Miˬyehˇ aˬ suˇ gʼaˬ nga?

1. Aˬ jeˬ miˇ neh Miˬyehˇ˗ahˇ, uˬ duˬ tahˬ paˬ˗ehˇ gʼeh˗eu nga?

Aˬ diˇ aˬ maˇ Miˬyehˇ pyeuꞈ˗eu gʼaˬ, yawˬ jeˬ na luꞈ˗ahˇ Beh˗euˬ gʼaˬ meh. Miˬyehˇ˗aˬ, aˇ dahˬ beh˗euˬ maˬ baw˗eu loꞈ˗ehˇ, aˇ saˬ saˬ˗eu kʼawꞈ maˬ baw˗a. (Ja ceuˬ 90:2) Jaˇliꞈ laꞈ kʼoeˇ ahˇ˗eu muiˬ˗eu gaˇ kawˆ, Miˬyehˇ jawˇ gaˇ neh oe˗euˬ meh. (1 Tiˆmoˇseˬ 1:11) Miˬyehˇ aˬ dui˗ahˇ dehꞈ ziˇ biꞈ˗euˬ miˇ neh, aˬ yawꞈ˗ahˇ tehꞈ˗ehˇ uˬ duˬ tahˬ˗eu tsaˬ meh.—Pah mehˬ˗eu 4:11-ahˇ gui˗awˬ.

2. Miˬyehˇ aˬ joˆ˗ehˇ gʼeh˗eu tiˬ gʼaˬ nga?

Miˬyehˇ˗ahˇ tiˬ gʼaˬ˗iˬ maˬ mawˇ haw˗aˬ. Aˬ jeˬ miˇ neh ehˇ naˇ, tsawˇ haˬ zaˬ naˆ maˬ tseˇ dzehˬ˗eu yaw sahˇ mawˇ do pyeuꞈ˗eu miˇ neh meh. (Yoˇhaˬ 1:18; 4:24) Ehˇ kʼawꞈ ni, Miˬyehˇ neh beh taˬ˗euˬ jeˬ˗ahˇ haw ngeh jawˇ, aˬ yawꞈ˗euˬ nui noeˬ nui duˇ deuˬ˗ahˇ ya siˬ nya˗eu meh. Yaw jeˬ ma jeˬ, aˇ siˬ hawˇ˗eu aˇ yehˆ deuˬ˗ahˇ haw ngeh, Miˬyehˇ˗euˬ nui gaˬ hawˇ˗eu zaˬ siˬ nui gahˇ deuˬ˗ahˇ ya mawˇ˗euˬ ma. Kʼoeˇ naˇ, miˇ tsaˬ tahˬ kʼawˇ˗ahˇ haw ngeh, Miˬyehˇ˗euˬ baoˬ huiˬ dui dui˗eu ya siˬ nya˗euˬ ma.—Loˇmaˆ 1:20-ahˇ gui˗awˬ.

Jaˇliꞈ gui˗eu baˬ da neh, Miˬyehˇ˗euˬ nui noeˬ nui duˇ deuˬ˗ahˇ, paˇ siˬ nya dzehˬ laˇ˗eu meh. Yaw jeˬ ma jeˬ, Jaˇliꞈ laꞈ kʼoeˇ Miˬyehˇ ya leˇ˗eu jeˬ hawˇ˗eu maˬ ya leˇ˗eu jeˬ˗ahˇ ehˇ nehˬ taˬ˗awˇ, tsawˇ haˬ˗euˬ dehꞈ jeˬ dehꞈ kawˆ˗ahˇ haw haw˗ehˇ, Miˬyehˇ mˇ kʼoꞈ nehˬ˗eu meh.—Ja ceuˬ 103:7-10-ahˇ gui˗awˬ.

