Miˬyehˇ aˬ joˆ˗ehˇ gʼeh˗eu uˬ duˬ tahˬ˗eu jeˬ˗ahˇ nui ma tsaˬ˗eu nga?

Miˬyehˇ zahˇ yawˬ zahˇ na luꞈ˗ahˇ nui ma tsaˬ˗eu maˬ ngeuˇ˗a lehˇ dzeuˇ yaꞈ˗euˬ kawˆ˗ahˇ aˬ dui ya ja sawˇ˗euˬ ma. Ehˇ kʼawꞈ Beh˗euˬ yaw sahˇ nui ma tsaˬ˗eu jeˬ˗ehˇ aˬ dui aˬ yawꞈ˗ahˇ uˬ duˬ tahˬ nya meh. Miˬyehˇ aˬ joˆ˗ehˇ gʼeh˗eu “uˬ duˬ tahˬ˗eu zahˇ sahˇ kʼoꞈ”˗ahˇ nui ma tsaˬ˗eu nga? (Yaˬkoˆ 1:27) Jaˇliꞈ aˬ joˆ˗ehˇ mehˬ˗eu nga lehˇ haw.

1. Aˬ dui uˬ duˬ tahˬ˗eu jeˬ, aˬ jeˬ˗ahˇ dawˬ pehˬ ya taˬ˗eu nga?

Aˬ dui uˬ duˬ tahˬ˗eu jeˬ Jaˇliꞈ˗ahˇ dawˬ pehˬ ya taˬ˗eu meh. Yeˬsuˇ “Nawˬ˗euˬ dawˬ˗aˬ, yaw tsaˬ yaw dawˇ jeˬ meh” lehˇ Miˬyehˇ˗ahˇ ehˇ nehˬ˗euˬ meh. (Yoˇhaˬ 17:17) Zahˇ tiˬ zahˇ na Miˬyehˇ˗euˬ dawˬ pyeuꞈ˗eu Jaˇliꞈ laꞈ kʼoeˇ˗euˬ yaw tsaˬ yaw dawˇ jeˬ˗ahˇ maˬ caw teh˗a. Aˬ yawꞈ maꞈ tsawˇ haˬ zaˬ neh mehˬ˗euˬ jeˬ hawˇ˗eu tawˬ ka leꞈ˗euˬ zahˇ deuˬ˗ahˇ caw teh˗eu meh. “Miˬyehˇ˗euˬ zahˇ dawˬ kʼoꞈ dawˬ˗ahˇ byehˇ dzeh”˗euˬ deuˬ˗ahˇ Miˬyehˇ nui ma maˬ tsaˬ˗a. (Maˬkuˆ 7:9-ahˇ gui.) Ehˇ kʼawꞈ aˬ yawꞈ Jaˇliꞈ laꞈ kʼoeˇ mehˬ taˬ˗euˬ jeˬ˗ahˇ mˇ caw˗eu deuˬ˗ahˇ tehꞈ˗ehˇ nui ma tsaˬ˗eu meh.

2. Aˬ dui Yeˬhawˇbaˬ˗ahˇ uˬ duˬ aˬ joˆ˗ehˇ ya tahˬ˗eu nga?

Yeˬhawˇbaˬ Beh˗euˬ yaw sahˇ pyeuꞈ˗eu miˇ neh, aˬ dui neh nui ma gawˇ mawˇ dawˬ tawˆ luꞈ uˬ duˬ tahˬ˗euˬ jeˬ˗ahˇ za geuˇ˗eu meh. (Pah mehˬ˗eu 4:11) Teu naˇ aˬ dui Yeˬhawˇbaˬ˗ahˇ gaˬ˗awˇ, tahˬ pahˬ aˬ ma mawˇ kawˇ hawˇ˗eu aˇ baˇ lawˬ muˇ maˬ zmˬ ni aˬ yawꞈ˗ahˇ tehꞈ˗ehˇ uˬ duˬ tahˬ gaˇ ehˇ mawꞈ˗eu meh.—Iˇsaˬyaˇ 42:8-ahˇ gui.

