Miˬyehˇ˗euˬ Miˇkʼahˬ keuˆ le ngeh aˬ jeˬ byoˆ iˇ˗eu nga?

1, 2. (a) Haiˬ˗eu miˇ tsaˬ heu siˬ hawˇ˗eu sehꞈ˗eu lehˇ daˇ tsehˆ dzeuˇ˗euˬ haiˬ˗eu heu gʼaˬ aˬ jeˬ duˇ leˇ˗eu nga? (Dahˬ beh˗eu baˇ˗ahˇ haw.) (b) Haiˬ˗eu miˇ tsaˬ˗ahˇ laˆ cawˆ gʼaˬ ngeh jawˇ mˬ hawˇ˗eu miˇ˗ahˇ jawˇ˗eu deuˬ aˬ joˆ˗ehˇ ehˇ˗eu nga?

Haiˬ˗eu tiˬ gʼaˬ tawˬ˗euˬ kuˆ lawˆ˗ahˇ neh oe doˆ luꞈ ngeh loꞈ˗eu gʼaˬ “Tsawˇ shiˇ cah luꞈ nga” lehˇ guˇ˗eu aˇ baˇ˗ahˇ shaˇ noeˬ haw sheˇ. Aˬ yawꞈ aˬ jeˬ miˇ neh teu loꞈ˗ehˇ guˇ˗eu nga? Haiˬ˗eu heu gʼaˬ loˆ ga ni dehꞈ luꞈ kʼawꞈ sehꞈ˗eu lehˇ daˇ tsehˆ dzeuˇ˗euˬ miˇ neh meh. Heu naˇ shiˇ˗euˬ gaˇ duˇ˗eu meh.a—Ehˇ lahˬ˗ahˇ haw.

² Nymˇ aˬ dui jawˇ luꞈ˗eu haiˬ˗eu miˇ tsaˬ heu siˬ kʼawꞈ sehꞈ˗eu lehˇ daˇ tsehˆ dzeuˇ˗euˬ haiˬ˗eu heu gʼaˬ˗ahˇ duˇ˗eu meh. Jaˇliꞈ “miˇ tsaˬ heu . . . ya byoˆ˗iˇ jiˇ tehꞈ˗a” lehˇ ehˇ˗eu meh. (1 Yoˇhaˬ 2:17) Yeˬhawˇbaˬ miˇ tsaˬ heu˗ahˇ gʼawˬ myahˇ maˬ gʼeh˗ehˇ laˆ cawˆ˗eu lehˇ daˇ tsehˆ dzeuˇ˗euˬ meh. Teu miˇ neh aˇ saˇ saˇ˗eu aˇ nah jaˆ˗eu yaw duˬ baw meh. Ehˇ kʼawꞈ miˇ tsaˬ heu siˬ hawˇ˗eu sehꞈ˗eu lehˇ daˇ tsehˆ dzeuˇ˗euˬ heu gʼaˬ beu gaˇ˗eu jeˬ jaˆ meh. Tiˬ deuˬ na yaˇ kʼaˬ daˇ˗eu gʼaˬ daˇ bahˬ˗euˬ kʼawꞈ pyeuꞈ nya˗awˇ haiˬ˗eu gʼaˬ shiˇ gaˇ maˬ keuˆ paˬ lehˇ noeˬ˗eu meh. Ehˇ kʼawꞈ Yeˬhawˇbaˬ byah kuꞈ˗eu yaˇ kʼaˬ daˇ˗eu gʼaˬ pyeuꞈ˗eu miˇ neh miˇ tsaˬ heu siˬ˗ahˇ yaˇ kʼaˬ daˇ˗eu tsaˬ˗eu dawˇ˗eu yaw duˬ baw meh. (Dawˬmehˬmehˬ˗eu. 32:4) Yaˇ kʼaˬ daˇ˗eu heu gʼawˬ myahˇ maˬ paˇ ga meh. Haiˬ˗eu miˇ tsaˬ˗ahˇ laˆ cawˆ gʼaˬ ngeh jawˇ mˬ hawˇ˗eu miˇ˗ahˇ jawˇ˗eu deuˬ Yeˬhawˇbaˬ˗euˬ yaˇ kʼaˬ daˇ˗eu jeˬ˗aˬ yaw tsaˬ yaw dawˇ jeˬ law hawˇ nga lehˇ ehˇ˗eu meh. Heu˗aˬ huiˬ dui dui˗eu buˬ iˇ law iˇ˗eu poˆ pyeuꞈ meh.

