‘Miˬyehˇ˗euˬ muiˬ˗eu shawˇ˗eu yaw sahˇ neh biꞈ˗euˬ nui ma tiˬ siˬ tehꞈ˗ehˇ taˬ˗eu jeˬ˗ahˇ jeˬ hmˬ geuꞈ˗awˬ’

“Nui ma tiˬ siˬ tehꞈ˗ehˇ taˬ˗eu” jeˬ heu naˇ, ‘Miˬyehˇ˗euˬ muiˬ˗eu shawˇ˗eu yaw sahˇ’ laꞈ kʼoeˇ neh pyeuꞈ doˆ laˇ˗euˬ jeˬ pyeuꞈ meh. Ehˇ kʼawꞈ Pawˇluˆ neh ehˇ taˬ˗euˬ loꞈ˗ehˇ nui ma tiˬ siˬ tehꞈ˗ehˇ taˬ nya˗eu gʼaˇ duˬ, kʼaˇ gʼeh nya gaˇ neh ya leh jeh˗eu meh. Teu loꞈ˗ehˇ ya leh jeh˗eu aˬ suˇ suˇ gʼaˬ nga? Dawˬ kʼoꞈ naˇ, Ka li zaˬ yawˬ gʼaˬ na luꞈ kʼaˇ gʼeh nya gaˇ neh ‘Miˬyehˇ˗euˬ muiˬ˗eu shawˇ˗eu yaw sahˇ neh biꞈ˗euˬ nui ma tiˬ siˬ tehꞈ˗ehˇ taˬ˗eu jeˬ˗ahˇ jeˬ hmˬ geuꞈ’ nya ni ya leh jeh˗eu meh.

Yaw jeˬ ma jeˬ heu˗ahˇ shaˇ noeˬ haw sheˇ. Tiˬ gʼaˬ gʼaˬ nawˬ˗ahˇ lawˬ liˬ yaw shuiꞈ tiˬ laˆ biꞈ˗euˬ lehˇ ehˇ˗awˬ. Lawˬ liˬ heu laˇ˗ahˇ haw saˆ˗eu aˬ suˇ gʼaˬ˗ahˇ doˇ˗eu nga? Aˬ suˇ gʼaˬ˗ahˇ doˇ˗eu lehˇ maˇ jawˆ ni siˬ laˇ˗eu meh. Nawˇ lawˬ liˬ heu laˆ˗ahˇ yaw muiˬ˗ehˇ maˬ haw saˆ˗euˬ miˇ neh cawˆ˗iˇ ngeh, nawˬ˗ahˇ lawˬ liˬ biꞈ˗euˬ gʼaˬ˗ahˇ maˬ dehˬ lehꞈ nya˗a.

Teu gaˇ duˇ ni, nui ma tiˬ siˬ tehꞈ˗ehˇ taˬ˗eu jeˬ Miˬyehˇ jawˇ gaˇ neh oe˗euˬ kʼawꞈ, aˬ dui yawˬ gʼaˬ na luꞈ tsaˬ leˇ dzoeˇ leˇ˗eu gʼaˇ duˬ kʼaˇ gʼeh nya gaˇ neh ya leh jeh˗eu meh. Aˬ dui mehˇ nmˇ deuˬ nehˬ˗ehˇ gaˇ kawˆ jaˆ laˇ naˇ, yawˬ ha˗ahˇ heu loꞈ˗ehˇ naˇ haˬ paˬ˗ehˇ gʼeh˗eu meh. ‘Ngaˇ aˇ muˇ laꞈ kʼoeˇ nui ma tiˬ siˬ tehꞈ˗ehˇ taˬ˗eu jeˬ hawˇ˗eu tsaˬ leˇ dzoeˇ leˇ˗eu jeˬ jaˆ ni mˇ luꞈ miˇ˗a laˬ?’

Nui ma tiˬ siˬ tehꞈ˗ehˇ taˬ˗eu gʼaˇ duˬ ‘kʼaˇ gʼeh nya˗eu loꞈ˗ehˇ leh jeh˗awˬ’

Pawˇluˆ neh ehˇ taˬ˗euˬ loꞈ˗ehˇ tiˬ poˆ na nui ma tiˬ siˬ tehꞈ˗ehˇ taˬ˗eu yaw shaˬ meh. Mehˇ nmˇ deuˬ aˬ dui˗ahˇ nui ma laˆ pehˇ laˇ ngeh ngehˬ˗ehˇ dzehˬ yaw shaˬ meh. Teu loꞈ˗ehˇ pyeuꞈ laˇ ngeh nawˇ aˬ yawꞈ nehˬ˗ehˇ yawˬ poˆ na luꞈ ya ja iˇ ngaˇ laˬ? Maˬ, nawˇ yawˬ ha˗ahˇ ‘Beu gaˇ˗eu jeˬ gaˇ kawˆ˗ahˇ ja iˇ˗eu heu naˇ, gaˇ kawˆ deuˬ˗ahˇ paˇ bi doeˇ dzehˬ laˇ nga laˬ?’ lehˇ naˇ haˬ. Tiˬ poˆ na, aˬ dui nui ma pehˇ˗eu maˬ kawˇ naˇ, iˬ baˇ pyehˬ nehˬ naˇ, gaˇ kawˆ teu˗ahˇ ngehˇ byoˆ naˇ, muiˬ dzehˬ meh.—Dawˬdaˬ 19:11; Maˬkuˆ 11:25.

