Miˬyehˇ Miˇ kʼahˬ heu, aˬ jeˬ˗ahˇ ehˇ mawꞈ˗eu nga?

1. Miˬyehˇ Miˇ kʼahˬ heu, aˬ jeˬ˗ahˇ ehˇ mawꞈ˗eu nga?

Miˬyehˇ Miˇ kʼahˬ heu naˇ, mˬ kʼoeˇ taˆ jawˇ˗eu uˆ lahˇ˗eu aˇ maꞈ˗ahˇ ehˇ˗eu meh. Uˆ lahˇ˗eu aˇ maꞈ heu naˇ, miˇ tsaˬ kʼoeˇ taˆ uˆ lahˇ luꞈ˗eu deuˬ˗ahˇ laˆ cawˆ le˗awˇ, Miˬyehˇ˗euˬ nui noeˬ mˬ kʼoeˇ taˆ byah˗eu loꞈ˗ehˇ, miˇ tsaˬ kʼoeˇ taˆ kʼawꞈ byah laˇ ni mˇ nehˬ le˗eu meh. Gaˇ kawˆ heu naˇ, yaw˗ehˇ muiˬ˗eu tiˬ jeˬ pyeuꞈ meh. Gʼawˬ myahˇ maˬ gʼeh˗ehˇ, Miˬyehˇ˗euˬ uˆ lahˇ˗eu aˇ maꞈ miˇ tsaˬ kʼoeˇ taˆ uˆ lahˇ le˗awˇ, tsawˇ haˬ zaˬ kʼaˇ loˬ˗eu jeˬ˗ahˇ mˇ nehˬ le˗eu meh. Kʼoeˇ naˇ tsawˇ haˬ zaˬ dawˬ tawˆ luꞈ tsaˬ leˇ dzoeˇ leˇ jiˇ˗awˇ, mehˬ bawˬ gm laˇ jiˇ˗eu meh.—Daˬyeˬlaˇ 2:44; Maꞈtehˬ 6:9, 10; 24:14-ahˇ gui˗awˬ.

Uˆ lahˇ˗eu aˇ maꞈ laꞈ kʼoeˇ, aˬ yuiꞈ tiˬ gʼaˬ ya jawˇ meh. Teu miˇ neh, Yeˬhawˇbaˬ Miˬyehˇ uˆ lahˇ˗eu aˇ maꞈ laꞈ kʼoeˇ Sahˬ paˬ bi geuꞈ˗eu gʼaˇ duˬ, Zaˬmaˇ Yeˬsuˇ˗ahˇ tseˇ˗euˬ meh.—Pah mehˬ˗eu 11:15-ahˇ gui˗awˬ.

Biˬdiˬoˬ haw Miˬyehˇ Miˇ kʼahˬ heu, aˬ jeˬ˗ahˇ ehˇ mawꞈ˗eu nga?

