Nawˇ noeˬ taˬ nya miˇ˗a loˇ?

Nawˇ heu kʼoꞈ˗euˬ Loꞈ˗eu nymˇgoˇ˗ahˇ yaw muiˬ˗ehˇ ya gui maˬ loˇ? Naˇ haˬ˗eu jeˬ heu deuˬ˗euˬ dawˬ kʼoꞈ˗ahˇ biꞈ nya miˇ˗a laˬ lehˇ haw ma.

Aˬ dui Yeˬhawˇbaˬ nehˬ˗ehˇ ngehˬ cawˬ˗awˇ, aˬ yawꞈ ngehˬ gaˇ naˇ haˬ˗eu uˬ taꞈ, aˬ yawꞈ˗euˬ gaˇ kawˆ˗ahˇ shaˇ noeˬ shaˇ sawˇ˗eu heu naˇ, aˬ dui˗ahˇ aˬ joˆ˗ehˇ gaˇ dahˇ tsoeˬ˗eu nga?

Aˬ dui yaw muiˬ˗ehˇ noeˬ tsehˆ nya laˇ˗awˇ, yaw muiˬ˗ehˇ mehˬ nya˗eu tiˬ gʼaˬ pyeuꞈ laˇ˗eu uˬ taꞈ, jah˗eu jeˬ ziꞈ dzehˬ laˇ˗awˇ, Yeˬhawˇbaˬ˗ahˇ gaˬ dzehˬ laˇ˗eu meh.—w22.01, myaˆ pyawˬ 30-31.

Aˬ dui Yeˬhawˇbaˬ˗ahˇ hawˇ˗eu aˬ yawꞈ neh kʼehˇ taˬ˗euˬ deuˬ˗ahˇ nui ma taˬ dzehˬ laˇ ni jahˇ˗eu heu naˇ, aˬ dui˗ahˇ aˬ joˆ˗ehˇ gaˇ dahˇ tsoeˬ˗eu nga?

Nymˬ˗mˇ aˇ yamˬ naˇ aˇ muˇ˗ahˇ sheuˬ gʼeh˗eu deuˬ neh sheuˬ hehˇ˗euˬ jeˬ hawˇ˗eu noeˬ tsehˆ˗euˬ jeˬ˗ahˇ ngeuˇ˗eu maˬ siˬ lehˇ maˬ noeˬ˗eu heu neh Yeˬhawˇbaˬ neh mˇ˗euˬ shaˇ˗euˬ jeˬ˗ahˇ nui ma taˬ˗eu lehˇ mˇ mawˇ˗eu aˇ yamˬ pyeuꞈ meh. Toˆ˗ehˇ jahˇ naˇ huiˬ dui dui˗eu shaˬ zahˬ keuˆ le ngeh, sheuˬ hehˇ nehˬ laꞈ˗euˬ jeˬ tiˬ jeˬ na maˇ diˇ zmˬ nya gaˇ maˬ duˇ kʼawꞈ, leh jeh˗awˇ naˇ haˬ˗eu meh.—w22.02, myaˆ pyawˬ 4-6.

Mˬ taˆ gʼaˬ kʼehˇ Zaˬkaˬliˇ˗ahˇ “Zeˬluˇbaˬbeˬlaˇ˗euˬ laꞈ˗ahˇ shmˇ siˬ caˆ dza tuˆ tehˬ taˬ˗euˬ” gaˇ kawˆ ja nehˬ˗eu heu naˇ aˬ jeˬ baˬ da neh nga? (Zaˬkaˬliˇ 4:8-10)

Yaw sahˇ laꞈ kʼoeˇ ya mawˇ˗euˬ jeˬ heu naˇ, Miˬyehˇ˗euˬ tsawˇ haˬ deuˬ˗ahˇ yaw shuiꞈ tsoˆ˗euˬ uˬ duˬ tahˬ nymˇ nymˇ ma heu hmˬ naˇ, Yeˬhawˇbaˬ nui ma tsaˬ˗eu jeˬ˗ehˇ, nui kʼahˇ shiˇ˗eu jeˬ˗ehˇ tsoˆ taˬ˗euˬ meh lehˇ kamˬ nehˬ˗eu jeˬ pyeuꞈ meh.—w22.03, myaˆ pyawˬ 16-17.

