Gʼawˬ myahˇ maˬ gʼeh˗ehˇ zahˇ deuˬ, aˬ jeˬ pyeuꞈ iˇ˗eu nga?

1. Zahˇ dawˬ tawˆ luꞈ muiˬ ngaˇ laˬ?

Zahˇ yawˬ zahˇ na luꞈ˗ahˇ, nui ma yaw dawˇ deuˬ jiˇ jawˇ meh. Aˬ yawꞈ maꞈ˗ahˇ Miˬyehˇ noeˬ keuˆ luꞈ meh. Heu naˇ muiˬ˗eu gaˇ kawˆ meh. Ehˇ kʼawꞈ, nui ma nyiˇ laˇ paˬ˗ehˇ gʼeh˗eu jeˬ naˇ, tiˬ deuˬ na˗aˬ, zahˇ˗ahˇ gʼoe˗awˇ neh maˬ muiˬ˗eu jeˬ˗ahˇ mˇ luꞈ meh. (2 Gawˇliˬtu 4:3, 4; 11:13-15) Zahˇ tiˬ deuˬ na˗aˬ, yaw haiˬ jeˬ mˇ˗eu, sehꞈ˗eu, guiˇ deuˆ˗eu, zaˬ˗ahˇ maˬ muiˬ˗eu jeˬ mˇ˗eu, gaˇ kawˆ heu deuˬ˗ahˇ gʼaˬ biꞈ luꞈ meh lehˇ ya gaˬ˗euˬ ma. Miˬyehˇ˗ahˇ maˇ diˇ jah˗eu deuˬ, gaˇ kawˆ heu deuˬ˗ahˇ ya gaˬ ngeh jawˇ, nui ma laꞈ kʼoeˇ gʼawˬ shaˬ˗ehˇ gʼeh laˇ˗eu meh.—Maꞈtehˬ 24:3-5, 11, 12-ahˇ gui˗awˬ.

Zahˇ maˇ naˇ, Miˬyehˇ˗ahˇ ciˬ huiˬ ciˬ mahˇ˗eu meh. Ehˇ kʼawꞈ, zahˇ kʼawꞈ deuˬ naˇ, Miˬyehˇ˗euˬ tsawˇ myahˇ˗ahˇ laˆ cawˆ˗eu meh. Zahˇ kʼawꞈ deuˬ naˇ, Miˬyehˇ˗euˬ gaˇ kawˆ hawˇ˗eu tsawˇ shiˇ˗euˬ gaˇ kawˆ, Jaˇliꞈ laꞈ kʼoeˇ ahˇ˗eu loꞈ˗ehˇ maˬ mehˬ˗a. Yeˬhawˇbaˬ Miˬyehˇ naˇ, tsawˇ haˬ zaˬ deuˬ˗ahˇ, aˬ yawꞈ˗euˬ yaw tsaˬ yaw dawˇ jeˬ bi siˬ nya mawꞈ˗eu meh.—Yeˬsaˬgeˬlaˇ 18:4; 1 Tiˆmoˇseˬ 2:3-5-ahˇ gui˗awˬ.

2. Gʼawˬ myahˇ maˬ gʼeh˗ehˇ, zahˇ deuˬ aˬ jeˬ pyeuꞈ iˇ˗eu nga?

Miˬyehˇ˗ahˇ gaˬ miˇ˗a lehˇ ehˇ gaˇ neh, Saˬdaˬ˗euˬ nui kʼahˇ mˇ luꞈ˗eu zahˇ deuˬ, Miˬyehˇ˗ahˇ maˬ myawꞈ dzeuˇ nya. (Yaˬkoˆ 4:4) Jaˇliꞈ laꞈ kʼoeˇ zahˇ kʼawꞈ deuˬ˗ahˇ, “Baˬbuˇloˬ meuˬ meuˬ ma” lehˇ kuˇ taˬ˗euˬ meh. Baˬbuˇloˬ meuˬ˗aˬ, meuˬ meuˬ oeˇ pyeuꞈ˗awˇ, Noˇaˬ saˇ ka˗ahˇ iˇ cuꞈ dahˬ pymˬ dzeuˇ˗awˇ kʼoeˇ sawˇ miˇ tsa, meuˬ teu meuˬ˗ahˇ neh zahˇ kʼawꞈ deuˬ doˆ laˇ˗euˬ meh. Gʼawˬ myahˇ maˬ gʼeh˗ehˇ, tsawˇ haˬ zaˬ˗ahˇ sheuˬ bahˬ luꞈ˗eu zahˇ kʼawꞈ deuˬ˗euˬ kʼoeˇ taˆ, Miˬyehˇ laˆ cawˆ˗eu jeˬ ja pyuˬ ni keuˆ le tehꞈ˗a.—Pah mehˬ˗eu 17:1, 2, 5, 16, 17; 18:8-ahˇ gui˗awˬ.

Muiˬ˗eu gaˇ kawˆ heu myaˆ tehꞈ maˬ ngeuˇ˗a siˬ. Yeˬhawˇbaˬ miˇ tsaˬ kʼoeˇ taˆ kʼaˇ jaˆ˗eu zahˇ kʼawꞈ laꞈ kʼoeˇ jawˇ luꞈ˗eu tsawˇ haˬ nui ma dawˇ coe ni gʼeh˗awˇ, aˬ yawꞈ˗ahˇ shaˇ poˆ luꞈ˗eu deuˬ˗ahˇ, Miˬyehˇ maˬ ngehˇ˗a. Aˬ yawꞈ maꞈ˗ahˇ yaw tsaˬ yaw dawˇ gaˇ kawˆ mehˬ nehˬ˗awˇ neh bi uiˬ laˇ luꞈ meh.—Miˇkaˬ 4:2, 5-ahˇ gui˗awˬ.