Aˬ dui uˬ duˬ tahˬ˗eu jeˬ Yeˬhawˇbaˬ ‘nui ma tsaˬ˗euˬ jeˬ, shawˇ jehˆ ni gʼeh˗eu jeˬ’ ya bi pyeuꞈ˗eu meh. (Loˇmaˆ 12:1, Yaw Shawˇ Yehˇ boꞈ 2018) Heu naˇ aˬ dui Miˬyehˇ˗euˬ zahˇ dawˬ˗ahˇ ya dehꞈ caw gaˇ ehˇ mawꞈ˗eu meh. Yaw jeˬ ma jeˬ, Yeˬhawˇbaˬ˗ahˇ gaˬ˗eu deuˬ, sheuˬ dahˬ dzaˬ˗eu jeˬ nehˬ˗ehˇ taꞈ leˇ˗awˇ Miˬyehˇ˗euˬ zahˇ dawˬ˗ahˇ aˇ poeˬ taˬ baw˗awˇ dehꞈ caw˗eu meh. Aˬ yawꞈ maꞈ mawˇ do˗ahˇ deuˬ laˇ˗eu, ya hawˬ, ya piˇ ya maˇ˗ahˇ yahˇ˗awˇ, lu paꞈ gʼoeˬ˗eu, jiˇ baˬ aˇ dzehˬ dawˇ dzeuˇ˗eu, heu deuˬ˗ahˇ jiˇ yahˇ˗eu meh.a

3. Aˬ dui aˬ jeˬ miˇ neh aˬ cawˬ deuˬ nehˬ˗ehˇ Yeˬhawˇbaˬ˗ahˇ uˬ duˬ ya tahˬ˗eu nga?

Yawˬ jaw na luꞈ jahˇ˗eu mehˬ bawˬ heu naˇ, ‘tsawˇ haˬ deuˬ uiˬ laˇ taˬ˗euˬ mehˬ shi Yeˬhawˇbaˬ˗ahˇ ja ceuˬ˗eu’ aˇ yamˬ pyeuꞈ meh. (Ja ceuˬ 111:1, 2) Aˬ dui teu loꞈ˗ehˇ jahˇ nya˗eu tiˬ jeˬ naˇ, Miˬyehˇ˗ahˇ ja ceuˬ˗eu dawˬ caˇ caˇ˗eu heu meh. (Ja ceuˬ 104:33-ahˇ gui.) Yeˬhawˇbaˬ aˬ dui˗ahˇ gaˬ˗eu miˇ neh, mehˬ bawˬ˗ahˇ bi iˇ mawꞈ˗eu meh. Mehˬ bawˬ˗ahˇ iˇ˗eu teu naˇ, aˬ dui˗ahˇ mˬ maˬ maˬ byaˆ zaˇ ziˇ dehꞈ˗eu jeˬ za ni caw ba nehˬ laꞈ˗awˇ, tiˬ gʼaˬ tiˇ gʼaˬ gʼaˬ biꞈ nya˗eu meh.

Naꞈ suiˇ ni dzaw

4. Aˬ dui uˬ duˬ tahˬ ngeh tahˬ pahˬ aˬ ma mawˇ kawˇ maˬ ya zmˬ

Biˬdiˬoˬ: Tahˬ pahˬ aˬ ma mawˇ kawˇ zmˬ˗awˇ uˬ duˬ tahˬ gaˇ Miˬyehˇ nui ma tsaˬ ngaˇ laˬ? (3:26)

• Jaˇliꞈ saˇ ka˗ahˇ Miˬyehˇ˗euˬ tsawˇ haˬ tiˬ deuˬ na, tahˬ pahˬ aˬ ma mawˇ kawˇ˗ahˇ zmˬ˗awˇ Miˬyehˇ˗ahˇ uˬ duˬ tahˬ ngeh aˬ jeˬ pyeuꞈ laˇ˗euˬ nga?

