Gui˗eu deuˬ naˇ haˬ˗eu jeˬ
Ja ceuˬ 61:8-ahˇ Daˬbiˇ neh Miˬyehˇ˗euˬ tsawˇ myahˇ˗ahˇ “mˬ maˬ maˬ byaˆ zaˇ ziˇ, (Yaw shawˇ Yehˇ boꞈ 2018)” ja ceuˬ˗eu lehˇ boꞈ taˬ˗euˬ heu naˇ, maˬ pyeuꞈ leˇ nya gaˇ ehˇ taˬ˗euˬ jeˬ pyeuꞈ nga laˬ?
Maˬ, maˬ ngeuˇ˗a. Daˬbiˇ neh boꞈ taˬ˗euˬ dawˬ heu naˇ, tsaˬ˗awˇ maˇ diˇ ngeuˇ gaˇ ehˇ taˬ˗euˬ jeˬ pyeuꞈ meh.
Jaˇliꞈ heu deuˆ hawˇ˗eu yawˬ deuˆ yawˬ˗ahˇ aˬ joˆ˗ehˇ paˇ boꞈ taˬ˗euˬ nga lehˇ haw kaˇ˗eu. Aˬ yawꞈ “Ngaˬ neh kamˬ taˬ˗euˬ loꞈ˗ehˇ nah˗ahˇ neh mˇ caw ngeh, ngaˇ nawˬ˗euˬ tsawˇ myahˇ˗ahˇ mˬ maˬ maˬ byaˆ zaˇ ziˇ caˇ˗awˇ ja ceuˬ ma.” “Ngaˬ˗euˬ Miˬyehˇ pyeuꞈ˗eu Sahˬpaˬ Miˬyehˇ˗oˇ, nui ma gʼawˇ mawˇ dawˬ tawˆ luꞈ nawˬ˗ahˇ ja ceuˬ ma. Nawˇ huiˬ dui mahˇ dui dui˗eu gaˇ kawˆ mˬ maˬ maˬ byaˆ zaˇ ziˇ ngaˇ ja gaˬ ma.”—Ja ceuˬ 61:8; 86:12; 145:1, 2.
Daˬbiˇ toˆ˗ehˇ boꞈ˗euˬ teu naˇ, aˬ yawꞈ maˬ shiˇ lehˇ noeˬ˗awˇ boꞈ˗euˬ maˬ ngeuˇ˗a. Daˬbiˇ tsawˇ haˬ zaˬ yawˬ gʼaˬ na luꞈ iˬ baˇ zaˬ pyeuꞈ˗eu miˇ neh ya shiˇ meh lehˇ siˬ nya˗eu meh. Aˬ yawꞈ kʼawꞈ iˬ baˇ zaˬ pyeuꞈ˗eu lehˇ ha geuꞈ˗eu meh. (Aˇdahˬbeh˗eu 3:3, 17-19; Ja ceuˬ 51:4, 5) Daˬbiˇ Miˬyehˇ nui kʼahˇ shiˇ ni dehꞈ˗euˬ, Aˬbyaˬhaˬ, Iˇtsaˆ, Yaˬkoˆ loꞈ˗ehˇ gʼeh˗eu saˇ jaˇ ziꞈ˗eu deuˬ kʼawꞈ ya shiˇ˗euˬ gaˇ kawˆ˗ahˇ aˬ yawꞈ siˬ nya˗awˇ, tiˬ nah keuˆ laˇ naˇ aˬ yawꞈ jiˇ ya shiˇ meh lehˇ siˬ nya˗eu meh. (Ja ceuˬ 37:25; 39:4) Teu miˇ neh Daˬbiˇ Ja ceuˬ 61:8-ahˇ boꞈ taˬ˗euˬ dawˬ heu naˇ, Miˬyehˇ˗ahˇ mˬ maˬ maˬ byaˆ zaˇ ziˇ maˬ ngeu naˇ, kʼaˇ dehꞈ˗eu kʼoeˇ keuˆ ni uˬ duˬ tahˬ ma lehˇ noeˬ tsehˆ taˬ˗euˬ jeˬ˗ahˇ bi mawˇ laˇ˗eu meh.—2 Saˬmeuˬlaˆ 7:12.
Ja ceuˬ yaw huiˬ 18, 51, 52 heu deuˬ˗euˬ gaˬ naˇ yaw huiˬ˗euˬ uˬ dzah˗ahˇ haw ngeh, tiˬ poˆ na Daˬbiˇ yawˬ ha˗euˬ puˬ haw mawˇ haw laꞈ˗euˬ jeˬ˗ahˇ boꞈ˗euˬ lehˇ siˬ laˇ˗eu meh. Daˬbiˇ Yeˬhawˇbaˬ˗ahˇ Ja ceuˬ yaw huiˬ 23 laꞈ kʼoeˇ sheuˬ hehˇ nehˬ˗eu shiˬ keuˇ ni bi gʼeh laˇ˗eu haw piˇ nehˬ˗eu yawˇ bo˗eu yaw sahˇ nehˬ˗ehˇ sheu cehˆ taˬ˗euˬ meh. Daˬbiˇ jiˇ teu loꞈ˗ehˇ gʼeh˗eu yawˇ bo˗eu yaw sahˇ pyeuꞈ haw˗awˇ, aˬ yawꞈ Yeˬhawˇbaˬ˗ahˇ “maˬ shiˇ tiˬ ziˇ” uˬ duˬ tahˬ mawꞈ˗eu meh.—Ja ceuˬ 23:6.
