Yawˬ ha˗euˬ jawˇ kʼahˬ˗ahˇ gʼoꞈ laˇ˗euˬ deuˬ˗euˬ gʼaˇ duˬ guiˬ lahˬ gʼawˬ mya ni jaˆ

Miˇ kʼahˬ yawˬ kʼahˬ yawˬ˗ahˇ pyuˇ poˆ˗iˇ˗eu gʼaˇ duˬ pawˇ˗iˇ˗euˬ mehˇ nmˇ gʼawˬ mya gʼaˬ, aˇ nah naˇ yawˬ ha˗euˬ jawˇ kʼahˬ˗ahˇ gʼoꞈ laˇ˗euˬ meh. Aˬ yawꞈ maꞈ aˬ jeˬ miˇ neh teu loꞈ˗ehˇ noeˬ tsehˆ˗euˬ nga? Aˬ yawꞈ maꞈ Yeˬhawˇbaˬ hawˇ˗eu tsawˇ haˬ deuˬ˗ahˇ gaˬ˗eu miˇ neh, tsaꞈ gaˬ˗eu deuˬ loˬ dzehˬ˗eu jawˇ duˬ˗ahˇ pawˇ˗iˇ˗euˬ meh. (Maꞈtehˬ 22:37-39) Aˬ yawꞈ maꞈ aˬ jeˬ jeˇ˗ahˇ ya byehˇ dzeh˗euˬ nga? Kʼoeˇ naˇ, Yeˬhawˇbaˬ˗ahˇ neh aˬ jeˬ jeˇ guiˬ lahˬ za˗euˬ nga? Aˬ dui Ehˇpa˗li kaˆ nahˇ ma ga kʼehˬ paw jaˆ˗eu Kehˇmaˬlmˬ miˇ kʼahˬ˗ahˇ˗euˬ mehˇ nmˇ tiˬ gʼaˬ na˗euˬ gaˇ kawˆ˗ahˇ haw ma.

“‘Ngaˬ shaˬ’ jawˇ˗eu jawˇ duˬ˗ahˇ poˆ tsaˬ”

1998 kʼoꞈ˗ahˇ mehˇ nmˇ Oˇ˗neˇsiˬmeˬ Kehˇmaˬlmˬ miˇ kʼahˬ˗ahˇ neh miˇ kʼahˬ yawˬ kʼahˬ yawˬ˗ahˇ pawˇ˗iˇ˗awˇ, kʼoeˇ gaˇ 14 kʼoꞈ jawˇ˗euˬ meh. Tiˬ nah aˬ yawꞈ bawˬ dzaˬ˗iˇ ngeh, tsaꞈ gaˬ˗eu gaˇ nehˬ˗ehˇ taꞈ˗eu yaw jeˬ ma jeˬ tiˬ kawˆ˗ahˇ ya gaˬ˗euˬ meh. Dawˬ mehˬ mehˬ˗eu gʼaˬ “Aˬ dui hawˇ˗eu aˬ dui˗euˬ cawˬ ngaˬ shaˬ tiˬ gʼaˬ tiˬ gaˇ ka˗iˇ˗awˇ, aˬ yawꞈ aˬ dui naˆ maˬ tseˇ ka za dzehˬ naˇ, aˬ dui aˬ yawꞈ nehˬ˗ehˇ maˬ ka˗iˇ loˇ?” lehˇ naˇ haˬ˗eu meh.

Oˇ˗neˇsiˬmeˬ yaw jeˬ ma jeˬ teu˗ahˇ ya gaˬ ngeh, yawˬ ha˗euˬ jawˇ kʼahˬ pyeuꞈ˗eu Kehˇmaˬlmˬ miˇ kʼahˬ˗ahˇ ya gʼoꞈ˗iˇ˗awˇ tsaꞈ gaˬ˗eu gaˇ˗ahˇ ya caw ba˗iˇ nya lehˇ noeˬ laˇ˗euˬ meh. Ehˇ kʼawꞈ aˬ yawꞈ Kehˇmaˬlmˬ miˇ kʼahˬ˗ahˇ maˬ ya jawˇ˗eu myahˇ laˇ˗euˬ miˇ neh, jawˇ nya maˬ siˬ lehˇ kʼahˬ lahˇ˗eu meh. Teu miˇ neh aˬ yawꞈ teu gaˇ ba la koꞈ siˬ jawˇ haw˗iˇ˗awˇ, 2012 kʼoꞈ˗ahˇ jawˇ kʼoꞈ˗iˇ˗euˬ meh.