2. Yeˬsuˇ aˬ jeˬ miˇ neh, aˬ cawˬ naˆ maˬ tseˇ muiˬ dzehˬ˗eu Sahˬ paˬ pyeuꞈ˗eu nga?

Aˬ jeˬ miˇ neh ehˇ naˇ, Miˬyehˇ˗euˬ Zaˬmaˇ˗aˬ, gʼawˬ shaˬ gaˬ˗eu jeˬ ahˇ˗awˇ, yaw tsaˬ yaw dawˇ jeˬ˗ahˇ ziꞈ dah ni tuˆ tehˬ taˬ˗euˬ miˇ neh meh. (Maꞈtehˬ 11:28-30) Kʼoeˇ naˆ maˬ tseˇ Yeˬsuˇ˗aˬ mˬ kʼoeˇ taˆ jawˇ˗awˇ, miˇ tsaˬ zaˬ˗ahˇ uˆ lahˇ˗eu baˬ da neh, tsawˇ haˬ zaˬ˗ahˇ caw ba nehˬ˗eu baoˬ yaw shehꞈ tiˬ byah ni ahˇ˗eu meh. Yeˬsuˇ gʼoꞈ dehꞈ laˇ gʼaˬ naˇ, mˬ kʼoeˇ taˆ daˆ leˇ˗awˇ, Yeˬhawˇbaˬ˗euˬ aˇ maˇ paw nuiˇ˗awˇ neh, uˆ lahˇ˗eu baoˬ biꞈ nehˬ laꞈ gaˇ dawˬ luꞈ meh. (Heˬbyehˇ 10:12, 13) Kʼoeˇ naˇ, aˇ saˬ saˬ leˇ ngeh, Miˬyehˇ Yeˬsuˇ˗ahˇ uˆ lahˇ˗eu baoˬ biꞈ nehˬ˗eu meh.—Daˬyeˬlaˇ 7:13, 14-ahˇ gui˗awˬ.

3. Yeˬsuˇ nehˬ˗ehˇ uˆ lahˇ˗eu, aˬ geu deuˬ nga?

“Miˬyehˇ˗euˬ tsawˇ haˬ [‘Yaw muiˬ yaw shawˇ tsawˇ haˬ,’ MS]” lehˇ kuˇ˗eu aˇ muˇ tiˬ muˇ, mˬ kʼoeˇ taˆ Yeˬsuˇ nehˬ˗ehˇ tiˬ kawˆ loꞈ˗ehˇ uˆ lahˇ tehꞈ˗a. (Daˬyeˬlaˇ 7:27) Yaw muiˬ yaw shawˇ aˇ maꞈ aˇ muˇ laꞈ kʼoeˇ neh, tseˇ doˆ beh beh˗euˬ deuˬ naˇ, Yeˬsuˇ˗ahˇ saˇ jaˇ ziꞈ˗eu gʼaˬ kʼehˇ deuˬ meh. Saˇ jaˇ ziꞈ˗eu aˬ buˇ aˬ li yaw muiˬ yaw shawˇ deuˬ˗ahˇ, Yeˬhawˇbaˬ iˬ nah keuˆ ni tseˇ luꞈ meh. Aˬ yawꞈ maꞈ kʼawꞈ Yeˬsuˇ loꞈ˗ehˇ, saꞈ laˇ gʼawˇ mawˇ neh gʼoꞈ dehꞈ laˇ˗eu meh.—Yoˇhaˬ 14:1-3; 1 Gawˇliˬtu 15:42-44-ahˇ gui˗awˬ.

Mˬ kʼoeˇ taˆ aˇ myaˆ gʼaˬ ya le˗eu nga? Yeˬsuˇ heu deuˬ˗ahˇ “nyiˇ dui dui˗eu [‘cuiˆ˗eu,’ MS] yawˇ yawˇ maꞈ” lehˇ kuˇ˗eu meh. (Luˇkaꞈ 12:32) Aˬ yawꞈ maꞈ 144,000 gʼaˬ byah˗awˇ, Yeˬsuˇ nehˬ˗ehˇ tiˬ kawˆ loꞈ˗ehˇ miˇ tsaˬ heu siˬ˗ahˇ uˆ lahˇ˗eu meh.—Pah mehˬ˗eu 14:1-ahˇ gui˗awˬ.

