Nga maꞈ˗ahˇ aˬ jeˬ miˇ neh Yeˬhawˇbaˬ˗euˬ Saˇ kiˇ lehˇ kuˇ˗eu nga?

Yeˬhawˇbaˬ˗euˬ Saˇ kiˇ lehˇ ehˇ˗eu heu naˇ, zahˇ yaw shuiꞈ˗euˬ tsawˇ myahˇ nya lehˇ, tsawˇ haˬ zaˬ myaˬ tiˬ paˆ noeˬ˗eu meh. Dzeuˇ yaꞈ˗euˬ 2,700 kʼoꞈ˗ahˇ, aˬ diˇ aˬ maˇ pyeuꞈ˗eu Miˬyehˇ˗euˬ gʼaˬ kʼehˇ deuˬ˗ahˇ, Miˬyehˇ˗euˬ “saˇ kiˇ” lehˇ kuˇ eu meh. (Iˇsaˬyaˇ 43:10-12) 1931 kʼoꞈ˗ahˇ keuˆ ni, nga maꞈ˗ahˇ Jaˇliꞈ Dzaw zaˬ deuˬ lehˇ, tsawˇ haˬ zaˬ deuˬ siˬ nya yaꞈ˗euˬ meh. Yeˬhawˇbaˬ˗euˬ Saˇ kiˇ lehˇ kuˇ˗eu tsawˇ myahˇ heu hmˬ˗ahˇ, aˬ jeˬ miˇ neh ha geuꞈ˗euˬ nga?

Yeˬhawˇbaˬ, nga maꞈ Miˬyehˇ˗euˬ tsawˇ myahˇ pyeuꞈ meh. Gaˇ hu˗euˬ Jaˇliꞈ yaw oeˇ laꞈ kʼoeˇ, Yeˬhawˇbaˬ lehˇ kuˇ˗eu Miˬyehˇ˗euˬ tsawˇ myahˇ heu hmˬ 7,000 poˆ dawˬ peh ahˇ˗eu meh. Jaˇliꞈ˗ahˇ dawˬ yuˇ paˇ˗euˬ deuˬ Miˬyehˇ˗euˬ tsawˇ myahˇ yuˇ doˆ˗awˇ, Sahˬpaˬ maˬ ngeuˇ naˇ, Miˬyehˇ lehˇ dawˆ ahˇ˗euˬ meh. Miˬyehˇ Moˇseˬ˗ahˇ ehˇ nehˬ˗euˬ, ngaˬ˗euˬ tsawˇ myahˇ˗aˬ, Yeˬhawˇbaˬ lehˇ kuˇ ma. Tsawˇ myahˇ “heu˗aˬ, mˬ maˬ maˬ byaˆ zaˇ ziˇ ngaˬ˗euˬ tsawˇ myahˇ pyeuꞈ˗eu ma.” (Doˆ˗iˇ˗eu 3:15) Heu naˇ, Miˬyehˇ nui deuˬ nehˬ˗ehˇ maˬ duˇ leˇ˗eu lehˇ mawˇ shawˇ laˇ˗eu meh. Nga maꞈ muiˬ˗eu shawˇ˗eu Miˬyehˇ˗euˬ tsawˇ myahˇ˗ahˇ ya ha geuꞈ˗euˬ miˇ neh, nui kʼahˇ shiˇ dui dui miˇ˗a.

Tsawˇ myahˇ heu hmˬ, nga maꞈ ya mˇ˗eu gaˇ deuˬ˗ahˇ, pah mehˬ nehˬ˗eu meh. Yaw tsaˬ yaw dawˇ pyeuꞈ˗eu, Aˬbeˬlaˆ˗ahˇ neh dahˬ beh˗awˇ, gaˇ hu ba˗euˬ tsawˇ haˬ yaw myaˬ gʼaˬ, Yeˬhawˇbaˬ˗ahˇ jah˗eu gaˇ kawˆ saˇ kiˇ kamˬ˗euˬ meh. Yaw myaˬ ziˇ laꞈ kʼoeˇ, Noˇaˬ, Aˬbyaˬhaˬ, Saˬlaˇ, Moˇseˬ, Daˬbiˇ hawˇ˗eu nui deuˬ kʼawꞈ, “saˇ kiˇ kamˬ˗eu tsawˇ haˬ . . . gʼawˬ mya” laꞈ kʼoeˇ ahˇ˗eu meh. (Heˬbyehˇ 11:4–12:1) Iˬ baˇ maˬ ahˇ˗eu tsawˇ haˬ˗euˬ gʼaˇ duˬ, saˇ naˇ mehˬ shi saˇ kiˇ geuꞈ nehˬ mawꞈ˗eu loꞈ˗ehˇ, Miˬyehˇ˗euˬ yaw tsaˬ yaw dawˇ jeˬ˗ahˇ kʼawꞈ, tsawˇ haˬ zaˬ deuˬ siˬ nya laˇ ni, saˇ kiˇ kamˬ nehˬ mawꞈ˗eu ma.

Nga maꞈ Yeˬsuˇ˗ahˇ dzaw geuꞈ˗eu ma. Jaˇliꞈ laꞈ kʼoeˇ Yeˬsuˇ˗ahˇ “saˇ jaˇ ziꞈ˗eu laꞈ kʼoeˇ dawˇ coe ni saˇ kiˇ kamˬ˗eu gʼaˬ” lehˇ kuˇ˗euˬ meh. (Pah mehˬ˗eu 3:14) ‘Miˬyehˇ˗euˬ tsawˇ myahˇ bi siˬ˗awˇ,’ Miˬyehˇ˗euˬ “yaw tsaˬ yaw dawˇ jeˬ˗euˬ gaˇ kawˆ saˇ kiˇ kamˬ” ma lehˇ Yeˬsuˇ ehˇ˗eu meh. (Yoˇhaˬ 17:26; 18:37) Kʼoeˇ miˇ neh Yeˬsuˇ˗euˬ gʼaˬ kʼehˇ maˇ diˇ deuˬ naˇ, Yeˬhawˇbaˬ˗euˬ tsawˇ myahˇ˗ahˇ ha geuꞈ˗awˇ, tsawˇ myahˇ heu hmˬ˗ahˇ, tsawˇ haˬ zaˬ deuˬ siˬ nya laˇ ni ya mˇ˗eu meh. Gaˇ heu hmˬ˗ahˇ, nymˇ Yeˬhawˇbaˬ˗euˬ Saˇ kiˇ deuˬ leh jeh˗awˇ mˇ luꞈ ma.

• Jaˇliꞈ dzaw zaˬ deuˬ, aˬ jeˬ miˇ neh Yeˬhawˇbaˬ˗euˬ Saˇ kiˇ lehˇ kuˇ˗eu tsawˇ myahˇ heu hmˬ˗ahˇ, ha geuꞈ˗euˬ nga?

• Yeˬhawˇbaˬ˗euˬ gʼaˇ duˬ saˇ kiˇ kamˬ nehˬ˗eu deuˬ, miˇ tsaˬ kʼoeˇ taˆ jawˇ luꞈ˗eu aˇ myah ni myahˇ laˇ˗euˬ nga?

• Yeˬhawˇbaˬ˗euˬ gʼaˇ duˬ, Saˇ kiˇ kamˬ gaˇ neh huiˬ dzehˬ˗eu aˬ suˇ gʼaˬ nga?