Gaˇ kawˆ 8
Miˬyehˇ aˬ jeˬ miˇ neh, maˬ muiˬ˗eu jeˬ hawˇ˗eu shaˬ zahˬ˗ahˇ maˬ laˆ byoˆ˗eu nga?
1. Maˬ muiˬ˗eu jeˬ, aˬ joˆ˗ehˇ pyeuꞈ doˆ laˇ˗euˬ nga?
Tsawˇ haˬ zaˬ neh uˆ lahˇ˗euˬ jeˬ˗aˬ, shaˬ zahˬ˗ahˇ maˬ laˆ piˇ nya nga lehˇ bi siˬ nya˗eu gʼaˇ duˬ, Miˬyehˇ aˇ yamˬ tiˬ byah tiˬ loꞈ biꞈ nehˬ˗euˬ meh
Saˬdaˬ neh dahˬ beh˗awˇ jaˬ myawꞈ myawꞈ˗euˬ gaˇ neh naˇ, miˇ tsaˬ kʼoeˇ taˆ maˬ muiˬ˗eu jeˬ pyeuꞈ doˆ laˇ˗euˬ meh. Aˇ dahˬ beh ngeh, Saˬdaˬ byah kuꞈ˗eu mˬ taˆ gʼaˬ kʼehˇ pyeuꞈ kʼawꞈ “yaw tsaˬ yaw dawˇ laꞈ kʼoeˇ, aˬ yawꞈ maˬ jawˇ nya˗a”. (Yoˇhaˬ 8:44, YS97) Aˬ yawꞈ˗aˬ, Miˬyehˇ˗ahˇ uˬ duˬ maˬ bi tahˬ ni, aˬ yawꞈ˗ahˇ bi tahˬ˗eu lehˇ noeˬ taˬ˗euˬ nui noeˬ kʼoeˇ huiˬ laˇ˗awˇ, Eˇbaˆ˗ahˇ mehˇ shuiˇ shuiˇ iˇ˗euˬ meh. Aˬdaˬ jiˇ ni Eˇbaˆ nehˬ˗ehˇ gm leˇ˗awˇ, Miˬyehˇ˗euˬ dawˬ˗ahˇ maˬ naˇ haˬ˗a. Aˬdaˬ neh tseˇ˗euˬ teu naˇ, shaˬ zahˬ hawˇ˗eu shiˇ˗eu jeˬ pyeuꞈ doˆ laˇ˗euˬ meh.—Aˇdahˬbeh˗eu 3:1-6, 19-ahˇ gui˗awˬ.
Miˬyehˇ dawˬ˗ahˇ maˬ bi naˇ haˬ˗eu lehˇ, Saˬdaˬ Eˇbaˆ˗ahˇ mehˇ shuiˇ shuiˇ˗euˬ teu naˇ, Miˬyehˇ uˆ lahˇ˗eu jeˬ˗ahˇ laꞈ maˬ daˬ lehˇ ehˇ˗eu meh. Tsawˇ haˬ myaˬ ni Saˬdaˬ nehˬ˗ehˇ gm leˇ˗awˇ, Miˬyehˇ uˆ lahˇ˗eu jeˬ˗ahˇ maˬ ha geuꞈ lehˇ ehˇ˗eu meh. Teu miˇ neh Saˬdaˬ˗aˬ, “miˇ tsaˬ˗ahˇ uˆ lahˇ˗eu gʼaˬ” pyeuꞈ˗eu meh.—Yoˇhaˬ 14:30; 1 Yoˇhaˬ 5:19-ahˇ gui˗awˬ.