Daˬbiˇ neh boꞈ˗euˬ jeˬ˗ahˇ muiˬ˗eu shawˇ˗eu yaw sahˇ neh sheuˬ gʼeh˗euˬ gaˇ kawˆ˗ahˇ taˬ ngehˇ. Daˬbiˇ aˇ yamˬ gʼawˬ myahˇ ni gʼeh˗awˇ neh tehꞈ˗ehˇ byah laˇ˗eu maˬ keuˆ laˇ miˇ ehˇ taˬ dawˬ deuˬ jiˇ boꞈ˗euˬ meh. Yaw jeˬ ma jeˬ, Ja ceuˬ 110-ahˇ mˬ kʼoeˇ taˆ ‘Miˬyehˇ˗euˬ aˇ maˇ paw’ Daˬbiˇ˗euˬ sahˬ paˬ nuiˇ taˬ˗awˇ baoˬ za˗eu gaˇ kawˆ˗ahˇ ngehˬ keuˆ taˬ˗euˬ meh. Baoˬ teu aˬ jeˬ˗euˬ gʼaˇ duˬ biꞈ˗euˬ nga? Muiˇ˗eu deuˬ˗euˬ kʼoeˇ taˆ uˆ lahˇ˗awˇ, ‘Miˇ kʼahˬ tsawˇ jeuˬ dawˬ tawˆ luꞈ˗ahˇ yaˇ kʼaˬ daˇ’˗eu gʼaˇ duˬ meh. Sahˬ paˬ teu gʼaˬ naˇ, Daˬbiˇ˗euˬ zaˬ deuˬ uˆ deuˬ pyeuꞈ˗eu Meˬsiˇya meh. Aˬ yawꞈ mˬ kʼoeˇ taˆ neh uˆ lahˇ˗awˇ, ‘mˬ maˬ maˬ byaˆ zaˇ ziˇ piˇ ma geuꞈ˗eu meh.’ (Ja ceuˬ 110:1-6) Yeˬsuˇ Ja ceuˬ yaw huiˬ 110 laꞈ kʼoeˇ ngehˬ keuˆ taˬ˗euˬ maˬ keuˆ laˇ miˇ ehˇ taˬ dawˬ heu naˇ, aˬ yawꞈ˗ahˇ ngehˬ keuˆ taˬ˗euˬ jeˬ pyeuꞈ˗awˇ, mehˬ hu paw maˇ diˇ byah laˇ meh lehˇ ehˇ˗eu meh.—Maꞈtehˬ 22:41-45.
Ngeuˇ meh, Miˬyehˇ˗euˬ muiˬ˗eu shawˇ˗eu yaw sahˇ Daˬbiˇ˗ahˇ aˬ yawꞈ˗euˬ dehꞈ ziˇ laꞈ kʼoeˇ pyeuꞈ laˇ˗euˬ gaˇ kawˆ hawˇ˗eu, gʼoꞈ dehꞈ laˇ˗awˇ Yeˬhawˇbaˬ˗ahˇ mˬ maˬ maˬ byaˆ zaˇ ziˇ ja ceuˬ nya˗eu mehˬ hu paw˗euˬ gaˇ kawˆ˗ahˇ boꞈ ni laˆ noeˬ nehˬ˗euˬ meh. Teu miˇ neh Ja ceuˬ 37:10, 11, 29 laꞈ kʼoeˇ˗euˬ dawˬ heu naˇ, gaˇ hu˗euˬ Iˇsaˬleˬlaˆ˗euˬ saˇ ka hawˇ˗eu, mehˬ hu paw Miˬyehˇ˗euˬ saˇ jaˇ dawˬ deuˬ miˇ tsaˬ tahˬ kʼawˇ doe ni byah laˇ˗eu aˇ yamˬ nehˬ˗ehˇ taꞈ˗eu lehˇ bi siˬ laꞈ˗eu meh.—Loꞈ˗eu nymˇgoˇ heu dmˬ laꞈ kʼoeˇ ahˇ˗eu “Nawˇ ngaˬ nehˬ˗ehˇ Baˬlaˬdiˇsuˆ˗ahˇ ya jawˇ tehꞈ˗a” lehˇ ehˇ˗eu gaˇ kawˆ˗euˬ aˇ deuˆ 8˗ahˇ haw.
Ja ceuˬ 61:8 heu deuˆ˗ahˇ duˇ˗eu aˇ deuˆ nui deuˬ laꞈ kʼoeˇ˗euˬ dawˬ heu naˇ, Daˬbiˇ maˬ shiˇ tiˬ ziˇ Yeˬhawˇbaˬ˗ahˇ ja ceuˬ mawꞈ˗eu lehˇ bi siˬ laꞈ˗awˇ, mehˬ hu paw Yeˬhawˇbaˬ aˬ yawꞈ˗ahˇ bi gʼoꞈ dehꞈ laˇ ngeh, aˬ yawꞈ mˬ maˬ maˬ byaˆ zaˇ ziˇ ja ceuˬ gʼeh nya˗eu gaˇ kawˆ˗ahˇ jiˇ bi siˬ laꞈ˗eu meh.