Shiˇ dzeuˇ˗euˬ deuˬ, aˬ jeˬ noeˬ tmˬ˗eu jeˬ jaˆ˗eu nga?

1. Shiˇ dzeuˇ˗euˬ deuˬ˗euˬ gʼaˇ duˬ, aˬ jeˬ muiˬ˗eu gaˇ kawˆ jaˆ˗eu nga?

Yeˬluˇsaˬlehˬ meuˬ Beˬtaˬniˇ pu˗ahˇ Yeˬsuˇ oe keuˆ ngeh, aˬ yawꞈ˗euˬ cawˬ Laˬzaˬluˇ shiˇ dzeuˇ˗euˬ oeˬ nah byah laˇ˗euˬ meh. Yeˬsuˇ Maˬliˇ hawˇ˗eu Maˬta nehˬ˗ehˇ, tiˬ kawˆ loꞈ˗ehˇ lmˬ bymˇ˗ahˇ iˇ˗euˬ meh. Aˬ yawꞈ nyaꞈ naˇ Laˬzaˬluˇ˗euˬ aˇ yuiꞈ meh. Gʼawˬ myahˇ maˬ gʼeh˗ehˇ, kʼoeˇ gaˇ tsawˇ haˬ tiˬ deuˬ uiˬ laˇ˗euˬ meh. Nawˇ shaˇ noeˬ haw sheˇ, Yeˬsuˇ Laˬzaˬluˇ˗ahˇ laˆ dehꞈ nehˬ ngeh, Maˬliˇ hawˇ˗eu Maˬta laꞈ kʼaˬ aˇ naˆ ni cehˇ˗eu nga?—Yoˇhaˬ 11:21-24, 38-44-ahˇ gui˗awˬ.

Shiˇ dzeuˇ˗euˬ deuˬ noeˬ tmˬ kʼaˇ za meh lehˇ, Maˬta siˬ nya taˬ˗euˬ meh. Yeˬhawˇbaˬ shiˇ dzeuˇ˗euˬ deuˬ˗ahˇ, miˇ tsaˬ kʼoeˇ taˆ tiˬ poˆ paˇ bi gʼoꞈ dehꞈ laˇ meh lehˇ, aˬ yawꞈ siˬ nya dzeuˇ taˬ˗euˬ meh.—Iˇsaˬyaˇ 26:19-ahˇ gui˗awˬ.

2. Shiˇ dzeuˇ˗euˬ deuˬ aˬ joˆ˗ehˇ pyeuꞈ luꞈ˗eu nga?

Miˇ tsaˬ yuˇ˗awˇ tsawˇ haˬ˗ahˇ beh˗euˬ meh. (Aˇdahˬbeh˗eu 2:7; 3:19) Shiˇ dzeuˇ˗euˬ deuˬ mawˇ do laꞈ kʼoeˇ, saꞈ laˇ lehˇ maˬ paˇ jaˆ meh. Tsawˇ haˬ shiˇ naˇ, iˇ nmꞈ gaˇ maˬ paˇ mˇ˗eu baˬ da neh, tiˬ jeˬ˗iˬ maˬ paˇ shaˇ noeˬ nya meh. Teu miˇ neh, Laˬzaˬluˇ shiˇ dzeuˇ˗euˬ gaˇ kawˆ˗ahˇ tiˬ jeˬ˗iˬ maˬ dzawˇ nehˬ nya. Aˬ jeˬ miˇ neh ehˇ naˇ, shiˇ dzeuˇ˗euˬ tsawˇ haˬ tiˬ jeˬ˗iˬ maˬ paˇ siˬ nya˗euˬ miˇ neh meh.—Ja ceuˬ 146:4; Dawˬtsoˆtsoˆ˗eu 9:5, 6, 10-ahˇ gui˗awˬ.

Miˬyehˇ shiˇ dzeuˇ˗euˬ deuˬ˗ahˇ, shiˬ buiˇ lah ma laꞈ kʼoeˇ kʼehˬ ngaˇ laˬ? Shiˇ dzeuˇ˗euˬ tsawˇ haˬ tiˬ jeˬ˗iˬ maˬ paˇ siˬ nya meh lehˇ, Jaˇliꞈ laꞈ kʼoeˇ ehˇ taˬ˗euˬ meh. Teu miˇ neh, shiˬ buiˇ lah ma jaˆ meh lehˇ mehˬ˗eu teu naˇ, Miˬyehˇ˗ahˇ ja cawˆ˗eu jeˬ pyeuꞈ˗eu meh. Shiˬ buiˇ lah ma laꞈ kʼoeˇ, tsawˇ haˬ zaˬ˗ahˇ kʼehˬ˗eu lehˇ ehˇ˗eu dawˬ˗ahˇ, Miˬyehˇ bye dui dui˗eu meh.—Yeˬlaˬmiˇ 7:31-ahˇ gui˗awˬ.

