Yeˬhawˇbaˬ nui kʼahˇ shiˇ˗eu jeˬ˗ehˇ aˬ joˆ˗ehˇ ya ngehˬ ya tmˇ˗eu nga?

Ngehˬ nya tmˇ nya˗eu jeˬ heu naˇ Yeˬhawˇbaˬ neh aˬ dui˗ahˇ beh ahˇ nehˬ taˬ˗euˬ muiˬ dui dui˗eu laꞈ sawˬ tiˬ jeˬ pyeuꞈ meh. Aˬ dui laꞈ sawˬ heu˗ahˇ aˬ joˆ˗ehˇ zmˬ˗eu lehˇ aˬ yawꞈ˗euˬ gʼaˇ duˬ aˇ yeˇ huiˬ ngaˇ laˬ? Aˇ yeˇ huiˬ dui dui˗eu meh. (Yaˬkoˆ 1:26-ahˇ gui.) Toˆ˗ehˇ naˇ aˬ dui Yeˬhawˇbaˬ nui kʼahˇ shiˇ˗eu jeˬ˗ehˇ aˬ joˆ˗ehˇ ya ngehˬ ya tmˇ˗eu nga?

1. Ngehˬ nya tmˇ nya˗eu laꞈ sawˬ heu˗ahˇ gaˇ dahˇ tsoeˬ ni aˬ joˆ˗ehˇ zmˬ nya˗eu nga?

Jaˇliꞈ aˬ dui˗ahˇ ‘tiˬ gʼaˬ tiˇ gʼaˬ gʼaˬ biꞈ˗awˇ caw dehˬ caw toˆ daˆ leꞈ˗awˬ’ lehˇ ehˇ˗eu meh. (1 Teˇsaˬloˇni 5:11) Nawˇ gʼaˬ biꞈ paˬ˗ehˇ gʼeh˗eu tiˬ gʼaˬ na jawˇ meh loˇ? Aˬ yawꞈ˗ahˇ gʼaˬ ahˇ leˇ ni aˬ joˆ˗ehˇ jahˇ nehˬ nya˗eu nga? Nawˇ aˬ yawꞈ˗ahˇ maˇ maˇ ni ngehˬ gʼeh nehˬ mawꞈ˗eu lehˇ bi siˬ˗awˇ, aˬ yawꞈ˗euˬ yaw muiˬ tiˬ jeˬ na˗ahˇ ngehˬ keuˆ nya meh. Nawˇ siˬ nya˗eu tiˬ gʼaˬ na˗ahˇ gʼaˬ ahˇ leˇ paˬ˗ehˇ gʼeh˗eu Jaˇliꞈ aˇ deuˆ tiˬ deuˆ˗ahˇ noeˬ doˆ laˇ miˇ˗a laˬ? Aˬ yawꞈ maꞈ˗ahˇ gʼaˬ bi ahˇ leˇ˗eu Jaˇliꞈ aˇ deuˆ gʼawˬ mya ni jaˆ meh. Aˬ dui aˬ jeˬ ngehˬ˗eu lehˇ tehꞈ˗ehˇ maˬ ngeuˇ˗eu, aˬ joˆ˗ehˇ ngehˬ˗eu heu jiˇ aˬ yawꞈ maꞈ˗ahˇ gʼaˬ bi ahˇ leˇ nya˗eu lehˇ taˬ ngehˇ. Teu miˇ neh aˬ myah luꞈ nahˬ yu ni naˇ haˬ muiˬ paˬ˗ehˇ ngehˬ˗awˬ.—Dawˬdaˬ 15:1.

2. Aˬ dui aˬ joˆ˗ehˇ gʼeh˗eu dawˬ maˬ ya ngehˬ nga?

Jaˇliꞈ “aˬ cawˬ˗ahˇ bi coeˬ leˇ˗eu dawˬ taˬ ngehˬ” lehˇ ehˇ˗eu meh. (Eˇpeˇsu 4:29-ahˇ gui.) Heu naˇ dawˬ doeˇ maˬ ehˇ, aˬ cawˬ˗euˬ nui ma˗ahˇ deuˬ leˇ naˇ leˇ˗eu dawˬ maˬ ehˇ, maˬ ngehˬ gaˇ ehˇ mawꞈ˗eu meh. Aˬ dui aˬ cawˬ˗euˬ gaˇ kawˆ maˬ ya ja kʼoeˬ, maˬ ya ja bu˗a.—Dawˬdaˬ 16:28-ahˇ gui.

