Loꞈ˗eu nymˇgoˇ Awˆlai Sahˬ boꞈ taˬ duˬ
Loꞈ˗eu nymˇgoˇ
Awˆlai Sahˬ boꞈ taˬ duˬ
Akha
?
  • ˆ
  • ꞈ
  • ˇ
  • ˬ
  • Jaˇliꞈ
  • Jahˇ doˆ taˬ˗euˬ jeˬ
  • Mehˬ bawˬ
  • w17 Shiꞈ siˬ ba la myaˆ pyawˬ 27-myaˆ pyawˬ 28 aˇ deuˆ 3
  • Gui˗eu deuˬ naˇ haˬ˗eu jeˬ

Tseˇ taˬ˗euˬ biˬdiˬoˬ heu hmˬ maˬ ahˇ nga.

Seuˆ maˬ, biˬdiˬoˬ maˬ haw nya nga.

  • Gui˗eu deuˬ naˇ haˬ˗eu jeˬ
  • Loꞈ˗eu nymˇgoˇ Yeˬhawˇbaˬ˗euˬ Miˇkʼahˬ gaˇ kawˆ tsaꞈ gaˬ˗eu (Dzaw dmˬ)—2017
Loꞈ˗eu nymˇgoˇ Yeˬhawˇbaˬ˗euˬ Miˇkʼahˬ gaˇ kawˆ tsaꞈ gaˬ˗eu (Dzaw dmˬ)—2017
w17 Shiꞈ siˬ ba la myaˆ pyawˬ 27-myaˆ pyawˬ 28 aˇ deuˆ 3

Gui˗eu deuˬ naˇ haˬ˗eu jeˬ

Ka li zaˬ deuˬ aˬ caw yehˬ bawˬ˗ehˇ jahˇ laˇ gaˇ laˆ piˇ˗eu gʼaˇ duˬ miˬ beuˆ bi jaˆ paˬ˗ehˇ gʼeh ngaˇ laˬ?

Ka li zaˬ deuˬ yawˬ ha˗euˬ mawˇ do˗ahˇ aˬ joˆ˗ehˇ ya haw piˇ˗eu gaˇ kaw noeˬ tsehˆ ngeh Jaˇliꞈ˗ahˇ dawˬ pehˇ ya taˬ˗eu meh. Jaˇliꞈ zahˇ heu naˇ Ka li zaˬ deuˬ yawˬ ha˗ahˇ haw piˇ˗eu gʼaˇ duˬ miˬ beuˆ beuˆ nymˇ miˬ beuˆ maˬ tehˇ maˬ ngeuˇ naˇ miˬ beuˆ nui jeˬ zmˬ˗eu heu naˇ bahˬ˗eu jeˬ pyeuꞈ nga lehˇ bi siˬ laꞈ˗eu meh. Laꞈ oˆ jaˆ˗eu gaˇ kawˆ heu deuˬ˗ahˇ shaˇ noeˬ haw sheˇ.

Tsawˇ haˬ zaˬ˗euˬ dehꞈ ziˇ Yeˬhawˇbaˬ˗euˬ mehˬ shi aˇ poeˬ baw dui dui˗eu meh. Ja ceuˬ sahˬ boꞈ boꞈ˗euˬ Daˬbiˇ Yeˬhawˇbaˬ˗aˬ “saꞈ laˇ iˇ byoe pyeuꞈ” meh lehˇ ehˇ˗eu meh. (Ja ceuˬ 36:9) Teu miˇ neh Ka li zaˬ deuˬ yawˬ ha hawˇ˗eu yawˬ ha˗euˬ myawˬ gahˬ˗ahˇ haw piˇ ngeh aˬ cawˬ˗ahˇ laˆ sehꞈ˗awˇ iˬ baˇ maˬ ya bi keuˆ le˗eu gʼaˇ duˬ aˬ cawˬ˗ahˇ maˬ sehꞈ ni kʼaˇ gʼeh nya gaˇ neh ya leh jeh˗eu meh.—Dawˬmehˬmehˬ˗eu 22:8; Ja ceuˬ 51:14.

