nɩ kyɩ̃. (Dwɔɔnʋ 6:27) Ɩwɔ anʋhʋba yɛ kɛɛ, sɛ yɛfa yɩ ɔzʋ̃mɩnlɛ yedi bɔmʋnlɩ a, sa idi yɛ ahyinyiadɩ nwʋ egyima.
2. Mɩnla adwɩnɩ yɛ ɩsɛ kɛɛ yenyia wɔ ozukua nwʋ a?
Ɩwɔ numɔ kɛɛ, Bayɩbʋlʋ ɩkã kɛɛ “ozukua ɩbɔ yɛ nwʋ banɩ” dɩyɛ, naasʋ̃ isia ɩbɔ yɛ kɔkɔ kɛɛ ozukua nkʋ̃ la ɩlɔ́kʋla ɩkɛma yɛ anyɩ ikele. (Odwokɔhanlɛvʋlɔ 7:12) Meti, bɛhyɛ yɛ ɛzɩzɩbɛ kɛɛ íni kɛɛ yɛma yɛ anyɩ ɩbʋlʋ ozukua, mfomi ɩsɛ kɛɛ ‘ye kunlu itwoli mɔɔ yɛlɛ yɩ nɩ nwʋ.’ (Kɩnga Hibulumaa 13:5.) Sɛ yɛma ye kunlu itwoli mɔɔ yɛlɛ yɩ nɩ nwʋ a, ɩlɛ́ma yɛ adwɩnɩ ikodu ɩkɔvʋla iluwakɛɛ yéni sʋ̃maa nɩ ti. Na ɩlɛ́ma yɛkɔwɔ kakɛ mbʋanlɩ mbʋanlɩ sʋ̃. (Ɛɣɛlɛwulɛ 22:7) Na asianɩ mɔɔ ɩzʋ̃ kyakyadʋlɛ nɩɩ ɔhʋanɩ tanɩ mɔɔ mmenii duwa ɔzʋlɔ nyia ozukua ndɛndɛ nu ɩba nɩ, ebiye ɩlɔ́tʋ yɛ.
3. Kɛ yɛkɛva ye ozukua yɛkɛyɛ baaba yekeze a?
Gyehova ɩdɩ kunlumiba Nyamɩnlɩ, na sɛ ‘yɛyɩyɩ yɛ ahʋnlɩnɩ nu yɛkyɛ dɩyɛ’ a, nɩ ikile kɛɛ yesumazumaa yɩ. (1 Timoti 6:18) Sa yɛkʋla yɛfa ye ozukua yɛbʋwa asafʋ yɩ nɩɩ bɛzabɛ mɔɔ behyinyia mmʋwalɩyɛ nɩ, yi titili ye mmeliyema dedimaa. Kɛ ozukua dʋdʋ mɔɔ yɛfa yɛyɛ baaba yɛ Gyehova yɩ anyɩ ideli nwʋmɔ a, mfomi adwɩnɩ mɔɔ yɛfa yɛyɛ nɩ yɛ ikila a. Sɛ yɛzʋ̃ yɛ ahʋnlɩnɩ munwala nu yɛda kunlumiba ali a, yɛ anyɩ ikele na yɛkɔzɔ Gyehova anyɩ.—Kɩnga Egyima 20:35.
SUMÁ SƲ̃MAA
Kilá kezimɔ mfasʋ wɔ ɔzʋlɔ paa kɛɛ yekenyia ozukua nwʋ adwɩnɩba na yɛama yɛ anyɩ ɩazɔ mɔɔ yɛlɛ nɩ.
4. Duwá kezimɔ ɛyɛ egyima zʋ hyɛ Gyehova animinyiamɩ
Ɩsɛ kɛɛ ɔhɔnwʋvalɛ mɔɔ yɛ nɩɩ Gyehova wɔ nɩ ɩkã subanɩ mɔɔ yɛda yɩ ali wɔ egyima nwʋ. Yɩ́ VIDIYO nɩ, na akʋ̃ bozunzú ndwokɔɣizialɛ mɔɔ ili ɛkɛnɩ nɩ nwʋ.