3. Miˬyehˇ˗euˬ Miˇkʼahˬ uˆ lahˇ le ngeh byoˆ iˇ˗eu oeˬ jeˬ aˬ geu nga?

³ “Ya byoˆ˗iˇ jiˇ”˗eu “miˇ tsaˬ” heu aˬ jeˬ˗ahˇ ehˇ mawꞈ˗eu nga? Nymˇ iˬ nah dehꞈ ziˇ laꞈ kʼoeˇ pyeuꞈ luꞈ˗eu maˬ muiˬ˗eu jeˬ˗ahˇ ehˇ mawꞈ˗eu meh. Gʼawˬ myahˇ maˬ gʼeh˗ehˇ maˬ muiˬ˗eu jeˬ dawˬ tawˆ luꞈ ya byoˆ iˇ jiˇ meh. Heu˗aˬ “Miˬyehˇ Miˇkʼahˬ gaˇ kawˆ laꞈ kʼaˬ cehˇ˗eu guiˬ lahˬ dawˬ” pyeuꞈ meh. (Maꞈtehˬ 24:14) Heu kawˆ˗ahˇ Miˬyehˇ Miˇkʼahˬ uˆ lahˇ le ngeh byoˆ iˇ˗eu oeˬ jeˬ˗ahˇ ja sawˇ ma. Heu naˇ haiˬ˗eu tsawˇ haˬ myawꞈ dzaˬ shuiˇ dzaˬ˗eu aˇ maꞈ mˇ bahˬ shaˇ muˆ˗eu gaˇ dahˬ gaˇ dzeˇ yaw jawꞈ heu deuˬ pyeuꞈ meh. Aˬ yawꞈ kawˆ aˬ yawꞈ˗ahˇ (1) nymˇ gaˇ kawˆ heu aˬ dui˗ahˇ aˬ joˆ˗ehˇ coeˬ laˇ˗eu nga? (2) heu˗ahˇ Yeˬhawˇbaˬ aˬ jeˬ jahˇ˗eu nga? (3) heu˗euˬ dah zaˇ aˬ jeˬ jaˆ le˗eu nga?

Haiˬ˗eu tsawˇ haˬ

4. Haiˬ˗eu tsawˇ haˬ deuˬ aˬ dui˗ahˇ aˬ joˆ˗ehˇ coeˬ laˇ nya˗eu nga?

⁴ Haiˬ˗eu tsawˇ haˬ aˬ dui˗ahˇ aˬ joˆ˗ehˇ coeˬ˗eu nga? Kuiˇ laꞈ Pawˇluˆ “aˇ saˬ saˬ˗eu aˇ nah a yamˬ laꞈ kʼoeˇ shaˬ dui dui˗eu aˇ yamˬ keuˆ le tehꞈ˗a” lehˇ ehˇ˗awˇ “haiˬ˗eu tsawˇ haˬ deuˬ hawˇ˗eu jaˬ myawꞈ mehˇ shuiˇ deuˬ˗aˬ ngehˬ jawˇ ngehˬ doeˇ dzehˬ laˇ” tehꞈ˗a lehˇ ehˇ˗eu meh. (2 Tiˆmoˇseˬ 3:1-5, 13) Nawˇ heu loꞈ˗ehˇ tahˬ puˬ haw maˬ loˇ? Aˬ dui haiˬ˗eu deuˬ neh bi behˬ dzaˬ haw˗euˬ paˬ. Yaw jeˬ ma jeˬ yaw kʼaˆ˗ehˇ kʼehˬ˗eu bye˗eu aˇ jeuˬ aˇ ca˗ahˇ haw teˬ˗eu yaw haiˬ yaw doeˇ jahˇ laˇ˗eu. Behˬ dzaˬ˗eu heu deuˬ naˇ bya cehˆ ni mˇ doˆ laꞈ˗eu deuˬ jawˇ˗eu loꞈ˗ehˇ caw ba˗eu jahˇ geuꞈ˗awˇ shuiˇ dzaˬ˗eu deuˬ jiˇ jawˇ˗eu meh. Gaˇ kawˆ heu aˬ dui kʼoeˇ taˆ do lehˇ maˬ keuˆ le kʼawꞈ haiˬ˗eu tsawˇ haˬ neh mˇ˗euˬ jeˬ aˬ dui˗ahˇ coeˬ laˇ nya meh. Zaˬ tsawˇ mawˬ hawˇ˗eu uˬ kʼawˇ maˬ piˇ˗euˬ deuˬ˗ahˇ yaw doeˇ jahˇ˗eu lehˇ ya gaˬ ngeh aˬ dui nui ma˗ahˇ gʼawˬ shaˬ˗ehˇ gʼeh laˇ˗eu meh. Haiˬ˗eu heu deuˬ naˇ bawˇ tsahˬ jeˬ zaˬ hawˇ˗eu nehꞈ loꞈ˗ehˇ duˇ˗eu meh. (Yaˬkoˆ 3:15) Ehˇ kʼawꞈ Yeˬhawˇbaˬ˗euˬ dawˬ aˬ dui˗ahˇ noeˬ tmˬ˗eu jeˬ biꞈ˗eu meh.

5. (a) Haiˬ˗eu tsawˇ haˬ deuˬ aˬ jeˬ˗euˬ aˇ yamˬ jaˆ luꞈ nga siˬ? (b) Maˬ noeˬ paˇ˗eu deuˬ˗euˬ kʼoeˇ taˆ aˬ jeˬ keuˆ le˗eu nga?

