Shaˬ zahˬ aˬ jeˬ miˇ neh myaˬ˗eu nga?

1, 2. Tsawˇ haˬ gʼawˬ mya ni, aˬ jeˬ naˇ haˬ˗eu nga?

Miˇ luˆ luˆ laˇ˗awˇ meuˬ˗ahˇ laˆ cawˆ˗eu, yaw haiˬ deuˬ tsawˇ haˬ˗ahˇ beuˆ sehꞈ˗eu, aˬ ma tiˬ gʼaˬ maˬ noeˬ gaˇ shiˇ˗awˇ, zaˬ 5 gʼaˬ˗ahˇ byehˇ dzeh yaꞈ˗eu.

² Shaˬ zahˬ heu deuˬ˗ahˇ ya mawˇ ngeh, tsawˇ haˬ gʼawˬ mya ni “Aˬ jeˬ miˇ neh teu loꞈ˗ehˇ gʼeh˗eu nga?” lehˇ noeˬ˗awˇ, miˇ tsaˬ kʼoeˇ taˆ aˬ jeˬ miˇ neh haiˬ˗eu jeˬ hawˇ˗eu shaˬ˗eu zahˬ˗eu jeˬ tehꞈ˗ehˇ jaˆ˗eu nga? lehˇ siˬ nya mawꞈ˗eu meh. Nawˇ kʼawꞈ teu loꞈ˗ehˇ noeˬ haw maˬ loˇ?

3, 4. (a) Haˬbaˬkuˆ Miˬyehˇ˗ahˇ aˬ jeˬ naˇ haˬ˗euˬ nga? (b) Yeˬhawˇbaˬ Haˬbaˬkuˆ˗ahˇ aˬ joˆ˗ehˇ ehˇ kʼoꞈ nehˬ˗euˬ nga?

³ Jaˇliꞈ˗ahˇ gui ngeh, Miˬyehˇ˗ahˇ jah˗eu deuˬ kʼawꞈ, aˬ dui loꞈ˗ehˇ naˇ haˬ gaˇ ya mawˇ˗eu meh. Yaw jeˬ ma jeˬ, Miˬyehˇ gʼaˇ duˬ ngehˬ dah˗eu Haˬbaˬkuˆ, Yeˬhawˇbaˬ˗ahˇ “maˬ tsaˬ maˬ dawˇ˗eu jeˬ mˇ gaˇ, aˬ jeˬ miˇ neh bi haw laꞈ te? Yaw haiˬ jeˬ hawˇ˗eu yaw cawˆ jeˬ, ngaˬ˗euˬ mehˬ shi mˇ dui dui˗awˇ, iˬ dehˬ iˬ ceh yaˇ kʼaˬ mehˬ dzaˬ, maˬ gui jiˇ coeˇ ni jaˆ luꞈ” gaˇ aˬ jeˬ miˇ neh bi mawˇ laꞈ te? lehˇ naˇ haˬ˗eu meh.—Haˬbaˬkuˆ 1:3.

⁴ Haˬbaˬkuˆ 2:2, 3-ahˇ Miˬyehˇ Haˬbaˬkuˆ˗ahˇ ehˇ kʼoꞈ nehˬ˗awˇ, maˬ muiˬ˗eu jeˬ˗ahˇ kʼawꞈ laˆ cawˆ jiˇ ma lehˇ saˇ jaˇ dzaˬ nehˬ taˬ˗euˬ meh. Maˇ diˇ naˇ, Yeˬhawˇbaˬ tsawˇ haˬ zaˬ˗ahˇ gaˬ dui dui˗awˇ, “ngehˬ gʼeh bo saˆ luꞈ˗eu meh” lehˇ Jaˇliꞈ ehˇ˗eu meh. (1 Beˬtuˆluˆ 5:7) Miˬyehˇ ngehˬ˗ehˇ dzehˬ shaˬ˗eu zahˬ˗eu jeˬ˗ahˇ maˬ haw mawꞈ˗a. (Iˇsaˬyaˇ 55:8, 9) Toˆ˗ehˇ maˇ˗iˬ miˇ tsaˬ heu siˬ˗ahˇ, aˬ jeˬ miˇ neh shaˬ˗eu zahˬ˗eu jeˬ tehꞈ˗ehˇ jaˆ luꞈ˗eu nga?