Tiˬ deuˬ na Miˬyehˇ nehˬ˗ehˇ gʼoeˇ dzehˬ leˇ mawꞈ˗eu miˇ neh, tahˬ pahˬ aˬ ma mawˇ kawˇ˗ahˇ zmˬ˗awˇ uˬ duˬ tahˬ˗eu meh. Heu naˇ Miˬyehˇ nehˬ˗ehˇ maˇ diˇ bi gʼoeˇ leˇ ngaˇ laˬ? Doˆ˗iˇ˗eu 20:4-6 hawˇ˗eu Ja ceuˬ 106:35, 36-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Tsawˇ haˬ deuˬ aˬ jeˬ˗euˬ aˇ baˇ, maˬ ngeuˇ naˇ aˬ jeˬ˗euˬ mawˇ kawˇ˗ahˇ uˬ duˬ tahˬ gaˇ nawˇ mawˇ haw deˬ?

• Tahˬ pahˬ aˬ ma mawˇ kawˇ˗ahˇ zmˬ˗awˇ uˬ duˬ tahˬ gaˇ Yeˬhawˇbaˬ aˬ joˆ˗ehˇ noeˬ˗eu nga?

• Nawˬ˗ahˇ tawˇ neh aˬ joˆ˗ehˇ noeˬ nya?

5. Yeˬhawˇbaˬ˗ahˇ tehꞈ˗ehˇ uˬ duˬ tahˬ naˇ, mehˬ bahˬ taˬ˗euˬ jeˬ˗ahˇ neh buˬ˗iˇ nya

Biˬdiˬoˬ: Yaw tsaˬ yaw dawˇ jeˬ bi buˬ bi law˗iˇ (5:16)

Ja ceuˬ 91:14-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Yeˬhawˇbaˬ aˬ yawꞈ˗ahˇ gaˬ˗awˇ aˬ yawꞈ˗ahˇ tehꞈ˗ehˇ uˬ duˬ tahˬ˗eu deuˬ˗ahˇ aˬ jeˬ biꞈ ma lehˇ saˇ jaˇ dzaˬ taˬ˗euˬ nga?

6. Tiˬ kawˆ loꞈ˗ehˇ uiˬ leˇ˗awˇ Miˬyehˇ˗ahˇ uˬ duˬ tahˬ

Aˇ muˇ˗euˬ mehˬ bawˬ˗ahˇ dawˬ caˇ caˇ˗awˇ nui noeˬ nui duˇ biꞈ˗eu teu naˇ, Yeˬhawˇbaˬ˗ahˇ ja ceuˬ˗eu jeˬ pyeuꞈ˗awˇ, tiˬ gʼaˬ tiˇ gʼaˬ gʼaˬ biꞈ˗eu jeˬ jiˇ pyeuꞈ˗eu meh. Ja ceuˬ 22:22-ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Mehˬ bawˬ˗ahˇ laˇ˗euˬ deuˬ nui noeˬ nui duˇ biꞈ gaˇ nawˬ˗ahˇ ya leˇ miˇ˗a loˇ?

• Nawˇ jiˇ nui noeˬ nui duˇ biꞈ˗eu gʼaˇ duˬ, lehˬ hmˬ mawꞈ miˇ˗a laˬ?

7. Yeˬhawˇbaˬ nawˬ neh ya siˬ˗euˬ jeˬ aˬ cawˬ˗ahˇ bi ja nehˬ mawꞈ

Aˬ dui Jaˇliꞈ laꞈ kʼoeˇ˗euˬ gaˇ kawˆ, kʼaˇ yehꞈ laˇ˗eu loꞈ˗ehˇ aˬ cawˬ˗ahˇ ja nehˬ nya meh. Ja ceuˬ 9:1 hawˇ˗eu 34:1˗ahˇ gui gʼaˬ naˇ, naˇ haˬ˗eu jeˬ heu˗ahˇ ja sawˇ.

• Jaˇliꞈ laꞈ kʼoeˇ neh nawˬ neh ya siˬ˗euˬ jeˬ, aˬ cawˬ˗ahˇ aˬ geu kawˆ ja nehˬ mawꞈ nya?