Maˇ diˇ naˇ aˬ geu jeˬ neh kʼawꞈ shiˬ laˆ doˆ nya˗eu meh. Ehˇ kʼawꞈ miˬ beuˆ ngehˬ˗ehˇ dzehˬ diˇ daˬ˗ehˇ maˬ ehˇ laˆ lehˬ˗awˇ neh maˬ ehˇ tsawˇ haˬ˗ahˇ laˆ sehꞈ˗eu awˬ dui dui meh.a (Ehˇ lahˬ˗ahˇ haw.) Kʼoeˇ naˇ yaw hai mˇ˗eu deuˬ nymˇ sahˇ gʼaˬ miˬ beuˆ jaˆ gaˇ ya mawˇ ngeh tsawˬ guˆ iˇ˗awˇ tsawˇ haˬ sehꞈ˗eu aˇ tiˆ le keuˆ nya˗eu meh.

Yeˬsuˇ aˬ yawꞈ shiˇ˗eu mehˬ hu ngeh miˇ aˬ yawꞈ˗euˬ gʼaˬ kʼehˇ deuˬ˗ahˇ mi cehˇ shaꞈ gʼeh˗awˬ lehˇ ehˇ nehˬ˗eu heu naˇ yawˬ ha˗ahˇ laˆ piˇ˗eu gʼaˇ duˬ maˬ ngeuˇ˗a. (Luˇkaꞈ 22:36, 38) Ka li zaˬ deuˬ miˬ beuˆ mi cehˇ nyehꞈ tehˬ luꞈ˗eu deuˬ nehˬ˗ehˇ ya tahˬ puˬ kʼawꞈ laˆ tahˬ laˆ naˇ˗eu yaw haiˬ jeˬ maˬ ya mˇ˗a lehˇ Yeˬsuˇ aˬ yawꞈ maꞈ˗ahˇ ehˇ nehˬ mawꞈ˗eu miˇ neh teu loꞈ˗ehˬ ehˇ nehˬ˗euˬ meh. (Luˇkaꞈ 22:52) Beˬtuˆluˆ neh piˇ ma˗euˬ zaˬ kʼaˆ˗ahˇ mi cehˇ coeˇ gʼaˬ ngeh Yeˬsuˇ Beˬtuˆluˆ˗ahˇ “mi cehˇ˗ahˇ tawˆ kʼawˆ laꞈ kʼoeˇ soeˬ ahˇ kʼoꞈ˗awˬ” lehˇ ehˇ nehˬ˗awˇ “mi cehˇ˗ahˇ nui ma huiˬ˗eu tsawˇ haˬ dawˬ tawˆ luꞈ mi cehˇ laꞈ˗ahˇ ya shiˇ tehꞈ˗a” lehˇ paˇ ehˇ nehˬ˗euˬ meh. Heu˗aˬ nymˇ iˬ nah Ka li zaˬ deuˬ˗ahˇ jiˇ sheuˬ gʼeh˗eu Jaˇliꞈ zahˇ pyeuꞈ meh.—Maꞈtehˬ 26:51, 52.

