Miˬyehˇ hawˇ˗eu aˬ cawˬ˗ahˇ gaˬ˗eu—Aˇ gʼehˇ ka dehꞈ

Ka li zaˬ deuˬ Moˇseˬ˗euˬ zahˇ dawˬ kʼoꞈ dawˬ uˬ moˆ maˬ paˇ jawˇ˗euˬ kʼawꞈ, Yeˬhawˇbaˬ aˬ dui˗ahˇ aˬ yawꞈ hawˇ˗eu aˬ cawˬ˗ahˇ gaˬ lehˇ ehˇ˗eu, aˬ cawˬ naˆ maˬ tseˇ huiˬ dzehˬ˗eu zahˇ dawˬ kʼoꞈ dawˬ heu 2 kawˆ˗ahˇ bi mˇ caw mawꞈ meh. (Tehˬ 22:37-39) Nui gaˬ heu naˇ, aˬ yawˇ yawꞈ dehꞈ laˇ nya˗euˬ maˬ ngeuˇ˗a, aˬ dui ya ka dehꞈ˗eu meh. Aˬ joˆ˗ehˇ ka dehꞈ nya˗eu nga? Aˇ yeˇ huiˬ˗eu tiˬ jeˬ naˇ, Jaˇliꞈ yawˬ nah na luꞈ guiˬ˗eu heu meh. Aˬ dui Jaˇliꞈ laꞈ kʼoeˇ Miˬyehˇ˗euˬ sehˆ dzeuꞈ aˇ gʼehˇ˗ahˇ pyehˆ tseˇ ngeh, Yeˬhawˇbaˬ˗euˬ “yaw muiˬ yaw jaˬ˗ahˇ” ya mawˇ˗eu meh. (Ceuˬ 27:4) Teu naˇ aˬ dui aˬ yawꞈ˗ahˇ gaˬ dzehˬ laˇ˗awˇ, aˬ yawꞈ loꞈ˗ehˇ duˇ˗eu nui noeˬ myaˬ daˆ laˇ ni caw ba nehˬ˗eu meh. Kʼoeˇ naˇ, Miˬyehˇ˗euˬ zahˇ dawˬ˗ahˇ naˇ haˬ˗awˇ yawˬ ha˗euˬ gʼaˇ duˬ tehꞈ˗ehˇ maˬ shaˇ noeˬ ni, aˬ cawˬ˗ahˇ gʼawˬ shaˬ gaˬ˗eu jeˬ mˇ mawˇ lehˇ ehˇ˗eu dawˬ˗ahˇ mˇ caw mawꞈ ni laˆ noeˬ nehˬ˗eu meh. (Yoˇ 13:34, 35; 1Yoˇ 5:3) Jaˇliꞈ gui mawꞈ˗eu nui ma ahˇ laˇ ni caw ba nehˬ˗eu 3 jeˬ˗ahˇ haw ma:

• Aˇ baˇ mawˇ laˇ ni shaˇ noeˬ caw. Nawˇ Jaˇliꞈ gui ngeh, nawˇ˗ahˇ aˬ jeˬ mawˇ laˇ, aˬ jeˬ gaˬ laˇ˗awˇ, aˬ jeˬ˗euˬ yaw saꞈ siˬ laˇ nya? lehˇ shaˇ noeˬ haw. Kʼoeˇ naˇ, teu gaˇ jawˇ luꞈ˗eu deuˬ aˬ joˆ˗ehˇ noeˬ nga? lehˇ jiˇ shaˇ noeˬ haw.

  

• Gʼawˬ myaˬ jeˬ˗ehˇ gui. Yaw jeˬ ma jeˬ, teˇ saˇ gui doˆ˗eu, maˬ ngeuˇ naˇ teˇ saˇ gui ahˇ taˬ gaˇ haw caw˗eu. Aˬ yawꞈ deuˆ yawꞈ lehˇ gui gui˗ehˇ maˬ iˇ ni, Jaˇliꞈ laꞈ kʼoeˇ ahˇ˗eu tsawˇ haˬ tiˬ gʼaˬ˗euˬ gaˇ kawˆ maˬ ehˇ, tiˬ jeˬ˗euˬ gaˇ kawˆ maˬ ehˇ gui˗eu. Yaw jeˬ ma jeˬ, Miˇ shuiꞈ dawˬ paˇ Jaˇliꞈ laꞈ kʼoeˇ ahˇ˗eu, dzaw lahˬ A7 hawˇ˗eu B12-ahˇ zmˬ˗awˇ Yeˬsuˇ˗euˬ gaˇ kawˆ gui nya meh. Kʼoeˇ naˇ, aˬ yawꞈ nah yawꞈ yuˇ leꞈ˗euˬ Jaˇliꞈ aˇ deuˆ˗euˬ gaˬ naˇ yaw huiˬ tiˬ hmˬ hmˬ lah ni gui nya˗awˇ Jaˇliꞈ boꞈ˗euˬ aˇ yamˬ aˬ yawꞈ yamˬ yawˬ˗ahˇ jiˇ gui nya meh.

  

• Gʼoˆ shaw nya˗eu gʼaˇ duˬ gui. Gʼoˆ shaw˗eu laꞈ kʼoeˇ yawˬ nah na luꞈ Jaˇliꞈ gaˬ naˇ yaw huiˬ tiˬ hmˬ tehꞈ˗ehˇ gui˗awˇ shaˇ noeˬ shaˇ sawˇ˗eu heu naˇ, gʼawˬ mya ni gui˗awˇ maˬ gʼoˆ shaw nya˗eu naˆ maˬ tseˇ muiˬ dzehˬ˗eu meh. Teu miˇ neh, Jaˇliꞈ gui ngeh, gaˇ kawˆ deuˬ˗ahˇ shaˇ noeˬ˗eu laꞈ kʼoeˇ duꞈ yawˇ ni pyehˆ tseˇ˗awˇ, miˇ kʼahˬ aˇ baˇ hawˇ˗eu ngehˬ keuˆ taˬ˗euˬ jeˬ˗ahˇ zmˬ. Nawˬ˗ahˇ maˬ gʼoˆ shaw laˇ˗eu tsahˇ˗ahˇ poˆ tseˇ˗awˇ, gʼeh nya naˇ nawˬ neh gui˗euˬ myah ni aˇ yamˬ yuˇ˗awˇ shaˇ noeˬ shaˇ sawˇ.