Kawˆ shawˆ

Beh˗euˬ yaw sahˇ pyeuꞈ˗eu Yeˬhawˇbaˬ aˬ yawꞈ˗ahˇ tehꞈ˗ehˇ uˬ duˬ tahˬ˗awˇ, aˇ muˇ˗euˬ mehˬ bawˬ˗ahˇ aˬ yawꞈ˗ahˇ ja ceuˬ˗eu uˬ taꞈ, yawˬ ha neh ya siˬ˗euˬ jeˬ aˬ cawˬ˗ahˇ ja nehˬ gaˇ nui kʼahˇ shiˇ˗eu meh.

Ja sawˇ poˆ˗eu

• Aˬ dui Miˬyehˇ nui ma tsaˬ˗eu jeˬ˗ehˇ uˬ duˬ tahˬ˗eu gaˇ kawˆ, aˬ gaˇ neh ya siˬ˗eu nga?

• Aˬ dui aˬ jeˬ miˇ neh Yeˬhawˇbaˬ tiˬ gʼaˬ˗ahˇ tehꞈ˗ehˇ uˬ duˬ ya tahˬ˗eu nga?

• Aˬ dui aˬ jeˬ miˇ neh Miˬyehˇ nui kʼahˇ shiˇ˗eu jeˬ mˇ mawꞈ˗eu deuˬ nehˬ˗ehˇ uiˬ leˇ˗awˇ uˬ duˬ ya tahˬ˗eu nga?

Haw lahˬ

Zaˬ miˬ aˬ buˇ tiˬ gʼaˬ aˬ jeˬ miˇ tahˬ pahˬ aˬ ma mawˇ kawˇ˗ahˇ uˬ duˬ maˬ paˇ tahˬ ngaˬ lehˇ haw˗eu gʼaˇ duˬ, “Ngaˇ tahˬ pahˬ aˬ ma mawˇ kawˇ˗euˬ zaˬ kʼaˆ maˬ paˇ ngeuˇ maˬ” lehˇ ehˇ˗eu gaˇ kawˆ˗ahˇ haw.

“Jaˇliꞈ tsawˇ haˬ˗euˬ dehꞈ ziˇ˗ahˇ laˆ paˇ” (Loꞈ˗eu nymˇgoˇ, 2011 Shiꞈ siˬ ba la 1)

Aˇ muˇ˗euˬ mehˬ bawˬ˗ahˇ nui noeˬ nui duˇ biꞈ nya ni nawˬ˗ahˇ caw ba nehˬ˗eu aˬ jeˬ nga lehˇ haw.

“Bawˬ dzaˬ ngeh Yeˬhawˇbaˬ˗ahˇ ja ceuˬ” (Loꞈ˗eu nymˇgoˇ, 2019 Tiˬ siˬ ba la)

Zaˬ yo aˬ li tiˬ gʼaˬ mehˬ bawˬ˗ahˇ iˇ˗eu yaw awˬ maˬ ngeuˇ kʼawꞈ iˇ˗euˬ miˇ neh, aˬ jeˬ gaˇ dahˇ tsoeˬ˗eu jeˬ za˗euˬ nga lehˇ haw.

Yeˬhawˇbaˬ ngaˬ˗ahˇ ngehˬ gʼeh˗eu lehˇ meh (3:07)

Daˇ kawˬ laꞈ yaꞈ heu naˇ, Yeˬsuˇ˗euˬ mehˬ nah caw teh˗eu deuˬ˗euˬ gʼaˇ duˬ meh lehˇ gʼawˬ mya gʼaˬ jah˗eu meh. Ehˇ kʼawꞈ aˬ dui uˬ duˬ tahˬ ngeh, daˇ kawˬ laꞈ yaꞈ zmˬ paˬ˗ehˇ gʼeh ngaˇ laˬ?

“Yeˬhawˇbaˬ˗euˬ Saˇ kiˇ deuˬ uˬ duˬ tahˬ ngeh, daˇ kawˬ laꞈ yaꞈ˗ahˇ aˬ jeˬ miˇ neh maˬ zmˬ˗eu nga?” (Iˇteuꞈnehꞈ laꞈ kʼoeˇ˗euˬ gaˇ kawˆ)