3. Nui ma dawˇ coe ni Miˬyehˇ˗ahˇ shaˇ poˆ˗eu deuˬ, aˬ jeˬ mˇ˗eu tsaˬ nga?

Yaw tsaˬ yaw dawˇ jeˬ hawˇ˗eu muiˬ˗eu jeˬ˗ahˇ gaˬ˗eu tsawˇ haˬ deuˬ˗ahˇ, Yeˬhawˇbaˬ haw luꞈ meh. Zahˇ kʼawꞈ laꞈ kʼoeˇ neh doˆ laˇ˗awˬ lehˇ, Miˬyehˇ ehˇ luꞈ meh. Miˬyehˇ˗ahˇ gaˬ˗eu deuˬ naˇ, aˬ yawꞈ maꞈ˗euˬ dehꞈ ziˇ Miˬyehˇ nui kʼahˇ shiˇ ni dehꞈ paˇ mawꞈ˗eu meh.—Pah mehˬ˗eu 18:4-ahˇ gui˗awˬ.

Gaˇ hu˗euˬ tsawˇ haˬ nui ma yaw dawˇ deuˬ, gʼaˬ kʼehˇ deuˬ jawˇ gaˇ neh muiˬ˗eu gaˇ kawˆ˗ahˇ ya gaˬ ngeh, laꞈ kʼaˬ tiˬ cehˇ ha geuꞈ˗euˬ meh. Yeˬhawˇbaˬ aˬ yawꞈ maꞈ˗ahˇ, dehꞈ ziˇ gaˇ ma yaw shuiꞈ mehˬ nehˬ˗euˬ meh. Teu miˇ neh, aˬ yawꞈ maꞈ laꞈ kʼaˬ cehˇ laˇ˗awˇ, noeˬ tmˬ˗eu jeˬ jaˆ laˇ˗euˬ meh. Miˬyehˇ˗euˬ muiˬ˗eu gaˇ kawˆ˗ahˇ aˬ yawꞈ maꞈ ya gaˬ ngeh, ha geuꞈ˗awˇ Miˇyehˇ˗ahˇ jeˬ huˬ taˬ˗eu heu naˇ, aˬ dui dzaw geuꞈ paˬ˗ehˇ gʼeh˗eu jeˬ pyeuꞈ meh.—1 Teˇsaˬloˇni 1:8, 9; 2:13-ahˇ gui˗awˬ.

Zahˇ kʼawꞈ laꞈ kʼoeˇ neh doˆ laˇ˗euˬ deuˬ˗ahˇ, Yeˬhawˇbaˬ aˬ yawꞈ˗euˬ nymˇ jiˇ laꞈ kʼoeˇ laꞈ kʼaˬ tiˬ cehˇ ha geuꞈ˗eu meh. Yeˬhawˇbaˬ gʼawˬ shaˬ gaˬ˗awˇ kuˇ gaˇ ha geuꞈ naˇ, aˬ yawꞈ˗euˬ nymˇ jiˇ laꞈ kʼoeˇ tsawˇ shuiꞈ pyeuꞈ laˇ˗awˇ, Yeˬhawˇbaˬ˗ahˇ uˬ duˬ tahˬ˗eu laꞈ kʼoeˇ, cawˬ cawˬ nya laˇ˗eu uˬ taꞈ, mˬ maˬ maˬ byaˆ zaˇ ziˇ dehꞈ˗eu jeˬ kʼawꞈ za˗eu meh.—Maˬkuˆ 10:29, 30; 2 Gawˇliˬtu 6:17, 18-ahˇ gui˗awˬ.

4. Miˇ kʼahˬ zaˬ deuˬ nui saˇ oꞈ ni, Miˬyehˇ aˬ joˆ˗ehˇ jahˇ˗eu nga?

Zahˇ kʼawꞈ deuˬ˗ahˇ laˆ cawˆ˗eu aˇ yamˬ keuˆ le shaw˗iˬ meh lehˇ ehˇ˗eu dawˬ heu naˇ, muiˬ˗eu gaˇ kawˆ pyeuꞈ meh. Aˬ jeˬ miˇ neh ehˇ naˇ, tsawˇ haˬ zaˬ kʼehˬ˗eu kʼaˆ˗eu laꞈ kʼoeˇ neh ya buˬ iˇ˗eu miˇ neh meh. Zahˇ kʼawꞈ deuˬ tsawˇ haˬ zaˬ˗ahˇ maˬ paˇ sheuˬ bahˬ nya, maˬ paˇ laˆ pyaˆ nya meh. Yawˬ gʼaˬ na luꞈ mehˬ bawˬ gm ˗awˇ, maˇ maˇ ni Miˬyehˇ pyeuꞈ˗eu gʼaˬ˗ahˇ tehꞈ˗ehˇ uˬ duˬ tahˬ˗eu meh.—Pah mehˬ˗eu 18:20, 21; 21:3, 4-ahˇ gui˗awˬ.