⁵ Gaˇ kawˆ heu˗ahˇ Yeˬhawˇbaˬ aˬ jeˬ jahˇ˗eu nga? Nymˇ Yeˬhawˇbaˬ yaw haiˬ deuˬ˗ahˇ noeˬ poˆ noeˬ paˇ˗eu aˇ yamˬ biꞈ nehˬ taˬ˗euˬ meh. (Iˇsaˬyaˇ 55:7) Gʼawˬ myahˇ maˬ gʼeh˗ehˇ haiˬ˗eu miˇ tsaˬ˗ahˇ laˆ cawˆ kʼawꞈ aˬ yawꞈ maꞈ˗ahˇ bi shiˇ˗eu lehˇ maˬ daˇ tsehˆ saˬ˗a siˬ. Huiˬ dui dui˗eu shaˬ zahˬ oe ngeh keuˆ ni maˬ noeˬ paˇ ni haiˬ˗eu miˇ tsaˬ˗ahˇ gʼaˬ biꞈ luꞈ˗eu deuˬ kʼoeˇ taˆ aˬ jeˬ keuˆ le˗eu nga? Yeˬhawˇbaˬ haiˬ˗eu tsawˇ haˬ˗ahˇ miˇ tsaˬ kʼoeˇ taˆ neh laˆ byoˆ jiˇ ma lehˇ saˇ jaˇ dzaˬ taˬ˗euˬ meh. (Ja ceuˬ 37:10-ahˇ gui.) Nymˇ iˬ nah gʼawˬ mya gʼaˬ yawˬ ha yaw lehˬ jeˬ˗ahˇ laˆ zaꞈ˗eu miˇ neh tiˬ jeˬ maˬ ngeuˇ˗eu loꞈ˗ehˇ dehꞈ nya˗eu meh. (Yawˇbaˆ 21:7, 9) Ehˇ kʼawꞈ Jaˇliꞈ “tsawˇ haˬ zaˬ˗euˬ kuiˇ toꞈ yawˬ toꞈ na luꞈ˗ahˇ aˬ yawꞈ haw luꞈ˗eu meh. Miˬyehˇ maˬ bi mawˇ nya ni iˬ baˇ zaˬ deuˬ cehˆ zaꞈ nya paˬ˗ehˇ jawˇ duˬ yaw zahˇ maˬ jaˆ˗a” lehˇ ehˇ˗eu meh. (Yawˇbaˆ 34:21, 22) Teu miˇ neh Yeˬhawˇbaˬ˗ahˇ tiˬ jeˬ˗iˬ maˬ zaꞈ nya˗a. Aˬ yawꞈ haiˬ˗eu deuˬ neh mˇ˗euˬ yawˬ jeˬ na luꞈ˗ahˇ mawˇ jiˇ nya meh. Aˬmaˬgeˬdoˬ jiˇ ngeh aˬ dui aˬ yawꞈ maꞈ˗ahˇ maˬ paˇ poˆ mawˇ nya meh. Aˬ yawꞈ maꞈ mˬ maˬ maˬ byaˆ zaˇ ziˇ bi laˆ byoˆ jiˇ˗euˬ meh.—Ja ceuˬ 37:12-15.

6. Haiˬ˗eu deuˬ byoˆ jiˇ ngeh aˬ geu deuˬ dzeˇ yaꞈ˗eu nga heu aˬ jeˬ miˇ neh muiˬ˗eu gaˇ kawˆ pyeuꞈ˗eu nga?

⁶ Haiˬ˗eu deuˬ byoˆ jiˇ ngeh aˬ geu deuˬ dzeˇ yaꞈ˗eu nga? Yeˬhawˇbaˬ “nui nahˬ nui yu ahˇ˗eu deuˬ˗aˬ miˇ kʼahˬ jeˬ biˇ oꞈ˗eu laꞈ kʼoeˇ shiˬ keuˇ ni laꞈ kʼaˬ cehˇ nui saˇ ya oꞈ” meh lehˇ saˇ jaˇ dzaˬ˗awˇ “tsawˇ muiˬ deuˬ˗ahˇ miˇ kʼahˬ oꞈ˗awˇ mˬ maˬ maˬ byaˆ ya jawˇ tehꞈ˗a” lehˇ jiˇ paˇ ehˇ taˬ˗euˬ meh. (Ja ceuˬ 37:11, 29) “Nui nahˬ nui yu ahˇ˗eu deuˬ” hawˇ˗eu “tsawˇ muiˬ” deuˬ aˬ geu deuˬ nga? Nui yu ahˇ˗eu deuˬ naˇ taˬ aw˗eu laꞈ kʼoeˇ Yeˬhawˇbaˬ˗euˬ gaˇ kawˆ˗ahˇ dzaw˗awˇ ehˇ dawˬ naˇ haˬ˗eu deuˬ meh. Tsawˇ muiˬ deuˬ naˇ Miˬyehˇ mehˬ shi tsaˬ˗eu jeˬ˗ahˇ gaˬ˗eu deuˬ pyeuꞈ meh. Nymˇ miˇ tsaˬ˗ahˇ haiˬ˗eu deuˬ tsawˇ muiˬ deuˬ naˆ maˬ tseˇ myaˬ dzehˬ˗eu meh. Ehˇ kʼawꞈ miˇ shuiꞈ˗ahˇ nui yu ahˇ˗eu deuˬ hawˇ˗eu tsawˇ muiˬ deuˬ tehꞈ˗ehˇ jawˇ˗awˇ miˇ tsaˬ heu baˬlaˬdiˇsuˆ pyeuꞈ laˇ ni mˇ˗eu meh.