Biˬdiˬoˬ haw Shiˇ dzeuˇ˗euˬ deuˬ aˬ joˆ˗ehˇ pyeuꞈ luꞈ˗eu nga?

3. Shiˇ dzeuˇ˗euˬ tsawˇ haˬ, aˬ dui nehˬ˗ehˇ ngehˬ cawˬ nya meh loˇ?

Shiˇ dzeuˇ˗euˬ tsawˇ haˬ dawˬ maˬ ngehˬ nya˗eu loꞈ˗ehˇ, naˬ bawˇ jiˇ maˬ gaˬ nya. (Ja ceuˬ 115:17) Ehˇ kʼawꞈ mˬ taˆ gʼaˬ kʼehˇ yaw doeˇ deuˬ, shiˇ dzeuˇ˗euˬ kʼoeˇ gʼaˬ˗euˬ aˇ baˇ˗ahˇ laˆ duˇ˗awˇ neh, tsawˇ haˬ nehˬ˗ehˇ dawˬ ngehˬ cawˬ laˇ˗eu meh. (2 Beˬtuˆluˆ 2:4) Yeˬhawˇbaˬ Miˬyehˇ shiˇ dzeuˇ˗euˬ tsawˇ haˬ deuˬ nehˬ˗ehˇ, aˬ geu paw dzeˇ neh maˬ kaˬ, taˬ ngehˬ cawˬ lehˇ ehˇ˗eu meh.—Dawˬmehˬmehˬ˗eu 18:10, 11 ˗ahˇ gui˗awˬ.

4. Aˬ geu deuˬ ya gʼoꞈ dehꞈ laˇ˗eu nga?

Shiˇ dzeuˇ˗euˬ tsawˇ haˬ deuˬ, aˇ lam aˇ lam gʼaˬ˗ahˇ neh, miˇ tsaˬ kʼoeˇ taˆ paˇ ya gʼoꞈ dehꞈ laˇ meh. Miˬyehˇ˗ahˇ maˬ ya siˬ nya ni, maˬ muiˬ˗eu jeˬ˗ahˇ mˇ˗awˇ shiˇ˗euˬ deuˬ kʼawꞈ, tiˬ poˆ paˇ ya gʼoꞈ dehꞈ laˇ meh.—Luˇkaꞈ 23:43; Gʼaˬkʼehˇ 24:15-ahˇ gui˗awˬ.

Shiˇ˗awˇ gʼoꞈ dehꞈ laˇ˗eu deuˬ˗aˬ, Miˬyehˇ nehˬ˗ehˇ taꞈ˗eu yaw tsaˬ yaw dawˇ jeˬ˗ahˇ dzaw geuꞈ˗awˇ, Yeˬsuˇ ehˇ dawˬ naˇ haˬ˗eu laꞈ kʼoeˇ, aˬ yawꞈ˗ahˇ jah ma lehˇ mˇ mawˇ˗eu aˬ kawˬ˗aˬ za meh. (Pah mehˬ˗eu 20:11-13) Shiˇ˗awˇ gʼoꞈ dehꞈ laˇ˗euˬ deuˬ, Miˬyehˇ nui ma tsaˬ˗eu jeˬ˗ahˇ mˇ naˇ, miˇ tsaˬ heu siˬ kʼoeˇ taˆ, mˬ maˬ maˬ byaˆ zaˇ ziˇ ya dehꞈ meh.—Yoˇhaˬ 5:28, 29-ahˇ gui˗awˬ.

5. Shiˇ˗awˇ gʼoꞈ dehꞈ laˇ˗eu gaˇ kawˆ heu hmˬ˗ahˇ neh, Yeˬhawˇbaˬ˗euˬ gaˇ kawˆ aˬ jeˬ ya siˬ nya˗eu nga?

Miˬyehˇ neh, Zaˬmaˇ Yeˬsuˇ˗ahˇ bi shiˇ dah le˗euˬ heu naˇ, shiˇ dzeuˇ˗euˬ deuˬ˗euˬ gʼaˇ duˬ noeˬ tmˬ˗eu jeˬ jaˆ laˇ˗euˬ meh. Shiˇ dzeuˇ˗euˬ deuˬ˗ahˇ bi gʼoꞈ dehꞈ laˇ˗eu heu naˇ, Yeˬhawˇbaˬ tsawˇ haˬ zaˬ˗ahˇ, gʼawˬ shaˬ aˇ naˆ ni gaˬ˗eu nga lehˇ ya siˬ nya˗eu meh. Shiˇ dzeuˇ˗euˬ deuˬ gʼoꞈ dehꞈ laˇ ngeh, nawˇ aˬ suˇ gʼaˬ˗ahˇ jeˬ hu mawˇ mawꞈ nya?—Yoˇhaˬ 3:16; Loˇmaˆ 6:23-ahˇ gui˗awˬ.