Shaˬ zahˬ aˬ jeˬ miˇ neh myaˬ˗eu nga?

5. Shaˬ zahˬ nehˬ˗ehˇ taꞈ leˇ˗awˇ, zahˇ deuˬ aˬ jeˬ lehˇ mehˬ˗eu nga? Jaˇliꞈ aˬ jeˬ lehˇ ehˇ˗eu nga?

⁵ Tsawˇ haˬ˗euˬ shaˬ zahˬ Miˬyehˇ neh bi pyeuꞈ laˇ˗euˬ meh lehˇ, zahˇ˗euˬ aˬ yuiꞈ deuˬ mehˬ˗eu meh. Tiˬ deuˬ na, tsawˇ haˬ zaˬ˗euˬ dehꞈ ziˇ laꞈ kʼoeˇ aˬ jeˬ jeˇ bi pyeuꞈ laˇ˗eu lehˇ Miˬyehˇ neh daˇ tsehˆ dzeuˇ taˬ˗awˇ, aˬ dui tiˬ jeˬ gʼeh neh˗iˬ maˬ gʼoˆ shaw nya˗a lehˇ ehˇ˗eu meh. Tiˬ deuˬ na naˇ, tsawˇ kʼaˆ maˬ ehˇ, zaˬ maˬ ehˇ, shiˇ naˇ mˬ taˆ Miˬyehˇ nehˬ˗ehˇ jawˇ leˇ meh lehˇ ehˇ˗eu meh. Teu loꞈ˗ehˇ ehˇ˗eu maˬ tsaˬ˗a. Yeˬhawˇbaˬ maˬ muiˬ˗eu jeˬ˗ahˇ tiˬ jawˇ˗iˬ maˬ bi pyeuꞈ laˇ haw˗aˬ. “Baoˬ huiˬ˗eu Miˬyehˇ˗aˬ, yaw haiˬ jeˬ tiˬ jawˇ˗iˬ maˬ mˇ˗ehˇ, tsawˇ haˬ tiˬ gʼaˬ˗ahˇ˗iˬ maˬ tsaˬ maˬ dawˇ˗eu jeˬ maˬ jahˇ nehˬ˗a” lehˇ Jaˇliꞈ ehˇ˗eu meh.—Yawˇbaˆ 34:12.

6. Shaˬ zahˬ pyeuꞈ laˇ ngeh, aˬ jeˬ miˇ neh Miˬyehˇ˗ahˇ dehˬ lehꞈ nga?

⁶ Tsawˇ haˬ myaˬ ni Miˬyehˇ miˇ tsaˬ heu siˬ˗ahˇ uˆ lahˇ luꞈ meh lehˇ noeˬ˗eu miˇ neh, shaˬ zahˬ pyeuꞈ laˇ ngeh, Miˬyehˇ˗ahˇ dehˬ lehꞈ˗eu meh. Maˇ diˇ naˇ miˇ tsaˬ˗ahˇ uˆ lahˇ luꞈ˗eu gʼaˬ Saˬdaˬ meh lehˇ, Gaˇ kawˆ 3˗ahˇ ya dzaw dzeuˇ˗euˬ ma.

7, 8. Miˇ tsaˬ˗ahˇ shaˬ zahˬ bi pyeuꞈ laˇ˗eu aˬ jeˬ jeˇ jaˆ˗eu nga?

