Aˬ yawꞈ Miˬyehˇ nehˬ˗ehˇ cah

Iˇnawˆ aˬ yawꞈ˗euˬ saˇ ka˗ahˇ˗euˬ tsawˇ haˬ deuˬ nehˬ˗ehˇ beu gaˇ dui dui˗eu miˇ neh, tiˬ gʼaˬ tehꞈ nya lehˇ noeˬ˗eu nui noeˬ heu aˬ joˆ˗ehˇ gʼeh˗eu lehˇ siˬ nya˗eu meh. Jaˇliꞈ laꞈ kʼoeˇ “Miˬyehˇ nehˬ˗ehˇ cawˬ cawˬ taꞈ˗euˬ” meh lehˇ ngehˬ keuˆ taˬ˗euˬ teu ngeh saˇ ka˗ahˇ aˬ yawꞈ tiˬ gʼaˬ jawˇ˗eu tehꞈ meh. Aˬ yawꞈ teu loꞈ˗ehˇ aˬ joˆ˗ehˇ jahˇ nya˗euˬ nga? Aˬ dui kʼaˬ duˬ ni gʼeh˗eu jeˬ nehˬ˗ehˇ taꞈ leˇ˗awˇ Iˇnawˆ˗ahˇ aˬ jeˬ dzaw geuꞈ nya nga?

Iˇnawˆ maˇ maˇ ni gʼeh˗eu Miˬyehˇ nehˬ˗ehˇ yaw teˬ nyiˬ jeˬ lehˇ cah˗euˬ meh. Dahˬ beh˗eu jeˬ naˇ, Miˬyehˇ˗ahˇ yaw zeu maˬ baw˗eu deuˬ˗ahˇ maˬ dzaw geuꞈ˗eu heu meh. Iˇnawˆ˗aˬ Aˬdaˬ hawˇ˗eu Eˇbaˆ˗ahˇ neh shiꞈ tsuiꞈ aˬ yawꞈ tsuiꞈ˗ahˇ dehꞈ yaꞈ˗euˬ meh. Iˇnawˆ dehꞈ le ngeh Aˬdaˬ yaw dehꞈ dehꞈ luꞈ˗awˇ mawˬ dui dui laˇ taˬ˗euˬ meh. (“Iˇnawˆ˗euˬ saˇ ka˗ahˇ neh yaˇ kʼaˬ daˇ˗eu deuˬ˗euˬ saˇ ka˗ahˇ keuˆ ni” aˇ yamˬ bi siˬ˗eu aˇ baˇ˗ahˇ haw.) Aˬdaˬ hawˇ˗eu Eˇbaˆ Miˬyehˇ˗ahˇ puiˬ˗euˬ taꞈ naˇ yawˬ gʼaˬ na luꞈ ehˇ gʼaˬ ni aˬ yawꞈ nyaꞈ loꞈ˗ehˇ mˇ˗euˬ meh. Aˬ yawꞈ nyaꞈ˗euˬ aˬ li Gaˬiˇnaˆ yawˬ ha˗euˬ aˬ nyiˇ tsi tsi pyeuꞈ˗eu Aˬbeˬlaˆ˗ahˇ sehꞈ˗euˬ meh. Aˬbeˬlaˆ naˇ Yeˬhawˇbaˬ˗ahˇ jah beh beh˗euˬ gʼaˬ pyeuꞈ meh. Kʼoeˇ naˇ Gaˬiˇnaˆ˗euˬ zaˬ deuˬ uˆ deuˬ tiˬ gʼaˬ na ngehˬ˗ehˇ dzehˬ teu naˆ maˬ tseˇ doeˇ˗eu jeˬ mˇ˗euˬ meh. (Aˇdahˬbeh˗eu 4:23, 24) Ehˇ kʼawꞈ Iˇnawˆ naˇ aˬ yawꞈ maꞈ˗ahˇ maˬ duˇ˗a. Teu ngeh saˇ ka˗ahˇ˗euˬ tsawˇ haˬ deuˬ˗euˬ nui noeˬ maˬ bi nyawˬ laˇ˗eu gʼaˇ duˬ kʼaˬ duˬ ni leh jeh˗euˬ meh. Aˬ cawˬ˗ahˇ maˬ coeˬ maˬ ciˆ ni dehꞈ˗eu miˇ neh Miˬyehˇ aˬ yawꞈ˗ahˇ nui kʼahˇ shiˇ˗eu meh.