Miˇkaˬ 4:3-ahˇ “miˇ kʼahˬ tsawˇ jeuˬ guiˇ maˬ deuˆ˗ehˇ guiˇ mˇ˗eu jeˬ maˬ paˇ baw˗aˇ” lehˇ maˬ keuˆ laˇ miˇ nehˇ taˬ˗euˬ meh. Maˇ maˇ ni gʼeh˗eu Ka li zaˬ deuˬ tsaˬ leˇ dzoeˇ leˇ˗eu jeˬ˗ahˇ gaˬ meh lehˇ tsawˇ haˬ deuˬ siˬ nya˗eu meh. Aˬ yawˬ maꞈ Miˬyehˇ neh gʼaˬ kʼehˇ Pawˇluˆ˗ahˇ gʼoe˗awˇ “aˬ cawˬ yaw doeˇ jahˇ laˇ ngeh yaw doeˇ taˬ jahˇ kʼoꞈ nehˬ” “tsawˇ haˬ yawˬ gʼaˬ na luꞈ nehˬ˗ehˇ tsaˬ leˇ ni yawˬ ha kʼaˇ gʼeh nya˗eu loꞈ˗ehˇ leh jeh˗awˇ dehꞈ˗awˬ” lehˇ ehˇ˗euˬ dawˬ˗ahˇ mˇ caw˗eu meh. (Loˇmaˆ 12:17, 18) Pawˇluˆ aˇ naˆ ni shaˬ˗awˇ “tahˇ joe joe laˇ gaˇ” keuˆ ni ya tahˬ puˬ kʼawꞈ dawˬ heu˗ahˇ mˇ caw˗euˬ meh. Aˬ yawꞈ yawˬ ha˗ahˇ haw piˇ˗eu gʼaˇ duˬ Jaˇliꞈ zahˇ˗ahˇ tiˬ jawˇ˗iˬ maˬ mˇ bahˬ haw˗a. (2 Gawˇliˬtu 11:26) Yaw bahˬ jeˬ mˇ ngeh to˗aˬ aˬ yawꞈ Miˬyehˇ˗ahˇ nui ma taˬ˗awˇ Jaˇliꞈ laꞈ kʼoeˇ ahˇ˗eu “zaˬ siˬ tsawˇ gahˇ˗aˬ guiˇ deuˆ˗eu keu ka naˆ maˬ tseˇ gaˇ dahˇ tsoeˬ˗eu meh” lehˇ jah˗eu ma.—Dawˬtsoˆtsoˆ˗eu 9:18.

Ka li zaˬ deuˬ˗euˬ gʼaˇ duˬ dehꞈ ziˇ˗aˬ pyuˇ shuiˇ myawˬ gahˬ naˆ maˬ tseˇ poeˬ˗eu meh. “Pyuˇ shuiˇ myawˬ gahˬ baˬ da neh yaw dehꞈ ya dehꞈ˗eu maˬ ngeuˇ˗a” lehˇ aˬ dui siˬ nya˗eu ma. (Luˇkaꞈ 12:15) Teu miˇ neh tahˇ joe deuˬ˗ahˇ yawˬ muiˬ paˬ˗ehˇ ngehˬ kʼawˬ gaˇ dahˇ maˬ tsoeˬ naˇ “aˬ cawˬ yaw doeˇ jahˇ laˇ kʼawˬ yaw doeˇ taˬ jahˇ kʼoꞈ nehˬ” lehˇ ehˇ taˬ˗euˬ dawˬ˗ahˇ ya mˇ caw meh. Heu naˇ aˬ yawꞈ geuꞈ mawꞈ˗eu jeˬ bi yuˇ gaˇ jiˇ ehˇ mawꞈ˗eu meh. (Maꞈtehˬ 5:39, 40; Luˇkaꞈ 6:29)b (Ehˇ lahˬ˗ahˇ haw.) Aˬ joˆ jahˇ˗awˇ aˬ dui˗euˬ uˬ kʼawˇ buˬ iˇ nga lehˇ ya jahˇ˗eu meh. Aˬ dui Jaˇliꞈ˗ahˇ mˇ caw˗awˇ pyuˇ shuiˇ myawˬ gahˬ neh “huiˬ mawꞈ mahˇ mawꞈ˗eu nui ma”˗ahˇ yahˇ naˇ buˬ iˇ law iˇ nya˗eu meh. (1 Yoˇhaˬ 2:16) Pu zaˬ deuˬ aˬ dui tsaˬ leˇ dzoeˇ leˇ˗eu Yeˬhawˇbaˬ˗euˬ Saˇ kiˇ pyeuꞈ meh lehˇ siˬ nya˗eu heu naˇ aˬ dui˗ahˇ haw piˇ˗eu tiˬ jeˬ pyeuꞈ meh.—Dawˬdaˬ 18:10.