3. Miˬyehˇ tsawˇ myahˇ baw meh loˇ?

“Mˬ kʼoeˇ taˆ jawˇ˗eu, nga maꞈ˗euˬ Aˬda˗oˇ, nawˬ˗euˬ tsawˇ myahˇ˗ahˇ yaw zeu baw luꞈ˗uˇ” lehˇ, Yeˬsuˇ ehˇ taˬ yaꞈ˗euˬ meh. (Maꞈtehˬ 6:9) Miˬyehˇ˗ahˇ kuˇ jeˬ kuˇ kawˆ yaw myaˬ jeˬ jaˆ kʼawꞈ, tsawˇ myahˇ myahˇ maˇ naˇ, tiˬ myahˇ jaˆ˗eu tehꞈ meh. Tsawˇ myahˇ teu hmˬ˗ahˇ, yawˬ ha˗euˬ tsawˇ jeuˬ dawˬ neh, kawˬ sheu teˇ saˇ gʼawˬ mya jeˬ lehˇ doˆ laˇ kʼawꞈ, aˬ dui Aˬkaˬ paw neh naˇ, “Jeˬhoˇbaˬ [‘Yeˬhawˇbaˬ,’ Miˇ Shuiꞈ Dawˬ Paˇ Jaˇliꞈ]” maˬ ngeuˇ naˇ “Yaˬgʼoeˬ” lehˇ kuˇ˗eu meh.—Doˆ˗iˇ˗eu 3:14 laꞈ oˆ oˆ saˬ aˇ boꞈ yaw nyiˇ˗ahˇ gui˗awˬ.

Jaˇliꞈ myaˬ ni Miˬyehˇ˗euˬ tsawˇ myahˇ yuˇ doˆ dzeh˗awˇ, Sahˬpaˬ maˬ ngeuˇ naˇ Miˬyehˇ lehˇ boꞈ ahˇ taˬ˗euˬ meh. Boꞈ beh beh˗euˬ Jaˇliꞈ˗ahˇ, Miˬyehˇ˗euˬ tsawˇ myahˇ 7,000 poˆ dawˬ peh ahˇ˗eu meh. Yeˬsuˇ Miˬyehˇ˗euˬ gaˇ kawˆ mehˬ ngeh, Miˬyehˇ˗euˬ tsawˇ myahˇ˗ahˇ kʼawꞈ mehˬ nehˬ˗euˬ meh.—Yoˇhaˬ 12:28, Jaˇliꞈ Yaw shuiꞈ 1997-ahˇ gui˗awˬ.

Biˬdiˬoˬ haw Miˬyehˇ tsawˇ myahˇ baw meh loˇ?

4. Yeˬhawˇbaˬ aˬ dui˗ahˇ ngehˬ gʼeh luꞈ ngaˇ loˇ?

Nymˇ iˬ nah shaˬ zahˬ myaˬ laˇ taˬ˗euˬ heu, Yeˬhawˇbaˬ Miˬyehˇ aˬ dui˗ahˇ byehˇ dzeh taˬ˗euˬ miˇ neh nga loˇ? Tsawˇ haˬ tiˬ deuˬ na˗aˬ, shaˬ zahˬ keuˆ le ngeh, Miˬyehˇ ngaˬ˗ahˇ lawˬ haw nya lehˇ ehˇ˗eu meh. Heu loꞈ˗ehˇ ehˇ˗eu maˬ tsaˬ˗a.—Yaˬkoˆ 1:13-ahˇ gui˗awˬ.

Miˬyehˇ tsawˇ haˬ zaˬ˗ahˇ yawˬ ha naꞈ˗i bi tseˇ geuꞈ mawꞈ˗eu meh. Miˬyehˇ gaˇ mˇ˗eu hawˇ˗eu maˬ mˇ˗eu yawˬ ha naꞈ˗i bi tseˇ laꞈ˗euˬ miˇ neh, Miˬyehˇ˗ahˇ guiˬ lahˬ huiˬ paˬ˗ehˇ gʼeh˗eu meh. (Yawˇshuˆ 24:15) Ehˇ kʼawꞈ tsawˇ haˬ myaˬ ni, maˬ muiˬ˗eu jeˬ˗ahˇ tseˇ geuꞈ˗eu miˇ neh, shaˬ zahˬ myaˬ laˇ˗eu meh. Maˬ tsaˬ maˬ dawˇ˗eu jeˬ˗ahˇ, Yeˬhawˇbaˬ ya mawˇ ngeh, nui ma˗ahˇ naˇ leˇ˗eu meh.—Aˇdahˬbeh˗eu 6:5, 6-ahˇ gui˗awˬ.