Iˇnawˆ maˬ dehꞈ le mi naˆ˗ehˇ yaw myaˬ kʼoꞈ ca ngeh neh tsawˇ haˬ deuˬ “Sahˬpaˬ Miˬyehˇ˗euˬ muiˬ˗eu shawˇ˗eu tsawˇ myahˇ˗ahˇ kuˇ kuˇ˗ehˇ uˬ duˬ tahˬ˗euˬ meh.” (Aˇdahˬbeh˗eu 4:26) Ehˇ kʼawꞈ aˬ yawꞈ maꞈ Miˬyehˇ˗euˬ tsawˇ myahˇ˗ahˇ yaw zeu baw˗eu jeˬ˗ehˇ kuˇ˗eu maˬ ngeuˇ ni, maˬ ngeuˇ˗eu miˬ yehˇ˗ahˇ uˬ duˬ tahˬ ngeh jiˇ kuˇ˗euˬ gaˇ duˇ˗eu meh. Iˇnawˆ naˇ toˆ˗ehˇ maˬ ngeuˇ˗a. Aˬ yawꞈ Miˬyehˇ˗euˬ tsawˇ myahˇ˗ahˇ gaˬ˗awˇ yaw zeu baw˗eu miˇ neh aˬ yawꞈ˗euˬ saˇ ka˗ahˇ˗euˬ tsawˇ haˬ deuˬ nehˬ˗ehˇ beu gaˇ dui dui˗eu meh.

Iˇnawˆ Miˬyehˇ nehˬ˗ehˇ cah˗euˬ nyiˬ jeˬ aˬ yawꞈ jeˬ naˇ, Miˬyehˇ kʼaˇ kʼehˇ˗eu jeˬ mˇ˗euˬ heu meh. Miˬyehˇ aˬ yawꞈ˗ahˇ huiˬ dui dui˗eu gaˇ pyeuꞈ˗eu bawˇlawˇpeh˗euˬ gaˇ bi mˇ˗euˬ meh. Aˬ yawꞈ haiˬ˗eu tsawˇ haˬ deuˬ˗ahˇ Miˬyehˇ neh ehˇ˗euˬ dawˬ ya dzawˇ gaˬ˗iˇ ngeh ngehˬ˗ehˇ dzehˬ nui kʼaˬ loˬ˗eu meh. Aˬ yawꞈ heu loꞈ˗ehˇ ya ehˇ nehˬ˗iˇ˗euˬ meh. “Miˬyehˇ˗aˬ, muiˬ˗eu shawˇ˗eu mˬ taˆ gʼaˬ kʼehˇ aˇ muiˇ aˇ seh nehˬ˗ehˇ oe tehꞈ˗a. Tsawˇ haˬ dawˬ tawˆ luꞈ˗ahˇ yaˇ kʼaˬ daˇ˗eu lehˇ oe˗awˇ, aˬ yawꞈ maꞈ Miˬyehˇ˗ahˇ yaw zeu maˬ baw ni mˇ taˬ shaˇ taˬ˗euˬ miˇ neh maˬ ehˇ, Miˬyehˇ˗ahˇ yaw zeu maˬ baw˗eu iˬ baˇ zaˬ deuˬ neh aˬ yawꞈ˗ahˇ ngehˬ doeˇ ehˇ doeˇ˗euˬ miˇ neh maˬ ehˇ, aˬ yawꞈ maꞈ˗ahˇ kʼehˬ nehˬ kʼaˆ nehˬ tehꞈ˗a.”

Iˇnawˆ Yeˬhawˇbaˬ maˇ diˇ yaˇ kʼaˬ daˇ dzeuˇ˗euˬ loꞈ˗ehˇ boꞈ taˬ˗euˬ meh. Teu gaˇ haw ngeh aˬ yawꞈ Yeˬhawˇbaˬ neh ehˇ˗euˬ dawˬ maˇ diˇ byah laˇ meh lehˇ jah ziꞈ˗eu lehˇ siˬ laˇ˗eu meh. Iˇnawˆ ya ehˇ˗iˇ˗eu dawˬ naˇ, kʼaˆ dui dui˗eu yaˇ kʼaˬ daˇ˗eu dawˬ pyeuꞈ meh. Aˬ yawꞈ “Miˬyehˇ˗ahˇ yaw zeu maˬ baw˗eu” lehˇ ehˇ˗eu dawˬ˗ahˇ nyiˬ poˆ ngehˬ keuˆ taˬ˗euˬ meh. Dawˬ teu˗ahˇ ya gaˬ˗eu deuˬ aˇ naˆ ni nui ma pehˇ leˇ paˬ nga. Ehˇ kʼawꞈ Yeˬhawˇbaˬ bi gaˬ mawꞈ˗eu dawˬ teu˗ahˇ aˬ yawꞈ kʼaˬ duˬ ni ehˇ˗iˇ˗euˬ meh.

