Nawˇ noeˬ taˬ nya miˇ˗a loˇ?

Nawˇ heu kʼoꞈ˗euˬ Loꞈ˗eu nymˇgoˇ˗ahˇ yaw muiˬ˗ehˇ ya gui maˬ loˇ? Naˇ haˬ˗eu jeˬ heu deuˬ˗euˬ dawˬ kʼoꞈ˗ahˇ biꞈ nya miˇ˗a laˬ lehˇ haw ma:

Aˬ dui Yeˬhawˇbaˬ˗ahˇ aˬ jeˬ baˬ da neh ja ceuˬ˗eu nga?

Aˬ dui Yeˬhawˇbaˬ˗ahˇ yaw zeu baw dui dui˗eu miˇ neh, gaˬ dui dui˗eu miˇ neh, aˬ cawˬ deuˬ˗ahˇ Yeˬhawˇbaˬ˗euˬ gaˇ kawˆ bi siˬ mawꞈ˗eu miˇ neh, aˬ yawꞈ˗ahˇ ja ceuˬ˗eu ma.—w25.01, myaˆ pyawˬ 3.

Tiˬ gʼaˬ gʼaˬ laˆ deuˬ laˆ naˇ laˇ ngeh, iˬ baˇ aˬ joˆ˗ehˇ pyehˬ nya˗eu nga?

Yawˬ ha˗euˬ nui ma˗ahˇ gʼeh laˇ˗eu jeˬ˗ahˇ myaˆ haw maˬ cawˬ ni taˬ gʼeh. Nui pehˇ hawˇ˗eu nui ma naˇ˗eu jeˬ˗ahˇ byehˇ dzeh. Heu naˇ, doeˇ dui dui˗eu jeˬ˗ahˇ yahˇ pawˇ nya ni caw ba nehˬ laꞈ meh.—w25.02, myaˆ pyawˬ 15-16.

Gʼaˬ kʼehˇ Maˬkuˆ aˬ jeˬ miˇ neh mehˇ nmˇ aˬ li zaˬ guˬ deuˬ˗euˬ gʼaˇ duˬ dzaw geuꞈ duˬ pyeuꞈ nga?

Maˬkuˆ aˬ cawˬ˗euˬ gʼaˇ duˬ nui ma keuˆ˗eu laꞈ kʼoeˇ mˇ. Aˬ yawꞈ nui ma nyiˇ nui ma cawˆ˗eu jeˬ˗ahˇ ya puˬ kʼawꞈ, gʼaˬ byehˆ maˬ byehˆ ni Pawˇluˆ hawˇ˗eu noeˬ dahˇ doe laˇ˗euˬ Ka li zaˬ nui deuˬ nehˬ˗ehˇ gʼoeˇ ni leh jeh˗eu meh.—w25.04, myaˆ pyawˬ 27.

Yeˬsuˇ “Ngaˇ aˬ yawꞈ maꞈ˗ahˇ nawˬ˗euˬ tsawˇ myahˇ dzawˇ mehˬ dzeuˇ˗euˬ ma” lehˇ ehˇ˗eu heu naˇ, aˬ jeˬ˗ahˇ ehˇ mawꞈ˗eu nga? (Yoˇhaˬ 17:26)

Yeˬsuˇ˗euˬ zaˬ lahˇ deuˬ Miˬyehˇ˗euˬ tsawˇ myahˇ siˬ nya taˬ dzeuˇ˗euˬ meh. Teu miˇ neh Yeˬsuˇ Miˬyehˇ˗euˬ tsawˇ myahˇ ehˇ mehˬ luꞈ˗eu maˬ ngeuˇ ni, Yeˬhawˇbaˬ naˇ aˬ joˆ˗ehˇ gʼeh˗eu Miˬyehˇ pyeuꞈ˗eu, aˬ yawꞈ˗euˬ seu dzeuꞈ aˇ gʼehˇ hawˇ˗eu aˬ yawꞈ neh noeˬ taˬ˗euˬ jeˬ uˬ taꞈ, mˇ dzeuˇ˗euˬ jeˬ hawˇ˗eu mehˬ hu paw mˇ˗eu lehˇ gʼeh˗eu jeˬ˗ahˇ mehˬ luꞈ˗eu jeˬ pyeuꞈ meh.—w25.05, myaˆ pyawˬ 20-21.