Oˇ˗neˇsiˬmeˬ aˬ yawꞈ “Ngaˇ teu gaˇ˗euˬ yaw saꞈ saꞈ˗eu jeˬ hawˇ˗eu yaw dehꞈ dehꞈ˗eu jeˬ nehˬ˗ehˇ jawˇ daˬ nya ni ya leh jeh˗awˇ, Bawˬdzaˬnymˇ˗ahˇ gʼahˇ ceuˆ ni gʼeh˗eu nuiˇ duˬ˗ahˇ ya nuiˇ˗euˬ ma” lehˇ ehˇ˗awˇ, “Ehˇ kʼawꞈ ngaˇ dawˬ mehˬ mehˬ gaˇ yaw muiˬ˗ehˇ naˇ haˬ ngeh, saˇ lehˆ ni gʼeh˗awˇ byehˆ noeꞈ ni gʼeh˗eu nuiˇ duˬ˗ahˇ aˬ lawˆ lawˆ˗ehˇ ngehˇ leˇ miˇ˗a” lehˇ uiˇ uiˇ˗ehˇ paˇ ehˇ˗eu meh.

2013 kʼoꞈ˗ahˇ mehˇ nmˇ Oˇ˗neˇsiˬmeˬ, Paˇlaˬ miˇ kʼahˬ˗ahˇ 9 kʼoꞈ jawˇ˗iˇ˗awˇ gʼoꞈ laˇ˗euˬ mehˇ nmˇ Jeˇloˬdiˬ nehˬ˗ehˇ sheuˬ dahˬ dzaˬ˗euˬ meh. Aˬ yawꞈ nyaꞈ Yeˬhawˇbaˬ˗euˬ gaˇ˗ahˇ dehꞈ ziˇ laꞈ kʼoeˇ naˬ ba tiꞈ taˬ ngeh, guiˬ lahˬ aˬ jeˬ jeˇ za˗euˬ nga? Oˇ˗neˇsiˬmeˬ “Nga nyaꞈ Miˬyehˇ Miˇkʼahˬ gaˇ kawˆ tsaꞈ gaˬ˗eu Dzaw nymˇ (SKE)˗ahˇ ya daˆ˗iˇ˗awˇ, Beˬdeˬlaˇ˗ahˇ jiˇ ya mˇ˗euˬ ma. Dzeuˇ yaꞈ ngeh kʼoꞈ laꞈ kʼoeˇ tehꞈ˗ehˇ nga maꞈ˗euˬ aˇ muˇ laꞈ kʼoeˇ 20 gʼaˬ byah ni iˇ cuꞈ shawˇ˗euˬ meh. Nymˬ˗mˇ ngaˇ ‘ngaˬ shaˬ’ jawˇ˗eu jawˇ duˬ˗ahˇ poˆ tsaˬ gaˇ duˇ nya” lehˇ ehˇ˗eu meh. (Maˬkuˆ 1:17, 18) Jeˇloˬdiˬ jiˇ “Ngaˇ guiˬ lahˬ heu myaˆ myaˆ˗ehˇ za paˬ lehˇ tiˬ jawˇ˗iˬ maˬ noeˬ haw˗aˬ” lehˇ ehˇ˗eu meh.