4. Yeˬsuˇ uˆ lahˇ dahˬ beh ngeh, aˬ jeˬ pyeuꞈ˗euˬ nga?

1914 kʼoꞈ˗ahˇ neh, Miˬyehˇ Miˇ kʼahˬ dahˬ beh˗euˬ meh. Yeˬsuˇ Sahˬ paˬ pyeuꞈ laˇ˗awˇ, mˇ dahˬ beh˗euˬ gaˇ nga lehˇ ngeuˇ naˇ, Saˬdaˬ hawˇ˗eu aˬ yawꞈ˗euˬ gʼaˬ kʼehˇ deuˬ˗ahˇ, miˇ tsaˬ kʼoeˇ taˆ teh ka leꞈ˗euˬ meh. Teu miˇ neh Saˬdaˬ nui ma pehˇ dui dui˗awˇ, miˇ kʼahˬ doe ni tsawˇ haˬ zaˬ˗ahˇ laˆ cawˆ˗eu gʼaˇ duˬ, leh jeh luꞈ meh. (Pah mehˬ˗eu 12:7-10, 12) Kʼoeˇ gaˇ neh taꞈ naˇ, shaˬ˗eu zahˬ˗eu jeˬ myaˬ laˇ behˇ laˇ˗euˬ meh. Guiˇ deuˆ˗eu, mehꞈ˗eu shuꞈ˗eu, naˇ˗eu gawˇ˗eu, miˇ luˆ luˆ˗eu gaˇ kawˆ heu deuˬ naˇ, Miˬyehˇ Miˇ kʼahˬ keuˆ le shaw˗iˬ meh lehˇ, “bi siˬ” nehˬ laꞈ˗eu jeˬ pyeuꞈ meh.—Luˇkaꞈ 21:7, 10, 11, 31-ahˇ gui˗awˬ.

5. Miˬyehˇ Miˇ kʼahˬ, aˬ jeˬ˗ahˇ mˇ pyeuꞈ˗eu nga?

Miˬyehˇ Miˇ kʼahˬ, miˇ tsaˬ doe ni dawˬ mehˬ mehˬ˗eu gaˇ heu neh, tsawˇ jeuˬ tsawˇ ca dawˬ tawˆ luꞈ˗ahˇ, tiˬ gaˇ bi uiˬ laˇ luꞈ meh. Nui ma nahˬ yu ni gʼeh˗eu tsawˇ haˬ yaw myaˬ lam gʼaˬ, Yeˬsuˇ uˆ lahˇ˗eu uꞈ moˆ jawˇ laˇ luꞈ meh. Miˬyehˇ Miˇ kʼah maˬ muiˬ˗eu yaw doeˇ deuˬ˗ahˇ laˆ cawˆ le ngeh, aˬ yawꞈ maꞈ˗ahˇ naˇ, uˆ kaˬ uˆ lahˇ nehˬ˗eu meh. Teu miˇ neh, Miˬyehˇ Miˇ kʼahˬ˗ahˇ neh muiˬ˗eu jeˬ za mawꞈ naˇ, Yeˬsuˇ˗euˬ dawˬ˗ahˇ naˇ haˬ˗eu tsawˇ haˬ ya pyeuꞈ meh.—Pah mehˬ˗eu 7:9, 14, 16, 17-ahˇ gui˗awˬ.

Yeˬsuˇ uˆ lahˇ˗eu 1,000 kʼoꞈ laꞈ kʼoeˇ, yaw beh Miˬyehˇ neh tsawˇ haˬ zaˬ deuˬ˗euˬ gʼaˇ duˬ noeˬ taˬ˗euˬ jeˬ˗ahˇ, pyeuꞈ leˇ ni mˇ nehˬ˗eu meh. Miˇ tsaˬ heu siˬ Baˬlaˬdiˇsuˆ pyeuꞈ kʼoꞈ laˇ meh. Aˇ saˬ saˬ leˇ ngeh, Yeˬsuˇ Miˬyehˇ Miˇ kʼahˬ heu, aˬ yawꞈ˗euˬ Aˬda˗ahˇ biꞈ kʼoꞈ nehˬ˗eu meh. (1 Gawˇliˬtu 15:24-26) Nawˇ tiˬ gʼaˬ na˗ahˇ Miˬyehˇ Miˇ kʼahˬ gaˇ kawˆ, maˬ ja nehˬ mawꞈ nya loˇ?—Ja ceuˬ 37:10, 11, 29-ahˇ gui˗awˬ.