Gaˇ kawˆ 10
Zahˇ maˇ˗ahˇ, aˬ joˆ˗ehˇ tseˇ paˆ paˬ nga?
1. Zahˇ maˇ tiˬ zahˇ jaˆ˗eu tehꞈ ngaˇ loˇ?
“Miˬyehˇ gʼaˇ duˬ ngehˬ dah˗eu jaˬ myawꞈ deuˬ˗ahˇ yahˇ˗awˬ.”—Maꞈtehˬ 7:15.
Zahˇ maˇ tiˬ zahˇ jaˆ˗eu tehꞈ meh lehˇ, Yeˬsuˇ aˬ yawꞈ˗euˬ zaˬ lahˇ deuˬ˗ahˇ mehˬ nehˬ˗euˬ meh. Zahˇ heu naˇ, mˬ maˬ maˬ byaˆ zaˇ ziˇ dehꞈ˗eu miˇ kʼahˬ˗ahˇ sheuˬ gʼeh˗eu gaˇ ma˗ahˇ duˇ˗eu meh. Yeˬsuˇ ehˇ˗eu gaˇ ma heu kahˇ˗ahˇ “poˆ mawˇ˗eu tsawˇ haˬ yaw cuiˆ meh.” (Maꞈtehˬ 7:14) Jaˇliꞈ˗ahˇ dawˬ pehˬ taˬ˗awˇ uˬ duˬ tahˬ˗eu zahˇ tehꞈ˗ehˇ, Miˬyehˇ ha geuꞈ˗eu meh. Zahˇ maˇ heu laꞈ kʼoeˇ jawˇ˗eu deuˬ nui jah tiˬ jeˬ tehꞈ meh.—Yoˇhaˬ 4:23, 24; 14:6; Eˇpeˇsu 4:4, 5-ahˇ gui˗awˬ.
Biˬdiˬoˬ haw Miˬyehˇ zahˇ yawˬ zahˇ na luꞈ˗ahˇ nui ma tsaˬ ngaˇ loˇ?
2. Ka li zaˬ aˇ kʼawꞈ deuˬ˗ahˇ, Yeˬsuˇ aˬ jeˬ lehˇ ehˇ taˬ yaꞈ˗euˬ nga?
“Aˬ yawꞈ maꞈ Miˬyehˇ˗ahˇ siˬ nya ma lehˇ ehˇ˗eu kʼawꞈ, aˬ yawꞈ maꞈ mˇ˗eu shaˇ˗eu kʼoeˇ loꞈ˗ehˇ maˬ ngeuˇ˗a.”—Tiˇtuˆ 1:16.
Mehˬ bahˬ˗eu deuˬ, Ka li zaˬ zahˇ˗ahˇ laˆ cawˆ laˇ meh lehˇ Yeˬsuˇ ehˇ taˬ˗euˬ meh. Laꞈ nyiˇ paw haw naˇ maˇ maˇ ni Miˬyehˇ˗ahˇ uˬ duˬ tahˬ˗eu deuˬ˗ahˇ duˇ leˇ˗eu meh. Aˬ yawꞈ maꞈ naˇ, yawˬ haˇ yawˬ ha Ka li zaˬ ma lehˇ ehˇ˗eu meh. Ehˇ kʼawꞈ Ka li zaˬ ngeuˇ˗eu maˬ ngeuˇ˗eu aˬ joˆ˗ehˇ siˬ laˇ˗eu nga? Aˬ yawꞈ maꞈ˗euˬ nui noeˬ nui duˇ hawˇ˗eu mˇ jeˬ shaˇ kawˆ˗ahˇ haw ngeh jawˇ, maˇ maˇ ni Ka li zaˬ ngeuˇ˗eu maˬ ngeuˇ˗eu siˬ duˬ laˇ˗eu meh.—Maꞈtehˬ 7:13-23-ahˇ gui˗awˬ.