Ka li zaˬ deuˬ aˬ cawˬ˗euˬ siˬ nya˗eu nui ma˗ahˇ yaw zeu taˬ meh. (Loˇmaˆ 14:21) Mehˇ nmˇ tiˬ gʼaˬ na Ka li zaˬ deuˬ yawˬ ha˗ahˇ haw piˇ˗eu gʼaˇ duˬ miˬ beuˆ jaˆ˗eu siˬ nya ngeh tsawˬ guˆ iˇ˗eu maˬ ngeuˇ naˇ sahˬ tiꞈ tiꞈ nya˗eu meh. Aˬ dui miˬ beuˆ bi jaˆ nya˗eu kʼawꞈ mehˇ nmˇ deuˬ˗ahˇ gaˬ˗eu miˇ neh aˬ yawꞈ maꞈ˗ahˇ sahˬ tiꞈ tiꞈ leˇ paˬ˗ehˇ gʼeh˗eu jeˬ maˬ ya jahˇ˗a.—1 Gawˇliˬtu 10:32, 33; 13:4, 5.

Ka li zaˬ deuˬ aˬ cawˬ dzaw geuꞈ duˬ ya pyeuˬ meh. (2 Gawˇliˬtu 4:2; 1 Beˬtuˆluˆ 5:2, 3) Ka li zaˬ deuˬ aˬ cawˬ yaw doeˇ jahˇ laˇ gaˇ laˆ piˇ˗eu gʼaˇ duˬ miˬ beuˆ bi jaˆ naˇ aˇ muˇ˗ahˇ sheuˬ gʼeh˗eu deuˬ Jaˇliꞈ zahˇ jaˆ˗eu loꞈ˗ehˇ mehˬ nehˬ˗eu meh. Ehˇ kʼawꞈ miˬ beuˆ kʼoeˇ paˇ bi jaˆ naˇ aˬ yawꞈ laˬ kʼoeˇ dzaw geuꞈ nya˗eu yaw muiˬ jeˬ maˬ ahˇ˗eu miˇ neh aˬ yawꞈ Ka li zaˬ aˇ muˇ˗euˬ gaˇ deuˬ˗ahˇ maˬ ya mˇ˗a. Gaˇ kawˆ˗eu miˬ beuˆ saꞈ˗awˇ gaˇ ya mˇ˗eu deuˬ˗ahˇ jiˇ ehˇ keuˆ mawꞈ˗eu meh. Teu miˇ neh aˬ yawꞈ maꞈ leh jeh˗awˇ gaˇ poˆ paˇ naˇ muiˬ dzehˬ tehꞈ˗a.c—Ehˇ lahˬ˗ahˇ haw.

Ka li zaˬ deuˬ yawˬ ha pehˬ hawˇ˗eu yawˬ ha˗euˬ pyuˇ shuiˇ myawˬ gahˬ˗ahˇ aˬ joˆ˗ehˇ haw piˇ˗awˇ aˬ jeˬ gaˇ mˇ˗eu lehˇ yawˬ haˇ yawˬ ha ya noeˬ tsehˆ˗eu meh. Ehˇ kʼawꞈ gaˇ kawˆ heu deuˬ˗ahˇ noeˬ tsehˆ ngeh Jaˇliꞈ zahˇ˗ah tsaˬ ni noeˬ tsehˆ paˬ˗ehˇ gʼeh˗eu meh. Nui gahˇ ahˇ˗eu Miˬyehˇ aˬ dui˗ahˇ gaˬ˗eu miˇ neh zahˇ heu deuˬ biꞈ nehˬ laꞈ˗eu meh. Yeˬhawˇbaˬ nehˬ˗ehˇ ziꞈ dah ni gʼoeˇ˗eu cawˬ pyeuꞈ˗eu Ka li zaˬ deuˬ naˇ yawˬ ha˗ahˇ haw piˇ˗eu gʼaˇ duˬ miˬ beuˆ maˬ bi jaˆ˗a. Aˬ yawꞈ maꞈ Miˬyehˇ˗ahˇ nui ma taˬ˗awˇ Jaˇliꞈ zahˇ mˇ caw naˇ aˬ myah luˇ guˆ˗eu jeˬ maˬ paˇ jaˆ meh lehˇ siˬ nya˗eu meh.—Ja ceuˬ 97:10; Dawˬdaˬ 1:33; 2:6, 7.