Myawꞈ dzaˬ shuiˇ dzaˬ˗eu aˇ maꞈ

7. Myawꞈ dzaˬ shuiˇ dzaˬ˗eu aˇ maꞈ aˬ dui˗ahˇ aˬ joˆ˗ehˇ coeˬ nga?

⁷ Myawꞈ dzaˬ shuiˇ dzaˬ˗eu aˇ maꞈ aˬ dui˗ahˇ aˬ joˆ˗ehˇ coeˬ nga? Nymˇ iˬ nah shaˬ zahˬ gʼawˬ mya jeˬ yawˬ ha˗ahˇ neh tehꞈ˗ehˇ pyeuꞈ˗eu maˬ ngeuˇ˗a aˇ maꞈ neh mˇ˗euˬ jeˬ˗ahˇ neh pyeuꞈ meh. Zahˇ paw˗euˬ aˇ maꞈ deuˬ gʼawˬ mya lam gʼaˬ˗ahˇ sheuˬ bahˬ˗eu meh. Yaw jeˬ ma jeˬ aˬ yawꞈ maꞈ Miˬyehˇ gaˇ kawˆ˗ahˇ mehˬ bahˬ˗eu uˬ taꞈ Jaˇliꞈ˗ahˇ nui ma maˬ taˬ nya˗a lehˇ ehˇ˗awˇ miˇ tsaˬ hawˇ˗eu tsawˇ haˬ˗euˬ mehˬ hu paw gaˇ kawˆ˗ahˇ kʼawꞈ mehˬ bahˬ˗eu meh. Shuiˇ dzaˬ˗eu uˆ lahˇ˗eu aˇ maꞈ guiˬ deuˆ gaˇ hawˇ˗eu yaw haiˬ mˇ gaˇ gʼaˬ biꞈ˗awˇ iˇ shaˬ zaˬ hawˇ˗eu yawˬ ha uˬ kʼawˇ maˬ piˇ˗eu deuˬ˗ahˇ behˬ dzaˬ˗eu meh. Aˬ yawꞈ maꞈ laꞈ nmꞈ pyuˆ˗ahˇ ha geuꞈ˗eu miˇ neh smˇ muiˬ muiˬ laˇ˗awˇ baoˬ yaw shehꞈ myaˬ laˇ˗eu meh. Nui kʼahˇ huiˬ˗eu baw leˬ deuˬ bawˇ tsahˬ sahˬ lahˬ˗ahˇ laˆ cawˆ˗awˇ tsawˇ haˬ˗ahˇ neh jiˇ jeuˬ poˆ˗eu miˇ neh iˇ shaˬ zaˬ deuˬ myaˬ˗eu meh. Teu miˇ neh nymˇ iˬ nah˗euˬ shaˬ zahˬ pyeuꞈ˗eu heu aˬ yawꞈ maꞈ˗ahˇ doˇ˗eu meh.

8. Tsawˇ haˬ mehˬ shi ziꞈ dah gʼeh˗eu aˇ maꞈ˗ahˇ aˬ jeˬ keuˆ le˗eu nga?

⁸ Gaˇ kawˆ heu˗ahˇ Yeˬhawˇbaˬ aˬ jeˬ jahˇ˗eu nga? Miˇ kʼahˬ˗euˬ guiˇ maꞈ zahˇ kʼawꞈ deuˬ˗ahˇ laˆ cawˆ ngeh huiˬ dui dui˗eu shaˬ zahˬ dahˬ beh˗eu jeˬ pyeuꞈ meh. (Pah mehˬ˗eu 17:1, 2, 16; 18:1-4) Zahˇ paw˗euˬ aˇ maꞈ deuˬ dawˬ tawˆ luꞈ bi laˆ cawˆ jiˇ ngeh myawꞈ dzaˬ shuiˇ dzaˬ˗eu aˇ maꞈ nui deuˬ˗ahˇ aˬ jeˬ keuˆ le˗eu nga? Aˬ yawꞈ maꞈ˗ahˇ haw ngeh gʼaˬ kʼaˆ˗awˇ ziꞈ dah ni gʼeh gaˇ duˇ˗eu miˇ neh Jaˇliꞈ aˬ yawꞈ maꞈ˗ahˇ gawˬ jawˬ hawˇ˗eu iˇ jaw lahˇ nehˬ˗ehˇ sheu tsehˆ taˬ˗euˬ meh. (Pah mehˬ˗eu 6:14-ahˇ gui.) Ehˇ kʼawꞈ Miˬyehˇ Miˇkʼahˬ˗ahˇ gʼaˬ maˬ biꞈ˗eu uˆ lahˇ˗eu aˇ maꞈ hawˇ˗eu aˇ maꞈ nui deuˬ bi laˆ cawˆ jiˇ˗eu meh. Teu ngeh huiˬ dui dui˗eu shaˬ zahˬ aˇ saˬ saˬ˗eu poˆ pyeuꞈ meh. (Yeˬlaˬmiˇ 25:31-33) Teu gaˇ neh naˇ myawꞈ dzaˬ shuiˇ dzaˬ˗eu aˇ maꞈ maˬ paˇ jawˇ meh.