⁷ “Miˇ tsaˬ dawˬ tawˆ luꞈ Haiˬ dui dui˗eu Gʼaˬ uˆ lahˇ˗eu uˬ moˆ jawˇ luꞈ” meh lehˇ Jaˇliꞈ ehˇ˗eu meh. (1 Yoˇhaˬ 5:19) Miˇ tsaˬ˗ahˇ uˆ lahˇ luꞈ˗eu Saˬdaˬ haiˬ dui doeˇ dui dui˗eu meh. Aˬ yawꞈ “miˇ tsaˬ zaˬ dawˬ tawˆ luꞈ˗ahˇ sheuˬ bahˬ”˗eu meh. (Pah mehˬ˗eu 12:9) Tsawˇ haˬ myaˬ ni aˬ yawꞈ˗ahˇ dzaw geuꞈ˗eu miˇ neh, miˇ tsaˬ kʼoeˇ taˆ muˇ juˇ juˇ˗eu jeˬ, bye˗eu jeˬ hawˇ˗eu haiˬ˗eu jeˬ tehꞈ˗ehˇ byah jiˇ taˬ˗euˬ meh.

⁸ Miˇ tsaˬ kʼoeˇ taˆ shaˬ zahˬ gʼawˬ mya ni bi pyeuꞈ laˇ˗eu jeˬ jaˆ˗a siˬ. Aˬdaˬ hawˇ˗eu Eˇbaˆ Miˬyehˇ˗ahˇ puiˬ gʼaˬ ngeh, aˬ yawꞈ nyaꞈ neh mˇ˗euˬ iˬ baˇ heu, zaˬ deuˬ˗euˬ kʼoeˇ taˆ keuˆ le˗euˬ meh. Teu miˇ neh, iˬ baˇ zaˬ deuˬ tiˬ gʼaˬ tiˇ gʼaˬ dawˬ gʼoꞈ laˆ doˆ˗awˇ, shaˬ zahˬ bi pyeuꞈ laˇ˗eu meh. Aˬ yawꞈ maꞈ aˬ cawˬ naˆ maˬ tseˇ huiˬ mawꞈ mahˇ mawꞈ˗eu miˇ neh, ceh˗eu, guiˇ deuˆ˗eu, laˆ tsoeˬ˗eu heu deuˬ mˇ˗eu meh. (Dawˬtsoˆ 4:1; 8:9) Shaˬ zahˬ bi pyeuꞈ laˇ˗eu nyaˆ taꞈ tiˬ jeˬ naˇ, aˬ dui “maˬ noeˬ gaˇ pyeuꞈ laˇ˗eu gaˇ kawˆ” jaˆ˗eu miˇ neh meh. (Dawˬtsoˆ 9:11, Miˇ shuiꞈ dawˬ paˇ Jaˇliꞈ) Aˬ dui jawˇ duˬ hawˇ˗eu aˇ yamˬ maˬ tsaˬ gaˇ jawˇ ngeh, maˬ muiˬ˗eu jeˬ pyeuꞈ laˇ nya˗eu meh.

9. Yeˬhawˇbaˬ shaˬ zahˬ˗ahˇ maˬ laˆ byoˆ˗eu heu naˇ, gaˇ kawˆ tiˬ jeˬ paˬ jaˆ˗eu miˇ neh ngaˇ lehˇ, aˬ dui aˬ jeˬ miˇ neh jah nya˗eu nga?

