Jaˇliꞈ dzaw ngeh gaˇ dahˇ tsoeˬ˗eu jeˬ za˗awˇ byawˬ dzehˬ laˇ ni aˬ joˆ˗ehˇ ya jahˇ

Yawˇshuˆ Iˇsaˬleˬlaˆ tsawˇ jeuˬ˗ahˇ Yeˬhawˇbaˬ neh Saˇ jaˇ dzaˬ taˬ˗euˬ Miˇ kʼahˬ˗ahˇ ya sheuˬ uˇ leꞈ˗eu meh. Gaˇ heu naˇ shaˬ dui dui˗eu jeˬ pyeuꞈ meh. Ehˇ kʼawꞈ, Yeˬhawˇbaˬ aˬ yawꞈ˗ahˇ ‘Yawˬ haˇ yawˬ ha nui jah ahˇ˗eu laꞈ kʼoeˇ, kʼaˬ duˬ ni mˇ˗awˬ’ lehˇ ehˇ nehˬ˗awˇ gʼaˬ biꞈ nehˬ˗euˬ uˬ taꞈ, Zahˇ dawˬ˗ahˇ gui˗awˇ nui ma keuˆ˗eu laꞈ kʼoeˇ mˇ caw naˇ, aˬ geu jeˬ gaˇ kawˆ˗ahˇ noeˬ tsehˆ ngeh maˬ kaˬ, yawˬ gahˇ gahˇ˗ehˇ noeˬ tsehˆ nya˗awˇ, kʼaˇ mˇ kʼaˇ shaˇ˗eu jeˬ pyeuꞈ leˇ nya˗eu meh lehˇ paˇ ehˇ nehˬ˗euˬ meh.—Yawˇshuˆ 1:7, 8.

Nymˬ˗mˇ aˬ dui “shaˬ dui dui˗eu aˇ yamˬ”˗ahˇ jawˇ luꞈ˗eu miˇ neh shaˬ zahˬ ya tahˬ puˬ˗eu meh. (2 Tiˆmoˇseˬ 3:1) Aˬ dui dehꞈ ziˇ laꞈ kʼoeˇ Yawˇshuˆ loꞈ˗ehˇ mˇ pyeuꞈ mawꞈ naˇ, aˬ dui Yeˬhawˇbaˬ neh Yawˇshuˆ˗ahˇ biꞈ˗euˬ nui noeˬ nui duˇ˗ahˇ ya mˇ caw˗eu meh. Aˬ dui aˬ myah luꞈ Jaˇliꞈ ya gui˗awˇ, yaw muiˬ˗ehˇ noeˬ tsehˆ nya˗eu gʼaˇ duˬ, aˬ dui neh ya siˬ˗euˬ jeˬ˗ahˇ ya zmˬ˗eu meh.

Yawˬ haˇ yawˬ ha Jaˇliꞈ dzaw˗eu jeˬ aˇ yeˇ huiˬ dui dui˗eu jeˬ pyeuꞈ kʼawꞈ, dzaw jeˬ dzaw kawˆ maˬ siˬ nya˗eu deuˬ jawˇ˗awˇ, dzaw gaˇ laꞈ kʼaˬ maˬ cehˇ˗eu deuˬ jiˇ jawˇ˗eu meh. “Heu loꞈ˗ehˇ mˇ haw” lehˇ ehˇ˗eu oeˬ coeˇ oeˬ bawˬ˗ahˇ haw naˇ, yawˬ haˇ yawˬ ha Jaˇliꞈ dzaw˗eu byawˬ laˇ ni maˬ ehˇ, teu gaˇ neh gaˇ dahˇ tsoeˬ˗eu jeˬ za ni maˬ ehˇ, caw ba nehˬ˗eu jeˬ˗ahˇ ya mawˇ tehꞈ˗a.

Ja ceuˬ sahˬ boꞈ boꞈ˗eu gʼaˬ “Ngaˬ˗euˬ laˬ kʼaˬ cehˇ duˬ zahˇ dawˬ kʼoꞈ dawˬ laꞈ kʼoeˇ jaˆ˗eu miˇ neh, dawˬ kʼoeˇ deuˬ˗ahˇ naˇ haˬ geuꞈ nya ni caw ba nehˬ laꞈ” lehˇ ehˇ˗eu meh. (Ja ceuˬ 119:35) Nawˇ kʼawꞈ Jaˇliꞈ yaw byawˬ byawˬ˗ehˇ dzaw nya˗awˇ, nawˇ ngehˬ˗ehˇ dzaw naˇ ngehˬ˗ehˇ muiˬ˗eu nui noeˬ nui duˇ deuˬ za laˇ dui dui meh.

Nawˇ Yawˇshuˆ loꞈ˗ehˇ Iˇsaˬleˬlaˆ deuˬ˗ahˇ maˬ ya sheuˬ gʼeh kʼawꞈ, nawˇ jiˇ shaˬ zahˬ gaˇ kawˆ jaˆ˗eu meh. Nawˇ jiˇ ni Yawˇshuˆ loꞈ˗ehˇ Jaˇliꞈ gui˗awˇ, ya siˬ˗euˬ jeˬ˗ahˇ mˇ caw luꞈ˗uˇ. Nawˇ toˆ˗ehˇ jahˇ naˇ, gaˇ kawˆ deuˬ˗ahˇ yaw muiˬ˗ehˇ noeˬ tsehˆ nya˗awˇ, dehꞈ ziˇ laꞈ kʼoeˇ mˇ pyeuꞈ nya meh.