Nui ma jeˇ lo ni pah˗awˇ pyehˆ tseˇ

Aˬ dui yawˬ haˇ yawˬ ha Jaˇliꞈ maˬ pyehˆ tseˇ mi naˆ˗ehˇ, yawˬ ha˗ahˇ ‘Ngaˇ heu poˆ pyehˆ tseˇ gaˇ neh aˬ jeˬ ya siˬ˗eu nga?’ lehˇ naˇ haˬ nya meh. Aˬ dui tiˬ jeˬ na˗ahˇ ya siˬ meh lehˇ noeˬ tmˬ kʼawꞈ, Yeˬhawˇbaˬ aˬ dui˗ahˇ bi siˬ mawꞈ˗eu gaˇ kawˆ yaw shuiꞈ deuˬ˗euˬ gʼaˇ duˬ jiˇ nui ma jeˇ lo ni ya pah˗eu meh. Aˬ dui teu loꞈ˗ehˇ aˬ joˆ˗ehˇ jahˇ nya˗eu nga?

Zaˬ siˬ nui gahˇ za ni guiˬ lahˬ shaˇ. Nymˬ˗mˇ Yeˬhawˇbaˬ ngaˬ˗ahˇ aˬ jeˬ mehˬ mawꞈ˗eu nga lehˇ siˬ laˇ ni caw ba nehˬ laꞈ lehˇ guiˬ lahˬ shaˇ. (Yaˬkoˆ 1:5) Yawˬ ha neh siˬ nya taˬ dzeuˇ˗euˬ jeˬ˗ahˇ tehꞈ˗ehˇ taˬ gʼoe.—Dawˬdaˬ 3:5, 6.

Miˬyehˇ˗euˬ dawˬ neh nawˬ˗euˬ dehꞈ ziˇ laꞈ kʼoeˇ bi uˆ lahˇ. “Miˬyehˇ˗euˬ dawˬ˗aˬ, yaw dehꞈ dehꞈ luꞈ”˗eu meh. (Heˬbyehˇ 4:12) Aˬ dui “Miˬyehˇ˗euˬ dawˬ” pyeuꞈ˗eu Jaˇliꞈ˗ahˇ kʼaˇ gui ngeh, yawˬ poˆ na luꞈ gaˇ kawˆ yaw shuiꞈ tiˬ hmˬ maˬ ngeuˇ naˇ tiˬ hmˬ˗ahˇ ya siˬ˗eu meh. Ehˇ kʼawꞈ ha geuꞈ mawꞈ˗eu nui ma ahˇ˗awˇ neh tehꞈ˗ehˇ gui˗awˇ gaˇ dahˇ tsoeˬ˗eu jeˬ za˗eu meh.

Yeˬhawˇbaˬ neh aˬ dui˗euˬ gʼaˇ duˬ lehˬ hmˬ nehˬ taˬ˗euˬ yawˬ jeˬ na luꞈ˗euˬ gʼaˇ duˬ aˇ poeˬ taˬ baw. Nui jah paw˗euˬ dzaˇ heu naˇ, Yeˬhawˇbaˬ neh aˬ dui˗ahˇ lehˬ hmˬ nehˬ taˬ˗euˬ “muiˬ dui dui˗eu dzaˬ dzaˬ dawˇ dawˇ” nehˬ˗ehˇ duˇ leˇ˗eu meh. (Iˇsaˬyaˇ 25:6) Yawˬ ha maˬ ya leˇ˗eu “dzaˬ dzaˬ dawˇ dawˇ” yahˇ pawˇ˗awˇ, yawˬ ha ya leˇ˗eu “dzaˬ dzaˬ dawˇ dawˇ” tehꞈ˗ehˇ taˬ dzaˬ. Nawˇ Yeˬhawˇbaˬ neh lehˬ hmˬ nehˬ taˬ˗euˬ yawˬ jeˬ na luꞈ˗ahˇ dzaˬ naˇ, yawˬ haˇ yawˬ haˇ Jaˇliꞈ pyehˆ tseˇ ngeh gaˇ dahˇ tsoeˬ˗eu jeˬ za˗eu tehꞈ˗ehˇ maˬ gʼaˬ ni laˬ kʼaˬ jiˇ cehˇ˗eu meh.