Wɔ vidiyo yi nu nɩ, mɩnla yɛ ɩkã wʋ ahʋnlɩnɩ wɔ kezimɔ nɩ Jason ɩyɛ yi egyima nɩɩ subanɩ mɔɔ ɩda yɩ ali wɔ yi egyima nu nɩ nwʋ a?
Mɩnla yɛ ɩyɛlɩ ɩva ihileli kɛɛ ɩwɔ egyima nwʋ adwɩnɩba a?
Kɩnga Kolosiyiamaa 3:23, 24, na akʋ̃ bozunzú odwokɔɣizialɛ eyi nwʋ:
Mɩnla ti yɛ kezimɔ yɛyɛ ye egyima nwʋ ihyinyia paa a?
Egyima nwʋ ihyinyia. Naasʋ̃ íni kɛɛ yɛma nwʋmɔ ba hyinyia yɛ tɛla ɔzʋ̃mɩnlɛ mɔɔ yɛfa yɛma Gyehova nɩ kyɩ̃ɩ̃.
5. Sɛ yɛma yɛ anyɩ ɩsɔ mɔɔ yɛlɛ a, ɩbʋwa yɛ
Mmenii bɔ mmɔdɩnɩ kɛɛ bokohunwahunwa ozukua sʋ̃maa munwa. Naasʋ̃ Bayɩbʋlʋ ɩáhyɛ yɛ ɛzɩzɩbɛ kɛɛ yɛyɛ ɔzɔ. Kɩnga 1 Timoti 6:6-8, na akʋ̃ bozunzú odwokɔɣizialɛ eyi nwʋ:
Mɩnla yɛ Bayɩbʋlʋ ɩhyɛ yɛ ɛzɩzɩbɛ kɛɛ yɛyɛ a?
Sɛ yéni sʋ̃maa po a, sa yɛ anyɩ ɩkʋla ide. Yɩ́ VIDIYO nɩ, na akʋ̃ bozunzú odwokɔɣizialɛ mɔɔ ili ɛkɛnɩ nɩ nwʋ.
Ɩávalɩ nwʋmɔ kɛɛ abusunwa eyi béni ozukua sʋ̃maa nɩ, mɩnla yɛ ɩma bɛ anyɩ ide a?
Naasʋ̃ sɛ yɛwɔ sʋ̃maa na yɛpɩɩ yekenyia ebiye yɛkɛhɩnla nwʋmɔ sʋ̃ ɛ? Gyisɛsɩ ɩhanlɩ odwokɔ be mɔɔ ɩma yɛnwʋ kezimɔ asianɩ wɔ eyi nu. Kɩnga Luuku 12:15-21, na akʋ̃ bozunzú odwokɔɣizialɛ eyi nwʋ:
Mɩnla yɛ osuma wɔ Gyisɛsɩ yɩ ndianwʋ yi nu a?—Kilá nkyɩkyɛmi 15.
Kɩnga Ɛɣɛlɛwulɛ 10:22 na fa tindiã 1 Timoti 6:10 nwʋ. Na akʋ̃ bozunzú ndwokɔɣizialɛ eyimmɔ nwʋ:
Gyehova mɔɔ yɛkɛva yɩ ɔhɔnwʋ nɩɩ ozukua sʋ̃maa mɔɔ yekenyia nɩ, ɛhɩnla dɩyɛ yɛ osunzu kɛɛ nwʋmɔ ihyinyia paa a? Mɩnla ti a?
Sɛ eɣile bela yɛpɩ kɛɛ yekenyia ozukua sʋ̃maa a, mɩnla ɔhawʋ yɛ ɩzʋ̃ numɔ ɩkɛɣa a?
6. Gyehova ɩkɛva mɔɔ yehyinyia nɩ ɩkɛma yɛ
Egyima nɩɩ ozukua nwʋ anwʋkyɩlɩ ɩkɔhʋla ikodwe dedi mɔɔ yɛlɛ wɔ Gyehova nu nɩ ikehila. Yɩ́ VIDIYO nɩ, na kilá mɔɔ yɛkɔhʋla yɛkɛyɛ mmɩlɩ mɔ yeyiyiaa ndwokɔzɩzɩbɛ mɔɔ ɩdɩ ɔzɔ nɩ, na akʋ̃ bozunzú ndwokɔɣizialɛ mɔɔ ili ɛkɛnɩ nɩ nwʋ.