Tsawˇ haˬ deuˬ˗ahˇ ya caw ba˗euˬ laˬ kʼaˬ cehˇ

Juˇdiˬ Aˬmeˬliˇkaˬ miˇ kʼahˬ˗ahˇ pawˇ˗iˇ˗euˬ kʼawꞈ, aˬ yawꞈ Miˬyehˇ gaˇ˗ahˇ heu naˆ maˬ tseˇ mˇ mawꞈ˗eu meh. Aˬ yawꞈ “Kehˇmaˬlmˬ˗ahˇ aˬ ma aˬ da jawˇ gaˇ gʼa˗iˇ˗awˇ Aˬmeˬliˇkaˬ˗ahˇ gʼoꞈ leˇ ngeh, Jaˇliꞈ dzaw nehˬ dahˬ beh˗euˬ deuˬ˗ahˇ noeˬ mawˇ˗eu miˇ neh ngoeˇ˗euˬ ma” lehˇ ehˇ˗eu meh. Ehˇ kʼawꞈ, Juˇdiˬ Kehˇmaˬlmˬ˗ahˇ pawˇ kʼoꞈ laˇ paˬ maˬ siˬ ngaˇ leˇ noeˬ˗eu meh. Aˬ jeˬ miˇ neh ehˇ naˇ, Aˬmeˬliˇkaˬ˗ahˇ aˬ yawꞈ mˇ luꞈ˗eu gaˇ pyuˇ gʼawˬ mya ni za laˇ˗eu uˬ taꞈ, Kehˇmaˬlmˬ˗ahˇ jawˇ˗eu aˬ yawꞈ˗euˬ aˬ da˗euˬ naˇ gawˇ laˆ saˆ poeˬ jiˇ ya poˆ˗eu miˇ neh meh. Ehˇ kʼawꞈ aˬ yawꞈ Yeˬhawˇbaˬ˗ahˇ nui ma taˬ˗awˇ Kehˇmaˬlmˬ˗ahˇ gʼoꞈ laˇ ma lehˇ noeˬ tsehˆ˗euˬ meh. Aˬ yawꞈ aˬ cawˬ˗euˬ miˇ kʼahˬ˗ahˇ jawˇ ngeh, yaw saˇ saˇ lehˇ ya dehꞈ˗euˬ aˇ yamˬ˗ahˇ noeˬ mawˇ nya lehˇ ehˇ˗eu meh. Teu miˇ neh aˬ yawꞈ Yeˬhawˇbaˬ˗ahˇ teu gaˇ jawˇ daˬ nya ni caw ba nehˬ laꞈ lehˇ guiˬ lahˬ shaˇ˗awˇ, aˇ maꞈ˗ahˇ sheuˬ gʼeh˗eu gʼaˬ hawˇ˗eu aˬ yawꞈ˗euˬ miˬ zaˬ jiˇ aˬ yawꞈ˗ahˇ gʼaˬ biꞈ dui dui˗eu meh.

Juˇdiˬ “Ngaˇ smˇ kʼoꞈ laꞈ kʼoeˇ dzaw zaˬ 4 gʼaˬ˗ahˇ iˇ cuꞈ shawˇ ni ya caw ba nehˬ˗euˬ gaˇ laˬ kʼaˬ cehˇ dui dui miˇ˗a” lehˇ ehˇ˗eu meh. Juˇdiˬ mehˇ nmˇ Sam Kehˇ˗suiꞈtoˬ nehˬ˗ehˇ sheuˬ dahˬ dzaˬ˗awˇ aˬ yawꞈ nyaꞈ dzehˬ˗eu huˬ mehˬ mehˬ˗eu gʼaˬ ya geuꞈ˗euˬ uˬ taꞈ, nymˬ˗mˇ naˇ aˇ maꞈ˗ahˇ sheuˬ gʼeh˗eu gaˇ mˇ luꞈ˗eu meh. Aˬ yawꞈ˗euˬ aˬ da tawˇ neh, aˬ joˆ˗ehˇ gʼeh luꞈ˗a? Miˇ kʼahˬ yawˬ kʼahˬ yawˬ˗ahˇ Juˇdiˬ aˬ da˗euˬ naˇ gawˇ gawˇ ma˗ahˇ yawꞈ ngehꞈ˗ehˇ laˆ saˆ nehˬ˗eu naˇ gawˇ laˆ saˆ duˬ tiˬ tsahˇ˗ahˇ ya mawˇ˗awˇ, teu gaˇ yaw muiˬ˗ehˇ laˆ saˆ nya˗euˬ meh.

