Heu Miˬyehˇ neh noeˬ taˬ˗euˬ jeˬ nga loˇ?

Nawˇ paˇ dmˬ gui ngeh maˬ ehˇ, tiˬ biˬ haw ngeh hawˇ˗eu mawˇ kawˇ naˇ haˬ ngeh maˬ ehˇ, diˬ˗eu, sehꞈ˗eu, guiˇ deuˆ˗eu, tsawˇ haˬ uiˬ gaˇ mawˬ puˇ pyehˬ˗eu, gaˇ kawˆ heu deuˬ˗ahˇ ya gaˬ ya mawˇ luꞈ˗eu paˬ. Tiˬ poˆ na, nawˇ kʼawꞈ naˇ˗eu gawˇ˗eu jeˬ˗ahˇ ya tahˬ puˬ˗awˇ, nawˇ gaˬ˗eu tiˬ gʼaˬ na bi shiˇ˗euˬ baˬ da neh kʼawꞈ noeˬ shaˬ luꞈ˗eu paˬ.

Nawˇ heu loꞈ˗ehˇ noeˬ˗eu paˬ:

• Miˬyehˇ ngaˇ hawˇ˗eu ngaˬ˗euˬ nymˇ jiˇ˗ahˇ, heu loꞈ˗ehˇ bi pyeuꞈ mawꞈ ngaˇ loˇ?

• Shaˬ zahˬ˗ahˇ laˆ piˇ˗eu gʼaˇ duˬ, aˬ suˇ gʼaˬ˗ahˇ shaˇ ju iˇ paˬ nga?

• Maˇ diˇ nui saˇ oꞈ˗eu aˇ nah lehˇ jaˆ ngaˇ laˬ?

Gaˇ kawˆ heu deuˬ˗ahˇ Jaˇliꞈ ehˇ kʼoꞈ nehˬ nya meh.

Miˬyehˇ tsawˇ haˬ zaˬ˗euˬ gʼaˇ duˬ zahˬ leˇ paˬ˗ehˇ gʼeh˗eu jeˬ jahˇ meh lehˇ Jaˇliꞈ ehˇ˗eu meh.

• Tsawˇ haˬ zaˬ deuˬ naˇ˗eu, mawˬ iˇ˗eu, shiˇ˗eu maˬ paˇ baw meh.—Pah mehˬ˗eu 21:4

• “Kuiˇ shiˇ gaˇ nyeh nyeh nya laˇ.”—Iˇsaˬyaˇ 35:6

• “Myaˆ behꞈ mawˇ nya laˇ.”—Iˇsaˬyaˇ 35:5

• Shiˇ˗euˬ deuˬ paˇ gʼoꞈ dehꞈ laˇ.—Yoˇhaˬ 5:28, 29

• Tiˬ gʼaˬ˗iˬ maˬ paˇ naˇ.—Iˇsaˬyaˇ 33:24

• Miˇ tsaˬ kʼoeˇ taˆ jawˇ˗eu tsawˇ haˬ deuˬ, dzaˬ˗eu dawˇ˗eu tiˬ byah tiˬ loꞈ jaˆ.—Ja ceuˬ 72:16

Jaˇliꞈ mehˬ˗eu jeˬ˗ahˇ neh gaˇ dahˇ tsoeˬ˗eu jeˬ za

Jeˬ hu taꞈ˗ahˇ boꞈ taˬ˗euˬ gaˇ kawˆ heu deuˬ, tiˬ jeˬ˗iˬ maˬ pyeuꞈ leˇ nya gaˇ ehˇ˗eu paˬ lehˇ nawˇ noeˬ tehꞈ˗a. Ehˇ kʼawꞈ, gʼawˬ myahˇ maˬ gʼeh˗ehˇ gaˇ kawˆ heu deuˬ miˇ tsaˬ kʼoeˇ taˆ bi pyeuꞈ laˇ ma lehˇ, Miˬyehˇ saˇ jaˇ dzaˬ taˬ˗awˇ, Jaˇliꞈ kʼawꞈ aˬ yawꞈ aˬ joˆ˗ehˇ mˇ pyeuꞈ˗eu lehˇ paˇ ehˇ mawˇ nehˬ taˬ˗euˬ meh.

Kʼoeˇ naˇ, Jaˇliꞈ aˬ dui˗ahˇ nymˬ˗mˇ mi naˆ˗ehˇ nui saˇ oꞈ ni, aˬ joˆ˗ehˇ ya jah˗eu lehˇ jiˇ ehˇ nehˬ taˬ˗euˬ meh. Nawˇ noeˬ shaˬ kʼahˬ lahˇ luꞈ˗eu jeˬ˗ahˇ shaˇ noeˬ haw sheˇ. Nymˬ˗mˇ nawˇ pyuˇ shuiˇ, nymˇ jiˇ, naˇ gawˇ maˬ ngeuˇ naˇ, yawˬ ha gaˬ˗eu gʼaˬ shiˇ˗euˬ gaˇ kawˆ heu deuˬ˗ahˇ kʼahˬ lahˇ luꞈ˗eu paˬ. Jaˇliꞈ gaˇ kawˆ heu deuˬ˗ahˇ laˆ piˇ nya ni caw ba nehˬ nya˗awˇ, laꞈ oˆ paw naˇ haˬ taˬ˗euˬ gaˇ kawˆ heu deuˬ˗ahˇ ehˇ kʼoꞈ˗eu heu neh kʼawꞈ, nawˬ˗ahˇ gʼaˬ biꞈ nehˬ nya˗eu meh.

• Aˬ dui shaˬ zahˬ˗ahˇ aˬ jeˬ miˇ neh ya tahˬ puˬ˗eu nga?

• Shaˬ zahˬ˗ahˇ aˬ dui aˬ joˆ˗ehˇ laˆ piˇ nya˗eu nga?

• Nymˇ jiˇ nui saˇ oꞈ ni aˬ joˆ˗ehˇ ya jahˇ˗eu nga?

• Shiˇ naˇ, aˬ gaˇ iˇ˗eu nga?

• Shiˇ dzeuˇ˗euˬ aˬ dui gaˬ˗eu deuˬ˗ahˇ ya mawˇ kʼoꞈ meh loˇ?

• Miˬyehˇ aˬ yawꞈ neh saˇ jaˇ kʼaˇ dzaˬ taˬ˗euˬ loꞈ˗ehˇ mˇ meh lehˇ, aˬ dui aˬ jeˬ miˇ neh jah nya˗eu nga?

Nawˇ paˇ dmˬ heu dmˬ˗ahˇ gui˗eu heu naˇ, Jaˇliꞈ mehˬ˗eu jeˬ˗ahˇ siˬ nya mawꞈ gaˇ duˇ˗eu meh. Paˇ dmˬ heu dmˬ nawˬ˗ahˇ caw ba nehˬ nya meh. Yawˬ deuˆ na luꞈ˗euˬ naˇ haˬ˗eu jeˬ heu naˇ, nawˇ Jaˇliꞈ˗ahˇ yaw muiˬ˗ehˇ gʼoˆ shaw laˇ ni caw ba nehˬ meh. Gʼawˬ mya lam gʼaˬ Yeˬhawˇbaˬ˗euˬ Saˇ kiˇ deuˬ nehˬ˗ehˇ Jaˇliꞈ dzaw mawꞈ˗eu meh. Nawˇ kʼawꞈ dzaw mawꞈ˗eu paˬ lehˇ nga maꞈ noeˬ tmˬ ma.