3. Maˇ diˇ uˬ duˬ tahˬ˗eu zahˇ laꞈ kʼoeˇ jawˇ luꞈ˗eu deuˬ ngaˇ lehˇ, aˬ gaˇ haw˗awˇ neh siˬ laˇ˗eu nga?
Aˬ yawꞈ maꞈ˗ahˇ haw siˬ nya˗eu, gaˇ kawˆ ngaˬ kawˆ jaˆ˗eu meh.
Aˬ yawꞈ maꞈ, Jaˇliꞈ˗aˬ Miˬyehˇ˗euˬ dawˬ pyeuꞈ meh lehˇ jah˗eu meh. Aˬ yawꞈ maꞈ˗euˬ dehꞈ ziˇ, Jaˇliꞈ zahˇ nehˬ˗ehˇ tsaˬ leˇ ni leh jeh˗eu meh. Teu miˇ neh zahˇ maˇ naˇ, tsawˇ haˬ˗euˬ zaˬ siˬ nui gahˇ˗ahˇ gʼoe˗awˇ neh, uˬ duˬ tahˬ˗eu zahˇ nehˬ˗ehˇ beu gaˇ meh. (Maꞈtehˬ 15:7-9) Ka li zaˬ maˇ diˇ deuˬ naˇ, ngehˬ˗eu tiˬ jeˬ mˇ˗eu tiˬ jeˬ lehˇ maˬ jahˇ˗a. Yoˇhaˬ 17:17; 2 Tiˆmoˇseˬ 3:16, 17-ahˇ gui˗awˬ.
Aˬ yawꞈ maꞈ, Yeˬhawˇbaˬ Miˬyehˇ˗euˬ tsawˇ myahˇ˗ahˇ, ciˬ huiˬ ciˬ mahˇ˗eu meh. Yeˬsuˇ tsawˇ haˬ zaˬ˗ahˇ, Miˬyehˇ˗euˬ tsawˇ myahˇ mehˬ nehˬ˗eu heu naˇ, Miˬyehˇ˗ahˇ ciˬ huiˬ ciˬ mahˇ˗eu jeˬ pyeuꞈ˗eu meh. Kʼoeˇ naˇ tsawˇ haˬ zaˬ deuˬ Miˬyehˇ˗ahˇ siˬ nya laˇ ni caw ba nehˬ˗awˇ, Miˬyehˇ˗euˬ tsawˇ myahˇ˗ahˇ yaw zeu baw˗eu laꞈ kʼoeˇ, guiˬ lahˬ shaˇ˗awˬ lehˇ mehˬ taˬ yaꞈ˗euˬ meh. (Maꞈtehˬ 6:9) Nawˬ˗euˬ jawˇ kʼahˬ˗ahˇ, Miˬyehˇ˗euˬ tsawˇ myahˇ siˬ nya laˇ ni, caw ba nehˬ luꞈ˗eu aˬ geu zahˇ nga?—Yoˇhaˬ 12:28, YS97; Loˇmaˆ 10:13, 14-ahˇ gui˗awˬ.
Aˬ yawꞈ maꞈ, Miˬyehˇ Miˇ kʼahˬ˗euˬ gaˇ kawˆ mehˬ nehˬ luꞈ˗eu meh. Miˬyehˇ Yeˬsuˇ˗ahˇ bi oe˗euˬ heu naˇ, Miˬyehˇ Miˇ kʼahˬ˗euˬ gaˇ kawˆ bi mehˬ nehˬ le˗euˬ meh. Tsawˇ haˬ zaˬ noeˬ tmˬ kʼaˇ za˗eu naˇ, Miˬyehˇ Miˇ kʼahˬ tiˬ hmˬ tehꞈ meh. Yeˬsuˇ shiˇ leˇ ngeh keuˆ ni, miˇ kʼahˬ teu˗euˬ gaˇ kawˆ ehˇ˗eu meh. (Luˇkaꞈ 4:43; 8:1; 23:42, 43) Aˬ yawꞈ˗euˬ gʼaˬ kʼehˇ deuˬ kʼawꞈ ni, Miˬyehˇ Miˇ kʼahˬ gaˇ kawˆ mehˬ tehꞈ˗a lehˇ Yeˬsuˇ ehˇ˗eu meh. Tiˬ gʼaˬ na nawˬ˗ahˇ, Miˬyehˇ Miˇ kʼahˬ gaˇ kawˆ ja sawˇ laˇ ngeh, aˬ yawꞈ aˬ geu muˇ˗euˬ tsawˇ haˬ pyeuꞈ paˬ˗ehˇ gʼeh˗eu nga?—Maꞈtehˬ 24:14-ahˇ gui˗awˬ.