Yeˬhawˇbaˬ ngehˬ gʼeh nehˬ laꞈ˗eu jeˬ˗ahˇ ya mawˇ

Mehˇ nmˇ Gʼoiˇteuˬ Kehˇnaˬdaˬ miˇ kʼahˬ˗ahˇ pawˇ˗iˇ˗euˬ meh. Ehˇ kʼawꞈ, aˬ yawꞈ sahˬ boꞈ dzaw goˇ˗eu gaˇ kawˆ˗ahˇ ngehˬ keuˆ taˬ˗euˬ Loꞈ˗eu nymˇgoˬ˗ahˇ ya gui ngeh, yawˬ ha dzaw luꞈ˗eu jeˬ˗ahˇ shaˇ noeˬ laˇ˗euˬ meh. Teu miˇ neh aˬ yawꞈ sahˬ boꞈ dzaw goˇ luꞈ˗eu kʼoeˇ naˬ leˇ˗awˇ, aˇ yamˬ yaw kʼaˆ˗ehˇ maˬ jiˇ ni gaˇ za laˇ˗eu jeˬ dzaw˗iˇ˗euˬ meh. Aˬ yawꞈ “Ngaˇ teu loꞈ˗ehˇ jahˇ ngeh gaˇ yaw kawˇ ma˗ehˇ poˆ mawˇ nya˗awˇ, ngaˇ mˇ mawꞈ nya lehˇ noeˬ luꞈ˗eu myahˇ laˇ˗euˬ jeˬ ya mˇ˗euˬ ma. Teu naˇ huˬ mehˬ mehˬ˗eu gʼaˬ geuꞈ˗eu heu meh” lehˇ ehˇ˗eu meh. Aˇ nah naˇ aˬ yawꞈ mehˇ nmˇ Kehˇloˬliˬ nehˬ˗ehˇ sheuˬ dahˬ dzaˬ˗awˇ, Kehˇmaˬlmˬ miˇ kʼahˬ˗ahˇ tiˬ kʼehˬ gʼoꞈ le ngeh Beˬdeˬlaˇ˗ahˇ gʼa˗iˇ˗euˬ meh. Teu ngeh mehˇ nmˇ tiˬ gʼaˬ na aˬ yawꞈ nyaꞈ˗ahˇ Kehˇmaˬlmˬ˗ahˇ Miˬyehˇ gaˇ mˇ le ma laˬ lehˇ cawˬ˗eu meh. Gʼoiˇteuˬ “Nga nyaꞈ yaw awˬ awˬ lehˇ dehꞈ luꞈ˗eu miˇ neh, aˬ yawꞈ maꞈ neh caw˗euˬ jeˬ˗ahˇ maˬ mˇ caw nya paˬ˗ehˇ gʼeh˗eu tiˬ jeˬ˗iˇ maˬ jaˆ” lehˇ ehˇ˗eu meh. Kehˇloˬliˬ jawˇ saˇ yaw kʼaˆ˗ehˇ maˬ doˆ kʼawꞈ, aˬ yawꞈ nyaꞈ Kehˇmaˬlmˬ miˇ kʼahˬ˗ahˇ Miˬyehˇ mˇ le ma lehˇ noeˬ tsehˆ˗euˬ meh.

Gʼoiˇteuˬ hawˇ˗eu Kehˇloˬliˬ aˬ myah luꞈ huˬ mehˬ mehˬ˗eu gʼaˬ geuꞈ laˇ˗awˇ, Jaˇliꞈ laꞈ kʼoeˇ˗euˬ yaw tsaˬ yaw dawˇ˗ahˇ nui ma ahˇ˗eu yaw myaˬ gʼaˬ˗ahˇ ya caw ba˗euˬ meh. Aˬ yawꞈ nyaꞈ pawˇ le beh beh ngeh, pyuˇ yuˇ taˬ˗euˬ ui cuiˆ jaˆ˗eu miˇ neh, gaˇ maˬ mˇ ni jawˇ nya˗euˬ meh. Ehˇ kʼawꞈ, aˇ nah naˇ aˬ yawꞈ nyaꞈ Kehˇmaˬlmˬ˗ahˇ huˬ mehˬ mehˬ˗eu gʼaˬ geuꞈ daˆ leꞈ nya˗eu gʼaˇ duˬ, Kehˇnaˬdaˬ miˇ kʼahˬ˗ahˇ ba la nyiˬ siˬ smˇ siˬ gʼoꞈ˗iˇ˗awˇ gaˇ mˇ˗iˇ˗euˬ meh. Aˬ yawꞈ nyaꞈ aˬ jeˬ jeˇ guiˬ lahˬ za˗euˬ nga? Aˬ yawꞈ nyaꞈ SKE Dzaw nymˇ˗ahˇ ya daˆ˗iˇ˗awˇ, dzehˬ˗eu huˬ mehˬ mehˬ˗eu gʼaˬ ya geuꞈ˗euˬ uˬ taꞈ, nymˬ˗mˇ naˇ Bawˬdzaˬnymˇ tsoˆ gaˇ mˇ luꞈ˗eu meh. Gʼoiˇteuˬ “Nga nyaꞈ saˇ lehˆ ni gʼeh˗eu dehꞈ ziˇ˗ahˇ byehˇ dzeh˗awˇ, Yeˬhawˇbaˬ˗ahˇ gʼoe dzehˬ laˇ˗euˬ miˇ neh, aˬ yawꞈ nga nyaꞈ˗ahˇ ngehˬ gʼeh luꞈ˗eu lehˇ siˬ laˇ nya” lehˇ ehˇ˗eu meh.