Taˬ aw˗eu jeˬ, aˬ jeˬ˗ahˇ maˬ ngehˇ ni caw ba nehˬ nga?

Aˬ dui˗ahˇ yawˬ ha maˬ siˬ nya˗eu jeˬ jaˆ meh lehˇ maˬ ngehˇ ni caw ba nehˬ. Yaw jeˬ ma jeˬ, aˬ dui aˇ saˬ saˬ˗eu aˇ yamˬ maˬ siˬ nya˗a. Teu ngeh Yeˬhawˇbaˬ aˬ joˆ˗ehˇ jahˇ˗eu, ni shawˬ aˬ jeˬ pyeuꞈ laˇ˗eu, Yeˬhawˇbaˬ aˬ dui˗ahˇ aˇ naˆ keuˆ ni siˬ nya˗eu lehˇ aˬ dui tiˬ byah tiˬ loꞈ maˬ siˬ nya˗a.—w25.06, myaˆ pyawˬ 15-18.

Gaˇ kawˆ deuˬ hawˇ˗eu dawˬ mehˬ mehˬ˗eu jeˬ˗ahˇ neh gaˇ dahˇ tsoeˬ˗eu jeˬ za ni caw ba nehˬ˗eu jeˬ naˇ, aˬ jeˬ nga?

Yawˬ ha˗ahˇ heu loꞈ˗ehˇ naˇ haˬ: ‘Aˬ cawˬ deuˬ yaw tsaˬ yaw dawˇ gaˇ kawˆ heu˗ahˇ jah ziꞈ laˇ˗awˇ ha geuꞈ coeˇ laˇ˗eu gʼaˇ duˬ, aˬ jeˬ˗euˬ saˇ kiˇ zmˬ taˬ˗euˬ nga? Ngaˇ aˬ cawˬ deuˬ˗ahˇ yaw tsaˬ yaw dawˇ heu kawˆ dzawˇ nehˬ nya˗eu gʼaˇ duˬ, zmˬ nya˗eu aˬ jeˬ jeˇ˗euˬ yaw jeˬ ma jeˬ gaˇ kawˆ jaˆ nga? Gaˇ kawˆ heu˗ahˇ aˬ suˇ suˇ gʼaˬ nui ma ahˇ paˬ˗ehˇ gʼeh nga?’—w25.07, myaˆ pyawˬ 19.

Yeˬhawˇbaˬ neh Daˬbiˇ˗ahˇ iˬ baˇ pyehˬ˗euˬ jeˬ˗ahˇ neh, aˬ dui Yeˬhawˇbaˬ˗euˬ iˬ baˇ pyehˬ˗eu jeˬ nehˬ˗ehˇ taꞈ leˇ˗awˇ aˬ jeˬ ya siˬ˗eu nga?

Daˬbiˇ huiˬ˗eu iˬ baˇ yaw myaˬ jeˬ mˇ˗euˬ kʼawꞈ, aˬ yawꞈ maˇ diˇ iˬ baˇ noeˬ poˆ noeˬ paˇ ngeh Yeˬhawˇbaˬ aˬ yawꞈ˗ahˇ iˬ baˇ pyehˬ nehˬ. (1 Sahˬ. 9:4, 5) Yeˬhawˇbaˬ iˬ baˇ pyehˬ gʼaˬ shaw naˇ ngehˇ byoˆ˗eu meh. Nyaˆ taꞈ poˆ lehˇ maˬ paˇ ja poˆ laˇ˗awˇ, teu˗euˬ gʼaˇ duˬ yaˇ kʼaˬ jiˇ maˬ paˇ daˇ meh.—w25.08, myaˆ pyawˬ 17.

Dzaw zaˬ deuˬ maˬ gʼoˆ shaw nya gaˇ kawˆ˗ahˇ ya mawˇ naˇ, aˬ joˆ˗ehˇ jahˇ nya nga?

Nawˇ kʼaˇ gʼeh nya gaˇ neh leh jeh˗awˇ mehˬ˗euˬ kʼawꞈ, gaˇ kawˆ teu˗ahˇ dzaw zaˬ yaw kʼaˆ˗ehˇ maˬ gʼoˆ shaw nya naˇ, bi jaˆ tawˬ˗awˇ, aˇ nah hawˇ˗eu ja sawˇ nya ni lehˬ hmˬ taˬ nya meh.—w25.09, myaˆ pyawˬ 24.