⁹ Yeˬhawˇbaˬ shaˬ zahˬ bi pyeuꞈ laˇ˗eu gʼaˬ maˬ ngeuˇ˗a. Guiˇ deuˆ˗eu, sehꞈ˗eu, maˬ muiˬ˗eu jeˬ keuˆ le ngeh, Miˬyehˇ˗ahˇ maˬ dehˬ lehꞈ nya˗a. Kʼoeˇ uˬ taꞈ, miˇ luˆ luˆ˗eu, jaˬ lehˇ lehˇ ma baw laˇ˗eu, iˇ cuꞈ dahˬ daˆ laˇ˗eu heu deuˬ kʼawꞈ, Miˬyehˇ neh bi pyeuꞈ laˇ˗eu maˬ ngeuˇ˗a. Ehˇ kʼawꞈ, ‘Miˬyehˇ yawˬ jeˬ na luꞈ kʼoeˇ taˆ baoˬ huiˬ dzehˬ˗eu gʼaˬ pyeuꞈ˗eu jeˬ maˇ˗iˬ, shaˬ zahˬ heu deuˬ˗ahˇ aˬ jeˬ miˇ neh maˬ laˆ byoˆ nehˬ˗eu nga?’ lehˇ nawˇ noeˬ tehꞈ˗a. Miˬyehˇ aˬ dui˗ahˇ gaˬ˗awˇ, kʼahˬ lahˇ luꞈ meh lehˇ Jaˇliꞈ ehˇ˗eu meh. Miˬyehˇ shaˬ zahˬ heu deuˬ˗ahˇ maˬ laˆ byoˆ ni bi jaˆ˗euˬ heu naˇ, aˬ yawꞈ laꞈ kʼoeˇ gaˇ kawˆ tiˬ jeˬ paˬ jaˆ˗eu miˇ neh meh.—1 Yoˇhaˬ 4:8.

Miˬyehˇ shaˬ zahˬ˗ahˇ aˬ jeˬ miˇ neh bi jaˆ˗eu nga?

10. Saˬdaˬ Yeˬhawˇbaˬ˗ahˇ aˬ joˆ˗ehˇ ja bu ja doeˇ˗eu nga?

¹⁰ Saˬdaˬ Aˬdaˬ hawˇ˗eu Eˇbaˆ Eˬdeˬ yaˇ kmˇ˗ahˇ jawˇ gaˇ, Miˬyehˇ˗aˬ, maˬ muiˬ˗eu uˆ lahˇ˗eu gʼaˬ pyeuꞈ meh lehˇ muˇ juˇ juˇ iˇ˗awˇ, Miˬyehˇ naw nyaꞈ˗ahˇ yaw muiˬ jeˬ maˬ bi za mawꞈ˗eu miˇ neh, laˆ tsoeˬ˗eu meh lehˇ ehˇ nehˬ˗euˬ meh. Saˬdaˬ aˬ yawꞈ nyaꞈ˗ahˇ aˬ yawꞈ uˆ lahˇ˗eu jeˬ˗aˬ, Yeˬhawˇbaˬ uˆ lahˇ˗eu jeˬ naˆ maˬ tseˇ muiˬ dzehˬ˗awˇ, Miˬyehˇ˗ahˇ gʼoe˗eu maˬ loˬ˗a lehˇ bi jah mawꞈ˗eu meh.—Aˇdahˬbeh˗eu 3:2-5; Dzaw lahˬ 27˗ahˇ haw.

11. Aˬ jeˬ naˇ haˬ˗eu jeˬ jaˆ˗eu nga?

¹¹ Aˬdaˬ hawˇ˗eu Eˇbaˆ Yeˬhawˇbaˬ˗euˬ dawˬ˗ahˇ maˬ naˇ haˬ ni ehˇ dawˬ leuˇ˗euˬ meh. Aˬ yawꞈ nyaꞈ muiˬ˗eu jeˬ hawˇ˗eu maˬ muiˬ˗eu jeˬ yawˬ ha naꞈ˗i tseˇ geuꞈ˗eu aˬ kawˬ˗aˬ jaˆ ma lehˇ noeˬ˗eu meh. Aˬdaˬ hawˇ˗eu Eˇbaˆ noeˬ bahˬ taˬ˗euˬ lehˇ bi siˬ˗awˇ, aˬ dui˗euˬ gʼaˇ duˬ muiˬ˗eu jeˬ˗ahˇ Yeˬhawˇbaˬ tehꞈ˗ehˇ siˬ nya˗eu lehˇ bi mawˇ laˇ˗eu gʼaˇ duˬ, Yeˬhawˇbaˬ aˬ joˆ˗ehˇ jahˇ˗eu nga?