2. Miˬyehˇ maˬ beh muiˬ˗euˬ miˇ neh nga loˇ?
Miˬyehˇ neh kʼaˇ beh˗euˬ jeˬ maˬ muiˬ˗eu jeˬ lehˇ maˬ jaˆ. Tsawˇ haˬ maˬ ehˇ, mˬ taˆ gʼaˬ kʼehˇ maˬ ehˇ, Miˬyehˇ˗ahˇ tiˬ byah tiˬ loꞈ naˇ haˬ nya˗eu jeˬ ahˇ˗eu meh. (Dawˬmehˬmehˬ˗eu 32:4, 5) Muiˬ˗eu hawˇ˗eu maˬ muiˬ˗eu jeˬ˗ahˇ yawˬ ha naꞈ ni tseˇ geuꞈ nya˗eu jeˬ, Miˬyehˇ aˬ dui˗ahˇ beh ahˇ nehˬ taˬ˗euˬ meh. Yawˬ ha naꞈ ni bi tseˇ laꞈ˗euˬ heu neh, Miˬyehˇ˗ahˇ gaˬ miˇ˗a lehˇ, mˇ mawˇ nehˬ nya˗eu meh.—Yaˬkoˆ 1:13-15; 1 Yoˇhaˬ 5:3-ahˇ gui˗awˬ.
3. Miˬyehˇ shaˬ˗eu zahˬ˗eu jeˬ˗ahˇ, iˬ nah keuˆ ni aˬ jeˬ miˇ neh bi jaˆ˗euˬ nga?
Yeˬhawˇbaˬ Miˬyehˇ aˬ yawꞈ˗ahˇ muiˇ˗eu deuˬ˗ahˇ maˬ laˆ cawˆ ni, iˬ nah keuˆ ni aˬ jeˬ miˇ neh bi jawˇ˗euˬ nga? Miˬyehˇ˗ahˇ maˬ gʼoe˗ni yawˬ haˇ yawˬ ha uˆ lahˇ˗eu aˇ naˆ ni shiꞈ ma naꞈ˗eu nya lehˇ, bi siˬ nya˗eu gʼaˇ duˬ bi jawˇ˗euˬ meh. (Dawˬtsoˆtsoˆ˗eu 7:29; 8:9) Tsawˇ haˬ zaˬ neh uˆ lahˇ˗euˬ jeˬ˗aˬ, guiˇ deuˆ˗eu, maˬ muiˬ maˬ jaˬ˗eu, maˬ tsaˬ maˬ dawˇ˗eu, naˇ˗eu gawˇ˗eu jeˬ˗ahˇ, maˬ laˆ byoˆ nya nga lehˇ, tsawˇ haˬ zaˬ˗euˬ dehꞈ jeˬ dehꞈ kawˆ 6,000 kʼoꞈ byah laˇ ngeh jawˇ, mawˇ shawˇ laˇ˗eu meh.—Yeˬlaˬmiˇ 10:23; Loˇmaˆ 9:17-ahˇ gui˗awˬ.
Miˬyehˇ uˆ lahˇ˗eu jeˬ˗ahˇ ha geuꞈ˗eu deuˬ naˇ guiˬ lahˬ baw meh. (Iˇsaˬyaˇ 48:17, 18) Gʼawˬ myahˇ maˬ gʼeh˗ehˇ, tsawˇ haˬ zaˬ uˆ lahˇ˗eu jeˬ dawˬ tawˆ luꞈ˗ahˇ, Yeˬhawˇbaˬ laˆ cawˆ jiˇ˗eu meh. Miˬyehˇ uˆ lahˇ˗eu jeˬ˗ahˇ ha geuꞈ˗eu deuˬ tehꞈ˗ehˇ, miˇ tsaˬ kʼoeˇ taˆ ya dehꞈ gʼeh meh.—Iˇsaˬyaˇ 11:9. Daˬyeˬlaˇ 2:44-ahˇ gui˗awˬ.
Biˬdiˬoˬ haw Miˬyehˇ aˬ jeˬ miˇ neh shaˬ zahˬ˗ahˇ bi jaˆ˗euˬ nga?