Tsawˇ haˬ deuˬ˗ahˇ Yeˬhawˇbaˬ˗ahˇ a nehˬ ni ya caw ba˗euˬ gaˇ neh za˗euˬ laˬ kʼaˬ cehˇ˗eu jeˬ

2002 kʼoꞈ˗ahˇ mehˇ nmˇ Ehˬlawˬ Jeˬmaˬniˬ miˇ kʼahˬ˗ahˇ sahˬ boꞈ dzaw goˇ luꞈ ngeh Zaˬ guˬ deuˬ nawˇ nawˬ˗euˬ dehꞈ ziˇ˗ahˇ aˬ joˆ˗ehˇ zmˬ de? lehˇ ehˇ˗eu sahˬ boꞈ aˇ taꞈ˗ahˇ ya gui˗euˬ meh. Gaˇ kawˆ teu aˬ yawꞈ˗ahˇ dehꞈ ziˇ laꞈ kʼoeˇ aˇ pyaˇ daˬ taˬ˗euˬ jeˬ laˆ paˇ ni laˆ noeˬ nehˬ˗euˬ meh. 2006 kʼoꞈ keuˆ laˇ ngeh aˬ yawꞈ Miˬyehˇ˗euˬ gaˇ mˇ˗eu Dzaw nymˇ (MTS)˗ahˇ ya daˆ iˇ˗awˇ, dzaw gʼaˬ naˇ aˬ yawꞈ neh dehꞈ le˗euˬ miˇ kʼahˬ pyeuꞈ˗eu Kehˇmaˬlmˬ˗ahˇ Miˬyehˇ gaˇ ya mˇ iˇ˗eu meh.

Teu gaˇ aˬ yawꞈ aˇ yamˬ yaw kʼaˆ˗ehˇ maˬ jiˇ leˇ˗eu gaˇ tiˇ hmˬ poˆ mawˇ˗awˇ, aˇ nah naˇ pyuˇ teu naˆ maˬ tseˇ za laˇ˗eu gaˇ tiˬ hmˬ˗ahˇ paˇ mawˇ˗euˬ meh. Ehˇ kʼawꞈ aˬ yawꞈ gaˇ teu naˇ Miˬyehˇ gaˇ mˇ˗eu aˇ yamˬ yaw kʼaˆ˗ehˇ maˬ doˆ laˇ nga lehˇ kʼahˬ lahˇ˗eu meh. Teu miˇ neh aˬ yawꞈ˗ahˇ dzehˬ˗eu huˬ mehˬ mehˬ˗eu gʼaˬ bi geuꞈ˗eu lehˇ kuˇ ngeh aˬ yawꞈ maˬ nyi naˬ ni taˆ lehˇ ha geuꞈ˗euˬ meh. Baw leˬ gʼaˬ ya siˬ ngeh pyuˇ biꞈ daˆ nehˬ ma lehˇ ehˇ kawꞈ, Ehˬlawˬ aˬ yawꞈ neh noeˬ tsehˆ˗euˬ jeˬ maˬ beˬ paˇ˗aˬ. Aˇ nah naˇ aˬ yawꞈ Paˇlaˬ miˇ kʼahˬ˗ahˇ gʼawˬ mya kʼoꞈ jawˇ haw˗euˬ mehˇ nmˇ Saꞈteˇpaˬniˬ nehˬ˗ehˇ sheuˬ dahˬ dzaˬ˗euˬ meh. Saꞈteˇpaˬniˬ Kehˇmaˬlmˬ miˇ kʼahˬ˗ahˇ Miˬyehˇ gaˇ mˇ ngeh aˬ jeˬ jeˇ˗euˬ shaˬ zahˬ˗ahˇ yaˬ tahˬ puˬ˗euˬ nga?