9. Miˇ shuiꞈ˗ahˇ aˬ yawꞈ jeˬ aˬ yawꞈ˗ehˇ baw meh lehˇ aˬ dui aˬ jeˬ miˇ neh ehˇ nya˗eu nga?

⁹ Myawꞈ dzaˬ shuiˇ dzaˬ˗eu aˇ maꞈ˗euˬ dah zaˇ aˬ jeˬ jaˆ le˗eu nga? Aˬmaˬgeˬdoˬ jiˇ naˇ tiˬ jeˬ˗iˬ aˇ maꞈ maˬ paˇ jaˆ nga laˬ? Jaˇliꞈ˗ahˇ “aˬ dui˗aˬ Miˬyehˇ neh saˇ jaˇ dzaˬ taˬ˗euˬ jeˬ˗ahˇ dawˬ luꞈ˗eu ma. Iˇ kahˇ laꞈ kʼoeˇ yaw tsaˬ yaw dawˇ jeˬ jaˆ˗eu mˬ yaw shuiꞈ miˇ yaw shuiꞈ˗ahˇ dawˬ luꞈ˗eu ma” lehˇ ehˇ taˬ˗euˬ meh. (2 Beˬtuˆluˆ 3:13) Mˬ oeˇ miˇ oeˇ heu naˇ myawꞈ dzaˬ shuiˇ dzaˬ˗eu uˆ lahˇ˗eu aˇ maꞈ hawˇ˗eu aˬ yawꞈ maꞈ laꞈ kʼoeˇ jawˇ˗eu tsawˇ haˬ deuˬ˗ahˇ ehˇ˗eu meh. Heu deuˬ byoˆ jiˇ naˇ heu˗euˬ dah zaˇ aˬ jeˬ jaˆ le˗eu nga? “Mˬ yaw shuiꞈ miˇ yaw shuiꞈ” meh. Mˬ yaw shuiꞈ heu naˇ Yeˬsuˇ hawˇ˗eu 144000 uˆ lahˇ˗eu Miˇkʼahˬ˗ahˇ ehˇ˗eu meh. Miˇ yaw shuiꞈ heu naˇ Miˬyehˇ˗euˬ Miˇkʼahˬ uˬ moˆ jawˇ˗eu deuˬ˗ahˇ ehˇ˗eu meh. Yeˬsuˇ hawˇ˗eu aˬ yawꞈ˗euˬ uˆ lahˇ˗eu aˇ maꞈ aˬ yawꞈ jeˬ aˬ yawꞈ˗ehˇ baw˗eu Yeˬhawˇbaˬ Miˬyehˇ˗ahˇ tiˬ byah dzaw geuꞈ˗eu meh. (1 Gawˇliˬtu 14:33) Teu miˇ neh “miˇ yaw shuiꞈ”˗ahˇ aˬ yawꞈ jeˬ aˬ yawꞈ˗ehˇ baw˗eu meh. Yawˬ jeˬ na˗ahˇ muiˬ˗eu deuˬ haw piˇ˗eu meh. (Ja ceuˬ 45:15, 16) Muiˬ˗eu tsawˇ haˬ heu deuˬ Yeˬsuˇ hawˇ˗eu 144000 gʼaˬ neh bi sheuˬ gʼeh˗eu meh. Myawˬ dzaˬ shuiˇ dzaˬ˗eu aˇ maꞈ deuˬ bi laˆ cawˆ jiˇ˗awˇ tiˬ jawˇ˗iˬ maˬ myawꞈ dzaˬ˗eu aˇ maꞈ tiˬ maꞈ tehꞈ˗ehˇ jaˆ˗eu aˇ yamˬ˗ahˇ shaˇ noeˬ haw sheˇ.

Mˇ bahˬ shaˇ muˆ˗eu jeˬ

10. Nawˇ jawˇ gaˇ tiˬ jeˬ maˬ ngeuˇ˗eu loꞈ˗ehˇ mˇ bahˬ˗eu aˬ jeˬ jeˇ jaˆ˗eu nga heu nawˬ˗euˬ nymˇ jiˇ˗ahˇ aˬ joˆ˗ehˇ coeˬ nga?

