Yeˬhawˇbaˬ˗ahˇ ja ceuˬ˗eu gʼaˇ duˬ dehꞈ!

Dehꞈ ziˇ˗aˬ, poeˬ dui dui˗eu laꞈ sawˬ pyeuꞈ meh. Aˬ dui yawˬ nah na dehꞈ˗eu jeˬ heu naˇ, dehꞈ ziˇ˗ahˇ aˇ poeˬ aˇ naˆ ni taˬ baw˗eu nga lehˇ bi siˬ laꞈ meh. Aˬ dui Yeˬhawˇbaˬ˗euˬ Saˇ kiˇ pyeuꞈ˗eu miˇ neh, aˬ dui pyeuꞈ luꞈ˗eu jeˬ hawˇ˗eu mˇ nya˗eu jeˬ neh Dehꞈ ziˇ biꞈ laꞈ˗euˬ Yeˬhawˇbaˬ˗ahˇ ciˬ huiˬ˗awˇ ja ceuˬ mawꞈ˗eu ma. (Ceuˬ 36:9; Pah 4:11) Ehˇ kʼawꞈ, haiˬ˗eu miˇ tsaˬ˗ahˇ yawˬ nah na noeˬ shaˬ kʼahˬ lahˇ˗eu jeˬ tehꞈ˗ehˇ jaˆ˗eu miˇ neh, Miˬyehˇ gaˇ mˇ˗eu jeˬ, jeˬ nah nah saˬ bi jaˆ iˇ nya meh. (Kuˆ 4:18, 19) Teu miˇ neh, ‘Ngaˇ Yeˬhawˇbaˬ˗ahˇ muiˬ dzehˬ˗eu jeˬ biꞈ maˬ loˇ? lehˇ yawˬ ha˗ahˇ ya naˇ haˬ˗eu meh. (Hawˇ 14:2) Ngaˬ˗euˬ gaˇ, Yeˬhawˇbaˬ˗euˬ gaˇ˗ahˇ deuˬ laˇ ngaˇ laˬ? Ngaˇ Miˬyehˇ gaˇ mˇ˗eu paw aˬ jeˬ noeˬ taˬ˗euˬ nga? Miˬyehˇ˗euˬ gaˇ aˬ joˆ˗ehˇ mˇ nya dzehˬ laˇ˗eu nga? Nawˇ Miˬyehˇ gaˇ mˇ nya dzehˬ laˇ˗eu jeˬ˗ahˇ ya mawˇ naˇ, Yeˬhawˇbaˬ˗ahˇ caw ba nehˬ laꞈ lehˇ guiˬ lahˬ shaˇ˗awˇ, loˬ naˇ tiˬ jeˬ na˗ahˇ laˆ paˇ. Yeˬhawˇbaˬ˗ahˇ yawˬ nah na ja ceuˬ˗eu heu naˇ, nui saˇ oꞈ˗awˇ laꞈ kʼaˬ cehˇ˗eu yaw duˬ baw meh.—Ceuˬ 61:8.

Nawˇ nya˗eu jeˬ Yeˬhawˇbaˬ˗euˬ gʼaˇ duˬ zmˬ lehˇ kuˇ˗eu biˬdiˬoˬ haw gʼaˬ naˇ, naˇ haˬ˗eu jeˬ heu deuˬ˗ahˇ dawˬ kʼoꞈ biꞈ:

• Nawˇ nya˗eu jeˬ Saˬdaˬ˗euˬ miˇ tsaˬ gʼaˇ duˬ zmˬ˗eu heu naˇ, aˬ jeˬ miˇ neh dawˇ ga˗ahˇ duˇ˗eu nga? (1Yoˇ 2:17)

• Yeˬhawˇbaˬ˗ahˇ muiˬ dzehˬ˗eu jeˬ biꞈ˗eu deuˬ, guiˬ lahˬ aˬ jeˬ jeˇ ya˗eu nga?

• Nawˇ pyeuꞈ luꞈ˗eu jeˬ hawˇ˗eu nawˇ nya˗eu jeˬ Miˬyehˇ˗euˬ gaˇ laꞈ kʼoeˇ aˬ jeˬ jeˇ mˇ nya˗eu nga?