Saꞈteˇpaˬniˬ “Ngaˇ Kehˇmaˬlmˬ˗ahˇ pawˇ laˇ ngeh tiˬ jawˇ, gʼawˬ mya jeˬ nehˬ˗ehˇ maˬ tsaˬ leˇ˗eu uˬ taꞈ, jawˇ saˇ jiˇ yaw kʼaˆ˗ehˇ maˬ doˆ nya. Ehˇ kawꞈ saˬ laˬ gʼoˬ jawˇ gaˇ tiˬ kʼehˬ maˬ taˬ iˇ ngeh muiˬ daˆ laˇ˗euˬ meh” lehˇ ehˇ˗eu meh. Aˬ yawꞈ nyaꞈ oˇ oꞈ˗eu laꞈ kʼoeˇ guiˬ lahˬ gʼawˬ mya jeˬ za˗euˬ meh. “Nga nyaꞈ gʼawˬ mahˇ ni kaˬ gaˇ jaˆ˗eu Keˇ˗teˬ lehˇ kuˇ˗eu pu˗ahˇ iˇ ngeh Jaˇliꞈ dzaw mawꞈ˗eu gʼawˬ mya gʼaˬ˗ahˇ mawˇ˗euˬ ma. Aˇ nah naˇ, aˬ yawꞈ maꞈ˗ahˇ naˬ gaˬ paw neh Jaˇliꞈ dzaw nehˬ˗eu ma. Teu laꞈ kʼoeˇ˗euˬ Jaˇliꞈ dzaw zaˬ nyiˬ gʼaˬ iˇ cuꞈ shawˇ˗awˇ teu gaˇ aˇ muˇ muˇ zaˬ tiˬ muˇ jaˆ laˇ˗euˬ mehˬ” lehˇ Ehˬlawˬ ehˇ˗eu meh. Saꞈteˇpaˬniˬ “Ngaˬ˗euˬ gʼaˇ duˬ naˇ tsawˇ haˬ deuˬ˗ahˇ Yeˬhawˇbaˬ˗ahˇ a nehˬ ni ya caw ba˗euˬ taꞈ˗ehˇ laˬ kʼaˬ cehˇ˗eu jeˬ maˬ paˇ jaˆ miˇ˗a. Nga nyaꞈ heu gaˇ Miˬyehˇ gaˇ mˇ ngeh heu loꞈ˗ehˇ laˬ kʼaˬ cehˇ˗eu jeˬ gʼawˬ mya poˆ ya mawˇ˗euˬ maˬ” lehˇ ehˇ˗eu meh. Nymˬ˗mˇ naˇ Ehˬlawˬ hawˇ˗eu Saꞈteˇpaˬniˬ aˇ maꞈ˗ahˇ sheuˬ gʼeh˗eu gaˇ mˇ luꞈ˗eu meh.

“Nga nyaꞈ mˇ paˬ˗ehˇ gʼeh˗eu jeˬ mˇ luꞈ miˇ˗a”

Jiˬsehˬ˗uˬ Iˇdaˬliˬ miˇ kʼahˬ˗ahˇ saˬ laˬ gʼoˬ geuꞈ˗eu lehˇ dzaw luꞈ ngeh iˇ cuꞈ shawˇ˗euˬ meh. Jiˬsehˬ˗uˬ aˬ yawꞈ˗ahˇ Jaˇliꞈ mehˬ˗eu huˬ mehˬ mehˬ˗eu gʼaˬ pyeuꞈ˗eu miˬ sawˇ yo zaˬ teu gu neh yaw awˬ awˬ lehˇ dehꞈ˗eu jeˬ˗ahˇ ya leˇ dui dui˗eu meh. Aˬ yawꞈ jiˇ Miˬyehˇ gaˇ˗ahˇ heu naˆ maˬ tseˇ mˇ mawꞈ˗eu miˇ neh saˬ laˬ gʼoˬ dzaw jiˇ˗eu lehˇ gʼeh˗eu heu kaˬ˗ahˇ aˬ myah luꞈ huˬ mehˬ mehˬ˗eu gʼaˬ geuꞈ˗euˬ meh.