¹⁰ Mˇ bahˬ shaˇ muˆ˗eu jeˬ aˬ dui˗ahˇ aˬ joˆ˗ehˇ coeˬ˗eu nga? Aˬ dui tiˬ jeˬ maˬ ngeuˇ˗eu loꞈ˗ehˇ dehꞈ bahˬ dehꞈ muˆ˗eu myawꞈ dzaˬ shuiˇ dzaˬ˗eu haiˬ˗eu muiˇ˗eu jeˬ tehꞈ˗ehˇ jaˆ˗eu miˇ tsaˬ˗ahˇ jawˇ luꞈ˗eu meh. Miˇ tsaˬ byawˬ gʼaˬ mo gʼaˬ˗eu jeˬ heu naˇ nui ma ahˇ laˇ paˬ˗ehˇ gʼeh˗awˇ Yeˬhawˇbaˬ neh mehˬ˗euˬ tsaˬ˗eu dawˇ˗eu jeˬ˗ahˇ uiˇ yoeˇ laˇ paˬ˗ehˇ gʼeh˗eu jeˬ bi pyeuꞈ˗eu meh. (Iˇsaˬyaˇ 5:20) Aˬ da aˬ ma deuˬ zaˬ˗ahˇ maˬ muiˬ˗eu nui noeˬ heu maˬ bi nyawˬ laˇ ni ya leh jeh˗eu meh. Maˇ diˇ naˇ Ka li zaˬ maˇ diˇ deuˬ Miˬyehˇ˗euˬ zahˇ dawˬ˗ahˇ yaw zeu maˬ baw˗eu miˇ tsaˬ heu laꞈ kʼoeˇ yawˬ ha Yeˬhawˇbaˬ nehˬ˗ehˇ cawˬ cawˬ˗eu jeˬ˗ahˇ ya bo saˆ˗eu meh.

11. Yeˬhawˇbaˬ neh Sawˇdoˬ meuˬ hawˇ˗eu Gawˇmawˇlaˆ meuˬ˗ahˇ yaˇ kʼaˬ daˇ˗euˬ gaˇ neh aˬ dui aˬ jeˬ dzaw geuꞈ nya˗eu nga?

¹¹ Yeˬhawˇbaˬ mˇ bahˬ shaˇ muˆ˗eu jeˬ˗ahˇ aˬ jeˬ jahˇ˗eu lehˇ gʼeh nga? Sawˇdoˬ meuˬ hawˇ˗eu Gawˇmawˇlaˆ meuˬ yaw haiˬ jeˬ mˇ gaˇ Yeˬhawˇbaˬ neh mˇ nehˬ˗euˬ jeˬ˗ahˇ shaˇ noeˬ haw. (2 Beˬtuˆluˆ 2:6-8-ahˇ gui.) Lawˇtaˬ muiˬ˗eu tiˬ gʼaˬ pyeuꞈ kʼawꞈ aˬ yawꞈ tiˬ jawˬ maˬ muiˬ˗eu jeˬ tehꞈ˗ehˇ mˇ˗eu miˇ neh aˬ yawꞈ pehˬ shaˬ zahˬ mˇ dui dui˗eu meh. Yeˬhawˇbaˬ teu gaˇ jaˆ˗eu yaw haiˬ jeˬ dawˬ tawˆ luꞈ˗ahˇ laˆ cawˆ jiˇ˗euˬ meh. Heu naˇ nymˇ iˬ nah haiˬ˗eu deuˬ bi “dzaw geuꞈ˗eu” gʼaˇ duˬ pyeuꞈ meh. Yeˬhawˇbaˬ yaw beh mˇ bahˬ shaˇ muˆ˗eu jeˬ˗ahˇ laˆ byoˆ˗euˬ loꞈ˗ehˇ haiˬ˗eu miˇ tsaˬ˗ahˇ laˆ cawˆ le ngeh nymˇ jaˆ luꞈ˗eu mˇ bahˬ shaˇ muˆ˗eu jeˬ˗ahˇ kʼawꞈ laˆ cawˆ jiˇ meh.

12. Haiˬ˗eu miˇ tsaˬ heu dzeuˇ iˇ ngeh nawˇ aˬ jeˬ mˇ jeˬ shaˇ kawˆ˗ahˇ loꞈ luꞈ le?

¹² Mˇ bahˬ shaˇ muˆ˗eu jeˬ dahˬ zaˇ aˬ jeˬ jaˆ le˗eu nga? Miˇ shuiꞈ laꞈ kʼoeˇ aˬ dui byawˬ˗eu cehˇ˗eu mˇ jeˬ shaˇ kawˆ˗ahˇ kaꞈ gʼa˗eu meh. Yaw jeˬ ma jeˬ aˬ dui miˇ tsaˬ heu siˬ baˬlaˬdiˇsuˆ pyeuꞈ laˇ ni mˇ˗awˇ aˬ dui hawˇ˗eu aˬ dui gaˬ˗eu deuˬ˗euˬ gʼaˇ duˬ iˇ kahˇ tsoˆ˗eu meh. Kʼoeˇ naˇ aˬ dui gʼoꞈ dehꞈ laˇ˗eu gʼawˬ mya lam gʼaˬ˗ahˇ ha geuꞈ˗awˇ Yeˬhawˇbaˬ˗euˬ gaˇ kawˆ hawˇ˗eu aˬ yawꞈ neh tsawˇ haˬ zaˬ˗euˬ gʼaˇ duˬ mˇ nehˬ˗euˬ jeˬ˗ahˇ ya mehˬ nehˬ˗eu meh. (Iˇsaˬyaˇ 65:21, 22; Gʼaˬkʼehˇ 24:15) Teu ngeh yamˬ˗ahˇ aˬ dui˗ahˇ laꞈ kʼaˬ cehˇ˗eu jeˬ hawˇ˗eu Yeˬhawˇbaˬ˗ahˇ ja ceuˬ˗eu jeˬ mˇ gaˇ kaꞈ gʼa˗eu meh.