Aˬ dui “ngehˬ˗eu tmˇ˗eu” paw dzaw geuꞈ paˬ˗ehˇ gʼeh˗eu tiˬ gʼaˬ aˬ joˆ˗ehˇ pyeuꞈ nya˗eu nga? (1 Tiˆmoˇseˬ 4:12)

Aˬ dui tsaꞈ gaˬ˗iˇ ngeh yaw zeu baw˗eu laꞈ kʼoeˇ nahˬ yu ni ngehˬ˗eu uˬ taꞈ, mehˬ bawˬ˗ahˇ nui ma laꞈ kʼoeˇ neh ja ceuˬ˗eu caˇ dawˬ caˇ˗awˇ, aˬ myah luꞈ dawˬ kʼoꞈ biꞈ˗eu uˬ taꞈ, ngeuˇ gaˇ ngehˬ˗awˇ, aˬ cawˬ˗ahˇ gʼaˬ bi ahˇ leˇ˗eu jeˬ˗ehˇ ngehˬ˗eu ma. Kʼoeˇ naˇ aˬ dui aˬ geu jeˬ lehˇ gʼeh˗eu “dawˬ doeˇ ngehˬ˗eu” jeˬ˗ahˇ maˬ kaˬ yahˇ˗eu ma.—w22.04, myaˆ pyawˬ 6-9.

Daˬyeˬlaˇ yaw huiˬ 7 laꞈ kʼoeˇ ngehˬ keuˆ taˬ˗euˬ haiˬ˗eu jeˬ zaˬ 4 mawˇ˗euˬ bi siˬ bi mawˇ˗eu jeˬ (miˇ kʼahˬ 4 kʼahˬ) Pah mehˬ˗eu 13:1, 2 laꞈ kʼoeˇ˗euˬ haiˬ˗eu jeˬ zaˬ tiˬ mawˇ laꞈ kʼoeˇ tehꞈ˗ehˇ aˬ jeˬ miˇ neh ahˇ iˇ˗euˬ nga?

Pah mehˬ˗eu yaw huiˬ 13 laꞈ kʼoeˇ ngehˬ keuˆ taˬ˗euˬ haiˬ˗eu jeˬ zaˬ heu mawˇ naˇ, Loˇmaˆ miˇ kʼahˬ maꞈ loꞈ˗ehˇ miˇ kʼahˬ˗ahˇ uˆ lahˇ˗eu baoˬ jaˆ˗eu miˇ kʼahˬ tiˬ kʼahˬ na˗ahˇ tehꞈ˗ehˇ ehˇ mawꞈ˗eu maˬ ngeuˇ˗a. Tsawˇ haˬ deuˬ˗ahˇ uˆ lahˇ˗eu, uˆ lahˇ˗eu aˇ maꞈ dawˬ tawˆ luꞈ˗ahˇ ehˇ mawꞈ˗eu meh.—w22.05, myaˆ pyawˬ 9.

Aˬ dui Yeˬhawˇbaˬ˗euˬ yaw tsaˬ yaw dawˇ jeˬ˗ahˇ jah ziꞈ˗eu lehˇ aˬ joˆ˗ehˇ mˇ mawˇ nya˗eu nga?

Tiˬ gʼaˬ paˬ aˬ dui˗ahˇ ngehˬ deuˬ mˇ deuˬ laˇ˗awˇ mˇ bahˬ laˇ ngeh, nui pehˇ maˬ yuˇ taˬ ni nui ma maˬ naˇ ni gaˇ kawˆ teu Yeˬhawˇbaˬ˗ahˇ ya a nehˬ˗eu meh. Iˬ baˇ baˬ da neh pyeuꞈ laˇ˗euˬ maˬ muiˬ˗eu jeˬ dawˬ tawˆ luꞈ˗ahˇ Yeˬhawˇbaˬ laˆ tsaˬ laˆ tsahˇ kʼoꞈ nehˬ meh.—w22.06, myaˆ pyawˬ 10-11.

Mehˬ bawˬ˗ahˇ guiˬ lahˬ shaˇ˗eu doˇ˗eu mehˇ nmˇ deuˬ aˬ jeˬ˗ahˇ noeˬ taˬ paˬ˗ehˇ gʼeh˗eu nga?

Guiˬ lahˬ bi shaˇ laꞈ ngeh, dawˬ mehˬ mehˬ˗eu loꞈ˗ehˇ, tiˬ jeˬ paˬ tsaꞈ gaˬ˗eu loꞈ˗ehˇ shaˇ paˬ˗ehˇ maˬ gʼeh˗a. Mehˬ bawˬ dahˬ beh laˇ ngeh ngehˬ˗ehˇ dzehˬ, guiˬ lahˬ shaˇ˗eu “gʼawˬ mya ni” ngehˬ˗eu maˬ loˬ˗a. (Maꞈtehˬ 6:7)—w22.07, myaˆ pyawˬ 24-25.