Aˬ yawꞈ Kehˇmaˬlmˬ miˇ kʼahˬ˗ahˇ gʼoꞈ iˇ˗awˇ, Miˬyehˇ gaˇ˗ahˇ teu naˆ maˬ tseˇ mˇ mawꞈ˗eu kʼawꞈ, tiˬ jeˬ na˗ahˇ kʼahˬ lahˇ˗eu meh. Aˬ yawꞈ “Ngaˇ Kehˇmaˬlmˬ˗ahˇ jawˇ˗iˇ naˇ Iˇdaˬliˬ miˇ kʼahˬ zaˬ ya pyeuꞈ˗eu aˬ kawˬ˗aˬ˗ahˇ ya byehˇ dzeh˗eu uˬ taꞈ, cawˬ deuˬ hawˇ˗eu yuiꞈ nyiˇ deuˬ˗ahˇ jiˇ maˬ paˇ ya mawˇ ngaˇ” lehˇ ehˇ˗eu meh. Ehˇ kʼawꞈ aˬ yawꞈ 2016 kʼoꞈ, Ngaˬ siˬ ba la˗ahˇ Kehˇmaˬlmˬ miˇ kʼahˬ˗ahˇ gʼoꞈ iˇ˗euˬ meh. Aˇ nah naˇ aˬ yawꞈ mehˇ nmˇ Liˇawˬ˗suiꞈ nehˬ˗ehˇ sheuˬ dahˬ dzaˬ˗awˇ, Kehˇmaˬlmˬ miˇ kʼahˬ˗euˬ Beˬdeˬlaˇ aˬ yawꞈ nyaꞈ˗ahˇ tsaꞈ gaˬ˗eu tsawˇ haˬ loˬ dzehˬ˗eu Eˇyoˬ˗suiꞈ meuˬ˗ahˇ jawˇ˗iˇ ma laˬ lehˇ ehˇ mawˇ nehˬ˗euˬ meh.

Aˬ yawꞈ nyaꞈ teu gaˇ jawˇ˗iˇ ngeh dehꞈ ziˇ aˬ joˆ˗ehˇ gʼeh˗eu nga? “Nga nyaꞈ jawˇ gaˇ miˬ dzaˬ aˇ jaw byah ni maˬ laˇ˗eu miˇ neh, naˬ gaˬ jiˇ maˬ zmˬ nya ni ya jawˇ˗euˬ ma. Kʼoeˇ naˇ gʼawˬ nyoeˇ jahˇ˗eu gʼaˇ duˬ miˬ dzaˬ jiˇ ya gʼoˆ doꞈ dzaw˗awˇ, tsawˇ haˬ maˬ jawˇ ngeh uˬ ciꞈ paw iˇ cuꞈ kʼawꞈ iˇ˗eu ma. Teu ngeh paˇ taˬ doꞈ˗awˇ laˆ lawˬ lehˬ lehˬ˗ehˇ iˇ˗eu ma” lehˇ Jiˬsehˬ˗uˬ ehˇ˗eu meh. Aˬ yawꞈ nyaꞈ˗ahˇ gaˇ kawˆ heu deuˬ˗ahˇ kamˬ daˬ nya ni caw ba nehˬ˗eu aˬ jeˬ nga? “Muiˬ˗eu shawˇ˗eu yaw sahˇ nga nyaꞈ˗ahˇ oˇ oꞈ nya ni caw ba nehˬ˗awˇ nga nyaꞈ dzeˇ zaˬ jiˇ tiˬ gʼaˬ tiˇ gʼaˬ caw ba˗awˇ gʼaˬ biꞈ˗eu ma. Kʼoeˇ naˇ cawˬ deuˬ hawˇ˗eu nymˇ jiˇ laꞈ kʼoeˇ˗euˬ deuˬ jiˇ nga nyaꞈ˗ahˇ gʼaˬ biꞈ˗eu uˬ taꞈ, tiˬ poˆ na pyuˇ jiˇ caw ba˗eu meh” lehˇ Jiˬsehˬ˗uˬ ehˇ˗eu meh.