Gaˇ dahˬ gaˇ dzeˇ yaw jawꞈ

13. Eˬdeˬ yaˇ kmˇ˗ahˇ saˇ jaˇ peuˬ gaˇ neh naˇ aˬ jeˬ pyeuꞈ laˇ˗euˬ nga?

¹³ Gaˇ dahˬ gaˇ dzeˇ yaw jawꞈ heu nymˇ aˬ dui˗ahˇ aˬ joˆ˗ehˇ coeˬ nga? Miˇ tsaˬ˗ahˇ haiˬ˗eu deuˬ shuiˇ dzaˬ˗eu aˇ maꞈ deuˬ mˇ bahˬ shaˇ muˆ˗eu deuˬ tehꞈ˗ehˇ byah jiˇ taˬ˗euˬ miˇ neh gaˇ dahˬ gaˇ dzeˇ yaw jawꞈ jeˬ tehꞈ˗ehˇ jaˆ˗eu meh. Aˬ dui yawˬ gʼaˬ na luꞈ guiˇ deuˆ˗eu shaˬ˗eu tsawˇ jeuˬ biˇ paˆ˗eu naˇ˗eu shiˇ˗eu heu deuˬ baˬ da neh ya shaˬ˗eu meh. Heu naˇ Saˬdaˬ hawˇ˗eu Aˬdaˬ Eˇbaˆ Yeˬhawˇbaˬ˗ahˇ saˇ jaˇ peuˬ gaˇ neh naˇ pyeuꞈ laˇ˗euˬ meh. Aˬ yawꞈ maꞈ neh mˇ˗euˬ teu aˬ dui˗ahˇ shaˬ˗eu jeˬ keuˆ le˗euˬ meh.

14. Gaˇ dahˬ gaˇ dzeˇ yaw jawꞈ jeˬ˗ahˇ Yeˬhawˇbaˬ aˬ jeˬ jahˇ˗eu nga?

¹⁴ Gaˇ dahˬ gaˇ dzeˇ yaw jawꞈ jeˬ˗ahˇ Yeˬhawˇbaˬ aˬ jeˬ jahˇ˗eu nga? Yaw jeˬ ma jeˬ tiˬ hmˬ na˗ahˇ ja sawˇ ma. Yeˬhawˇbaˬ guiˇ deuˆ˗eu jeˬ˗ahˇ maˬ paˇ bi jaˆ ma lehˇ saˇ jaˇ dzaˬ taˬ˗euˬ meh. (Ja ceuˬ 46:8, 9-ahˇ gui.) Aˬ yawꞈ naˇ˗eu gawˇ˗eu jeˬ˗ahˇ laˆ byoˆ˗eu meh. (Iˇsaˬyaˇ 33:24) Shiˇ˗eu jeˬ˗ahˇ kʼawꞈ mˬ maˬ maˬ byaˆ zaˇ ziˇ laꞈ cawˆ˗eu meh. (Iˇsaˬyaˇ 25:8) Kʼoeˇ naˇ iˇ shaˬ shaˬ˗eu jeˬ maˬ paˇ jaˆ meh. (Ja ceuˬ 72:12-16) Yeˬhawˇbaˬ nymˇ iˬ nah dehꞈ˗eu jeˬ˗ahˇ laˆ kaꞈ laˆ siˇ laˇ˗eu yaw jawꞈ jeˬ˗ahˇ laˆ cawˆ˗awˇ Saˬdaˬ hawˇ˗eu nehꞈ deuˬ˗ahˇ neh doˆ laˇ˗euˬ jeˬ dawˬ tawˆ luꞈ˗ahˇ jiˇ ni laˆ byoˆ jiˇ˗eu meh.—Eˇpeˇsuˆ 2:2.

15. Aˬmaˬgeˬdoˬ guiˇ jiˇ ngeh aˬ jeˬ jeˇ byoˆ iˇ jiˇ˗eu nga?

¹⁵ Guiˇ deuˆ˗eu hawˇ˗eu naˇ˗eu gawˇ˗eu jeˬ shiˇ˗eu jeˬ maˬ jaˆ˗eu miˇ tsaˬ˗ahˇ ya dehꞈ naˇ aˬ joˆ˗ehˇ gʼeh˗eu nga lehˇ shaˇ noeˬ haw sheˇ. Teu gaˇ guiˇ maꞈ miˬ beuˆ mi cehˇ hawˇ˗eu guiˇ deuˆ gaˇ gʼaˬ biꞈ˗eu mawˇ kawˇ jiˇ maˬ paˇ jaˆ meh. Aˬ dui naˇ gawˇ laˆ saˆ duˬ saˬ laˬ gʼoˬ tsawˇ shiˇ baꞈ taˬ duˬ maˬ ngeuˇ naˇ lmˬ bymˇ jiˇ maˬ paˇ loˬ meh. Kʼoeˇ naˇ yaw haiˬ jeˬ maˬ paˇ jaˆ˗euˬ miˇ neh yehˇ hawˇ˗eu tahˇ joe laˇ gaˇ guˇ gaˬ˗eu keu ka kʼoeˇ naˇ sawˇ jiˇ maˬ paˇ zmˬ meh. Aˬ dui˗ahˇ shaˬ zahˬ bi naꞈ˗eu yaw jawꞈ jeˬ dawˬ tawˆ luꞈ mˬ maˬ maˬ byaˆ zaˇ ziˇ byoˆ iˇ jiˇ meh.