Jaˇliꞈ˗ahˇ ‘iˬ baˇ mehˇ shuiˇ’ gaˇ kawˆ˗ahˇ aˬ joˆ˗ehˇ ngehˬ keuˆ taˬ˗euˬ nga? (Heˬbyehˇ 3:13)

Iˬ baˇ heu naˇ, aˬ dui˗ahˇ mˇ bahˬ ni muˇ juˇ juˇ˗eu tehꞈ˗ehˇ maˬ gʼaˬ ni, tiˬ kʼehˬ maˬ kaˬ Yeˬhawˇbaˬ˗euˬ nui gaˬ˗ahˇ maˬ jah coeˇ ni bi gʼeh laˇ˗eu meh.—w25.10, myaˆ pyawˬ 16.

Aˬ dui guiˬ lahˬ yaw muiˬ˗ehˇ shaˇ nya laˇ˗eu gʼaˇ duˬ ya mˇ˗eu smˇ jeˬ jaˆ meh. Teu naˇ aˬ jeˬ nga?

(1) Yeˬhawˇbaˬ aˬ joˆ˗ehˇ gʼeh˗eu Miˬyehˇ nga lehˇ shaˇ noeˬ shaˇ sawˇ. (2) Nymˬ˗mˇ ya puˬ luꞈ˗eu jeˬ˗euˬ gʼaˇ duˬ guiˬ lahˬ shaˇ. Yaw jeˬ ma jeˬ, tiˬ gʼaˬ na˗ahˇ iˬ baˇ pyehˬ nehˬ˗eu loˬ ngaˇ laˬ lehˇ shaˇ noeˬ haw. (3) Aˇ yamˬ yuˇ˗awˇ guiˬ lahˬ shaˇ naˇ, yawˬ ha nui ma laꞈ kʼoeˇ kʼaˇ jaˆ˗eu jeˬ Yeˬhawˇbaˬ˗ahˇ gʼawˬ mya ni dzawˇ nehˬ nya meh.—w25.10, myaˆ pyawˬ 19-20.

Aˇ kʼoꞈ kʼawˆ laˇ˗euˬ mehˇ nmˇ deuˬ˗ahˇ aˬ joˆ˗ehˇ caw ba nya˗eu nga?

Aˬ dui aˬ yawꞈ maꞈ jawˇ gaˇ gʼa iˇ˗eu, naˬ gaˬ ngehˬ cawˬ˗eu, saˬ laˬ gʼoˬ jawˇ gaˇ iˇ caw˗eu, maˬ ngeuˇ naˇ aˬ yawꞈ maꞈ nehˬ˗ehˇ Miˬyehˇ˗euˬ gaˇ yaw myaˬ jeˬ lehˇ mˇ nya meh.—w25.11, myaˆ pyawˬ 6-7.

Ka li zaˬ deuˬ Yeˬhawˇbaˬ˗ahˇ ciˬ huiˬ˗eu jeˬ˗ehˇ jiˇ cehˇ baˇ˗eu gʼaˇ duˬ, aˬ jeˬ jeˇ˗ahˇ ya noeˬ keuˆ˗eu nga?

Jiˇ cehˇ baˇ˗eu jeˬ nehˬ˗ehˇ taꞈ˗eu miˇ kʼahˬ˗euˬ zahˇ sahˇ kʼoꞈ deuˬ˗ahˇ mˇ caw. Jiˇ cehˇ baˇ ngeh maˬ ehˇ, hawˬ byawˇ lawˇ ngeh maˬ ehˇ, Miˬyehˇ˗euˬ muiˬ˗eu shawˇ˗eu yaw sahˇ neh doˆ le˗euˬ jeˬ bi mawˇ. Haw muiˬ paˬ˗ehˇ gʼeh˗eu mehˬ tsoeˬ dmˬ. Jaˇliꞈ˗ahˇ maˬ tsaˬ˗eu zahˇ sahˇ kʼoꞈ deuˬ˗ahˇ yahˇ. Jiˇ cehˇ baˇ˗eu lehˬ hmˬ ngeh, yaw muiˬ˗ehˇ ja cawˬ.—w25.12, myaˆ pyawˬ 21-24.