Jiˬsehˬ˗uˬ yawˬ ha dehꞈ leˬ˗euˬ Kehˇmaˬlmˬ miˇ kʼahˬ˗ahˇ gʼoꞈ laˇ˗awˇ, Miˬyehˇ gaˇ ya mˇ˗eu laˬ kʼaˬ cehˇ ngaˇ laˬ? Aˬ yawꞈ “Laˬ kʼaˬ cehˇ dui dui miˇ˗a” lehˇ ehˇ˗eu meh. “Dahˬ beh ngeh nga nyaꞈ shaˬ zahˬ gʼawˬ mya jeˬ˗ahˇ ya tahˬ puˬ˗awˇ gʼaˬ baˬ˗eu kʼawꞈ, teu˗ahˇ daˬ dzeuˇ oˇ dzeuˇ nya˗euˬ ma. Teu miˇ neh nga nyaꞈ mˇ paˬ˗ehˇ gʼeh˗eu jeˬ mˇ luꞈ miˇ˗a lehˇ siˬ laˇ nya. Nga nyaꞈ Yeˬhawˇbaˬ˗ahˇ gʼoe˗euˬ miˇ neh aˬ yawꞈ nehˬ˗ehˇ gʼoeˇ dzehˬ leˇ mi˗aˇ” lehˇ Jiˬsehˬ˗uˬ ehˇ˗eu meh. Aˇ nah naˇ Liˇawˬ˗suiꞈ hawˇ˗eu Jiˬsehˬ˗uˬ SKE Dzaw nymˇ˗ahˇ ya daˆ leˇ˗awˇ, nymˬ˗mˇ naˇ tiˬ poˆ na dzehˬ˗eu huˬ mehˬ mehˬ˗eu gʼaˬ geuꞈ luꞈ˗eu meh.

Ngaˬ shaˬ nyehꞈ˗eu tsawˇ haˬ deuˬ shaˬ zahˬ gʼawˬ mya jeˬ˗ahˇ ya tahˬ puˬ kʼawꞈ, ngaˬ shaˬ nyehꞈ za˗eu gʼaˇ duˬ nui kʼaˬ ya ahˇ˗eu meh. Teu gaˇ duˇ ni yawˬ ha˗euˬ jawˇ kʼahˬ laꞈ kʼoeˇ jawˇ˗eu yaw tsaˬ yaw dawˇ jeˬ˗ahˇ siˬ nya mawꞈ˗eu deuˬ˗ahˇ caw ba gʼaˇ duˬ, mehˇ nmˇ heu deuˬ jiˇ kʼaˬ duˬ ni ya gʼeh˗awˇ, nui ma keuˆ˗eu laꞈ kʼoeˇ dehꞈ ziˇ laꞈ kʼoeˇ gʼawˬ mya jeˬ ya byehˇ dzeh˗euˬ meh. Yeˬhawˇbaˬ mehˇ nmˇ heu deuˬ neh aˬ yawꞈ˗euˬ tsawˇ myahˇ˗ahˇ gaˬ˗awˇ leh jeh˗awˇ mˇ˗euˬ jeˬ˗ahˇ tiˬ jawˇ˗iˬ maˬ ngehˇ˗a. (Neˬhaˬmiˇ 5:19; Heˬbyehˇ 6:10) Nawˇ miˇ kʼahˬ yawˬ kʼahˬ yawˬ˗ahˇ jawˇ˗awˇ, nawˇ dehꞈ leˬ˗euˬ miˇ kʼahˬ tsaꞈ gaˬ˗eu tsawˇ haˬ loˬ dzehˬ naˇ, yawˬ ha˗euˬ jawˇ kʼahˬ˗ahˇ gʼoꞈ laˇ˗awˇ Miˬyehˇ gaˇ mˇ˗eu za meh laˬ? Nawˇ teu loꞈ˗ehˇ jahˇ naˇ Yeˬhawˇbaˬ˗ahˇ neh guiˬ lahˬ gʼawˬ mya ni za˗eu yaw duˬ baw meh.—Dawˬdaˬ 10:22.