Aˬ yawꞈ maꞈ mehˇ nmˇ deuˬ neh mˇ˗euˬ jeˬ˗ahˇ neh nui gaˬ ya mawˇ

Yoˬmaˬlaˬ, Maˬseˇloˬ, Haiˇbeuˬ aˬ ha smˬ mehˇ nmˇ Guˬ˗aˬ teꞈmaˬlaˬ miˇ kʼahˬ˗euˬ pu pu zaˬ tiˬ pu˗ahˇ jawˇ˗eu meh. Yoˬmaˬlaˬ Yeˬhawˇbaˬ˗euˬ Saˇ kiˇ deuˬ nehˬ˗ehˇ Jaˇliꞈ jeˬ hu dzaw laˇ˗awˇ, aˇ nah naˇ aˬ yawꞈ˗euˬ aˬ nyiˇ nyiˬ gʼaˬ luꞈ jiˇ dzaw laˇ˗euˬ meh. Aˬ yawꞈ maꞈ˗euˬ shaˬ zahˬ tiˬ jeˬ naˇ, aˬ yawꞈ ha smˇ gʼaˬ luꞈ myaˆ behꞈ behꞈ˗awˇ myaˆ behꞈ deuˬ˗euˬ sahˬ bo jiˇ maˬ gui nya˗eu heu meh. Teu miˇ neh Jaˇliꞈ dzaw mehˬ˗eu gʼaˬ Jaˇliꞈ hawˇ˗eu sahˬ boꞈ deuˬ ya gui nehˬ˗eu meh.

Kʼoeˇ naˇ mehˬ bawˬ˗ahˇ iˇ˗eu heu jiˇ aˬ yawꞈ maꞈ˗euˬ gʼaˇ duˬ shaˬ zahˬ tiˬ jeˬ pyeuꞈ meh. Aˬ yawꞈ pehˬ˗euˬ iˇ kahˇ neh kʼaˇ peh dzehˬ˗eu Bawˬdzaˬnymˇ naˇ˗aˬ, naˬ liˬ 40 peu dzehˬ ni ya iˇ˗eu meh. Kʼoeˇ naˇ aˬ yawꞈ maꞈ mehˬ bawˬ˗ahˇ yawˬ haˇ yawˬ ha iˇ˗eu jiˇ maˬ pyeuꞈ leˇ˗a. Ehˇ kʼawꞈ aˇ muˇ laꞈ kʼoeˇ˗euˬ mehˇ nmˇ deuˬ aˬ yawꞈ ha smˬ mehˇ nmˇ˗ahˇ mehˬ bawˬ yawˬ poˆ na luꞈ˗ahˇ laˇ nya ni caw ba nehˬ˗euˬ meh. Kʼoeˇ naˇ aˬ ha smˬ mehˇ nmˇ˗ahˇ jawˇ nah yaw kaˬ mehˬ bawˬ˗ahˇ dzaw zaˬ geuꞈ˗eu doˇ laˇ ngeh jiˇ, mehˇ nmˇ deuˬ aˬ yawꞈ maꞈ˗ahˇ maˬ haw ni gui nya taˬ ni caw ba nehˬ˗eu meh.

2019 kʼoꞈ, Ngaˬ siˬ ba la˗ahˇ aˬ yawꞈ ha smˬ mehˇ nmˇ jawˇ˗eu pu˗ahˇ aˇ muˇ˗euˬ mehˬ bawˬ jahˇ˗euˬ meh. Kʼoeˇ naˇ, aˬ myah luꞈ huˬ mehˬ mehˬ˗eu tiˬ gu aˬ yawꞈ maꞈ˗euˬ pu˗ahˇ pawˇ laˇ˗euˬ meh. Teu nyiˬ gʼaˬ aˬ ha smˬ mehˇ nmˇ˗ahˇ myaˆ behꞈ deuˬ˗euˬ sahˬ boꞈ gui nya, boꞈ nya ni caw ba nehˬ ma lehˇ noeˬ taˬ˗euˬ meh. Aˬ yawꞈ nyaꞈ myaˆ behˬ deuˬ˗ahˇ sahˬ boꞈ aˬ joˆ˗ehˇ ya mehˬ˗eu lehˇ siˬ nya˗eu gʼaˇ duˬ sahˬ boꞈ taˬ duˬ˗ahˇ pyehˆ tseˇ˗iˇ˗euˬ meh.

Gʼawˬ myahˇ maˬ gʼeh˗ehˇ aˬ yawꞈ ha smˇ gʼaˬ luꞈ yaw awˬ awˬ lehˇ gʼeh˗eu myaˆ behꞈ deuˬ˗euˬ sahˬ boꞈ gui nya laˇ˗euˬ meh. Teu naˇ aˬ yawꞈ maꞈ˗ahˇ Yeˬhawˇbaˬ nehˬ˗ehˇ gʼoeˇ dzehˬ laˇ ni caw ba nehˬ˗eu meh.a Nymˬ˗mˇ smˇ gʼaˬ luꞈ aˬ myah luꞈ huˬ mehˬ mehˬ˗eu gaˇ mˇ luꞈ˗eu meh. Maˬseˇloˬ ngehˬ˗ehˇ dzehˬ aˇ muˇ˗ahˇ caw ba˗eu gʼaˬ jiˇ pyeuꞈ laˇ shaw˗eu meh. Aˬ yawꞈ maꞈ jaw lah ni Miˬyehˇ˗euˬ gaˇ mˇ gaˇ leh jeh dui dui˗eu meh. Aˬ yawꞈ ha mehˇ nmˇ teu loꞈ˗ehˇ leh jeh˗eu teu naˇ mehˇ nmˇ nui deuˬ˗ahˇ jiˇ leh jeh laˇ ni laˆ noeˬ nehˬ˗euˬ meh.

Aˬ yawꞈ ha smˬ mehˇ nmˇ luꞈ aˇ muˇ neh nui gaˬ keuˆ˗eu laꞈ kʼoeˇ caw ba nehˬ laꞈ˗euˬ jeˬ˗euˬ gʼaˇ duˬ guiˬ lahˬ huiˬ dui dui˗eu meh. Yoˬmaˬlaˬ “Yeˬhawˇbaˬ˗euˬ Saˇ kiˇ deuˬ nehˬ˗ehˇ ya mawˇ beh beh ngeh neh Ka li zaˬ maˇ diˇ deuˬ˗euˬ nui gaˬ za nyaˬ lehˇ noeˬ laˇ nya” lehˇ ehˇ˗eu meh. Maˬseˇloˬ jiˇ “Aˇ muˇ laꞈ kʼoeˇ muiˬ dui dui˗eu cawˬ za taˬ˗awˇ, nui gaˬ ahˇ˗awˇ, mehˬ bawˬ gm˗eu miˇ kʼahˬ doe ni jawˇ˗eu mehˇ nmˇ deuˬ za taˬ˗euˬ ma” lehˇ ehˇ˗eu meh. Miˇ tsaˬ tiˬ siˬ siˬ lah ni miˇ tsaˬ Baˬlaˬdiˇsuˆ pyeuꞈ laˇ˗eu aˇ nah˗ahˇ aˬ yawꞈ ha smˬ mehˇ nm dawˬ luꞈ ma lehˇ ehˇ˗eu meh.—Ja ceuˬ 37:10, 11; Iˇsaˬyaˇ 35:5.