Wɔ vidiyo yi nu nɩ, mɩnla ndwokɔzɩzɩbɛ yɛ eliyema benyia yɩ iyiyialɩ a?
Mɩnla yɛ ɩyɛlɩ ɩva ilili ndwokɔzɩzɩbɛ yɩ nwʋ egyima a?
Kɩnga Matiyu 6:25-34, na akʋ̃ bozunzú odwokɔɣizialɛ eyi nwʋ:
Mɩnla anʋhʋba yɛ Gyehova ɩva ɩwɔ bɛzabɛ mɔɔ bɛfa yɩ ɔzʋ̃mɩnlɛ bedi bɔmʋnlɩ nɩ a?
ABIYEMMƆ BƐKÃ KƐƐ: “Ɩsɛ kɛɛ mɩyɛ egyima ɛzɩzɩbɛ mɩfa mikila mɩ abusunwa. Mʋlɔ́kʋla mʋkɔhɔ dɩyɛzumanlɛ dapɛnɩ bela.”
Mɩnla ɛhɛlɛlɛ odwokɔ yɛ ɩma esi pi kɛɛ, sɛ ɛfa Gyehova yɩ ɔzʋ̃mɩnlɛ di bɔmʋnlɩ a, nɩ ezi pɔkɔ baaba a?
YƖ DƆKƆWƆLƐ
Egyima nɩɩ ozukua nwʋ ihyinyia, naasʋ̃ íni kɛɛ yɛma nwʋmɔ ba hyinyia yɛ tɛla ɔzʋ̃mɩnlɛ mɔɔ yɛfa yɛma Gyehova nɩ kyɩ̃.
Kɛ Okowuwa Ekeze a?
Mɩnla yɛ ɩkɔhʋla ɩkɔwʋwa wʋ ma ekenyia egyima nwʋ adwɩnɩba a?
Sɛ ɛma wʋ anyɩ ɩsɔ mɔɔ ɛlɛ a, mɩnla mfasʋ yɛ ekenyia a?
Kɛ ɛkɛyɛ na wʋahile kɛɛ anʋhʋba mɔɔ Gyehova ɩwɔ kɛɛ ɩkɛva yi mmenii bɛ ahyinyiadɩ ɩkɛma bɛ nɩ, ɔwɔ numɔ anwʋlazʋ a?
PƖBƐ́ SƲ̃MAA
Kilá kɛɛ Bayɩbʋlʋ ɩkã ozukua nwʋ odwokɔ kɛɛ ɩdɩ dɩyɛ tanɩ a.
“Asʋ̃ Ozukua Yɛ Ɩfa Tanɩyɛlɛ Azʋlɔtʋ Sʋ̃maa Ɩba a?” (Ndwokɔ mɔɔ ɩwɔ jw.org zʋ)
Sumá kezimɔ yɛkɔhʋla yɛkɛva ye ozukua yɛkɔzɔ Nyamɩnlɩ anyɩ.
“Mɩnla Yɛ Bayɩbʋlʋ Ɩkã Ɩfalɩ Dɩyɛhyɛlɛ Nwʋ a?” (Ndwokɔ mɔɔ ɩwɔ jw.org zʋ)
Asʋ̃ asianɩ bela íni kyakyadʋlɛ nu a?
“Mɔɔ Bayɩbʋlʋ Ɩkã Ɩfalɩ Kyakyadʋlɛ Nwʋ” (Awake!, March 2015)
Kilá mɔɔ ɩwʋwalɩ benyia be ma iyiakili kyakyadʋlɛ nɩɩ awuloyɛlɛ.
“Nɩ Mɩ Anyɩ Ideli Awɔnkɔ Mɔɔ Bɛfa Besi Ambile Nwʋ Paa” (Ɔwɩɛnɩlɛ Aɣanɩ, November 1, 2011)