Teu baˬ da neh aˬ jeˬ pyeuꞈ laˇ˗euˬ nga? Jaˇliꞈ yaw duˬ duˬ lehˇ maˬ ehˇ taˬ kʼawꞈ, Iˇnawˆ˗euˬ ziˇ˗ahˇ keuˆ ni deuˬ laˇ˗euˬ lehˇ siˬ laˇ˗eu meh. Aˬ joˆ˗ehˇ siˬ laˇ nga? Jaˇliꞈ laꞈ kʼoeˇ “aˬ yawꞈ˗ahˇ tiˬ jawˇ˗iˬ maˬ paˇ ya mawˇ ni byoˆ tsehˆ˗euˬ meh” lehˇ ehˇ taˬ˗euˬ meh. Haiˬ˗eu tsawˇ haˬ deuˬ Iˇnawˆ˗ahˇ bye dui dui˗awˇ yaw doeˇ jahˇ mawꞈ gaˇ duˇ˗eu meh. Ehˇ kʼawꞈ Yeˬhawˇbaˬ aˬ yawꞈ˗euˬ cawˬ pyeuꞈ˗eu Iˇnawˆ˗ahˇ gaˬ dui dui˗eu miˇ neh haiˬ˗eu tsawˇ haˬ deuˬ neh maˬ bi laˆ deuˬ maˬ bi laˆ naˇ˗euˬ uˬ taꞈ, aˬ yawꞈ maꞈ˗euˬ aˬ laꞈ laꞈ kʼoeˇ maˬ bi shiˇ˗aˬ. Iˇnawˆ˗ahˇ tiˬ jeˬ˗iˬ maˬ bi naˇ ni bi shiˇ˗euˬ meh. Teu miˇ neh aˬ yawꞈ˗ahˇ tiˬ gʼaˬ˗iˬ yaw doeˇ maˬ paˇ jahˇ nya mehˬ. Yeˬhawˇbaˬ Iˇnawˆ˗ahˇ maˬ ngehˇ˗aˬ. Tiˬ nah˗aˬ bi gʼoꞈ dehꞈ laˇ˗eu yaw duˬ baw meh.

Yeˬhawˇbaˬ aˬ yawꞈ˗ahˇ muiˬ dui dui˗eu laꞈ sawˬ biꞈ˗euˬ meh. Jaˇliꞈ˗ahˇ heu loꞈ˗ehˇ ehˇ˗eu meh. Iˇnawˆ maˬ shiˇ mi naˆ˗ehˇ “aˬ yawꞈ Miˬyehˇ nui kʼahˇ shiˇ ni dehꞈ˗euˬ meh lehˇ saˇ kiˇ jaˆ˗eu meh.” Yeˬhawˇbaˬ aˬ yawꞈ˗ahˇ tiˬ nah miˇ tsaˬ Baˬlaˬdiˇsuˆ˗ahˇ yaw saˇ saˇ lehˇ ya dehꞈ meh lehˇ yuꞈ maˆ bi maˆ mawˇ˗euˬ kʼawꞈ pyeuꞈ nya meh. Iˇnawˆ saꞈ tsehˆ leˇ˗eu lehˇ gʼeh ngeh Yeˬhawˇbaˬ aˬ yawꞈ˗ahˇ maˇ diˇ gaˬ ngaˇ, nui jah ziꞈ dah ni gʼeh˗awˇ kʼaˬ duˬ ni gʼeh˗euˬ jeˬ˗ahˇ guiˬ lahˬ biꞈ˗euˬ ngaˇ lehˇ ya siˬ duˬ˗euˬ meh.

Jaˇliꞈ aˇ deuˆ heu deuˬ˗ahˇ gui:

• Aˇdahˬbeh˗eu 5:21-24

• Heˬbyehˇ 11:5

• Yuˇdaˆ 14, 15

Ja sawˇ˗eu gʼaˇ duˬ:

Iˇnawˆ kʼaˬ duˬ ni gʼeh˗eu lehˇ aˬ joˇ joˆ˗ehˇ mˇ mawˇ˗euˬ nga?