Aˬ yawꞈ maꞈ, haiˬ˗eu miˇ kʼahˬ nehˬ˗ehˇ maˬ taꞈ˗a. Aˬ yawꞈ maꞈ miˬ beuˆ mi cehˇ maˬ nyehꞈ tehˬ˗eu uˬ taꞈ, miˇ kʼahˬ˗ahˇ dzoeˬ dzaˬ˗eu aˬ yuiꞈ geuꞈ˗eu gaˇ kawˆ˗ahˇ kʼawꞈ maˬ ceh˗a. (Yoˇhaˬ 17:16; 18:36) Kʼoeˇ naˇ miˇ tsaˬ kʼoeˇ taˆ jaˆ˗eu, tsawˇ haˬ zaˬ˗euˬ dehꞈ jeˬ dehꞈ kawˆ maˬ muiˬ˗eu jeˬ˗ahˇ kʼawꞈ, maˬ dzaw geuꞈ˗a.—Yaˬkoˆ 4:4-ahˇ gui˗awˬ.
Aˬ yawꞈ maꞈ, tiˬ gʼaˬ tiˇ gʼaˬ gʼoeˇ˗eu gaˬ˗eu jeˬ byah˗eu meh. Tsawˇ jeuˬ tsawˇ ca dawˬ tawˆ luꞈ˗ahˇ gaˬ˗awˇ yaw zeu baw˗eu gʼaˇ duˬ, Jaˇliꞈ laꞈ kʼoeˇ neh aˬ yawꞈ maꞈ dzaw geuꞈ luꞈ meh. Zahˇ kʼawꞈ deuˬ naˇ, guiˇ deuˆ gaˇ gʼaˬ biꞈ˗eu meh. Ehˇ kʼawꞈ Ka li zaˬ maˇ diˇ deuˬ naˇ, guiˇ deuˆ gaˇ gʼaˬ maˬ biꞈ˗a. (Miˇkaˬ 4:1-3) Ka li zaˬ maˇ diˇ deuˬ naˇ, aˬ cawˬ˗ahˇ caw ba ngeh, aˇ yamˬ maˬ ehˇ, gʼaˬ maˬ ehˇ, gʼaˬ yui maˬ yui˗a.—Yoˇhaˬ 13:34, 35; 1 Yoˇhaˬ 4:20-ahˇ gui˗awˬ.
4. Zahˇ maˇ˗ahˇ, nawˇ tseˇ paˆ nya ma loˇ?
Jaˇliꞈ˗ahˇ dawˬ pehˬ taˬ˗awˇ mehˬ˗eu laꞈ kʼoeˇ, Miˬyehˇ˗euˬ tsawˇ myahˇ˗ahˇ ciˬ huiˬ ciˬ mahˇ luꞈ˗eu aˬ geu muˇ nga? Tsawˇ haˬ zaˬ noeˬ tmˬ kʼaˇ za˗eu naˇ, Miˬyehˇ Miˇ kʼahˬ tiˬ hmˬ tehꞈ meh lehˇ, mehˬ˗euˬ aˬ geu muˇ nga? Kʼoeˇ naˇ, nui gaˬ˗ahˇ zmˬ˗awˇ guiˇ deuˆ gaˇ gʼaˬ maˬ biꞈ˗eu aˬ geu muˇ nga? Nawˇ aˬ joˆ˗ehˇ noeˬ nya?— 1 Yoˇhaˬ 3:10-12-ahˇ gui˗awˬ.