12, 13. (a) Yeˬhawˇbaˬ muiˇ˗eu deuˬ˗ahˇ aˬ jeˬ miˇ neh taˆ lehˇ maˬ laˆ cawˆ nga? (b) Aˬ jeˬ miˇ neh, Saˬdaˬ˗ahˇ miˇ tsaˬ˗ahˇ bi uˆ lahˇ˗awˇ, tsawˇ haˬ zaˬ˗ahˇ yawˬ haˇ yawˬ ha bi uˆ lahˇ˗eu nga?

¹² Yeˬhawˇbaˬ Aˬdaˬ hawˇ˗eu Eˇbaˆ˗ahˇ tiˬ poˆ tehꞈ˗ehˇ maˬ laˆ cawˆ˗euˬ uˬ taꞈ, aˬ yawꞈ nyaꞈ˗ahˇ zaˬ bi baw behˇ˗euˬ heu naˇ, aˬ yawꞈ nyaꞈ˗euˬ zaˬ deuˬ aˬ geu gʼaˬ neh bi uˆ lahˇ le lehˇ yawˬ ha naꞈ˗i bi tseˇ˗eu gʼaˇ duˬ meh. Yeˬhawˇbaˬ neh noeˬ taˬ˗euˬ jeˬ naˇ, miˇ tsaˬ heu siˬ˗ahˇ byah kuꞈ˗eu tsawˇ haˬ bi jawˇ byah jiˇ˗eu lehˇ meh. Saˬdaˬ aˇ naˆ ni laˆ tsoeˬ kʼawꞈ, Miˬyehˇ neh noeˬ taˬ˗euˬ jeˬ heu pyeuꞈ leˇ jiˇ meh.—Aˇdahˬbeh˗eu 1:28; Iˇsaˬyaˇ 55:10, 11.

¹³ Saˬdaˬ Yeˬhawˇbaˬ˗ahˇ mˬ taˆ gʼaˬ kʼehˇ gʼawˬ mya lam gʼaˬ˗euˬ mehˬ shi ja bu˗eu meh. (Yawˇbaˆ 38:7; Daˬyeˬlaˇ 7:10) Teu miˇ neh, Yeˬhawˇbaˬ Saˬdaˬ ehˇ˗eu tsaˬ ngaˇ laˬ lehˇ bi siˬ laˇ˗eu gʼaˇ duˬ, Saˬdaˬ˗ahˇ aˇ yamˬ biꞈ˗euˬ meh. Kʼoeˇ naˇ, tsawˇ haˬ zaˬ˗ahˇ kʼawꞈ, Miˬyehˇ˗ahˇ maˬ gʼoe ni, Saˬdaˬ˗ahˇ gʼoe˗awˇ yawˬ haˇ yawˬ ha uˆ lahˇ˗eu teu naˇ, pyeuꞈ leˇ nya ngaˇ laˬ lehˇ bi siˬ laˇ˗eu gʼaˇ duˬ, aˇ yamˬ biꞈ˗euˬ meh.

14. Aˇ yamˬ, aˬ jeˬ˗ahˇ bi siˬ laˇ˗eu nga?

¹⁴ Dzeuˇ laꞈ˗euˬ yaw myaˬ heˇ kʼoꞈ˗ahˇ, tsawˇ haˬ zaˬ yawˬ haˇ yawˬ ha leh jeh leh jeh˗ehˇ uˆ lahˇ laꞈ˗euˬ kʼawꞈ, maˬ pyeuꞈ leˇ gaˇ haw ngeh Saˬdaˬ jaˬ myawꞈ nga lehˇ siˬ laˇ˗eu meh. Tsawˇ haˬ zaˬ Miˬyehˇ neh caw ba˗euˬ jeˬ˗ahˇ loˬ˗eu meh. “Sahˬ paˬ Miˬyehˇ˗oˇ, tsawˇ haˬ zaˬ yaw dehꞈ dehꞈ˗eu˗aˬ, yawˬ ha gaˇ kawˆ yawˬ ha maˬ gʼaˬ leˇ˗ehˇ, yawˬ ha saꞈ laˇ˗ahˇ maˬ tuˆ tehˬ nya˗eu ngaˇ siˬ nya ma” lehˇ, Yeˬlaˬmiˇ ehˇ˗eu dawˬ teu tsaˬ meh.—Yeˬlaˬmiˇ 10:23.