3. Gʼaˬ ahˇ leˇ paˬ˗ehˇ gʼeh˗eu dawˬ ngehˬ nya ni aˬ joˆ˗ehˇ ya jahˇ˗eu nga?

Aˬ myah myah naˇ aˬ dui neh ngehˬ˗euˬ jeˬ aˬ dui˗euˬ nui ma laꞈ kʼoeˇ aˬ jeˬ ahˇ˗eu, aˬ jeˬ shaˇ noeˬ luꞈ˗eu lehˇ bi siˬ laˇ˗eu meh. (Luˇkaꞈ 6:45) Teu miˇ neh aˬ dui tsaˬ˗eu dawˇ˗eu jeˬ, muiˬ˗eu shawˇ˗eu jeˬ, aˬ cawˬ haw gaˬ paˬ˗ehˇ gʼeh˗eu jeˬ, aˬ cawˬ taˬ huiˬ taˬ mahˇ paˬ˗ehˇ gʼeh˗eu jeˬ, heu deuˬ˗ahˇ shaˇ noeˬ nya ni ya leh jeh˗eu meh. (Piˇliˇpiˆ 4:8) Teu loꞈ˗ehˇ shaˇ noeˬ nya˗eu gʼaˇ duˬ, aˬ dui aˬ suˇ gʼaˬ nehˬ˗ehˇ cawˬ cawˬ˗eu, gʼaˬ naˬ naˬ ngeh aˬ jeˬ˗ahˇ haw baˇ˗eu lehˇ yaw gahˇ gahˇ˗ehˇ ya tseˇ˗eu meh. (Dawˬdaˬ 13:20) Kʼoeˇ uˬ taꞈ, maˬ ngehˬ mi naˆ˗ehˇ yaw muiˬ˗ehˇ ya shaˇ noeˬ˗awˇ, yawˬ ha neh ngehˬ˗euˬ dawˬ aˬ cawˬ˗ahˇ aˬ joˆ˗ehˇ gʼeh leˇ˗eu nga lehˇ jiˇ ya shaˇ noeˬ˗eu meh. “Dawˬ doeˇ ngehˬ˗eu mi cehˇ coeˇ gaˇ duˇ˗awˇ, tsawˇ gahˇ ahˇ˗eu dawˬ muiˬ jaˆ gʼaˬ˗ahˇ duˇ˗eu meh” lehˇ Jaˇliꞈ ehˇ˗eu meh.—Dawˬdaˬ 12:18.

Naꞈ suiˇ ni dzaw

4. Aˬ geu ngeh aˬ jeˬ ngehˬ˗eu, aˬ joˆ˗ehˇ ngehˬ˗eu lehˇ shaˇ noeˬ

Tiˬ poˆ na aˬ dui aˇ nah hawˇ˗eu nui ma ya cawˆ˗eu jeˬ ngehˬ doˆ laꞈ˗eu meh. (Yaˬkoˆ 3:2) Gaˬlaˬtiˆ 5:22, 23-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ jeˬ ngehˬ˗awˇ aˬ joˆ˗ehˇ ngehˬ˗eu lehˇ shaˇ noeˬ nya˗eu gʼaˇ duˬ, Yeˬhawˇbaˬ˗ahˇ Jaˇliꞈ heu deuˆ laꞈ kʼoeˇ ngehˬ keuˆ taˬ˗euˬ seuˆ dzeuꞈ aˇ gʼehˇ aˬ geu hmˬ shaˇ mawꞈ nya? Seuˆ dzeuꞈ aˇ gʼehˇ heu deuˬ nawˬ˗ahˇ aˬ joˆ˗ehˇ caw ba nehˬ nya˗eu nga?

1 Gawˇliˬtu 15:33-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Cawˬ deuˬ hawˇ˗eu aˬ dui neh gui aˬ dui neh haw˗euˬ jeˬ, aˬ dui˗euˬ ngehˬ jeˬ ngehˬ kawˆ˗ahˇ aˬ joˆ˗ehˇ bi pyeuꞈ˗iˇ nya˗eu nga?

Dawˬtsoˆ 3:1, 7-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ dui aˬ geu ngeh ciˬ cuˇ ni jawˇ paˬ˗ehˇ gʼeh˗awˇ, aˬ geu ngeh ngehˬ paˬ˗ehˇ gʼeh˗eu nga?

5. Aˬ cawˬ˗ahˇ yaw muiˬ paw dzeˇ dzaˬ˗ehˇ ngehˬ keuˆ

Biˬdiˬoˬ: ‘Aˬ cawˬ˗euˬ gʼaˇ duˬ muiˬ ni’ ngehˬ (4:07)

• Biˬdiˬoˬ laꞈ kʼoeˇ˗euˬ mehˇ nmˇ zaˬ yo aˬ li heu gʼaˬ, aˬ cawˬ˗ahˇ ngehˬ keuˆ˗eu jeˬ aˬ jeˬ miˇ neh laˆ paˇ mawꞈ˗eu nga?

• Aˬ yawꞈ teu˗ahˇ laˆ paˇ˗eu gʼaˇ duˬ aˬ jeˬ jahˇ˗euˬ nga?

Dawˬtsoˆ 7:16-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ cawˬ˗euˬ maˬ muiˬ˗eu jeˬ˗ahˇ ja paˬ˗ehˇ tsaˬ laˇ ngeh, aˬ dui aˬ jeˬ˗ahˇ ya noeˬ taˬ˗eu nga?