“Yaw doeˇ jeˬ mˇ˗euˬ tsawˇ haˬ˗aˬ, gʼoꞈ dehꞈ laˇ˗awˇ yaˇ kʼaˬ daˇ˗eu gaˇ ya daˬ tehꞈ˗a” lehˇ ehˇ˗eu heu naˇ aˬ jeˬ˗ahˇ ehˇ mawꞈ˗eu nga? (Yoˇhaˬ 5:29)

Aˬ yawꞈ maꞈ neh dzeuˇ yaꞈ ngeh mˇ yaꞈ˗euˬ jeˬ˗ahˇ haw˗awˇ yaˇ kʼaˬ bi daˇ gaˇ ehˇ mawꞈ˗eu maˬ ngeuˇ˗a. Aˬ yawꞈ maꞈ gʼoꞈ dehꞈ laˇ gʼaˬ˗euˬ miˇ tsa aˬ yawꞈ maꞈ˗euˬ mˇ˗eu shaˇ˗eu jeˬ hawˇ˗eu aˬ yawꞈ maꞈ˗euˬ nui ma taˬ jeˬ taˬ kawˆ˗ahˇ haw˗awˇ yaˇ kʼaˬ daˇ˗eu jeˬ pyeuꞈ meh.—w22.09, myaˆ pyawˬ 18.

1922 kʼoꞈ, Gʼoeˬ siˬ ba la˗ahˇ jahˇ˗eu huiˬ˗eu mehˬ bawˬ tiˬ hmˬ˗ahˇ mehˇ nmˇ Joˇsehꞈ Laˇdeuˇpawˬ aˬ jeˬ nui ma cehˇ tahˬ tahˬ laˇ paˬ˗ehˇ gʼeh˗eu jeˬ ehˇ˗eu nga?

Aˬmeˬliˇkaˬ miˇ kʼahˬ Oˬ˗haiˇ˗oˬ gahˬ kaˬ Siˇdeuˇ Paw˗tiˬ meuˬ˗ahˇ jahˇ˗eu huiˬ˗eu mehˬ bawˬ tiˬ hmˬ˗ahˇ aˬ yawꞈ “Sahˬ paˬ uˆ lahˇ shaw. Naw maꞈ Miˬyehˇ˗euˬ do dah tsaꞈ gaˬ˗eu gʼaˬ pyeuꞈ meh. Teu miˇ neh Sahˬ paˬ hawˇ˗eu Miˬyehˇ Miˇkʼahˬ gaˇ kawˆ bi siˬ bi gaˬ˗awˬ. Bi siˬ bi gaˬ˗awˬ. Bi siˬ bi gaˬ˗awˬ” lehˇ tsaꞈ gaˬ˗eu meh.—w22.10, myaˆ pyawˬ 3-5.

Iˇsaˬyaˇ yaw huiˬ 30 laꞈ kʼoeˇ Yeˬhawˇbaˬ aˬ dui˗ahˇ kamˬ daˬ coeˇ ni caw ba nehˬ˗eu aˬ jeˬ˗euˬ 3 jeˬ˗ahˇ ngehˬ keuˆ taˬ˗euˬ nga?

Iˇsaˬyaˇ yaw huiˬ 30 aˬ dui˗ahˇ (1) Miˬyehˇ aˬ dui˗euˬ shaˇ dawˬ˗ahˇ naˇ haˬ˗awˇ dawˬ kʼoꞈ biꞈ˗eu, (2) aˬ dui˗ahˇ sheuˬ kʼehˇ˗eu (3) nymˬ˗mˇ neh maˬ ehˇ, mehˬ hu paw maˬ ehˇ, guiˬ lahˬ biꞈ˗eu lehˇ siˬ laˇ ni caw ba nehˬ˗eu meh.—w22.11, myaˆ pyawˬ 9.

Ja ceuˬ 37:10, 11, 29 laꞈ kʼoeˇ˗euˬ dawˬ heu naˇ, gaˇ hu byah yaꞈ˗euˬ kʼawꞈ, mehˬ hu paw byah laˇ meh siˬ lehˇ aˬ jeˬ miˇ neh ehˇ nya˗eu nga?

Daˬbiˇ˗euˬ dawˬ heu naˇ Iˇsaˬleˬlaˆ deuˬ sahˬ paˬ Sawˇlaˬmoˬ uˆ lahˇ ngeh yamˬ˗ahˇ muiˬ˗eu aˇ nah aˇ yamˬ pyeuꞈ yaꞈ˗euˬ gaˇ pah mehˬ˗eu meh. Yeˬsuˇ mehˬ hu paw˗euˬ miˇ tsaˬ Baˬlaˬdiˇsuˆ˗euˬ gaˇ kawˆ˗ahˇ ja ngeh yaw nyiˇ 11-ahˇ ngehˬ keuˆ˗euˬ meh. (Maꞈtehˬ 5:5; Luˇkaꞈ 23:43)—w22.12, myaˆ pyawˬ 8-10, 14.