Yeˬhawˇbaˬ aˬ jeˬ miˇ teu myah myah˗ehˇ dawˬ˗eu nga?

15, 16. (a) Yeˬhawˇbaˬ aˬ jeˬ miˇ neh shaˬ zahˬ˗ahˇ teu myah myah˗ehˇ bi jaˆ˗euˬ nga? (b) Yeˬhawˇbaˬ aˬ jeˬ miˇ neh Saˬdaˬ neh laˆ cawˆ taˬ˗euˬ jeˬ˗ahˇ maˬ laˆ muiˬ nehˬ˗eu nga?

¹⁵ Yeˬhawˇbaˬ aˬ jeˬ miˇ neh shaˬ zahˬ˗ahˇ teu myah myah˗ehˇ bi jaˆ˗euˬ nga? Aˬ jeˬ miˇ neh maˬ muiˬ˗eu jeˬ˗ahˇ maˬ laˆ byoˆ˗eu nga? Saˬdaˬ uˆ lahˇ˗eu jeˬ˗aˬ, maˬ pyeuꞈ leˇ˗a lehˇ bi siˬ duˬ laˇ˗eu gʼaˇ duˬ, aˇ yamˬ ya zmˬ˗eu miˇ neh meh. Tsawˇ haˬ zaˬ gʼawˬ mya jeˬ lehˇ uˆ lahˇ laꞈ haw˗euˬ kʼawꞈ, tiˬ jeˬ˗iˬ maˬ muiˬ daˆ laˇ˗aˬ. Caˆ keu ka hawˇ˗eu miˇ tsaˬ˗euˬ nui gahˇ paw huiˬ laˇ mahˇ laˇ˗euˬ kʼawꞈ, maˬ tsaˬ maˬ dawˇ˗eu, iˇ shaˬ shaˬ˗eu, sehꞈ˗eu, guiˇ deuˆ˗eu, heu deuˬ, kʼoeˇ ngeh ba naˆ maˬ tseˇ myaˬ dzehˬ laˇ˗euˬ meh. Tsawˇ haˬ zaˬ Miˬyehˇ˗ahˇ maˬ gʼoe ni maˬ dehꞈ nya˗a.

¹⁶ Yeˬhawˇbaˬ Saˬdaˬ neh laˆ cawˆ taˬ˗euˬ jeˬ˗ahˇ maˬ laˆ muiˬ nehˬ˗a siˬ. Laˆ muiˬ nehˬ naˇ, Saˬdaˬ uˆ lahˇ˗eu jeˬ˗ahˇ gʼaˬ biꞈ gaˇ duˇ˗awˇ, tsawˇ haˬ zaˬ deuˬ kʼawꞈ Saˬdaˬ neh yawˬ haˇ yawˬ ha uˆ lahˇ nya meh lehˇ ehˇ˗euˬ dawˬ kʼoeˇ tsaˬ law hawˇ ngaˬ˗aˇ lehˇ noeˬ leˇ˗eu meh. Maˇ diˇ naˇ nui noeˬ teu maˬ tsaˬ˗a. Yeˬhawˇbaˬ jaˬ myawꞈ maˬ myawꞈ˗eu miˇ neh, Saˬdaˬ˗euˬ jaˬ myawꞈ dawˬ˗ahˇ gʼaˬ maˬ biꞈ˗a.—Heˬbyehˇ 6:18.

17, 18. Saˬdaˬ neh laˆ cawˆ taˬ˗euˬ jeˬ˗ahˇ, Yeˬhawˇbaˬ aˬ jeˬ jahˇ˗eu lehˇ gʼeh˗eu nga?