Dawˬtsoˆ 7:21, 22-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Tiˬ gʼaˬ na nawˬ˗ahˇ ja bu˗eu lehˇ ya siˬ ngeh, nawˇ nui ma maˬ pehˇ˗eu gʼaˇ duˬ Jaˇliꞈ heu deuˆ aˬ joˆ˗ehˇ caw ba nehˬ nya˗eu nga?

6. Nymˇ jiˇ laꞈ kʼoeˇ˗euˬ deuˬ nehˬ˗ehˇ yaw muiˬ˗ehˇ ngehˬ

Biˬdiˬoˬ: Nui gaˬ hawˇ˗eu yaw zeu baw˗eu jeˬ nymˇ jiˇ˗ahˇ mehˬ bawˬ bi gm (3:08)

• Nymˇ jiˇ laꞈ kʼoeˇ˗euˬ deuˬ nehˬ˗ehˇ yaw muiˬ˗ehˇ ngehˬ nya ni nawˬ˗ahˇ caw ba nehˬ˗eu aˬ jeˬ nga?

Eˇpeˇsu 4:31, 32-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Nymˇ jiˇ laꞈ kʼoeˇ˗euˬ deuˬ˗ahˇ aˬ dui aˬ yawꞈ maꞈ˗ahˇ gaˬ˗eu lehˇ siˬ leˇ ni aˬ joˆ˗ehˇ ngehˬ paˬ˗ehˇ gʼeh˗eu nga?

Yeˬhawˇbaˬ aˬ yawꞈ˗euˬ Zaˬmaˇ Yeˬsuˇ˗ahˇ aˇ naˆ ni gaˬ˗eu lehˇ ngehˬ doˆ leꞈ˗eu meh. Maꞈtehˬ 17:5-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Aˬ dui nymˇ jiˇ laꞈ kʼoeˇ˗euˬ deuˬ nehˬ˗ehˇ ngehˬ cawˬ ngeh, Yeˬhawˇbaˬ˗ahˇ aˬ joˆ˗ehˇ dzaw geuꞈ nya˗eu nga?

Kawˆ shawˆ

Aˬ dui neh ngehˬ˗euˬ dawˬ heu naˇ baoˬ ahˇ˗eu miˇ neh, aˬ dui aˬ jeˬ ngehˬ˗eu, aˬ geu ngeh ngehˬ˗eu, aˬ joˆ˗ehˇ ngehˬ˗eu lehˇ yaw muiˬ˗ehˇ ya shaˇ noeˬ˗eu meh.

Ja sawˇ poˆ˗eu

• Aˬ cawˬ˗ahˇ gʼaˬ ahˇ leˇ ni aˬ joˆ˗ehˇ ngehˬ paˬ˗ehˇ gʼeh˗eu nga?

• Aˬ dui aˬ joˆ˗ehˇ gʼeh˗eu dawˬ maˬ ngehˬ ni yahˇ paˬ˗ehˇ gʼeh˗eu nga?

• Aˬ myah luꞈ dawˬ muiˬ ngehˬ˗awˇ, gʼaˬ bi ahˇ leˇ˗eu dawˬ ngehˬ nya ni aˬ jeˬ ya jahˇ˗eu nga?

Haw lahˬ

Aˬ dui yaw muiˬ paw dzeˇ dzaˬ˗ahˇ aˬ joˆ˗ehˇ ngehˬ nya˗eu nga?

Tsawˇ gahˇ ahˇ˗eu dawˬ ngehˬ nya ni leh jeh (8:04)

Dawˬ doeˇ maˬ ngehˬ ni aˬ joˆ˗ehˇ yahˇ nya˗eu nga lehˇ haw.

“Dawˬ doeˇ ngehˬ˗eu heu maˇ maˇ ni bahˬ ngaˇ laˬ?” (Iˇteuꞈnehꞈ laꞈ kʼoeˇ˗euˬ gaˇ kawˆ)

Aˬ cawˬ˗euˬ gaˇ kawˆ˗ahˇ maˬ ja kʼoeˬ ni aˬ joˆ˗ehˇ yahˇ nya˗eu nga lehˇ haw.

Ngaˇ aˬ cawˬ˗ahˇ maˬ ja kʼoeˬ ni aˬ joˆ˗ehˇ yahˇ nya˗eu nga? (2:36)

Maˬ muiˬ˗eu dawˬ ngehˬ dzaw taˬ˗euˬ zaˬ yo aˬ li tiˬ gʼaˬ Yeˬhawˇbaˬ˗ahˇ siˬ nya laˇ ngeh, teu loꞈ˗ehˇ maˬ paˇ ngehˬ ni aˬ joˆ˗ehˇ byehˇ nya˗euˬ nga lehˇ haw.

“Ngaˇ aˬ jeˬ˗euˬ gʼaˇ duˬ dehꞈ luꞈ˗eu lehˇ yaw kʼaˆ˗ehˇ shaˇ noeˬ laˇ nyaˬ” (Loꞈ˗eu nymˇgoˇ, 2013 Yehꞈ siˬ ba la 1)