Gʼaˬ kʼehˇ Pawˇluˆ aˬ dui˗ahˇ “goeˇ˗eu gaˬ˗eu laꞈ kʼoeˇ tiˬ gʼaˬ tiˇ gʼaˬ oˇ˗awˬ” lehˇ ehˇ taˬ˗euˬ meh. (Eˇpeˇsu 4:2) Jaˇliꞈ dawˬ tsuiꞈ puiˇ kʼawˬ˗eu paˇ dmˬ tiˬ dmˬ˗ahˇ dawˬ heu dawˬ˗ahˇ “aˬ yawꞈ kʼaˇ pyeuꞈ˗eu loꞈ˗ehˇ ha geuꞈ” lehˇ jiˇ ehˇ nya meh lehˇ ehˇ taˬ˗euˬ meh. Heu naˇ, aˬ dui iˬ baˇ zaˬ pyeuꞈ˗eu loꞈ˗ehˇ mehˇ nmˇ deuˬ jiˇ iˬ baˇ zaˬ pyeuꞈ meh lehˇ ha geuꞈ gaˇ ehˇ˗eu meh. Kʼoeˇ naˇ nymˬ˗mˇ aˬ dui yawˬ gʼaˬ na luꞈ “yaw dehꞈ dehꞈ˗eu yaw shuiꞈ jeˬ” ahˇ laˇ ni leh jeh luꞈ˗eu meh. (Eˇpeˇsu 4:23, 24) Ehˇ kʼawꞈ aˬ dui laꞈ kʼoeˇ tiˬ gʼaˬ˗i ehˇ kʼaˇ maˬ za ni maˬ jahˇ nya˗aˬ siˬ. (Loˇmaˆ 3:23) Aˬ dui gaˇ kawˆ heu˗ahˇ ha geuꞈ coeˇ naˇ, tiˬ gʼaˬ tiˇ gʼaˬ oˇ˗eu awˬ dzehˬ laˇ˗awˇ, ‘Miˬyehˇ˗euˬ muiˬ˗eu shawˇ˗eu yaw sahˇ neh biꞈ˗euˬ nui ma tiˬ siˬ tehꞈ˗ehˇ taˬ˗eu jeˬ˗ahˇ jeˬ hmˬ geuꞈ’ nya laˇ˗eu meh.

Aˬ dui mehˇ nmˇ deuˬ˗ahˇ iˬ baˇ pyehˬ˗awˇ, aˬ yawꞈ maꞈ neh mˇ deuˬ laˇ˗euˬ jeˬ˗ahˇ noeˬ taˬ noeˬ taˬ˗ehˇ maˬ jawˇ ni ngehˇ byoˆ naˇ, aˇ muˇ laꞈ kʼoeˇ “tsaˬ leˇ dzoeˇ leˇ˗eu jeˬ neh gahˇ dzahˬ” nya laˇ˗eu meh. Eˇpeˇsu 4:3-ahˇ “tsaˬ leˇ dzoeˇ leˇ˗eu jeˬ neh gahˇ dzahˬ” taˬ lehˇ ehˇ˗eu Gaˬliˇ dawˬ heu dawˬ, Gawˇlawˇsehˇ 2:19-ahˇ “shaˬ guˬ shaˬ caˆ” lehˇ ehˇ˗eu heu dawˬ nehˬ˗ehˇ duˇ leˇ˗eu meh. Shaˬ guˬ shaˬ caˆ heu naˇ, yoeˬ tsuiꞈ yoeˬ laꞈ jaˆ gaˇ jaˆ˗awˇ, yoeˬ tsuiꞈ yoeˬ laꞈ deuˬ˗ahˇ gʼeu tsaˬ gʼeu tawꞈ nehˬ˗eu meh. Teu gaˇ duˇ ni tsaˬ leˇ dzoeˇ leˇ˗eu jeˬ hawˇ˗eu nui gaˬ heu naˇ, aˬ dui˗ahˇ mehˇ nmˇ deuˬ aˬ jeˬ lehˇ mˇ doeˇ laˇ˗awˇ nui ma laˆ pehˇ laˇ kʼawꞈ, aˬ yawꞈ maꞈ nehˬ˗ehˇ maˬ bi gʼawˬ˗iˇ ni caw ba nehˬ˗eu meh.

Teu miˇ neh mehˇ nmˇ deuˬ aˬ dui˗ahˇ nui ma kʼaˇ laˆ pehˇ laˇ ngeh, aˬ yawꞈ maꞈ˗ahˇ yaw lehˬ poˆ˗eu maˬ leh jeh ni gʼoˆ shaw nehˬ˗awˇ, gʼawˬ shaˬ ya gaˬ nehˬ˗eu meh. (Gawˇlawˇsehˇ 3:12) Aˬ dui yawˬ gʼaˬ na luꞈ maˬ byah kuꞈ˗eu tsawˇ haˬ pyeuꞈ˗eu miˇ neh nawˇ jiˇ aˬ cawˬ˗ahˇ ngehˬ deuˬ mˇ deuˬ˗eu lehˇ baw meh. Nawˇ gaˇ kawˆ heu˗ahˇ noeˬ taˬ naˇ, ‘Miˬyehˇ˗euˬ muiˬ˗eu shawˇ˗eu yaw sahˇ neh biꞈ˗euˬ nui ma tiˬ siˬ tehꞈ˗ehˇ taˬ˗eu jeˬ˗ahˇ jeˬ hmˬ geuꞈ˗eu’ kʼaˇ gʼeh nya gaˇ neh leh jeh laˇ˗eu meh.