¹⁷ Saˬdaˬ hawˇ˗eu tsawˇ haˬ neh laˆ cawˆ taˬ˗euˬ jeˬ˗ahˇ, Yeˬhawˇbaˬ laˆ muiˬ kʼoꞈ nehˬ jiˇ nya meh laˬ? Laˆ muiˬ kʼoꞈ nehˬ jiˇ nya meh. Yeˬhawˇbaˬ maˬ jahˇ nya˗eu jeˬ maˬ jaˆ˗a. Saˬdaˬ neh ja bu˗euˬ teu maˬ tsaˬ˗a lehˇ bi siˬ duˬ laˇ˗eu gʼaˇ duˬ, aˇ yamˬ aˇ myaˆ ni ya zmˬ˗eu lehˇ kʼawꞈ aˬ yawꞈ siˬ nya˗eu meh. Kʼoeˇ naˇ, miˇ tsaˬ heu siˬ aˇ dahˬ beh ngeh Baˬlaˬdiˇsuˆ bi pyeuꞈ mawꞈ˗eu loꞈ˗ehˇ bi pyeuꞈ laˇ˗awˇ, “lmˬ bymˇ laꞈ kʼoeˇ” jawˇ luꞈ˗eu deuˬ˗ahˇ kʼawꞈ paˇ bi gʼoꞈ dehꞈ laˇ˗eu meh. (Yoˇhaˬ 5:28, 29) Tsawˇ haˬ zaˬ naˇ˗eu shiˇ˗eu maˬ paˇ loˬ meh. Yeˬsuˇ Saˬdaˬ neh laˆ cawˆ taˬ˗euˬ jeˬ˗ahˇ, laˆ muiˬ kʼoꞈ nehˬ jiˇ˗eu meh. Yeˬhawˇbaˬ Yeˬsuˇ˗ahˇ kʼehˇ gʼeh leꞈ˗awˇ, Saˬdaˬ neh mˇ taˬ˗euˬ jeˬ˗ahˇ bi “laˆ cawˆ” le meh. (1 Yoˇhaˬ 3:8) Yeˬhawˇbaˬ oˇ nehˬ laꞈ˗euˬ miˇ neh, aˬ dui aˬ yawꞈ˗ahˇ ya siˬ nya laˇ˗awˇ, aˬ yawꞈ neh bi uˆ lahˇ ma lehˇ noeˬ tsehˆ˗eu aˬ kawˬ˗aˬ za˗euˬ ma. Teu miˇ neh, Yeˬhawˇbaˬ˗ahˇ guiˬ lahˬ huiˬ miˇ˗a. (2 Beˬtuˆluˆ 3:9, 10-ahˇ gui.) Aˬ dui shaˬ zahˬ˗ahˇ ya tahˬ puˬ kʼawꞈ, oˇ dzeuˇ nya ni aˬ yawꞈ caw ba nehˬ laꞈ meh.—Yoˇhaˬ 4:23; 1 Gawˇliˬtu 10:13-ahˇ gui.

¹⁸ Yeˬhawˇbaˬ aˬ yawꞈ˗ahˇ tseˇ lehˇ aˬ dui˗ahˇ maˬ ka tiˇ˗a. Yawˬ ha naꞈ˗i tseˇ geuꞈ nya˗eu laꞈ sawˬ biꞈ taˬ˗euˬ meh. Laꞈ sawˬ heu aˬ dui˗ahˇ aˬ jeˬ gaˇ dahˇ tsoeˬ nga lehˇ ja sawˇ ma.

Yawˬ ha naꞈ˗i tseˇ geuꞈ nya˗eu laꞈ sawˬ˗ahˇ nawˇ aˬ joˆ˗ehˇ ya zmˬ˗eu nga?

19. Yeˬhawˇbaˬ aˬ dui˗ahˇ aˬ jeˬ laꞈ sawˬ biꞈ˗euˬ nga? Laꞈ sawˬ heu hmˬ˗euˬ gʼaˇ duˬ, aˬ jeˬ miˇ neh guiˬ lahˬ huiˬ paˬ˗ehˇ gʼeh˗eu nga?