16, 17. (a) Aˬmaˬgeˬdoˬ guiˇ˗ahˇ neh bu iˇ˗euˬ deuˬ aˬ joˆ˗ehˇ gʼeh˗eu nga? Yaw jeˬ maˬ jeˬ ehˇ haw sheˇ. (b) Miˇ yaw oeˇ heu byoˆ iˇ kʼawꞈ aˬ dui jawˇ luꞈ˗a siˬ lehˇ aˬ jeˬ miˇ neh ehˇ nya˗eu nga?

¹⁶ Gaˇ dahˬ gaˇ dzeˇ yaw jawꞈ jeˬ byoˆ iˇ naˇ aˬ joˆ˗ehˇ gʼeh˗eu nga? Aˇ baˇ heu˗ahˇ shaˇ noeˬ˗eu yaw awˬ maˬ ngeuˇ˗a. Aˬ dui gaˇ dahˬ gaˇ dzeˇ yaw jawꞈ jeˬ tehꞈ˗ehˇ jaˆ gaˇ jawˇ dzaw taˬ˗euˬ miˇ neh heu deuˬ aˬ dui˗ahˇ aˬ joˆ˗ehˇ coeˬ˗eu lehˇ maˬ siˬ laˇ ni pyeuꞈ iˇ nya˗eu meh. Yaw jeˬ ma jeˬ teˇ saˇ kʼaˆ˗eu miˬ dzaˬ laˆ lawˬ dawˬ peh jawˇ˗eu deuˬ myahˇ laˇ naˇ teˇ saˇ kʼaˆ˗eu lehˇ maˬ siˬ laˇ ni pyeuꞈ iˇ nya˗eu meh. Kʼoeˇ naˇ jaˆ guˆ jaˆ meuˬ dawˬ peh jawˇ˗eu deuˬ kʼawꞈ myahˇ laˇ ngeh maˬ paˇ behꞈ laꞈ ni pyeuꞈ iˇ nya meh. Yeˬhawˇbaˬ gaˇ dahˬ gaˇ dzeˇ jaˆ˗eu yaw jawꞈ jeˬ˗ahˇ laˆ cawˆ jiˇ ngeh huiˬ dui dui˗eu caw ba˗eu poˆ pyeuꞈ meh.

¹⁷ Nymˇ aˬ dui˗ahˇ shaˬ zahˬ laˆ naꞈ˗eu jeˬ˗euˬ dah zaˇ aˬ jeˬ jaˆ laˇ˗eu nga? “Nui nahˬ nui yu ahˇ˗eu deuˬ˗aˬ miˇ kʼahˬ jeˬ biˇ oꞈ˗eu laꞈ kʼoeˇ shiˬ keuˇ ni laꞈ kʼaˬ cehˇ nui saˇ ya oꞈ” meh lehˇ ehˇ taˬ˗euˬ meh. (Ja ceuˬ 37:11 MS) Yeˬhawˇbaˬ aˬ dui˗ahˇ teu loꞈ˗ehˇ bi dehꞈ mawꞈ˗eu lehˇ ya siˬ˗euˬ heu aˇ naˆ ni gʼaˬ za laˇ paˬ˗ehˇ gʼeh˗eu nga. Shaˬ zahˬ aˇ yamˬ heu laꞈ kʼoeˇ Yeˬhawˇbaˬ hawˇ˗eu aˬ yawꞈ˗euˬ aˇ maꞈ aˇ muˇ dawˬ peh jawˇ nya ni kʼaˇ gʼeh nya gaˇ neh leh jeh˗awˬ. Nawˬ˗euˬ mehˬ hu paw noeˬ tmˬ˗euˬ jeˬ gaˇ kawˆ heu aˇ poeˬ baw dui dui˗eu miˇ neh gaˇ kawˆ heu˗ahˇ yaw muiˬ˗ehˇ shaˇ noeˬ˗awˇ aˬ cawˬ˗ahˇ jiˇ ni ehˇ nehˬ˗awˬ. (1 Tiˆmoˇseˬ 4:15, 16; 1 Beˬtuˆluˆ 3:15) Aˬ dui teu loꞈ˗ehˇ jahˇ naˇ haiˬ˗eu miˇ tsaˬ heu aˇ saˬ saˬ kʼawꞈ aˬ dui laꞈ kʼaˬ tiˬ cehˇ mˬ maˬ maˬ byaˆ zaˇ ziˇ ya dehꞈ meh.