4. Miˬyehˇ nui oˇ ahˇ˗eu baˬ da neh, aˬ dui aˬ jeˬ mˇ˗eu aˬ kawˬ˗aˬ za˗euˬ nga?
Tsawˇ haˬ zaˬ Yeˬhawˇbaˬ˗ahˇ uˬ duˬ tahˬ˗eu heu naˇ, yawˬ ha˗euˬ gʼaˇ duˬ muiˬ laˇ˗eu jeˬ jaˆ˗eu miˇ neh tehꞈ meh lehˇ Saˬdaˬ ehˇ˗eu meh. Dawˬ teu maˬ tsaˬ˗a lehˇ, nawˇ mˇ mawˇ nehˬ mawꞈ miˇ˗a loˇ? Mˇ mawˇ nya meh. Miˬyehˇ oˇ˗eu miˇ neh, Miˬyehˇ neh bi uˆ lahˇ le laˬ maˬ ngeuˇ naˇ tsawˇ haˬ neh bi uˆ lahˇ le laˬ lehˇ, mˇ mawˇ˗eu aˬ kawˬ˗aˬ za˗euˬ ma. Aˬ dui dehꞈ jeˬ˗ahˇ haw ngeh, aˬ geu gʼaˬ˗ahˇ tseˇ taˬ˗euˬ lehˇ siˬ laˇ˗eu meh.—Yawˇbaˆ 1:8-12; Dawˬdaˬ 27:11-ahˇ gui˗awˬ.
5. Miˬyehˇ neh bi uˆ lahˇ ma lehˇ aˬ joˆ˗ehˇ tseˇ geuꞈ nya˗eu nga?
Miˬyehˇ neh aˬ dui˗ahˇ bi uˆ lahˇ˗eu hawˇ˗eu maˬ bi uˆ lahˇ˗eu, yawˬ ha˗ahˇ jaˆ˗eu tehꞈ meh
Tseˇ geuꞈ nya˗eu jeˬ naˇ, Jaˇliꞈ˗ahˇ dawˬ pehˬ taˬ˗eu zahˇ maˇ˗ahˇ poˆ˗awˇ ya caw teh˗eu meh. (Yoˇhaˬ 4:23) Yeˬsuˇ˗ahˇ duˇ ni, aˬ dui kʼawꞈ miˇ tsaˬ˗ahˇ uˆ lahˇ˗eu jeˬ hawˇ˗eu guiˇ beuˆ gaˇ maˬ gm leˇ˗eu heu naˇ, Saˬdaˬ uˆ lahˇ˗eu jeˬ˗ahˇ laꞈ maˬ daˬ lehˇ, mˇ mawˇ˗eu jeˬ pyeuꞈ meh.—Yoˇhaˬ 17:14-ahˇ gui˗awˬ.
Saˬdaˬ aˬ yawꞈ˗euˬ baoˬ˗ahˇ gʼoe˗awˇ, maˬ muiˬ˗eu jeˬ mˇ˗eu paw gʼaˬ biꞈ luꞈ meh. Aˬ dui teu loꞈ˗ehˇ maˬ mˇ ngeh, cawˬ hawˇ˗eu yuiꞈ nyiˇ deuˬ kʼawꞈ ehˇ doeˇ laˇ˗eu meh. (1 Beˬtuˆluˆ 4:3, 4) Teu miˇ neh, aˬ dui ya tseˇ geuꞈ meh. Miˬyehˇ˗ahˇ gaˬ˗eu deuˬ nehˬ˗ehˇ cawˬ˗awˇ, Miˬyehˇ˗euˬ nui gaˬ ahˇ˗eu zahˇ dawˬ˗ahˇ caw teh naˇ, tsawˇ haˬ zaˬ shaˬ zahˬ keuˆ le ngeh, Miˬyehˇ˗ahˇ byehˇ dzeh tehꞈ˗a lehˇ, Saˬdaˬ neh ehˇ˗euˬ dawˬ kʼoeˇ, jaˬ myawꞈ nga lehˇ siˬ duˬ laˇ˗eu meh.—1 Gawˇliˬtu 6:9, 10; 15:33-ahˇ gui˗awˬ.
Miˬyehˇ tsawˇ haˬ zaˬ˗ahˇ gaˬ˗eu miˇ neh, maˬ muiˬ˗eu jeˬ hawˇ˗eu shaˬ˗eu zahˬ˗eu jeˬ dawˬ tawˆ luꞈ˗ahˇ, laˆ byoˆ jiˇ nehˬ ma lehˇ saˇ jaˇ dzaˬ taˬ˗euˬ meh. Miˬyehˇ˗euˬ saˇ jaˇ dawˬ˗ahˇ jah˗eu deuˬ, miˇ tsaˬ kʼoeˇ taˆ mˬ maˬ maˬ byaˆ zaˇ ziˇ ya dehꞈ meh.—Yoˇhaˬ 3:16-ahˇ gui˗awˬ.