¹⁹ Yeˬhawˇbaˬ neh aˬ dui˗ahˇ biꞈ˗euˬ yawˬ ha naꞈ˗i tseˇ geuꞈ nya˗eu laꞈ sawˬ heu, jeˬ zaˬ nehˬ˗ehˇ bi beu gaˇ˗eu meh. Jeˬ zaˬ˗aˬ, tsaˬ˗eu hawˇ˗eu maˬ tsaˬ˗eu maˬ tseˇ paˆ nya˗a. Ehˇ kʼawꞈ, tsawˇ haˬ naˇ, yawˬ ha aˬ joˆ˗ehˇ dehꞈ˗eu lehˇ tseˇ nya˗awˇ, Yeˬhawˇbaˬ nui kʼahˇ mˇ˗eu laˬ lehˇ kʼawꞈ noeˬ tsehˆ nya˗eu meh. (Dawˬdaˬ 30:24-28) Yeˬhawˇbaˬ aˬ dui˗ahˇ laˬ kʼaˬ bi cehˇ mawꞈ˗eu miˇ neh, caˆ mawˇ kawˇ loꞈ˗ehˇ maˬ beh˗aˬ, aˬ dui aˬ joˆ˗ehˇ gʼeh˗eu tsawˇ haˬ pyeuꞈ mawꞈ nya, aˬ suˇ gʼaˬ nehˬ˗ehˇ cawˬ mawꞈ nya, aˬ joˆ˗ehˇ dehꞈ mawꞈ nya lehˇ, yawˬ ha naꞈ˗i tseˇ nya˗eu meh.

20, 21. Nymˬ˗mˇ neh tseˇ nya˗eu laꞈ kʼoeˇ neh muiˬ dzehˬ˗eu aˬ geu jeˬ nga?

²⁰ Yeˬhawˇbaˬ aˬ yawꞈ˗ahˇ bi gaˬ mawꞈ meh. (Maꞈtehˬ 22:37, 38) Zaˬ tiˬ gʼaˬ neh˗iˬ maˬ ka tiˇ gaˇ, nui ma laꞈ kʼoeˇ neh “Ngaˇ nawˬ˗ahˇ gaˬ nya” daˬ˗oˇ lehˇ ehˇ ngeh, aˬ da deuˬ laˬ kʼaˬ cehˇ˗eu loꞈ˗ehˇ, Miˬyehˇ kʼawꞈ teu gaˇ duˇ˗eu meh. Yeˬhawˇbaˬ aˬ dui˗ahˇ aˬ yawꞈ˗euˬ gaˇ mˇ˗eu hawˇ˗eu maˬ mˇ˗eu yawˬ ha naꞈ˗i bi tseˇ laꞈ˗euˬ meh. Saˬdaˬ hawˇ˗eu Aˬdaˬ,Eˇbaˆ, Yeˬhawˇbaˬ˗euˬ gaˇ maˬ mˇ˗eu gʼaˇ duˬ tseˇ˗euˬ meh. Nawˇ tawˇ neh aˬ jeˬ˗ahˇ tseˇ nmˇ?

²¹ Yeˬhawˇbaˬ˗euˬ gaˇ mˇ˗eu tseˇ lehˇ nawˬ˗ahˇ gʼaˬ biꞈ mawꞈ miˇ˗a. Gʼawˬ mya lam gʼaˬ, Saˬdaˬ jawˇ paw maˬ jawˇ ni Miˬyehˇ nui kʼahˇ mˇ˗eu gʼaˇ duˬ noeˬ tsehˆ˗euˬ meh. (Dawˬdaˬ 27:11) Shaˬ zahˬ maˬ paˇ jaˆ˗euˬ Miˬyehˇ˗euˬ miˇ shuiꞈ˗ahˇ ya jawˇ˗eu gʼaˇ duˬ, nymˬ˗mˇ nawˇ aˬ jeˬ ya jahˇ˗eu nga? Nyaˆ taꞈ kawˆ˗ahˇ gaˇ kawˆ heu bi siˬ nehˬ laꞈ tehꞈ˗a.