Yeˬhawˇbaˬ aˬ dui˗ahˇ ngehˬ gʼeh luꞈ˗eu Miˬyehˇ pyeuꞈ˗eu meh. Aˬ dui˗ahˇ laꞈ kʼaˬ cehˇ taˆ ni bi dehꞈ mawꞈ˗eu meh. Teu miˇ neh gʼawˬ myahˇ maˬ gʼeh˗ehˇ, shaˬ zahˬ˗ahˇ laˆ byoˆ jiˇ˗awˇ, shaˬ zahˬ bi pyeuꞈ laˇ˗eu gʼaˬ˗ahˇ kʼawꞈ laˆ cawˆ˗eu meh. Nymˇ mehˬ kʼehˬ˗ahˇ shaˬ zahˬ tiˬ kʼehˬ bi jaˆ taˬ˗euˬ heu naˇ, Miˬyehˇ laꞈ kʼoeˇ gaˇ kawˆ tiˬ jeˬ paˬ jaˆ˗eu miˇ neh meh. Gaˇ kawˆ heu, gaˬ naˇ yaw huiˬ 8 laꞈ kʼoeˇ ehˇ shaw nehˬ laꞈ tehꞈ˗a.—2 Beˬtuˆluˆ 2:9; 3:7, 13-ahˇ gui˗awˬ.

5. Miˬyehˇ nehˬ˗ehˇ peh leˇ ni aˬ joˆ˗ehˇ ya jahˇ˗eu nga?

Guiˬ lahˬ shaˇ˗eu jeˬ neh, aˬ yawꞈ jawˇ gaˇ jiˆ peh laˇ˗awˬ lehˇ, Yeˬhawˇbaˬ kuˇ luꞈ˗eu meh. Aˬ dui yawˬ gʼaˬ na luꞈ˗ahˇ, aˬ yawꞈ ngehˬ gʼeh luꞈ˗eu meh. (Ja ceuˬ 65:2; 145:18) Aˬ yawꞈ iˬ baˇ pyehˬ nehˬ mawꞈ˗eu meh. Miˬyehˇ nui ma tsaˬ˗eu jeˬ˗ahˇ mˇ˗eu lehˇ, leh jeh luꞈ gaˇ neh, lehˬ iˇ luꞈ˗eu deuˬ˗ahˇ Miˬyehˇ mawˇ luꞈ meh. Teu miˇ neh, aˬ dui iˬ baˇ zaˬ pyeuꞈ˗eu kʼawꞈ, Miˬyehˇ˗euˬ dawˬ peh jiˆ peh leˇ nya˗eu meh.—Ja ceuˬ 103:12-14; Yaˬkoˆ 4:8-ahˇ gui˗awˬ.

Yeˬhawˇbaˬ aˬ dui˗ahˇ dehꞈ ziˇ biꞈ laꞈ˗euˬ gʼaˬ pyeuꞈ˗eu miˇ neh, yawˬ gʼaˬ yawˬ˗ahˇ naˆ maˬ tseˇ, aˬ yawꞈ˗ahˇ gaˬ˗eu geuˇ meh. (Maˬkuˆ 12:30) Nawˇ Miˬyehˇ˗ahˇ gaˬ naˇ, aˬ yawꞈ˗euˬ gaˇ kawˆ deuˬ˗ahˇ dzaw geuꞈ˗awˇ, Miˬyehˇ nui ma tsaˬ˗eu jeˬ˗ahˇ ya mˇ meh. Toˆ˗ehˇ naˇ, Miˬyehˇ˗euˬ dawˬ peh peh leˇ nya meh.—1 Tiˆmoˇseˬ 2:4; 1 Yoˇhaˬ 5:3-ahˇ gui˗awˬ.