Naꞈ suiˇ ni poˆ tseˇ

1. 1. Tsawˇ haˬ deuˬ aˬ geu jeˬ lehˇ “Miˬyehˇ˗euˬ muiˬ˗eu shawˇ˗eu tsawˇ myahˇ˗ahˇ kuˇ” dahˬ beh˗euˬ nga? (Aˇdahˬbeh˗eu 4:26; w01-SI 9/15 29 ¶3)

   Dawˬ kʼoꞈ

2. 2. Iˇnawˆ aˬ jeˬ˗euˬ gaˇ˗ahˇ ya mˇ beh beh˗euˬ gʼaˬ pyeuꞈ nga? Aˬ yawꞈ gaˇ teu˗ahˇ aˬ joˆ˗ehˇ mˇ byah nya˗euˬ nga? (w01-SI 9/15 31 ¶5)

   Dawˬ kʼoꞈ

3. 3. Iˇnawˆ bawˇlawˇpeh˗euˬ gaˇ maˬ ya mˇ mi naˆ˗ehˇ aˬ yawꞈ kʼaˬ duˬ ni ya gʼeh meh lehˇ aˬ jeˬ miˇ neh siˬ nya˗eu kʼawꞈ pyeuꞈ nya nga? (w06-SI 10/1 19 ¶13-14) (Aˇ baˇ 1)

   Dawˬ kʼoꞈ

   

4. 4. Tiˬ deuˬ na jah˗eu loꞈ˗ehˇ Iˇnawˆ mˬ kʼoeˇ taˆ bi kuˇ daˆ leꞈ˗euˬ maˬ ngeuˇ˗eu lehˇ aˬ joˆ˗ehˇ ja sawˇ nehˬ nya nga? (Yoˇhaˬ 3:13; Heˬbyehˇ 11:5, 13)

   Dawˬ kʼoꞈ

Aˬ joˆ˗ehˇ zmˬ˗iˇ nya nga lehˇ shaˇ noeˬ

• Tsaꞈ gaˬ˗iˇ˗eu gʼaˇ duˬ aˬ geu ngeh nui kʼaˬ ya ahˇ dui dui nga? Iˇnawˆ loꞈ˗ehˇ duˇ ni aˬ dui˗ahˇ caw ba nehˬ nya˗eu jeˬ naˇ aˬ jeˬ nga? (Aˇ baˇ 2)

  Dawˬ kʼoꞈ

  

• Aˬ dui Yeˬhawˇbaˬ nehˬ˗ehˇ kʼaˬ duˬ ni cah ngeh aˬ yawꞈ˗ahˇ aˬ joˆ˗ehˇ gʼeh leˇ nga? (Dawˬdaˬ 27:11; Heˬbyehˇ 11:5)

  Dawˬ kʼoꞈ

• Iˇnawˆ˗euˬ kʼaˬ duˬ ni gʼeh˗eu jeˬ˗ahˇ aˬ joˆ˗ehˇ dzaw geuꞈ nya nga?

  Dawˬ kʼoꞈ

Naꞈ suiˇ ni shaˇ noeˬ

• Gaˇ kawˆ heu Yeˬhawˇbaˬ nehˬ˗ehˇ taꞈ leˇ˗awˇ ngaˬ˗ahˇ aˬ jeˬ bi siˬ laꞈ nga?

  Dawˬ kʼoꞈ

• Gaˇ kawˆ heu miˇ shuiꞈ˗ahˇ Yeˬhawˇbaˬ neh saˇ jaˇ dzaˬ taˬ˗euˬ jeˬ nehˬ˗ehˇ aˬ joˆ˗ehˇ taꞈ nga?

  Dawˬ kʼoꞈ

• Iˇnawˆ gʼoꞈ dehꞈ laˇ ngeh ngaˇ aˬ jeˬ naˇ haˬ paˬ nga?

  Dawˬ kʼoꞈ

Haw lahˬ

Iˇnawˆ˗euˬ gaˇ kawˆ heu naˇ yaw haiˬ yaw doeˇ jeˬ˗ahˇ kamˬ daˬ coeˇ ni aˬ joˆ˗ehˇ caw ba nehˬ nga?

Nui jah maˬ ahˇ˗eu deuˬ˗ahˇ maˬ ngeuˇ˗eu, nui jah ahˇ˗eu deuˬ˗ahˇ dzaw geuꞈ—Laˬmehˇ˗ahˇ maˬ ngeuˇ˗eu, Iˇnawˆ˗ahˇ dzaw geuꞈ (2:53)

Iˇnawˆ˗ahˇ nui jah ziꞈ dzehˬ laˇ ni caw ba nehˬ˗euˬ aˬ jeˬ nga lehˇ haw.

“Shaˬ zahˬ ciˬ tehˬ taˬ˗euˬ aˇ yamˬ˗ahˇ Miˬyehˇ nehˬ˗ehˇ cah” (w05-SI 9/1 13-17)