Ka li zaˬ deuˬ huiˬ˗eu shaˬ zahˬ laꞈ kʼoeˇ kʼehˬ laˇ kʼaˆ laˇ gaˇ ya daˬ ngeh, Yeˬhawˇbaˬ aˬ yawꞈ maꞈ˗ahˇ haw piˇ nehˬ laꞈ meh lehˇ nui ma taˬ

Shaˬ dui zahˬ dui dui˗eu aˇ yamˬ heu laꞈ kʼoeˇ yawˬ haˇ yawˬ ha laˆ piˇ˗eu lehˇ maˬ leh jeh ni Yeˬhawˇbaˬ˗ahˇ ya gʼoe˗eu meh

a Ka li zaˬ deuˬ shaˬ teh˗eu maˬ ngeuˇ naˇ bawˇ tsahˬ jeˬ zaˬ˗ahˇ yahˇ˗eu gʼaˇ duˬ miˬ beuˆ bi jaˆ nya˗eu meh. (miˬ beuˆ beuˆ nymˇ miˬ beuˆ maˬ tehˇ) Miˬ beuˆ zmˬ gʼaˬ naˇ miˬ beuˆ miˬ siˬ yuˇ doˆ maˬ ngeuˇ naˇ miˬ beuˆ pyaˆ˗awˇ yahˇ kʼaˇ maˬ za gaˇ yuˇ taˬ paˬ˗ehˇ gʼeh˗eu meh. Tiˬ tsahˇ na miˬ beuˆ maˬ zmˬ nya˗eu zahˇ sahˇ kʼoꞈ jaˆ˗eu maˬ ngeuˇ naˇ miˇ kʼahˬ˗ahˇ uˆ lahˇ˗eu aˬ yuiꞈ deuˬ miˬ beuˆ aˬ joˆ˗ehˇ jaˆ nya˗eu zahˇ sahˇ kʼoꞈ laˆ baw taˬ naˇ Ka li zaˬ deuˬ zahˇ teu deuˬ˗ahˇ ya mˇ caw meh.—Loˇmaˆ 13:1.

b Dawꞈ laˇ˗eu jeˬ˗ahˇ buˬ iˇ˗eu gaˇ kawˆ naˆ maˬ tseˇ siˬ nya mawꞈ naˇ “Dawꞈ laˇ˗eu jeˬ˗ahˇ yahˇ nya˗eu je” lehˇ ehˇ˗eu gaˇ kawˆ Smˇ siˬ ba la 8 1993-ahˇ doˇ laˇ˗euˬ Noeˬlaˇ˗awˬ! paˇ dmˬ˗ahˇ haw.

c Miˬ beuˆ saꞈ˗awˇ gaˇ mˇ˗eu gaˇ kawˆ nehˬ˗ehˇ taꞈ leˇ˗awˇ Loꞈ˗eu nymˇgoˇ paˇ dmˬ heu deuˆ˗ahˇ gui iˇ nya meh. Tseˇ tiꞈ siˬ ba la 1 2005 myaˆ pyaw 31 hawˇ˗eu Shiꞈ siˬ ba la 15 1983 myaˆ pyawˬ 25-26.

    Aˬkaˬ sahˬ boꞈ paˇ dmˬ (2013-2025)
    Doˆ iˇ˗eu
    Ahˇ leˇ˗eu
    • Akha
    • Biˇ nehˬ˗eu
    • Toeˬ taˬ˗eu
    • Copyright © 2025 Watch Tower Bible and Tract Society of Pennsylvania
    • Zmˬ nya˗eu aˇ tiˆ
    • Yawˬ ha˗euˬ gaˇ kawˆ˗ahˇ haw lahˇ nehˬ˗eu jeˬ
    • Yawˬ ha-euˬ gaˇ kawˆ-ahˇ haw lahˇ-eu g'aˇ duˬ toeˬ taˬ-eu
    • JW.ORG
    • Ahˇ leˇ˗eu
    Biˇ nehˬ˗eu